359

Tibetan	བདག་མེད་པ་གཉིས་ཀྱི་མཚན་ཉིད་གཉིས།
Tibetan Alternate
Tibetan Definition	དེ་ཡང་། ལང་གཤེགས་མདོ་ལས་སངས་རྒྱས་ཐམས་ཅད་ཀྱི་གསུང་གི་སྙིང་པོའི་མདོ་ལས་བྱུང་བ་སྟེ། 1.གང་ཟག་ལ་བདག་མེད་པ་ནི། བདག་དང་བདག་གི་དང་བྲལ་བ། ཕུང་པོ་དང་། ཁམས་དང་། སྐྱེ་མཆེད་འདུས་པ་མི་ཤེས་པ་དང་། ལས་དང་སྲེད་པ་ལས་སྐྱེས་པ། མིང་དང་གཟུགས་ལ་སོགས་པར་འཛིན་པ་ལ་མངོན་པར་ཞེན་པ་ལས་རྣམ་པར་ཤེས་པ་སྐྱེ་བ། འདི་ལྟར་དབང་པོ་ཐམས་ཅད་དང་། རང་གི་སེམས་སྣང་བའི་སྣོད་དང་། ལུས་དང་། གཞི་ནི་རང་གི་རྣམ་པར་རྟོག་པས་བརྟགས་པས་རབ་ཏུ་ཕྱེ་བ། འབབ་ཆུ་དང་། ས་བོན་དང་། མར་མེ་དང་། རླུང་དང་། སྤྲིན་དང་མཚུངས་པར་སྐད་ཅིག་མ་གཅིག་ནས་གཅིག་ཏུ་འཇིག་པར་འགྱུར་བ། སྤྲེའུ་ལྟར་རབ་ཏུ་གཡོབ། སྦྲང་མ་ལྟར་མི་གཙང་བའི་གནས་ལ་རབ་ཏུ་མོས་པ། རབ་ཏུ་འབར་བའི་མེ་ལྟར་ཆོག་མི་ཤེས་པ། ཐོག་མ་མེད་པའི་དུས་ནས་སྤོས་པའི་གནས་ངན་ལེན་གྱི་བག་ཆགས་རྒྱུར་གྱུར་པ། ཟོ་ཆུན་གྱི་འཁོར་ལོ་ལྟར་འཁོར་བར་འགྲོ་བའི་སྲིད་པའི་འཁོར་ལོར་གྱུར་པ། ལུས་རྣམ་པ་སྣ་ཚོགས་ཀྱི་གཟུགས་འཆང་བ། སྒྱུ་མ་དང་། རིག་སྔགས་དང་། འཁྲུལ་འཁོར་ལྟ་བུར་འཇུག་ཅིང་འབྱུང་སྟེ། གང་མཚན་ཉིད་འདི་ལ་མཁས་པའི་ཤེས་པ་དེ་ནི་གང་ཟག་ལ་ བདག་མེད་པར་ཤེས་པ་ཞེས་བྱའོ། ། 2.དེ་ལ་ཆོས་ལ་བདག་མེད་པར་ཤེས་པ་ནི། ཕུང་པོ་དང་། ཁམས་དང་། སྐྱེ་མཆེད་རྣམས་ཀྱི་ཀུན་བརྟགས་པའི་མཚན་ཉིད་ཀྱིས་རང་བཞིན་ཚོགས་པ་སྟེ། ཇི་ལྟར་ཕུང་པོ་དང་། ཁམས་དང་། སྐྱེ་མཆེད་རྣམས་བདག་དང་། བདག་གི་དང་བྲལ་ཞིང་། ཕུང་པོ་དང་། ཁམས་དང་། སྐྱེ་མཆེད་འདུས་པ། རྒྱུ་དང་། ལས་དང་། སྲིད་པའི་སྲིད་བུས་སྦྲེལ་བ། ཕན་ཚུན་ཀུན་ཏུ་གྱུར་པ་ལས་སྐྱེ་ཞིང་གཡོ་བ་མེད་པ། དེ་བཞིན་དུ་ཆོས་རྣམས་ཀྱང་དེ་བཞིན་ཏེ། རང་དང་སྤྱིའི་མཚན་ཉིད་དང་བྲལ་བ། ཡང་དག་པ་མ་ཡིན་པ། ཀུན་ཏུ་རྟོག་པའི་མཚན་ཉིད་དེ། ཀུན་ཏུ་རྟོག་པའི་སྟོབས་ཀྱང་བྱིས་པ་རྣམས་ཀྱིས་སྐྱེད་པར་བྱེད་ཀྱི། འཕགས་པ་རྣམས་ཀྱིས་ནི་མ་ཡིན་ཏེ། སེམས་དང་། ཡིད་དང་། ཡིད་ཀྱི་རྣམ་པར་ཤེས་པ་དང་། ཆོས་ལྔ་དང་། རང་བཞིན་དང་བྲལ་བའི་ཕྱིར་རོ། ། བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་ཐམས་ཅད་བདག་མེད་པར་རབ་ཏུ་དབྱེ་བ་ལ་ མཁས་པར་བྱའོ། ། ཆོས་བདག་མེད་པ་ལ་མཁས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ནི་རིང་པོར་མི་ཐོགས་པར་བྱང་ཆུབ་སེམས་དཔའི་ས་དང་པོ་འཐོབ་སྟེ། སྣང་བ་མེད་པར་སྒོམ་པའི་སའི་མཚན་ཉིད་རབ་ཏུ་དབྱེ་བ་ཁོང་དུ་ཆུད་པས་རབ་ཏུ་དགའ་ཞིང་། རིམ་གྱིས་གོང་ནས་གོང་དུ་ཁྱད་པར་དུ་གྱུར་པས་ས་དགུའི་མཚན་ཉིད་ཀྱི་རིག་པ་ལས་འདས་ཏེ། ཆོས་ཀྱི་སྤྲིན་རབ་ཏུ་འཐོབ་བོ། ། དེར་རིན་པོ་ཆེའི་པདྨའི་རྒྱལ་པོ་དང་། རིན་པོ་ཆེ་ཆེན་པོའི་གཞལ་མེད་ཁང་རིན་པོ་ཆེ་ཚད་མེད་པས་བརྒྱན་པས་རྣམ་པར་བཀོད་པ། སྒྱུ་མའི་རང་བཞིན་གྱི་སྤྱོད་ཡུལ་ཡོངས་སུ་བསྒོམས་པ་ལས་བྱུང་བ་དེ་ལ་འཇུག་སྟེ། འཁོར་རྒྱལ་བའི་སྲས་སྐལ་བ་མཐུན་པ་རྣམས་ཀྱིས་ཡོངས་སུ་བསྐོར་ཅིང་། སངས་རྒྱས་ཀྱི་ཞིང་ཐམས་ཅད་ནས་བྱོན་པའི་སངས་རྒྱས་ཀྱི་ཕྱག་གིས་སྤྱི་བོ་ནས་དབང་བསྐུར་བས་འཁོར་ལོས་བསྒྱུར་བའི་རྒྱལ་པོའི་བུ་བཞིན་དུ་མངོན་པར་དབང་བསྐུར་རོ། ། སངས་རྒྱས་སྲས་ཀྱི་ས་ལ་འདས་ནས་འཕགས་པ་སོ་སོ་རང་གི་རིག་པའི་ཆོས་ཀྱི་ཚུལ་ཁོང་དུ་ཆུད་པའི་ཕྱིར། དེ་བཞིན་གཤེགས་པའི་མངའ་བརྙེས་པའི་ཆོས་ཀྱི་སྐུ་འཐོབ་པར་འགྱུར་ཏེ། ཆོས་བདག་མེད་པར་མཐོང་བའི་ཕྱིར་རོ། ། འདི་ནི་ཆོས་བདག་མེད་པའི་མཚན་ཉིད་ཅེས་བྱ་སྟེ། དེ་ལ་བྱང་ཆུབ་སེམས་དཔའ་རྣམས་ཀྱིས་བསླབ་པར་བྱའོ། །
Tibetan Source	《མདོ་ཅ་པ་》ཤ་339བ་1ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number