7194

Tibetan	ཁྲེགས་ཆོད་ལས་ཐོད་རྒལ་ཁྱད་པར་བདུན་གྱིས་འཕགས་པ།
Tibetan Alternate
Tibetan Definition	དེ་ཡང་། མདོ་རྒྱུད་རིན་པོ་ཆེའི་མཛོད་དེབ་གཟུགས་གླེགས་བམ་བཞི་པ་མདོ་རྒྱུད་རིན་པོ་ཆེའི་མཛོད་ཀྱི་རྒྱས་འགྲེལ་སྐབས་ཉེར་གཉིས་པ་ཐོད་རྒལ་སྒོམ་པའི་རིམ་པ་ལས་བྱུང་བ་སྟེ། 1. སྣང་བ་འོད་ཀྱི་ཁྱད་པར་ནི། ཁྲེགས་ཆོད་ཀྱིས་ཕྱི་འཕྲུལ་སྣང་གི་ས་རྡོ་རི་བྲག་ལ་སོགས་པ་དག་པར་བྱེད་མི་ནུས་ཤིང་། ཡུལ་དུ་བྱེད་པས་སྒྱུ་མ་དང་གཞི་མེད་ལ་སོགས་པའི་རྒྱས་འདེབས་ཡིད་དཔྱོད་ལ་ལྟོས་པས། སེམས་ཀྱི་རྣམ་ཤེས་ཚོགས་པའི་ཆོས་ལ་བརྟེན་ཞིང་མྱུར་དུ་མི་གྲོལ་བ་ཉིད་ཐོད་རྒལ་དུ་འོད་ལྔ་དབྱིངས་རིག་གི་ཡུལ་དུ་བྱེད་པས། འཁྲུལ་སྣང་གི་མིང་མེད་ཡིད་དཔྱོད་ཀྱི་རྒྱས་འདེབས་མི་དགོས་ཤིང་། སེམས་ཀྱི་ཆོས་མིག་གི་རྣམ་ཤེས་ལ་སོགས་པ་རང་འགགས་ལ་སྦྱོང་བས། འཁོར་བ་མིང་མེད་དུ་ལ་ཟློས་ཏེ། ཚེ་དེས་འོད་དུ་གྲོལ་བའི་ཁྱད་ཞུགས་པ་ནི། ཐལ་འགྱུར་ལས། འདི་ནི་རང་ཡུལ་ལ་བསྟན་པས། ། འཁོར་རྐྱེན་འཇུག་པ་མ་ཡིན་པར། ། ཟང་མ་ཉིད་དང་ཐལ་བྱུང་དུ། ། ཡུལ་དང་ཤེས་པའི་སྣང་ཆ་ལས། ། ཐད་ཀ་སོ་སོའི་གཞི་ལས་གྲོལ། ། ཞེས་སོ། ། འོ་ན་ཁྲེགས་ཆོད་འབྱོངས་ནའང་སྣང་བ་ཚད་དུ་མ་ཕྱིན་པར་ཕུང་པོ་གྲོལ་བར་བཤད་པས་ཁྱད་ཅི་ཡོད་ན། ཤིན་ཏུ་ཆེ་སྟེ། ཁྲེགས་ཆོད་ཀྱིས་འབྱོངས་ཀྱང་རྡུལ་ཕྲན་ཆ་མེད་ལས་འོད་དུ་འགྲོ་མི་སྲིད། འོད་དུ་མ་སོང་ན་རྡོ་རྗེའི་ལུས་མི་གྲུབ་སྟེ། རེས་འགའ་བའི་སྒྱུ་ལུས་ཀྱིས་མཐར་ཐུག་གིས་མི་ཆོད་པ་དང་། འོད་ལུས་མ་ཐོབ་ན་འཕོ་བ་ཆེན་མོའི་སྐུ་མི་མཐོང་བས་གཞན་དོན་རླབས་པོ་ཆེ་རྟེན་དེས་མི་འགྲུབ་པས་ན། འོད་དང་རྡུལ་ཕྲན་དུ་དེངས་པའི་ཆ་ལས། འཕོ་བ་ཆེན་མོས་དོན་བྱེད་མི་བྱེད་དང་སྤྱན་དང་མངོན་ཤེས་དང་། རྫུ་འཕྲུལ་གྲུབ་པ་ལ་རླབས་ཆེ་ཆུང་གི་ཁྱད་ཡོད་པའོ། ། 2. ཉམས་ལེན་ལ། ལེན་དང་འབྲེལ་བའི་ཁྱད་པར་ནི། རིག་སྟོང་འོད་གསལ་ལག་ལེན་ཉིད་སྟོན་ཁྱད། ། རིག་པ་ཡེ་ནས་འོད་གསལ་དུ་གསུངས་པ་དེ་ཁྲེགས་ཆོད་ཀྱིས་སྟོང་པར་འཇལ་བ་ལས་རང་འོད་མི་མཐོང་བ་དེ། ཐོད་རྒལ་གྱིས་གནད་གཅུན་པས་ཆོས་ཉིད་ངོ་བོའི་འོད་གསལ་ནང་དུ་ཟིན་དུས། ཆོས་ཅན་རང་གདངས་ཀྱི་འོད་གསལ་ཕྱིར་སྣང་བ་ལག་ལེན་ལ་བསྟན་དུ་ཡོད་པས་འཕགས་ཏེ། ། རང་ཤར་ལས། རང་སྣང་རིག་པའི་རྒྱལ་པོ་འདི། ། ཀུན་ལ་ཡོད་དེ་རྟོགས་པ་མེད། ། ཅེས་སོ། ། 3. རང་སྣང་མངོན་སུམ་གཟིགས་པའི་ཁྱད་པར་ནི། རིག་པ་བལྟར་མེད་ཆོས་ཉིད་མཐོང་གསལ་ཁྱད། ། རིག་པའི་ཡེ་ཤེས་ཁྲེགས་ཆོད་དུ་བལྟར་མེད་ཀྱི་རྒྱས་བཀབ་ནས་མཐོང་དུ་མེད་པ་ཅིག་ཏུ་ཐག་གཅོད་པ་སྟེ། ཐོད་རྒལ་དུ་ཡེ་ཤེས་ཀྱི་མཐོངས་ཕྱེ་བས་ཆོས་ཉིད་ཀྱི་ཉི་ཟེར་གསལ་བ་ནི། ཐལ་འགྱུར་ལས། ཆོས་ཉིད་མངོན་སུམ་སྣང་བ་ཡིས། ། ཡིད་དཔྱོད་འཛིན་པའི་ལྟ་བ་བསྣུབས། ། ཞེས་སོ། ། 4. ལུས་གནད་རྩའི་ཁྱད་པར་ནི། རགས་པའི་རྩ་རླུང་འོད་རྩ་སྒྲོན་མའི་ཁྱད། ། ཁྲེགས་ཆོད་དུ་རགས་པའི་རྩ་རླུང་ལ་བརྟེན་པ་ལས། ཐོད་རྒལ་དུ་འོད་རྩ་དར་བ་ངོས་བཟུང་ནས་སྒྲོན་མ་དངོས་ལམ་དུ་བྱེད་པ་སྟེ། དེ་ཉིད་ལས། གཞན་ཡང་རྩ་དང་འཁྲུལ་འཁོར་གྱིས། ། རང་བཞིན་སྣང་བའི་ཡེ་ཤེས་ལྔ། ། ཆུ་བུར་མིག་གིས་མཐོང་བའོ། ། ཞེས་སོ། ། 5. སྣང་བྱེད་སྒོའི་ཁྱད་པར་ནི། དབང་པོ་དྲུག་སྒོ་དག་པ་འོད་སྒོའི་ཁྱད། ། ཁྲེགས་ཆོད་དུ་དབང་པོ་དྲུག་གི་སྒོམ་དག་པ་སེམས་ཀྱི་ཆོས་ལ་དངས་འཚོལ་བ་ལས། ཐོད་རྒལ་དུ་དག་པ་འོད་གསལ་གྱི་སྒོ་ཡེ་ཤེས་ཀྱི་རླུང་གིས་བསྐུལ་བས་སྒྲོན་མ་བཞིའི་སྣང་བ་འཆར་བས་འཕགས་ཏེ། དེ་ཉིད་ལས། སྒོ་ནས་ཇི་ལྟར་འབྱུང་བ་ནི། ། འཇུག་པའི་རླུང་གིས་བསྐུལ་བ་ཡིས། ། སྒྲོན་མ་བཞི་ལས་བཞིར་བྱུང་། ། ཞེས་སོ། ། 