8104

Tibetan	བྱང་ཆུབ་སེམས་དཔའ་ལས་དང་པོ་བའི་ལྟུང་བའི་རྩ་བ་བརྒྱད།
Tibetan Alternate
Tibetan Definition	དེ་ཡང་། འཕགས་པ་ནམ་མཁའི་སྙིང་པོ་ཞེས་བྱ་བའི་མདོ་ལས་བྱུང་བ་སྟེ། 1. སེམས་ཅན་གང་དག་སྔོན་ངན་པར་སྤྱད་པའི་རྒྱུས་ཉོན་མོངས་པ་སྙིགས་མ་ལྔ་དང་ལྡན་པའི་འཇིག་རྟེན་གྱི་ཁམས་འདིར་སྐྱེས་ནས་དེ་དག་དགེ་བའི་རྩ་བ་ཆུང་ངུ་དང་ལྡན་པ་ལས་དགེ་བའི་བཤེས་གཉེན་ལ་བརྟེན་ཏེ་ཐེག་པ་ཆེན་པོ་ཤིན་ཏུ་ཟབ་པ་འདི་ཉན་ཅིང་རིགས་ཀྱི་བུ་དེ་དག་བློ་ཆུང་དུ་ཟིན་གྱིས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། ། དེ་དག་གི་ནང་ནས་བྱང་ཆུབ་སེམས་དཔའ་ལས་དང་པོ་བ་ཤིན་ཏུ་ཟབ་པའི་སྟོང་པ་དང་ལྡན་པའི་མདོ་སྡེ་འདི་ཉན་པར་བྱེད། ལུང་སྦྱིན་པར་བྱེད། ཀློག་པར་བྱེད། དེ་དག་ཇི་ལྟར་ཀུན་ཆུབ་པ་བཞིན་དུ་སེམས་ཅན་གཞན་སྔོན་གྱི་བློ་དང་འདྲ་བ་དག་གི་མདུན་དུ་དོན་དང་བཅས། ཚིག་འབྲུ་དང་བཅས་པར་རྒྱ་ཆེར་དྲན་པར་བྱེད། སྟོན་པར་བྱེད་པ་དང་། དཀའ་བ་མ་བྱས་པའི་བྱིས་པ་སོ་སོའི་སྐྱེ་བོ་དེ་དག་ཐོས་ནས་འཇིགས་པར་འགྱུར། དངངས་པར་འགྱུར། སྐྲག་པར་འགྱུར། སྐྲག་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ལྡོག་ཅིང་ཉན་ཐོས་ཀྱི་ཐེག་པ་ལ་སེམས་སྨོན་པར་འགྱུར་བའོ། ། 2. གཞན་ཡང་བྱང་ཆུབ་སེམས་དཔའ་ལས་དང་པོ་པ་ལ་ལ་ཞིག་ལ་ཁྱོད་ཀྱིས་ཕ་རོལ་ཏུ་ཕྱིན་པ་དྲུག་ལ་སྤྱོད་མི་ནུས། ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མི་ནུས་ཀྱི། ཁྱོད་མྱུར་དུ་ཉན་ཐོས་ཀྱི་ཐེག་པའམ། རང་སངས་རྒྱས་ཀྱི་ཐེག་པ་ལ་སེམས་སྐྱེད་ཅིག་དང་། དེའི་ཕྱིར་ཁྱོད་མྱུར་དུ་འཁོར་བ་ལས་ངེས་པར་འབྱུང་བར་འགྱུར་རོ། ། 3. གཞན་ཡང་བྱང་ཆུབ་སེམས་དཔའ་ལས་དང་པོ་པ་ལ་ལ་ཞིག་ལ་ཀྱེ་ཁྱོད་ཀྱིས་སོ་སོར་ཐར་པའི་འདུལ་བ་དང་། ཚུལ་ཁྲིམས་དང་། ལེགས་པར་སྤྱད་པས་ཅི་ཞིག་བྱ། ཁྱོད་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་ཅིང་། ཐེག་པ་ཆེན་པོ་ལྷོགས་ཤིག དེའི་ཕྱིར་ཉོན་མོངས་པའི་རྐྱེན་གྱིས་ཁྱོད་ཀྱི་ལུས་དང་། ངག་དང་། ཡིད་ཀྱིས་མི་དགེ་བའི་ལས་གང་ཅུང་ཟད་བསྒྲུབས་པ་དེ་དག་དེའི་ཕྱིར་དག་ཅིང་རྣམ་པར་སྨིན་པར་འགྱུར་བ་མེད་དོ། ། 4. གཞན་ཡང་བྱང་ཆུབ་སེམས་དཔའ་ལས་དང་པོ་བ་ལ་ལ་ཞིག་ལ་རིགས་ཀྱི་བུ་ཁྱོད་ཀྱིས་ཉན་ཐོས་ཀྱི་ཐེག་པའི་གཏམ་སྤོངས་ཤིག མ་ཉན་ཅིག མ་ཀློག་ཅིག གཞན་ལ་མ་སྟོན་ཅིག ཁྱོད་ཀྱིས་ཉན་ཐོས་ཀྱི་ཐེག་པའི་གཏམ་སྤང་བར་གྱིས་ཤིག ཁྱོད་ནི། ཐེག་པ་ཆེན་པོ་ཉོན་ཅིག ཁྱོད་ཐེག་པ་ཆེན་པོ་ལྷོགས་ཤིག གཞན་ལ་སྟོན་ཅིག་དང་། དེའི་ཕྱིར་ཁྱོད་ངན་འགྲོ་དང་། ངན་སོང་གི་ལམ་ཐམས་ཅད་དུ་འགྲོ་བར་མི་འགྱུར་ཞིང་། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། ། ཞེས་དེ་སྐད་སྨྲས་ནས་གལ་ཏེ་དེ་དེའི་ཚིག་བཞིན་དུ་བྱེད་ཅིང་ལྟ་བའི་རྣམ་པ་དེ་ལྟ་བུ་ལེན་པར་བྱེད་ན། གཉིས་ཀའང་ལྟུང་བའི་རྩ་བར་འགྱུར་ཏོ། ། 5. གཞན་ཡང་བྱང་ཆུབ་སེམས་དཔའ་ལས་དང་པོ་པ་དག་ལྕེ་གཉིས་པར་འགྱུར་ཏེ། གཞན་དུ་སེམས་ལ་གཞན་དུ་སྟོན་ཅིང་ཐེག་པ་ཆེན་པོ་འདིའང་སྒྲ་གྲགས་པ་དང་། ཚིགས་སུ་བཅད་པ་དང་། རྙེད་པ་དང་། བཀུར་སྟིའི་ཕྱིར་འདོན་པར་བྱེད། ཁ་ཏོན་བྱེད། འཛིན་པར་བྱེད། ཀློག་པར་བྱེད། འཆད་པར་བྱེད། ཕ་རོལ་ལའང་ཐོས་པ་ཙམ་སྟོན་པར་བྱེད་ཅིང་བདག་ནི། ཐེག་པ་ཆེན་པོ་པ་ཡིན་གྱི། གཞན་ནི་མ་ཡིན་ནོ། ། ཞེས་དེ་སྐད་ཟེར་ཞིང་རྙེད་པ་དང་བཀུར་སྟིའི་ཕྱིར་གཞན་ལ་ཕྲག་དོག་ཏུ་བྱེད་ལ། ཕ་རོལ་གང་ལས་ཉེ་བར་སྤྱོད་པ་དང་། ཡོངས་སུ་སྤྱོད་པ་ཐོབ་པར་འགྱུར་བ་ལ་དེའི་རྐྱེན་གྱིས་དེ་དག་འཁྲུག་པར་འགྱུར། དེ་དག་གི་མིང་བརྗོད་པར་བྱས་ཏེ་སྨོད་པར་བྱེད། བརྙས་པར་བྱེད། ངན་དུ་བརྗོད་པར་བྱེད། བདག་བསྟོད་པར་བྱེད་ཅིང་དེ་དག་ཕྲག་དོག་གི་རྒྱུས་བདག་མིའི་ཆོས་བླ་མ་དང་ལྡན་པར་འཆད་པར་བྱེད་དེ། དེའི་ཕྱིར་དངོས་པོ་དེས་ལྟུང་བར་འགྱུར། ཐེག་པ་ཆེན་པོའི་བདེ་བ་ལས་ཕས་ ཕམ་པར་གྱུར་ནས་དེའི་ཕྱིར་ཡང་ཐེག་པ་ཆེན་པོ་ལས་ལྕི་བ་ཆེན་པོའི་ལྟུང་བ་འབྱུང་བར་འགྱུར་ཏེ། དེའི་ཕྱིར་ངན་སོང་དུ་འགྲོ་བར་འགྱུར་རོ། ། དཔེར་ན། མི་ལ་ལ་ཞིག་རིན་པོ་ཆེའི་གླིང་དུ་འགྲོ་འདོད་དེ། རྒྱ་མཚོ་ཆེན་པོར་གྲུ་ལས་སོང་བ་ལས་རྒྱ་མཚོ་ཆེན་པོར་གྲུ་ཉིད་ཞིག་པར་གྱུར་པ་དེ་བཞིན་དུ། བྱང་ཆུབ་སེམས་དཔའ་ལས་དང་པོ་པའང་ ཐེག་པ་ཆེན་པོའི་རྒྱ་མཚོར་རྒལ་བར་འདོད་པ་ལས་ཕྲག་དོག་གི་ཕྱིར་བརྫུན་དུ་སྨྲས་ནས་དེའི་རྐྱེན་གྱིས་ལྟུང་བ་ལྕི་བ་ཆེན་པོ་འབྱུང་བར་འགྱུར་ཏོ། ། 6. གཞན་ཡང་མ་འོངས་པའི་དུས་ན་ལས་དང་པོ་པའི་བྱང་ཆུབ་སེམས་དཔའ་ཁྱིམ་པའམ། རབ་ཏུ་བྱུང་བ་དག་ཟབ་པ་ཉིད་ལ་སྟོང་པ་ཉིད་དང་ལྡན་པའི་མདོ་སྡེ་གཟུངས་དང་། བཟོད་པ་དང་། ཏིང་ངེ་འཛིན་དང་། སས་བརྒྱན་པའི་སྐྱེས་བུ་རིག་པ་ཆེན་པོ་དང་ལྡན་པ། ཚེགས་ཆུང་བའི་བྱང་ཆུབ་སེམས་དཔའ་རྣམས་ཀྱི་སྤྱོད་ཡུལ་གྱི་ཐེག་པ་ཆེན་པོའི་མདོ་སྡེ་དེ་ཀློག་པར་བྱེད། འདོན་པར་བྱེད། ཁ་ཏོན་བྱེད། བཀླགས་ནས་གཞན་ལ་རྒྱ་ཆེར་སྟོན་པར་བྱེད། དེ་བདག་གིས་ཆོས་འདི་དག་རང་གི་བློས་རྟོགས་ནས་ང་སྙིང་རྗེ་བའི་ཕྱིར་དེ་ལྟར་ཁྱོད་ལ་སྟོན་གྱི། ཁྱོད་ཀྱིས་ཅི་ནས་ཀྱང་ཆོས་ཟབ་མོ་འདི་ལ་མངོན་སུམ་དུ་འགྱུར་བ་དེ་སྒོམས་ཤིག་དང་། ད་ལྟར་གྱི་ང་བཞིན་དུ་ཁྱེད་ཀྱང་ཡེ་ཤེས་མཐོང་བར་འགྱུར་རོ། ། ཞེས་སྨྲ་ཞིང་། ཆོས་འདི་ལྟ་བུ་ཟབ་མོ་ཟབ་པ་དག་མངོན་པར་ནི། མ་བྱས་ཀྱི། བཀླགས་པ་ཙམ་གྱིས་བསྟན་ནོ། ། ཞེས་ནི། མི་ཟེར་བར་རྙེད་པ་དང་། བཀུར་སྟིའི་ཕྱིར་བདག་འཚོང་བར་བྱེད་དེ། དེའི་རྐྱེན་གྱིས་དུས་གསུམ་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དག་དང་། འཕགས་པའི་གང་ཟག་གི་སྤྱན་སྔར་ཉེས་པ་དང་བཅས་པར་འགྱུར། ལྟུང་བ་ལྕི་བ་འབྱུང་བར་འགྱུར། ལྷ་དང་མི་ནམས་ཀྱི་ཐེག་པ་ཆེན་པོས་བསླུས་པར་འགྱུར་ཏེ། དེ་ནི། དེའི་ཉན་ཐོས་ཀྱི་ཐེག་པར་ཡང་མི་འགྱུར་ན། ཐེག་པ་ཆེན་པོ་ལྟ་ཅི་སྨོས། ཐེག་པ་ཆེན་པོ་ལ་འཇུག་པའི་རྟོགས་པའི་ཁྱད་པར་ལྟ་ཅི་སྨོས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལྟ་ཅི་སྨོས། འདི་ལྟ་སྟེ། མི་ཞིག་འབྲོག་དགོན་པ་ཆེན་པོར་སོང་བ་ལས་བཀྲེས་པ་དང་སྐོམ་པས་ཉེན་ཅིང་ངལ་བར་གྱུར་ནས་དེ་འབྲས་བུ་ཆེན་པོ་དང་ལྡན་པའི་ཤིང་གི་དྲུང་དུ་ཟས་ཀྱི་ཕྱིར་འདུག་ནས་དེས་ཤིང་འབྲས་བུ་ཆེན་པོ་དང་ལྡན་པ། དྲི་དང་ལྡན་པ། རོ་དང་ལྡན་པ་བོར་ཏེ་དུག་གི་ཤིང་རོ་མེད་པ་ལ་འཛེགས་ནས་དུག་གི་འབྲས་བུ་ཟའོ། ། ཟོས་ནས་འཆི་བའི་དུས་བྱེད་དེ། གང་ཟག་དེའང་དཔེ་དེ་དང་འདྲ་བར་བརྗོད་དོ། ། དེ་བས་ན། མིར་རྙེད་པ་ཤིན་ཏུ་དཀོན་པ་རྙེད་ནས་དགེ་བའི་བཤེས་གཉེན་ལ་གནས་ཏེ་ཐེག་པ་ཆེན་པོ་ལ་འཇུག་པར་འདོད་པ་ལས་རྙེད་པ་དང་། བཀུར་སྟི་དང་། གྲགས་པའི་ཕྱིར་བདག་ལ་བསྟོད། གཞན་ལ་སྨོད་པར་བྱེད་པས་ལྟུང་བའི་ལྕི་བ་དེ་འདྲ་བ་བྱུང་བར་གྱུར་ནས་ལྟུང་བའི་རྩ་བ་དེའི་ཕྱིར་ཤེས་པ་ཐམས་ཅད་ཀྱིས་སྨད་ཅིང་ངན་སོང་དུ་འགྲོ་བར་འགྱུར་ཏེ། གང་ཟག་དེ་འདྲ་བ་ནི། རྒྱལ་རིགས་དང་། བྲམ་ཟེ་དང་། རྗེའུ་རིགས་དང་། དམངས་རིགས་ཐམས་ཅད་ཀྱི་མི་བསྟེན་པར་བྱའོ། ། གང་དེ་སྟེན་པར་བྱེད་པ་དེ་ནི། ཤེས་པ་ཐམས་ཅད་ཀྱི་འདས་པ་དང་བཅས་པ་ཡིན་ནོ། ། 