6933

Tibetan	རྫོགས་རིམ་སྐབས་ཀྱི་ཆོས་དྲུག
Tibetan Alternate
Tibetan Definition	དེ་ཡང་། ཡོན་ཏན་རིན་པོ་ཆེའི་མཛོད་འགྲེལ་ཉིན་བྱེད་སྣང་བ་ལས་བྱུང་བ་སྟེ། 1. ལམ་གྱི་རྩ་བ་གཏུམ་མོ་ལ་གསུམ་སྟེ། ། (1)ལས་ཀྱི་གཏུམ་མོ་ནི། ལུས་ཀྱི་བྱེད་པ་བཅིངས་ཏེ་ཆོས་བདུན་གཡོ་མེད་དུ་བྱེད་པ། ངག་གི་བྱེད་པ་བཅིངས་ཏེ་ཁ་སྦྱོར་དུ་འཆིང་བ། སེམས་ཀྱི་བྱེད་པ་བཅིངས་ཏེ་གཏུམ་མོ་འབར་འཛག་སྒོམ་པ་སོགས་སོ། ། (2)ཉམས་ཀྱི་གཏུམ་མོ་ནི། དེ་ལྟར་བསྒོམས་པས་རླུང་སེམས་དབུ་མར་འདུས་པའི་རྟགས་སུ་དུ་བ་སྨིག་རྒྱུ་མེ་ཁྱེར་ལ་སོགས་པ་སྣང་ཞིང་སེམས་བདེ་སྟོང་གི་ཉམས་སྐྱེ་བའོ། ། (3)མཆོག་གི་གཏུམ་མོ་ནི། རླུང་སེམས་འདུ་ཚུལ་ལས་སྣང་བ་གསུམ་གྱིས་དྲངས་པའི་འོད་གསལ་མངོན་དུ་གྱུར་ནས་རྣམ་པར་མི་རྟོག་པ་མཆོག་གི་གཏུམ་མོ་རྒྱུད་ལ་སྐྱེ་བའོ། ། 2. ལམ་གྱི་གཞི་མ་སྒྱུ་ལུས་ལའང་གསུམ་སྟེ། (1)མ་དག་པའི་སྒྱུ་ལུས་ནི། ཕྱི་ནང་གི་སྣང་བ་ཐམས་ཅད་སྒྱུ་མ་དང་རྨི་ལམ་ལྟར་སྒོམ་པའོ། ། (2)དག་པའི་སྒྱུ་ལུས་ནི། སྣང་བ་ཐམས་ཅད་ལྷ་སྐུ་སྒྱུ་མ་ལྟར་སྒོམ་པའོ། ། (3)སྦས་དོན་རླུང་སེམས་ཀྱི་སྒྱུ་ལུས་ནི། དེ་ལྟར་སྣང་བ་ལྷ་གོམས་པ་དང་། དེ་ཉིད་འོད་གསལ་དུ་འཇུག་པའི་བསྡུ་རིམ་གཉིས་ཀ་སྤེལ་ནས་གོམས་པས་བསྡུ་རིམ་ཚེ་ཐ་མལ་གི་ལུས་རགས་པའི་འཛིན་པ་དང་བྲལ་ནས། རླུང་སེམས་ཙམ་ལས་གྲུབ་པའི་སྒྱུམ་ལྟ་བུའི་ལྷ་སྐུར་ལངས་པ་དེ་ཉིད་རང་ངོ་ལ་རྟག་པར་སྣང་ཞིང་གཞན་སྣང་དུ་སྔར་གྱི་ལུས་རགས་པ་དེ་ཉིད་མི་སྣང་བ་སྟེ་དེའི་ཚེ་སྒྱུ་ལུས་གྲུབ་པ་ཞེས་བྱའོ། ། 