6. མཐོང་བ་དབང་པོའི་ཁྱད་པར་ནི། ནང་དངས་དབང་པོ་ཟང་ཐལ་དབང་པོའི་ཁྱད། ། ཁྲེགས་ཆོད་ཀྱིས་བལྟར་མེད་རིག་པ་ནང་དངས་ཀྱི་དབང་པོ་ལ་དངས་འཚོལ་བ་ལས། ཐོད་རྒལ་དུ་ཕྱི་ནང་ཡེ་ཤེས་ཟང་ཐལ་གྱི་དབང་པོས་དབྱིངས་དང་། ཡེ་ཤེས་འདུ་འབྲལ་མེད་པའི་སྣང་བ་ལ་དངོས་སུ་དཔྱོད་པའི་ཁྱད་ཞུགས་ཏེ། ཐལ་འགྱུར་ལས། དག་པ་དབྱིངས་ཀྱི་སྒྲོན་མ་ལ། ། ཐིག་ལེ་སྐུ་དང་འཁྲུལ་སྣང་དག ། རང་བཞིན་ཉིད་དང་ངོ་བོ་ཉིད། ། གཉིས་མེད་འདུ་འབྲལ་མེད་པར་སྣང་། ། ཞེས་སོ། ། 7. ཉམས་མྱོང་འཕེལ་སྣང་གི་ཁྱད་པར་ནི། མ་སྤངས་རྒྱས་འདེབས་སྣང་བ་གོང་འཕེལ་ཁྱད། ། ཁྲེགས་ཆོད་ཀྱི་ཕྱི་ཡུལ་ནང་སེམས་ཀྱི་འཁྲུལ་བ་སྣང་དུ་བཅུག་ནས་སྤོང་ལེན་མེད་པའི་ངང་རྒྱས་འདེབས་པས་མྱུར་དུ་དེ་དག་མི་གྲོལ་བ་ཉིད། ཐོད་རྒལ་དུ་གནད་བཅས་པའི་སྐད་ཅིག་ནས། ཕྱི་ནང་གི་འཁྲུལ་སྣང་འཁྲུལ་འཛིན་དང་བཅས་པ་རང་སངས་ཏེ། མ་སྤངས་གནས་སུ་དག་པ་རྒྱས་འདེབས་ལ་མི་ལྟོས་ཤིང་། ཡེ་ཤེས་ཀྱི་འཕེལ་སྣང་ཟླ་བ་ཡར་ངོ་བཞིན་གོང་དུ་འཕེལ་ཏེ། སྣང་བ་བཞི་ཚད་དུ་ཕྱིན་ནས་མྱུར་དུ་གྲོལ་བ་ཉིད། དེ་ལས། སྣང་ཚུལ་འཁྲུལ་བ་མ་ཡིན་ལ། ། རྒྱུ་རྐྱེན་དག་པའི་རང་བཞིན་ལ། ། དངོས་དང་དངོས་མེད་རང་དག་ནས། ། སྒོ་ལྔའི་ཡུལ་ཞེན་དག་པ་དང་། ། འབྱུང་བའི་རགས་པ་དག་པ་དང་། ། ཡེ་ཤེས་ད་ག་པ་འཕེལ་སྣང་སྟོན། ། དེ་ལས་ཟད་པའི་ཆོས་ཉིད་དོ། ། ཞེས་སོ། ། འདི་དག་གི་ཁྱད་པར་ཞིབ་མོར་ཕྱེ་ན་བསམ་གྱིས་མི་ཁྱབ་ཀྱང་། ཆེ་ལོང་ཙམ་བརྗོད་པ་སྟེ་མདོར་བསྡུ་ན་རིག་པའི་དོན་དངོས་སུ་མཐོང་ཞིང་བལྟར་ཡོད་པས་འཁྲུལ་བ་སྐད་ཅིག་ལ་ལྡོག་པ་དང་། ཡིད་དཔྱོད་ལ་ལུས་པས་འཁྲུལ་སྣང་ལ་ལམ་ བྱས་ནས་མ་འཁྲུལ་བའི་འབྲས་བུས་འཚོལ་བའི་ཁྱད་པར་གྱིས་ཆེ་བར་ཤེས་རབ་ཀྱི་མིག་དང་ལྡན་པ་རྣམས་ཀྱིས་རྟོགས་པར་བྱའོ། ། ཆོས་འདི་ལ་གནད་འདི་ལྟ་བུ་ཡོད་པས་ཀུན་གྱི་རྩེ་མོ་བླ་ན་མེད་པ་ཞེས་བྱའོ། །
Tibetan Source	《མདོ་རྒྱུད་མཛོད་ཚི་པ་》ཤ་264.6ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number