2033

Tibetan	ཟབ་གསང་རྫོགས་པ་ཆེན་པོའི་བརྒྱུད་པ་གསུམ།
Tibetan Alternate
Tibetan Definition	1.རིང་བརྒྱུད་བཀའ་མ་ནི། (1)པཎ་ཆེན་བི་མ་ལ་མི་ཏྲས་རྨ་རིན་ཆེན་མཆོག་དང་གཉགས་ཛྙ་ན་ཀུ་མ་ར་གཉིས་ལ《སྒྱུ་འཕྲུལ་གསང་བ་སྙིང་པོའི》སྐོར་བཤད་ཅིང་བསྒྱུར་བས་སློབ་མ་དེ་གཉིས་ལས་ཡང་སློབ་མང་པོ་བྱུང་ནས་གཙང་སྟོད་མང་མགར་དང་། ལ་སྟོད་ལྷོ་བྱང་། འབྲི་ཆུའི་བརྒྱུད་སྤོམ་འབོར་སྒང་གི་ས་ཆ་རྣམས་སུ་དར། (2)ཡང་སློབ་དཔོན་དྷ་ན་རཀྵི་ཏས་བལ་པོ་དྷརྨ་བྷོ་དྷི་ལ་རྩ་རྒྱུད་དང་། བཤད་རྒྱུད་སོགས་བཤད། བྲུ་ཤའི་ཡུལ་དུ་ཁྲོམ་རུ་ཆེ་བཙན་སྐྱེས་ལ་བཤད་ཅིང་བསྒྱུར། དེ་ནས་རིམ་པས་འཕེལ་བ་ཡིན། (3)གཉགས་ཛྙ་ན་ཀུ་མ་རས་བཻ་རོ་ཙ་ན་དང་གཡུ་སྒྲ་སྙིང་པོ་ལ《 རྫོགས་པ་ཆེན་པོ》སེམས་ཕྱོགས་སུ་གྲགས་པ་ཞུས། དེ་ནས་རིམ་པར་འཕེལ་བས《སེམས་ཕྱོགས》ཀྱི་སྐོར་བྱུང་། ཡང་བཻ་རོ་ཙ་ནས་དཔང་མི་ཕམ་མགོན་པོ་ལ《དཔལ་ནམ་མཁའ་དང་མཉམ་པའི་རྒྱུད》ལ་སོགས་པ་རྡོ་རྗེ་ཟབ་པའི་མན་ངག་རྣམས་བཤད་པ་ལས《 ཀློང་སྡེའི》སྐོར་བྱུང་། སློབ་དཔོན་བི་མ་ལ་མི་ཏྲ་(སྔ་མས་)མངའ་བདག་རྒྱལ་པོ་དང་མྱང་ཏིང་འཛིན་བཟང་པོ་གཉིས་ལ《རྫོགས་པ་ཆེན་པོ་སྙིང་ཏིག》གི་སྐོར་བཤད་པ་ལས་རིམ་གྱིས《ཀློང་ཆེན་སྙིང་ཏིག》ཏུ་གྲགས་པ་བྱུང་ཡང་སློབ་དཔོན་དགའ་རབ་རྡོ་རྗེས་རིག་འཛིན་ཤྲཱི་སེང་ཧ་ལ《མཁའ་འགྲོ་སྙིང་ཏིག》གི་སྐོར་བཤད་པ་ལས་ཀྱང་སྙིང་ཏིག་རིགས་མི་འདྲ་བ་ཞིག་བྱུང་བར་བཤད། 2.ཉེ་བརྒྱུད་གཏེར་མ་ནི། སློབ་དཔོན་པདྨ་འབྱུང་གནས་ལ་སོགས་པའི་ཚད་ལྡན་གྱི་སྐྱེས་བུ་འགའ་ཞིག་གིས་མ་འོངས་པའི་གདུལ་བྱའི་དོན་དུ་མཆོག་དང་ཐུན་མོང་གི་དངོས་གྲུབ་འགྲུབ་པའི་མན་ངག་མང་པོ་རི་དང་བྲག་སོགས་ལ་གཏེར་དུ་སྦས། གཏེར་དེ་དུས་ནམ་ཞིག་འདོན་དགོས་པ་དང་། འདོན་རན་པའི་དུས་རྟགས། གཏེར་འདོན་པ་པོ་གཏེར་སྟོན་དེའི་མིང་རུས། སྐྱེ་ཡུལ། ལོ་རྟགས། ལུས་ཀྱི་རྟགས་མཚན་སོགས་གསལ་བར་འཁོད་པའི་གཏེར་གྱི་ཁ་བྱང་བཏབ། རྗེས་སུ་གནས་དུས་གང་ཟག་ཐམས་ཅད་འཛོམས་པ་ན་གཏེར་དེ་ཐོན་ནས་སློབ་མ་མང་པོར་སྤེལ་བ་ལ་གཏེར་ཆོས་ཞེས་གྲགས། སྤྱིར་གཏེར་མ་མང་ཆེ་བ་རྙིང་མའི་ཆོས་ལ་ཡོད་ཅིང་། གྲུབ་མཐའ་གཞན་ལ་ཡང་ཡོད་པ་འདྲ་བས་གཏེར་ཆོས་ཚང་མ་རྙིང་མའི་ཆོས་མིན་ནོ། ། 3.ཟབ་མོ་དག་སྣང་གི་བརྒྱུད་པ་ནི། བླ་མ་འགའ་ཞིག་ལ་ཡི་དམ་གྱི་ལྷས་ཞལ་གཟིགས་ནས་དངོས་སུ་གསུངས་པའི་མན་ངག་གི་སྐོར་ལ་ཟེར་ཏེ། འདི་ཡང་ས་དགེ་སོགས་གྲུབ་མཐའ་ཐམས་ཅད་ལ་ཡོད།
Tibetan Source	《དུང་དཀར་ཚིག་མཛོད་ཆེན་མོ་》ཤུ་1808.12ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number