3. ལམ་གྱི་དྲོད་ཚད་རྨི་ལམ་ནི། སྒྱུ་ལུས་ཀྱི་ཡན་ལག་སྟེ། དང་པོ་འདུན་སྟོབས་དང་རླུང་སྟོབས་གང་རུང་གིས་རྨི་ལམ་བཟུང་ནས་རྨི་ལམ་ལ་རྨི་ལམ་དུ་ངོ་ཤེས་པ་ལ་སྦྱངས། དེ་ནས་རྨི་ལམ་གྱི་སྣང་བ་སྤྲུལ་སྒྱུར་བྱེད་པ་དང་རྨི་ལམ་བཟུང་ནས་སངས་རྒྱས་ཀྱི་ཞིང་དང་སེམས་ཅན་གྱི་གནས་ལ་སོགས་པ་ཉུལ་བ་དང་། འཇིགས་སྐྲག་གི་གནས་མེ་དང་ཆུ་དང་གཡང་ས་སོགས་ལ་ཐོག་བརྫིས་བྱ་བ་དང་། མཐར་རྨི་ལམ་གྱི་སྣང་བ་ཐམས་ཅད་ལྷ་དང་གཞལ་ཡས་ཁང་གི་རང་བཞིན་དུ་བལྟས་ནས་སྒྱུ་མར་སྦྱོང་བ་དང་། མཐར་སྒྱུ་མའི་ལྷ་སྐུ་ཡང་བསྡུ་རིམ་གྱིས་བསྡུས་ནས་འོད་གསལ་དུ་འཇུག་པ་སྟེ་མཐར་རྨི་ལམ་དབྱིངས་སུ་ནུབ་པའི་ཐབས་ལ་སློབ་པའོ། ། 4. ལམ་གྱི་སྙིང་པོ་འོད་གསལ་ནི། སྔར་སྒྱུ་ལུས་ཀྱི་སྐབས་ཀྱི་སྒྱུ་མ་ལྟ་བུའི་ལྷ་སྐུ་དེ་ཡང་བསྡུ་རིམ་གྱིས་འོད་གསལ་དུ་བསྡུས་ནས་གཏུམ་མོ་རང་ལུས་དང་གཞན་ལུས་ཕྱག་རྒྱའི་ལམ་གང་རུང་ལ་བརྟེན་ནས་དགའ་བཞི་ལྷན་ཅིག་སྐྱེས་པའི་ཡེ་ཤེས་སོགས་ལ་གོམས་པ་ལས། སྟོང་པ་བཞིའམ་དགའ་བ་བཞིས་དྲང་བའི་འོད་གསལ་རྒྱུད་ལ་སྐྱེ་བའོ། ། དེ་ཡང་སྟོང་པ་བཞི་ནི། (1)དང་པོ་རྣམ་ཤེས་སྣང་བ་ལ་ཐིམ་པའི་སྐབས་སུ་ཞེ་སྡང་གི་སྟོང་པ་སོ་གསུམ་འགག ཕྱི་རྟགས་སུ་སྟོན་གནམ་ཟླ་འོད་ཀྱིས་བསླད་པ་ལྟར་དཀར་ལམ་ལམ་པའི་སྣང་བ་དང་ནང་རྟགས་ སུ་གསལ་བའི་ཉམས་མཐའ་དབུས་མེད་པར་འཆར་ཏེ་སྟོང་པ་ཞེས་བྱའོ། ། (2)དེ་ནས་སྣང་བ་མཆེད་པ་ལ་ཐིམ་པས་འདོད་ཆགས་ཀྱི་རྟོག་པ་བཞི་བཅུ་འགག ཕྱི་རྟགས་སུ་སྟོན་གནམ་ཉི་འོད་ཀྱིས་བསླད་པ་ལྟ་བུའི་དམར་ལམ་པ་དང་། ནང་རྟགས་སུ་བདེ་བ་མུ་མཐའ་མེད་པར་འཆར་ཏེ་སྟོང་པ་ཆེན་པོ་ཞེས་བྱའོ། ། (3)དེ་ནས་མཆེད་པ་ཉེར་ཐོབ་ལ་ཐིམ་པས་གཏི་མུག་གི་རྟོག་པ་བདུན་འགག