5128

Tibetan	ཐོད་རྒལ་གོམས་པའི་ཚད་ལྔ།
Tibetan Alternate
Tibetan Definition	དེ་ཡང་། ཚིག་དོན་མཛོད་ལས་བྱུང་བ་སྟེ། 1.འོད་ནི། ཡེ་ཤེས་ལྔའི་རང་འོད་ལ་གོམས་པའི་རྟགས་ཚད་ནི། སྐུ་གདུང་འབར་བ་ལས། གང་གི་འོད་ལ་སུ་གོམས་པ། ། རང་གིས་མཐོང་བའི་སྤྱོད་ཡུལ་དུ། ། ས་དང་ཆུ་དང་མེ་རླུང་དང་། ། འབྱུང་བཞིའི་སྣང་བ་རང་ནུབ་ནས། ། རིམ་གྱིས་ཁ་དོག་ལྔ་ལ་སྤྱོད། ། འདི་དང་འབྲལ་བ་མེད་པའི་རྟགས། ། གཞན་གྱིས་མཐོང་བའི་སྤྱོད་ཡུལ་དུ། ། སྨྱོན་པ་བཞིན་ཏེ་ཐོགས་མེད་པར། ། གང་ལ་ཆགས་པ་མེད་པ་དང་། ། རི་བྲག་རྣམས་ལ་ཟང་ཐལ་དང་། ། དེ་བཞིན་ས་གཏིང་འཛུལ་བར་སྣང་། ཆུ་རྣམས་ལ་ཡང་ཟང་ཐོལ་ལོ། ། ལུས་ལ་གོས་ཀྱང་མེད་པར་ནི། ། གཅེར་བུ་གང་ལ་ཐོགས་མེད་ཅིང་། ། ཟས་སོགས་འདོད་པ་རང་བྲལ་བས། ། འདིས་ནི་སྣང་བ་འདི་ཉིད་ལ། ། འབྱུང་བ་རང་སར་དེངས་ནས་ནི། ། ཟག་བཅས་ཕུང་པོ་མི་སྣང་བར། ། འབྲས་བུ་ཐོབ་པར་ཐེ་ཚོམ་མེད། ། ཅེས་སོ། ། 2.དབྱིངས་ནི། དབྱིངས་སྣང་འོད་ཡིན་ཀྱང་དབྱིངས་དངོས་མུ་ཁྱུད་ཀྱི་ར་བ་ཡིན་པས་དེ་ལ་གོམས་པའི་ཚད་ནི། རྒྱུད་དེ་ཉིད་ལས། གང་གི་དབྱིངས་ལ་གོམས་པ་ནི། ། དབུགས་ནི་ཕྱི་ནང་རྒྱུ་བ་ཆད། ། ནམ་མཁར་བྱ་བཞིན་འགྲོ་བ་དང་། ། དེ་བཞིན་ཆུ་ལ་ཉ་བཞིན་དུ། ། སྐལ་དང་ལྡན་པ་འདི་འགྲོ་སྟེ། ། སྔར་མ་མཐོང་བའི་ཡུལ་རྣམས་དང་། ། གླིང་དང་རི་རབ་བཅས་པ་ཡང་། ། འདུག་ས་གཅིག་ནས་མཐོང་བ་དང་། ། དེ་བཞིན་སངས་རྒྱས་ཞིང་ཁམས་ནི། ། སྔ་ན་མཐོང་བ་མེད་པ་རྣམས། ། འདི་ཀུན་དུས་གཅིག་མཐོང་བར་འགྱུར། ། འདི་ལྟར་རྟགས་དང་གང་ལྡན་པ། ། འདི་ནས་ཟླ་བ་བཅུ་དྲུག་ན། ། ཆོས་ཀྱི་དབྱིངས་ཀྱང་མཐོང་བར་འགྱུར། ། ཞེས་སོ། ། 3.ཐིག་ལེ་ནི། ཐིག་ལེའི་ཚད་ནི ། རྒྱུད་དེ་ཉིད་ལས། ཐིག་ལེ་ཀློང་དུ་སུས་གྱུར་པ། ། འདི་ནི་སྐལ་ལྡན་ཉག་གཅིག་མཐོང་། ། ཐིག་ལེ་སྟོང་པའི་སྒྲོན་མ་ནི། ། རྩོལ་བ་མེད་པར་རང་ཤར་ན། ། འདི་ཀུན་རང་གི་ཉམས་ཀྱི་རྟགས། ། ཚིག་གི་སྤྲོས་པ་རྣམས་ཆོད་དོ། ། གཞན་ལ་ཟློ་ནི་སྐད་ཅིག་ཀྱང་། ། འཇུག་པར་མི་འགྱུར་དེ་སྐབས་མེད། ། གཏམ་རྒྱུད་བརྗོད