7732

Tibetan	སྒོམ་པའི་ལམ་བཤད་པ་ལ་བརྒྱད།
Tibetan Alternate
Tibetan Definition	1.མཚན་ཉིད་གཞག་པ་ནི། སྒོམ་ལམ་ཁྱད་པར་ལ་གོམས་གནས་སྐབས་ཏེ། ། སྒོམ་ལམ་གྱི་མཚན་ཉིད་ནི། རྣམ་པར་གྲོལ་བའི་འཇུག་ངོགས་གང་ཞིག ཏིང་ངེ་འཛིན་ཁྱད་པར་ཅན་གོམས་པར་བྱ་བའི་གནས་སྐབས་ཀྱིས་བསྡུས་པའོ། ། 2. མཚན་གཞི་ངོས་བཟུང་བ་ནི། མངོན་སུམ་རྟོགས་དེ་རྒྱུད་ལ་འདྲིས་པར་བྱེད། ། མཐའ་དག་སྤོང་བའི་གཉེན་པོ་ལམ་དེའི་མཚན་གཞི་ནི། མཐོང་ལམ་གྱིས་ཆོས་ཉིད་མངོན་སུམ་དུ་རྟོགས་པའི་དོན་དེ་ཉིད་རྒྱུད་ལ་གོམས་ཤིང་འདྲིས་པར་བྱེད་པའོ། ། 3. རབ་ཏུ་དབྱེ་བ་ནི། དེ་ལ་གཉིས་ཏེ། (1)འཇིག་རྟེན་པའི་སྒོམ་ལམ་ནི། ཟག་བཅས་སྒོམ་ལམ་གོང་དུ་བཤད་ལས་ཤེས། ། ཟག་བཅས་འཇིག་རྟེན་པའི་སྒོམ་ལམ་ནི་གོང་དུ་ཚངས་པའི་ཐེག་པ་བཤད་པའི་སྐབས་སུ་བཤད་པ་ལས་མཚོན་ཅིང་ཤེས་པར་བྱ་སྟེ་འདིར་མ་སྨོས་སོ། ། (2)འཇིག་རྟེན་ལས་འདས་པའི་སྒོམ་ལམ་ནི། ཟག་མེད་འདས་ལམ་ཉན་རང་བྱང་སེམས་རྟེན། ། སྦྱོར་དང་བར་ཆད་མེད་དང་རྣམ་པར་གྲོལ། ། ཁྱད་པར་ལམ་བཞི་ངོ་བོ་ཆུང་འབྲིང་ཆེ། ། མཉམ་རྗེས་གོམས་པའི་དབྱེ་བས་རྣམ་གཉིས་སོ། ། འཕགས་ལམ་ཡན་ལག་བརྒྱད་པོ་བསླབ་པར་བྱ། ། ཟག་མེད་མྱང་འདས་ཀྱི་སྒོམ་ལམ་ལ་དབྱེ་ན་ལྔ་སྟེ། དང་པོ་རྟེན་གྱིས་དབྱེ་བ་ནི། ཉན་ཐོས་དང་། རང་རྒྱལ་དང་། བྱང་ཆུབ་སེམས་དཔའི་སྒོམ་ལམ་གསུམ་མོ། ། གཉིས་པ་སྤང་བྱས་དབྱེ་བ་ནི། སྒོམ་སྤང་བརྒྱ་དང་ཞེ་བཞི་ལ་གཉེན་པོའང་དེ་སྙེད་དོ། ། གསུམ་པ་ལམ་གྱིས་དབྱེ་བ་ནི། སྦྱོར་བའི་ལམ། བར་ཆད་མེད་པའི་ལམ། རྣམ་པར་གྲོལ་བའི་ལམ། ཁྱད་པར་གྱི་ལམ་དང་བཞིའོ། ། བཞི་པ་ངོ་བོས་དབྱེ་བ་ནི། སྒོམ་ལམ་ཆེ་འབྲིང་ཆུང་གསུམ་མོ། ། ལྔ་པ་གོམས་པས་དབྱེ་བ་ནི། མཉམ་གཞག་རྗེས་ཐོབ་ཀྱི་སྒོ་ནས་གོམས་པར་བྱེད་པ་གཉིས་སོ། ། གནས་སྐབས་དེར་ཡང་དག་པའི་ལྟ་བ་སོགས་འཕགས་པའི་ལམ་ཡན་ལག་བརྒྱད་པོ་ལ་བསླབ་པར་བྱ་བ་ཡིན་ནོ། ། 4. རང་བཞིན་གཏན་ལ་དབབ་པ་ནི། དེ་ལ་གཉིས་ཏེ། (1)སྒོམ་སྤང་སྤོང་ཚུལ་ལ་གསུམ་སྟེ། [1]སྒོམ་སྤང་གི་མཚན་ཉིད་ནི། ལྷན་ཅིག་སྐྱེས་པའི་བདག་གི་སེམས་རབ་ཏུ་མ་ཞི་བར་བྱེད་པའོ། ། [2]དེའི་རབ་ཏུ་དབྱེ་བ་ནི། འདོད་ཁམས་ན་ལྷན་ཅིག་སྐྱེས་ཀྱི་ཉོན་མོངས་དྲུག་དང་། ཁམས་གོང་མ་གཉིས་ན་ཁོང་ཁྲོ་མེད་པས་བསམ་གཏན་དང་པོ་སོགས་ས་བརྒྱད་པོ་རེ་རེ་ལ་ལྔ་ལྔ་སྟེ་བཞི་བཅུ། གོང་དང་བསྡོམས་པས་ཞེ་དྲུག འདི་དག་ལ་ཆེ་འབྲིང་ཆུང་གསུམ་དང་། དེ་རེ་རེ་ལའང་ཆེན་པོའི་ཆེན་པོ་སོགས་དགུ་དགུར་ཕྱེ་བས་བཞི་བརྒྱ་དང་བཅུ་བཞིའོ། ། [3]གཉེན་པོས་སྤོང་ཚུལ་ནི། མཐོང་ལམ་དུ་བཤད་པ་བཞིན་ཤེས་པར་བྱའོ། ། (2)སྒོམ་ལམ་སྐྱེ་ཚུལ་ལ་གསུམ་སྟེ། [1]རྟེན་གང་ལ་སྐྱེ་བ་ནི། གླིང་གསུམ་གྱི་སྐྱེས་པ་བུད་མེད་དང་། ལྷའི་ནང་ནས་འདུ་ཤེས་མེད་དང་སྲིད་རྩེ་མ་གཏོགས་པ་རྣམས་ལ་སྐྱེ་སྟེ་བསོད་ནམས་ཀྱི་རྟེན་པ་ཡིན་པའི་ཕྱིར་རོ། ། ངན་སོང་གསུམ། སྒྲ་མི་སྙན། ཟ་མ་མ་ནིང་རྣམས་ནི་སྒྲིབ་པ་ཤས་ཆེ་བ་དང་། འདུ་ཤེས་མེད་པ་ནི་སེམས་མི་གསལ་བ་དང་། སྲིད་རྩེ་པ་ནི་ཁམས་གོང་མ་ལ་ཞི་བར་ལྟ་བ་མེད་པས་དེ་རྣམས་ལ་མི་སྐྱེ་བ་ཡིན་ནོ། ། [2]ས་གང་ལ་བརྟེན་པ་ནི། ཉན་ཐོས་ཀྱི་སྒོམ་ལམ་ནི་བསམ་གཏན་གྱི་དངོས་གཞི་བཞི་དང་། བསམ་གཏན་དང་པོའི་ཉེར་བསྡོགས་དང་། དངོས་གཞི་ཁྱད་པར་ཅན་དང་། གཟུགས་མེད་ཀྱི་འབྲས་བུ་གསུམ་དང་དགུ་ལ་བརྟེན་ནོ། ། གཞན་ལ་མི་བརྟེན་པའི་རྒྱུ་མཚན་འདོད་ཁམས་ཀྱི་སེམས་ལས་སུ་མི་རུང་། སྲིད་རྩེའི་སེམས་མི་གསལ། བསམ་གཏན་ལྷག་མ་གསུམ་དང་གཟུགས་མེད་གསུམ་གྱི་ཉེར་བསྡོགས་ཀྱང་གོང་མ་ཐོབ་པ་ལ་འབད་རྩོལ་དང་བཅས་པས་ཞི་གནས་ཤས་ཆུང་ཞིང་དེའི་སྟོབས་ཀྱིས་ཞི་ལྷག་ཟུང་དུ་མ་འབྲེལ་བས་མི་བརྟེན་ནོ། ། རང་སངས་རྒྱས་ཀྱི་སྒོམ་ལམ་ནི་ཚོགས་ན་སྤྱོད་ལ་བསམ་གཏན་དྲུག་གང་རུང་ལ་བརྟེན་ལ། བསེ་རུ་ལྟ་བུ་ནི་བསམ་གཏན་བཞི་པའི་དངོས་གཞི་ལ་བརྟེན་ནོ། ། བྱང་ཆུབ་སེམས་དཔའི་སྒོམ་ལམ་ནི་བསམ་གཏན་བཞི་པ་ཤིན་ཏུ་དག་པ་ལ་བརྟེན་ལ། འོན་ཀྱང་སྐྱེ་བའི་ས་ནི་གཟུགས་མེད་མ་གཏོགས་འདོད་གཟུགས་ཀྱི་ཁམས་གཉིས་སུ་ལས་དང་སྨོན་ལམ་གྱིས་སྐྱེ་ཞིང་། ཏིང་ངེ་འཛིན་གྱི་རྩལ་སྦྱོང་བ་ནི་སེང་གེ་རྣམ་བསྒྱིངས་དང་ཐོད་རྒལ་སོགས་ལ་སྙོམས་པར་འཇུག་པའི་ཚེ་གཟུགས་མེད་པ་དང་འགོག་པ་ལ་སྙོམས་པར་འཇུག་པ་ཡིན་ནོ། ། [3]ཡུལ་གང་ལ་དམིགས་པའི་ཁྱད་པར་ནི། ཐེག་པ་ཐུན་མོང་བ་ནི་མཐོང་ལམ་གྱི་རྗེས་ལ་བདེན་བཞིའི་ཆོས་ཉིད་ལ་དམིགས་པའི་ཞི་ལྷག་མཚུངས་ལྡན་དུ་གོམས་པར་བྱེད་པའོ། ། ཐེག་ཆེན་ཐུན་མོང་མ་ཡིན་པ་ནི་མཐོང་ལམ་དུ་རྟོགས་པའི་ཆོས་ཉིད་དང་ཡེ་ཤེས་ཆོས་ཅན་མཐའ་དག་དང་འབྲེལ་བར་གོམས་པར་བྱེད་པའོ། ། 5. སྤང་རྟོགས་ཀྱི་ཁྱད་པར་ནི། ཤེས་སྒྲིབ་གཙོར་སྤོང་ཆོས་ཉིད་མངོན་པར་རྟོགས། ། མཐོང་ལམ་གྱིས་སྤངས་མ་ནུས་པའི་ཀུན་སྦྱོར་ལྷག་མ་སྒོམ་སྤང་རྣམས་རིམ་གྱིས་སྤོང་ཞིང་། ཁྱད་པར་ཐེག་ཆེན་པས། མདོ་སྡེ་རྒྱན་ལས། མཐོང་བས་སྤང་བྱའི་ཉོན་མོངས་རྣམས། ། ཐམས་ཅད་ཡང་དག་ཟད་བྱས་ནས། ། ཤེས་བྱའི་སྒྲིབ་པ་སྤང་བའི་ཕྱིར། ། སྒོམ་པ་ལ་ནི་རབ་ཏུ་སྦྱོར། ། ཞེས་གསུངས་པ་ལྟར་ཤེས་སྒྲིབ་གཙོ་ཆེར་སྤངས་པ་དང་། སེང་བཟང་གིས། ཇི་སྐད་བཤད་པའི་མཐོང་བའི་ལམ་གྱིས་མངོན་སུམ་དུ་བྱས་པ་ལས་ཐ་མི་དད་ལ་དམིགས་པའི་ཕྱིར། ཞེས་གསུངས་པ་ལྟར་ཆོས་ཉིད་མངོན་སུམ་དུ་རྟོགས་པ་མཐོང་ལམ་དང་རྗེས་མཐུན་པའོ། ། དེའང་གཙོ་ཆེ་བ་འདས་པའི་སྒོམ་ལམ་གྱིས་ཡིན་གྱི། འཇིག་རྟེན་པའི་ལམ་ནི་འབྲས་བུ་འཁོར་བར་བསྐྱེད་པས་མཐོང་ལམ་ལས་དམན་ནོ། ། 6. ཡོན་ཏན་བརྗོད་པ་ནི། ཡོན་ཏན་ཁྱད་པར་ཅན་རྣམས་གོང་དུ་འཕེལ། ། རྗེས་ལ་མངོན་པར་རྟོགས་པས་བསྡུས་པ་རྣམས་དང་། ས་བཅུའི་ཡོན་ཏན་ཁྱད་པར་ཅན་རྣམས་གོང་ནས་གོང་དུ་འཕེལ་བའོ། ། 7. བྱེད་ལས་གང་ཡིན་ནི། བག་ཉལ་སྒྲིབ་བྲལ་ས་བཅུ་རིམ་བགྲོད་བྱེད། ། སྤང་བྱ་ལྷན་སྐྱེས་བག་ལ་ཉལ་གྱི་ཉོན་མོངས་པ་དང་ཤེས་བྱའི་སྒྲིབ་པ་ཐམས་ཅད་རྩད་ནས་སྤངས་ཏེ་འཇིག་རྟེན་ལས་འདས་པའི་ས་བཅུ་མངོན་དུ་བྱེད་པའོ། ། དེའང་དབང་པོ་ཐ་ཤལ་པ་ཞིག་ས་བདུན་པ་མན་ཆད་དུ་དམན་པའི་བྱང་ཆུབ་ཏུ་ལྡོག་ཉེན་ཡོད་པས་མ་དག་པའི་ས་ཡིན་ལ། ས་བརྒྱད་པ་ནས་མི་ལྡོག་པས་དག་པའོ། ། 8. ངེས་ཚིག་བསྟན་པ་ནི། ངེས་ཚིག་རྟོགས་པ་གོམས་པར་བྱེད་པའོ། ། ངེས་ཚིག་ནི། མཐོང་ལམ་དུ་རྟོགས་པའི་དེ་ཁོ་ན་ཉིད་སྒོམ་པ་གོམས་པར་བྱེད་པའི་ལམ་ཡིན་པས་སྒོམ་ལམ་ཞེས་བྱ་ཞིང་། ཟག་པ་མེད་པས་ཟག་པ་མེད་པའི་དགེ་བའི་རྩ་བ་དང་། སྒོམ་པས་སྤང་བར་བྱེད་པའི་གཉེན་པོ་ཡིན་པས་སྤང་བའི་གཉེན་པོ་ཞེས་ཀྱང་བྱའོ། །
Tibetan Source	《ཤེས་བྱ་ཀུན་ཁྱབ་》དེབ་སྨད་ཆ་ཤ་485.15ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number