ཕྱི་རྟགས་སུ་སྟོན་གནམ་སྨག་གིས་བསླད་པ་ལྟ་བུའི་ནག་ལམ་པ་དང་ནང་རྟགས་སུ་རྣམ་པར་མི་རྟོག་པའི་ཉམས་མཐའ་དབུས་མེད་པར་འཆར་ཏེ་ཤིན་ཏུ་སྟོང་པ་ཞེས་བྱའོ། ། (4)དེ་ནས་ཉེར་ཐོབ་འོད་གསལ་ལ་ཐིམ་པ་ཞེས་ཟེར་ཡང་། དོན་དུ་སྔར་ཉེར་ཐོབ་ཀྱི་སྐབས་ཀྱི་མི་རྟོག་པ་དེ་ཉིད་ཅུང་ཟད་སངས་ནས་རང་བཞིན་གཞིར་གནས་ཀྱི་འོད་གསལ་དོན་དམ་ལྷན་ཅིག་སྐྱེས་པའི་ཡེ་ཤེས་བཅོས་མིན་དུ་ཤར་བ་ནི་སྟོན་གྱི་དུས་སུ་ཐོ་རངས་ཀྱི་ནམ་མཁའ་བསླད་བྱེད་ཀྱི་སྐྱོན་གསུམ་དང་བྲལ་བ་སྟེ་ཐམས་ཅད་སྟོང་པའི་འོད་གསལ་ཞེས་བྱའོ། ། དེ་དག་གི་སྐབས་སུ་བཤད་པའི་ཞེ་སྡང་གི་རྟོག་པ་སོ་གསུམ་ནི། [1]འདོད་ཆགས་དང་བྲལ་བ། [2]འདོད་ཆགས་དང་བྲལ་བ་བར་མ། [3]ཤིན་ཏུ་འདོད་ཆགས་དང་བྲལ་བ། [4]གང་ཡིད་ཀྱི་འོང་དག [5]ཡིད་ཀྱི་འགྲོ། [6]སོང་བ། [7]མྱ་ངན། [8]མྱ་ངན་བར་མ། [9]ཤིན་ཏུ་མྱ་ངན། [10]ཞི་བ། [11]རྣམ་པར་རྟོག་པ། [12]འཇིགས་པ། [13]འཇིགས་པ་བར་མ། [14]ཤིན་ཏུ་འཇིགས་པ། [15]སྲེད་པ། [16]སྲེད་པ་བར་མ། [17]ཤིན་ཏུ་སྲེད་པ། [18]ཉེ་བར་ལེན་པ། [19]མི་དགེ་བ། [20]བཀྲེས་སྐོམ་པ། [21]ཚོར་བ། [22]ཚོར་བ་བར་མ། [23]ཤིན་ཏུ་ཚོར་བ། [24]རིག་པ། [25]རིག་པ་འཛིན་པའི་གཞི། [26]སོ་སོར་རྟོག་པ། [27]ངོ་ཚ་ཤེས་པ། [28]སྙིང་རྗེ་བ། [29]བརྩེ་བ། [30]བརྩེ་བ་བར་མ། [31]ཤིན་ཏུ་བརྩེ་བ། [32]དོགས་པ་དང་བཅས་པ། [33]སྡུད་པ། [34]སེར་སྣའོ། །(སྐབས་འདིར་རྟོག་པ་གཅིག་ལྷག) འདོད་ཆགས་ཀྱི་རྟོག་པ་བཞི་བཅུ་ནི། [1]འདོད་ཆགས་པ། [2]ཆགས་པ། [3]དགའ་བ། [4]དགའ་བ་བར་མ། [5]ཤིན་ཏུ་དགའ་བ། [6]རངས་པ། [7]རབ་ཏུ་མགུ་བ། [8]དོན་མཚར་བ། [9]དགོད་པ། [10]ཚིམ་པ། [11]འཁྱུད་པ། [12]འོ་བྱེད་པ། [13]འཇིབ་པ། [14]བརྟན་པ། [15]བརྩོན་པ། [16]ཁེངས་པ། [17]བྱེད་པ། [18]འཕྲོག་པ། [19]སྟོབས། [20]སྤྲོ་བ། [21]ཚོམ་ཚོམ་མེད་པ། [22]ཚོམ་ཚོམ་མེད་པ་བར་མ། [23]ཤིན་ཏུ་ཚོམ་ཚོམ་མེད་པ། [24]དྲེགས