་པ་ཟད་པའི་ཕྱིར། ། གཞན་ལ་སྤུ་བྱེད་བསམ་པ་ཡང་། ། སྐྱེས་བུ་འདི་ལ་འབྱུང་མི་སྲིད། ། སྒྲ་ཚིག་རྗེས་སུ་ག་ལ་འགྱུར། ། འདི་ལྟར་སུ་ལ་སྣང་བ་དེ། ། སྤྲོས་མེད་ཉག་གཅིག་དེས་རྩད་ཆོད། ། འདི་ལྟར་རྟགས་དང་ལྡན་པ་དེ། ། དེ་ནས་ལོ་ནི་གཉིས་ན་ཡང་། ། རིག་པ་ཉིད་ཀྱི་ཚད་ཤེས་ནས། ། དབྱིངས་དང་རིག་པའི་རང་སྣང་དང་། ། འབྲལ་བ་མེད་པར་འཇུག་པའོ། ། དེ་ཡང་འབྱུང་བ་རང་དྭངས་སུ། ། འགྱུར་བར་འདི་ལ་ཐེ་ཚོམ་མེད། ། ཅེས་སོ། ། 4.སྐུ་ནི། སྐུའི་ཚད་ལ་ཆོས་སྐུ་ལོངས་སྐུ་སྤྲུལ་སྐུ་གསུམ་སྟེ། རྒྱུད་དེ་ཉིད་ལས། ཆོས་ཀྱི་སྐུ་ལ་སུས་གོམས་པ། ། གཞན་གྱིས་མཐོང་བའི་སྤྱོད་ཡུལ་དུ། ། ལུས་ནི་སུས་ཀྱང་མི་མཐོང་བར། ། རྣལ་འབྱོར་རང་ནི་གང་གར་རོལ། ། མ་བཙལ་བཞག་པའི་བསམ་གཏན་ནི། ། རང་གི་རྒྱུད་ལ་སྐྱེ་བ་དང་། ། ཤེས་པ་ཇི་མི་སྙམ་པའི་ཉམས། ། རྣལ་འབྱོར་ཀུན་གྱི་སེམས་ལ་སྣང་། ། འདི་ལྟར་འབྱུང་བའི་སྐྱེས་བུ་རྣམས། ། ཆོས་ཀྱི་སྐུ་ཡི་སྣང་བ་མཐོང་། ། འདི་མཐོང་སངས་རྒྱས་ཐམས་ཅད་ཀྱི། ། སྐུ་ཡི་ཀློང་དུ་འདུས་པའོ། ། གང་གིས་ལོངས་སྤྱོད་རྫོགས་པ་ལ། ། གོམས་ཤིང་གདེང་དུ་གྱུར་པའི་རྟགས། ། འདི་ལྟར་ཉམས་སུ་མྱོང་བའི་མི། ། སྐུ་ལྔ་ཡེ་ཤེས་ལྔ་ལ་རོལ། ། རོལ་པ་ཆེན་པོའི་ལྟ་སྟངས་ཀྱིས། ། འདི་ལྟར་རྟགས་དང་སུ་ལྡན་པ། ། རྣལ་འབྱོར་ལྡན་པའི་སྐལ་ལྡན་ཏེ། ། ཐིག་ལེ་སྟོང་པའི་སྒྲོན་མ་དང་། ། རྩོལ་བ་མེད་པར་ཤར་བ་ལ། ། སྣང་བ་ཉིད་ཀྱང་སྐུ་རུ་ཡང་། ། རིམ་གྱིས་མཐོང་བའི་སྐྱེས་བུ་ནི། ། ལོངས་སྐུའི་རྩ་བ་འདིར་མཐོང་ཡིན། ། འདི་ལྟར་རྒྱུད་ལ་གོམས་པ་ཡི། ། ངག་ནི་གསལ་ཞིང་སྐད་དང་ལྡན། ། བརྫུན་དུ་བརྗོད་པའི་ཚིག་རྣམས་ནི། ། འདི་ཡི་ཁ་ནས་ཚིག་མི་འབྱུང་། ། དེ་བཞིན་མི་དགེའི་ལས་ཀྱི་ཚིག ། གཏན་དུ་སྨྲ་བའི་བརྗོད་མཐའ་འགགས། ། དེ་ལྟར་རྟགས་དང་ལྡན་པ་དེས། ། འདི་དོན་ཉམས་སུ་བླངས་ན་ནི། ། ནམ་མཁའ་ལ་ནི་འཕུར་བ་དང་། ། རི་བྲག་ལ་ཡང་ཟང་ཐལ་དང་། ས་ཡི་འོག་ཏུ་འཛུལ་བ་དང་། ། ཆུ་ལ་བྱིང་བ་མེད་པ་འབྱུང་། ། དེ་ལྟར་ལྡན་པའི་སྐལ་ལྡན་གྱིས། ། དབྱིངས་རིག་གདེང་དུ་མ་ཚུད་ན། ། འབྱུང་བ་ཉིད་ནི་རང་དེངས་སུ། ། འགྱུར་བ་ཉིད་ནི་མ་ཡིན་ཏེ། ། འདི་ནས་སྐྱེ་བ་འཕོས་ནས་ནི། ། ཆོས་ཉིད་ཀྱི་ནི་བར་དོ་ལ། ། སྐད་ཅིག་ལྔ་ལ་གྲོལ་བར་འགྱུར། ། གང་དག་སྐྱེས་བུ་སྐུལ་དང་ལྡན། ། སྤྲུལ་པའི་སྐུ་ལ་གོམས་ནས་ནི། ། འདི་ཉིད་གདེང་དུ་གྱུར་པའི་མི། ། ལུས་ངག་སེམས་ཀྱི་རྟགས་འདི་དག ། སུ་ལ་བྱུང་བའི་སྐྱེས་བུ་ནི། ། འདི་ཡང་སྐལ་དང་ལྡན་པར་འགྱུར། ། སྔོན་དུ་ཐོས་པའི་ཆོས་རྣམས་ཀྱི། ། དོན་ནི་རང་གི་རྒྱུད་ལ་ཡང་། ། ཅིག་ཅར་དུ་ནི་འཆར་བར་ནི། ། འདི་ལས་འགྱུར་རོ་མཁའ་འགྲོ་མ། ། དེ་བཞིན་སྔོན་དུ་མ་ཐོས་པའི། ། ཆོས་ཀྱི་ཚིག་ནི་སྣ་ཚོགས་པ། ། རང་བཞིན་དུ་ནི་ཁ་ནས་སྨྲ། ། དེ་བཞིན་གསང་སྔགས་དག་གི་ནི། རྒྱུད་ཀྱི་ཚིག་རྣམས་ཇི་བཞིན་དུ། ། རིམ་པ་ཇི་ལྟར་གསལ་བར་འགྱུར། ། དེ་བཞིན་ཆོས་རྣམས་མཐའ་དག་ལ། ། ཚིག་དང་དོན་གྱི་རྣམ་པ་ཀུན། ། སེམས་ཅན་ཇི་ལྟར་མོས་པ་ཡི། ། ཆོས་རྣམས་དང་ནི་མཐུན་པར་ཡང་། ། ཇི་ལྟར་དྲིས་པའི་ལན་དེ་ཡང་། ། སྐལ་དང་ལྡན་པ་འདིས་འདོན་པས། ། འདི་ནི་སྨྲ་བའི་སེང་གེའོ། ། ལུས་ཀྱི་སྟོབས་སུ་སྔོན་བས་ཀྱང་། ། རྐང་པ་མགྱོགས་པའི་སྟོབས་ཀྱང་རྙེད། ། ལུས་ཀྱི་གཉེར་མ་མེད་པ་དང་། ། སྐྲ་དཀར་དག་ཀྱང་ནག་པོར་འགྱུར། ། དེ་བཞིན་བཅུ་དྲུག་ལོན་པ་བཞིན། ། གཞོན་པའི་མདངས་དང་ལྡན་པར་ཡང་། ། དཔེར་ན་རྩྭ་ནི་གཞོན་ནུ་ལ། ། ཆར་པ་དག་ནི་ཡང་བབ་པས། ། སྐྱེད་ནི་རང་སྐྱེད་ལྡན་པར་འགྱུར། ། སྔ་ན་མེད་པའི་སྙིང་རྗེ་ཡང་། ། འདི་ལ་གཏིང་ནས་སྐྱེ་བ་དང་། ། དེ་རྗེས་སེམས་ཅན་དོན་ལ་འཇུག ། རང་གི་ལུས་ཀྱིས་ཕན་པ་ཡི། ། སེམས་ཅན་དག་ནི་བྱུང་བ་ན། ། དེ་ལ་ཇི་ལྟར་འདོད་པ་ཡི། ། ལུས་དང་ཡན་ལག་གཏོང་བར་ནུས། ། ཕྱི་རོལ་བདོག་པ་སྨོས་ཅི་དགོས། དེ་བཞིན་རང་གི་བླ་མ་ལ། ། གོང་བཞིན་ལུས་སོགས་གཏོང་བར་ནུས། ། འདི་ལྟར་སུ་ལ་བྱུང་བའི་མི། ། སྤྲུལ་པའི་སྐུ་ལ་འདིས་རེག་གོ ། དེ་ལྟར་ལྡན་པའི་སྐྱེས་བུ་ནི། ། ཕྱིས་ནི་སྤྲུལ་སྐུའི་ཞིང་ཁམས་སུ། ། བརྫུས་ནས་སྐྱེས་ཀྱི་ལུས་བླངས་ནས། ། ལོ་ནི་དྲུག་ཁྲི་བརྒྱད་སྟོང་དུ། ། སེམས་ནི་གནས་ནས་སེམས་ཅན་དོན། ། སྐྱེས་བུ་འདི་ཡིས་བྱེད་པའོ། ། དེ་ནས་ངོ་བོ་རང་བཞིན་ལས། ། འཛམ་བུའི་གླིང་སོགས་གླིང་རྣམས་སུ། ། སྤྲུལ་པ་བྱེ་བ་དྲུག་ཁྲི་ཡིས། ། རང་རང་མཐུན་པའི་ལུས་བླངས་ནས། ། སེམས་ཅན་དོན་ཀུན་བྱེད་པར་ནི། ། འདི་ཡིས་འགྱུར་རོ་མཁའ་འགྲོ་མ། ། དེ་ནས་ངོ་བོ་ཀ་དག་ལ། ། ཉི་མ་ལ་ནི་ཟེར་འདུས་ལྟར། ། རང་གི་སྤྲུལ་པར་བཅས་པ་ནི། ། རང་གི་ངོ་བོར་རང་ཐིམ་ནས། ། དབྱེར་མེད་འབྱེད་པ་མེད་པ་འགྱུར། ། ཞེས་སོ། ། 5.རིག་པ་དང་། གོམས་པའི་ཚད་ནི། ལྔ་པ་རིག་པའི་ཚད་ལ་གཉིས་ཏེ། རང་མདངས་ལུ་གུ་རྒྱུད་ལ་ཕྱིར་གོམས་པའི་ཚད་དང་། རང་ངོ་ཀ་དག་སྐྱོན་མེད་ལ་ནིང་ངུ་གོམས་པའི་ཚད་དོ། ། དང་པོ་ནི། སྐུ་གདུང་འབར་བ་ལས། རིག་པ་ལ་ནི་སུས་གོམས་པ། ། དེ་ཡི་ལུས་ལ་རྒྱ་འདིའོ། ། གང་དུ་གཏད་པའི་དངོས་པོ་ལ། ། དེར་ནི་རང་ཤེས་འཛུད་པར་ནུས། ། གང་དུ་འདུག་པའི་ས་ཉིད་དུ། ། ལུས་ཀྱང་དེ་ཡི་རྗེས་སུ་སྟེ། ། ཇི་ལྟར་རིག་པ་ཉིད་དང་མཚུངས། ། གཞན་གྱི་མ་དད་བསྒྱུར་ནུས་དང་། ། བསམ་རྒྱུན་ཞེན་པ་རང་འགགས་དང་། ། ནང་གི་རྟགས་དང་རྣམ་པར་ལྡན། ། མངོན་སུམ་ཉིད་དུ་སུས་རིག་པ། ། འདི་ནི་འབྱུང་བ་རང་གི་སར། ། སྐལ་དང་ལྡན་པ་འདི་དེངས་ནས། ། སྐྱེ་མེད་མཆོག་ལ་སྙེགས་པའོ། ། ཞེས་སོ། ། གཉིས་པ་ནི། རྒྱུད་དེ་ཉིད་ལས། གང་གི་སྐྱེ་མེད་སུ་ཡིས་ནི། ། རྩད་ནས་ཆོད་པའི་མི་དེ་ལ། ། རྟགས་ནི་འདི་ལྟ་བུ་ཡང་འབྱུང་། ། འདི་རྟགས་སུ་ལ་ལྡན་པ་ནི། ། ང་དང་སྐལ་བ་མཉམ་པ་ཡིན། ། ལུས་ལ་འབུ་སྲིན་ཤིག་ལ་སོགས། ། འདི་ཀུན་སྐྱེ་བ་རྒྱུན་ཆད་དང་། ། གང་གི་སྐུ་དང་སེན་མོ་དང་། ། འདི་ཀུན་མི་སྐྱེ་རྒྱུན་ཟད་ན། ། འདི་ནི་སྐྱེ་བ་མེད་པ་སྟེ། ། འདི་ལྟར་རྟགས་དང་ལྡན་པ་ནི། ། ཟླ་བ་དག་ནི་གསུམ་ན་ཡང་། ། འདི་ནི་འབྱུང་བ་རང་དེངས་སུ། ། ཟག་བཅས་ཕུང་པོ་མི་སྣང་བར། ། རང་ལུས་འོད་ཀྱི་གདངས་དཀྱིལ་དུ། ། རིགས་དང་བཅས་ཏེ་འདི་འགྱུར་རོ། ། ཞེས་སོ། །
Tibetan Source	《 ཀློང་ཆེན་མཛོད་བདུན་ག་པ་》ཤ་137ན་4ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number