7. གཞན་ཡང་རིགས་ཀྱི་བུ། མ་འོངས་པའི་དུས་ན་རྒྱལ་རིགས་རྣམས་ཀྱི་མདུན་ན་འདོན་གྱི་ཕྱག་དར་བའམ། བློན་པོའི་ཕྱག་དར་བའམ། དཔའ་བོའི་ཕྱག་དར་བའམ། སྨན་པའི་ཕྱག་དར་བ། བླུན་པ། མཁས་པས་སྙེམས་པ། ནོར་ཆེ་བ། ལོངས་སྤྱོད་ཆེ་བ་དག་འབྱུང་སྟེ། དེ་དག་སྦྱིན་པའི་བསོད་ནམས་ཀྱི་དངོས་པོ་རྣམ་པ་མང་པོ་དག་བྱེད་པར་སྣང་སྟེ། དེ་དག་གཏོང་བས་རྒྱགས་ཤིང་དོགས་ནས་སྙེམས་པ་དང་། རྒྱགས་པས་རྒྱལ་རིགས་དག་ཀྱང་འབྱེད་པར་བྱེད། དགེ་སློང་དག་ཀྱང་རྒྱལ་རིགས་དང་འབྱེད་པར་བྱེད་ཅིང་། དེ་དག་རྒྱལ་རིགས་ལ་བརྟེན་ནས་དགེ་སྦྱོང་དག་ཀྱང་ཆད་པས་གཅོད་པར་བྱེད་དེ། ནོར་གྱི་ཆད་པས་འཕྲོག་པར་བྱེད་པས་གནོད་པ་དེའི་ཕྱིར་དགེ་སློང་དེ་དག་གིས་གང་ཟག་གིའང་རུང་། དགེ་འདུན་གྱིའང་རུང་། ཕྱོགས་བཞིའི་དགེ་འདུན་གྱིའང་རུང་། མཆོད་རྟེན་གྱིའང་རུང་སྟེ། འཕྲོག་ནས་དེ་དག་ལ་སྐྱེས་སུ་འབུལ་བར་བྱེད། ཕྱག་དར་བ་དེ་དག་ཀྱང་རྒྱལ་རིགས་ལ་འབུལ་བར་བྱེད་དེ། དེ་གཉིས་ཀ་ལྟུང་བའི་རྩ་བར་འགྱུར་རོ། ། 8. གཞན་ཡང་རྒྱལ་རིགས་ཀྱི་ཕྱག་དར་བ་དེ་དགེ་སྦྱོང་དང་བཅས་ཏེ་ཉེས་པར་འགྱུར། ཆོས་དེ་ལྟ་བུ་དག་ཀྱང་ཆོས་མ་ཡིན་པར་འདོགས། ཆོས་མ་ཡིན་པར་ནི་ཆོས་སུ་འདོགས་ཏེ་ཆོས་སྤངས། མདོ་སྡེ་དང་འདུལ་བའི་བསླབ་པ་ལ་མི་ལྟ། ནག་པོ་བསྟན་པ་ལ་མི་ལྟ། ཆེན་པོ་བསྟན་པ་ལ་མི་ལྟ། བྱམས་པ་དང་། སྙིང་རྗེ་ཆེན་པོ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་བསླབ་པ་དང་། ཐབས་ཀྱི་བསླབ་པ་དང་། གང་ཡང་མདོ་སྡེ་གཞན་དག་ལས་བསླབ་པ་བཤད་པ་དེའང་སྤངས་ནས་དགེ་སློང་དག་གཙེ་བའི་ཕྱིར་དེ་འདྲ་བའི་ཆོས་དང་མི་ལྡན་པའི་བྱ་བ་འཆའ་བར་བྱེད་དེ། བྱ་བ་འཆའ་བ་དེ་དག་གིས་དགེ་སློང་དག་གཙེ་བར་འགྱུར། ཞི་གནས་དང་ལྷག་མཐོང་ལ་སྦྱོར་བའི་ཡིད་ལ་བྱེད་པ་གཏོང་བར་འགྱུར། བསམ་གཏན་པ་དེ་དག་གནོད་སེམས་མང་བར་འགྱུར་བས་དེའི་ཕྱིར་དགེ་སློང་དག་གི་ཉོན་མོངས་པ་མ་ཞི་བ་ཞི་བར་མི་བྱེད། སྲབ་མོར་མི་འགྱུར་ཏེ། དེའི་ཚེ་དགེ་སློང་དག་བསམ་པ་ཉམས་པར་འགྱུར། ཚུལ་ཁྲིམས་ཉམས་པར་འགྱུར། སྤྱོད་པ་ཉམས་པ་དང་། ལྟ་བ་ཉམས་པར་འགྱུར་ཏེ། དེའི་ཕྱིར་ལྷོད་པར་འགྱུར། ཕལ་ཆེར་ལྷོད་པར་འགྱུར། ཚུལ་ཁྲིམས་ཉམས་པར་འགྱུར། དགེ་སྦྱོང་མ་ཡིན་ན་དགེ་སྦྱོང་དུ་ཁས་འཆེ། ཚངས་པར་སྤྱོད་པ་མ་ཡིན་ན་ཚངས་པར་སྤྱོད་པར་ཁས་འཆེ་ཞིང་བོང་བུ་དང་མཚུངས་པ་དང་། ཆོས་ཤིན་ཏུ་གསལ་བར་འཆད་པར་འགྱུར་ཏེ། དེ་དག་ལ་རྒྱལ་རིགས་འཁོར་དང་བཅས་པས་ཤིན་ཏུ་བཀུར་སྟི་བྱས་པ་དང་། རིམ་གྲོ་བྱས་པ་དང་། མཆོད་པ་བྱས་པར་འགྱུར། དེ་དག་གིས་དགེ་སློང་སྤོང་བ་ལ་བརྩོན་པ་རྣམས་ཀྱི་བསྔགས་པ་མ་ཡིན་པ་ཁྱིམ་པ་ལ་བརྗོད་པ་དང་། རྒྱལ་རིགས་འཁོར་དང་བཅས་པ་དེའང་དགེ་སློང་སྤོང་བ་ལ་བརྩོན་པ་དེ་དག་ལ་ཞེ་སྡང་ཞིང་འཕྱ་བར་འགྱུར་ཏེ། གང་དེ་ན་དགེ་སློང་སྤོང་བ་ལ་བརྩོན་པ་རྣམས་ཀྱི་ཕན་པ་དང་ལོངས་སྤྱོད་དུ་བྱ་བ་དེ་ཁ་ཏོན་ལ་བརྩོན་པའི་དགེ་སློང་ལ་འབུལ་བར་བྱེད་པས་དེ་གཉིས་ཀ་ལྟུང་བའི་རྩ་བར་འགྱུར་རོ། དེ་ཅིའི་ཕྱིར་ཞེ་ན། དགེ་སློང་བསམ་གཏན་པ་ནི། ཞིང་དམ་པ་ཡིན་གྱི། ཁ་ཏོན་པ་དང་། ཞལ་ཏ་ལ་གནས་པ་ནི། མ་ཡིན་པའི་ཕྱིར་ཏེ། དགེ་སློང་བསམ་གཏན་པ་དག་ནི། ཏིང་ངེ་འཛིན་དང་། གཟུངས་དང་། བཟོད་པ་དང་། ས་དག་ལ་སྣོད་དུ་གྱུར་པ། སྦྱིན་གནས་དམ་པ། སྣོད་དམ་པར་གྱུར་པ། འཇིག་རྟེན་གྱི་སྣང་བར་བྱེད་པ། ལམ་སྟོན་པར་བྱེད་པ། ལས་ཀྱི་ཞིང་དང་ཉོན་མོངས་པའི་ཞིང་ལས་སེམས་ཅན་རྣམས་སྒྲོལ་བར་བྱེད་པ། མྱ་ངན་ལས་འདའ་བར་འགྲོ་བའི་ལམ་ལ་གཞོག་པར་བྱེད་པའོ། ། རིགས་ཀྱི་བུ། དེ་ནི། ཚེགས་མ་ཕྱུང་རོ། །
Tibetan Source	《མདོ་ཞ་པ་》ཤ་464ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number