་པ། [25]རྣམ་པར་སྒེག་པ། [26]འགྲས་པ། [27]དགེ་བ། [28]ཚིག་གསལ་བ། [29]བདེན་པ། [30]མི་བདེན་པ། [31]ངེས་པ། [32]ཉེ་བར་ལེན་པ། [33]སྦྱིན་པ་པོ་ཉིད། [34]བརྟུལ་བ། [35]དཔའ་བ། [36]ངོ་ཚ་མེད་པ། [37]གཡོ་ཅན། [38]གདུག་པ་ཅན། [39]མི་སྲུན་པ། [40]གྱ་གྱུ་ཆེ་བའོ། ། གཏི་མུག་གི་རྟོག་པ་བདུན་ནི། [1]འདོད་ཆགས་བར་མ། [2]བརྗེད་ངས། [3]འཁྲུལ་པ། [4]མི་སྨྲ་བ། [5]སྐྱོ་བ། [6]ལེ་ལོ། [7]ཐེ་ཚོམ་དང་བདུན་ནོ། ། 5. ལམ་གྱི་སུན་མ་བར་དོ་ནི། (1)རབ་འབྱུང་འཁྲུགས་འཆི་ཁའི་བར་དོ་ལ་སྣང་གསུམ་གྱིས་དྲངས་པའི་གཞིའི་འོད་གསལ་འཆར་བའི་ཚེ་སྔར་འདྲིས་ཀྱི་གདིང་ལ་བརྟེན་ནས་ངོས་བཟུང་སྟེ་འོད་གསལ་ཆོས་སྐུའི་ངང་དུ་གྲོལ་བའོ། ། (2)འབྲིང་སྣང་མུན་སྲིད་པའི་བར་དོར་སྒྱུ་ལུས་ལ་བརྟེན་ནས་སྒྱུ་མ་ལྟ་བུའི་ལྷ་སྐུར་ལྡང་བ། (3)ཐ་མ་སྲེད་ལེན་སྐྱེ་གནས་ཀྱི་བར་དོར་མངལ་སྒོ་བཟང་པོ་འདམ་པ་དང་། མངལ་སྒོ་ངན་པ་འགེགས་པ། དག་པའི་ཞིང་ཁམས་སུ་འཕེན་པ་གཏོད་པ་སོགས་ ཀྱིས་གསང་སྔགས་ཀྱི་ཆོས་ལ་སྤྱོད་པའི་སྣོད་རུང་དུ་སྐྱེས་ནས་ལམ་གྱི་འཕྲོ་མཐུད་པའོ། ། 6. ལམ་གྱི་བློ་ཚོད་འཕོ་བ་ནི། གང་ཟག་རབ་ཚེ་འདིར་ལྟ་བ་རྟོགས་པ་དང་། གྲུབ་མཐའ་སྙོགས་པ་ཡིན་ན་འཕོ་བ་མི་དགོས་ཀྱང་། ཇི་སྐད་དུ། ལམ་སྦྱང་དམན་ན་འཕོ་བས་བསུ། ། ཞེས་གསུངས་པ་ལྟར་ལམ་གྱི་སྦྱང་བགྲོད་དམན་པ་དག་གིས་འཆི་ལྟས་བརྟགས་པས་འཆི་བར་ངེས་ཤིང་མི་བསླུ་བར་ཤེས་ནས། ཐིམ་རིམ་མ་བྱུང་གོང་དུ་སྔར་བཤད་པའི་འོད་ཀྱི་གོང་བུའི་འཕོ་བ་དང་། སྒྲ་ཡི་འཕོ་བ་སོགས་ཀྱིས་རྣམ་ཤེས་དག་པའི་ཞིང་དུ་འཕོ་བའོ། །
Tibetan Source	《དཔལ་སྤྲུལ་གསུང་འབུམ་ང་པ་》ཤ་63ན་2ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number