8143

Tibetan	སྦྱོར་བའི་ལམ་བཤད་པ་ལ་བརྒྱད།
Tibetan Alternate
Tibetan Definition	1.མཚན་ཉིད་གཞག་པ་ནི། སྦྱོར་ལམ་དོན་དམ་མངོན་རྟོགས་གནས་སྐབས་ཏེ། ། སྦྱོར་ལམ་གྱི་ངོ་བོ་རྣམ་པར་གྲོལ་བའི་འཇུག་ངོགས་གང་ཞིག དོན་མངོན་པར་རྟོགས་པའི་གནས་སྐབས་ཀྱིས་བསྡུས་པའོ། ། 2. མཚན་གཞི་ངོས་བཟུང་བ་ནི། འཇིག་རྟེན་པ་ཡི་སྒོམ་བྱུང་ཤེས་རབ་ཉིད། ། ལམ་དེའི་མཚན་གཞི་ཉེ་བར་སྤོང་བའི་གཉེན་པོ་སྟེ་དྲོད་ཀྱི་ཡེ་ཤེས་སྐྱེས་པ་ནས་བཟུང་མཐོང་ལམ་མ་སྐྱེས་བར་གྱི་འཇིག་རྟེན་པའི་སྒོམ་བྱུང་གི་ཤེས་རབ་བོ། ། 3. རབ་ཏུ་དབྱེ་བ་ནི། རང་བཞིན་མོས་སྤྱོད་ལ་སོགས་དབྱེ་མང་ཡང་། ། ཡེ་ཤེས་དྲོད་སྐྱེ་དགེ་རྩ་གཡོ་བའི་ཚེ། ། ཟབ་མོར་བཟོད་ཐོབ་འཇིག་རྟེན་ཆོས་ཀྱི་མཆོག ། བཞི་ལ་དབང་པོ་སྟོབས་ལྔ་གཉིས་རེར་བསྒོམ། ། ལམ་འདིའི་རྣམ་པར་དབྱེ་བ་ལ། རང་བཞིན་གྱིས་དབྱེ་བ་ནི། མོས་པས་སྤྱོད་པའི་ས་དང་། སྒོམ་ལམ་ཟག་བཅས་དང་། ངེས་འབྱེད་ཆ་མཐུན་དང་། འཇུག་པའི་སྒྲུབ་པ་སོགས་སུ་དབྱེར་ཡོད་པ་དང་། ཚོགས་སྦྱོར་གྱི་དབྱེ་བ་ཚོགས་ཀྱང་ཡིན་ལ་སྦྱོར་བའང་ཡིན་པ་དང་། ཚོགས་མ་ཡིན་ལ་སྦྱོར་བ་ཡིན་པ་གཉིས་སུའང་དབྱེར་ཡོད་ལ། དེའི་དང་པོ་ནི་ཚོགས་ལམ་གྱི་རྒྱུན་སྦྱོར་ལམ་ན་ཡོད་པའོ། ། ཕྱི་མ་ནི་བདེན་པ་བཞིའམ་བདག་མེད་གཉིས་ལ་སྦྱོར་བས་སྦྱོར་བ་ཡིན་ལ་ཚོགས་ལམ་དངོས་མ་ཡིན་པས་ཚོགས་མ་ཡིན་པའོ། ། ཆེ་ཆུང་གིས་དབྱེ་ན། སྤྱོད་ལམ་ཆུང་འབྲིང་ཆེ་གསུམ་དུ་དབྱེར་ཡོད་པའི་ཆུང་ངུ་ནི་མཐོང་ལམ་སྐྱེ་བའི་དུས་ངེས་པ་མེད་པའོ། འབྲིང་ནི་ངེས་པ་ཡོད་པའོ། ། ཆེན་པོ་ནི་ཚེ་འདི་ལ་མཐོང་ལམ་སྐྱེ་བའོ། ། དེ་ལྟར་དབྱེ་སྒོ་མང་ཡང་རྟོགས་ཚུལ་གྱི་སྒོ་ནས་དབྱེ་བ་ཉིད་ཡོངས་སུ་གྲགས་པ་སྟེ། དེའང་ཤིང་གཙུབས་པས་མེ་འབྱུང་བའི་སྔ་ལྟས་སུ་དྲོད་འབྱུང་བ་ལྟར་མཐོང་ལམ་རྣམ་པར་མི་རྟོག་པའི་ཡེ་ཤེས་མེ་ལྟ་བུ་སྐྱེ་བའི་སྔ་ལྟས་སུ་གྱུར་པས་དྲོད། དགེ་བའི་རྩ་བ་གཡོ་བ་རྣམས་ཀྱི་རྩེ་མོ་སྟེ་རབ་བམ་མཆོག་ཏུ་གྱུར་པས་རྩེ་མོ། རྩེ་མོའི་སྐད་དོད་མཱུརྟི་ཞེས་པ་ཐང་གཅིག་ལའང་འཇུག་པས། རིང་དུ་མི་གནས་པས་ཐང་གཅིག་གམ་རྩེ་མོ་ཟེར་བའང་ཡོད། མི་གཡོ་བའི་སྒོ་ནས་བདེན་པ་མཐོང་བའི་ལམ་དང་རྗེས་སུ་མཐུན་པར་ཆོས་ཟབ་མོ་ལ་བཟོད་པ་ཐོབ་སྟེ་སྟོང་ཉིད་ལ་མི་སྐྲག་པས་བཟོད་པ། སྐལ་མཉམ་གྱི་རྒྱུ་མེད་ཀྱང་འཕགས་པའི་ལམ་གྱིས་འདྲེན་ནུས་པས་འཇིག་རྟེན་པའི་ཆོས་ཀྱི་ནང་ནས་མཆོག་ཏུ་གྱུར་པས་འཇིག་རྟེན་ཆོས་མཆོག་སྟེ་མཐོང་ལམ་ཟག་མེད་ཀྱི་བདག་རྐྱེན་བྱེད་པའོ། ། དེའང་མངོན་རྟོགས་རྒྱན་ལས། ཆུང་ངུ་འབྲིང་དང་ཆེན་པོ་ཡིས། ། ཞེས་པས་གཉིས་ཀ་ལ་གསུམ་རེ་སྟེ་བཅུ་གཉིས་སུ་དབྱེ་བར་ཐེག་ཆེན་པ་འགའ་ཞིག་བཞེད་པ་ལྟར་ན། དྲོད་ནི་སོ་སོ་རང་རིག་པའི་ཡེ་ཤེས་ཀྱིས་བདེན་བཞིའི་ཆོས་རྣམས་ལ་དམིགས་ནས་བསྒོམས་པས་ནང་འཛིན་པ་ཡིད་ཀྱི་བརྗོད་པ་ཙམ་མ་གཏོགས་གཟུང་བ་ཕྱི་དོན་རང་བཞིན་མེད་པར་རྟོགས་པ་ལ་གསལ་སྣང་ཆུང་ངུ་ཐོབ་པའི་ཏིང་ངེ་འཛིན་ཞི་གནས་དང་ཤེས་རབ་ལྷག་མཐོང་གྲོགས་དེ་དག་དང་མཚུངས་ལྡན་གྱི་སེམས་སེམས་བྱུང་དང་བཅས་པ་སྟེ། དེ་ལའང་སྟོང་པ་བདག་མེད་ཀྱི་གསལ་སྣང་རེས་འགའ། ཕལ་ཆེར། དེ་ལས་ཀྱང་མང་ཞིང་གསལ་བའི་ཆ་ནས་དྲོད་ཆུང་འབྲིང་ཆེ་གསུམ་དུ་བཞག་ཅིང་། དྲོད་ཀྱི་ཡེ་ཤེས་དེ་ལ་ནི་མཐོང་ལམ་ཆུང་ངུ་སྐྱེས་པ་ཞེས་བྱ་སྟེ་སྔར་མ་མཐོང་བའི་དོན་ཅུང་ཟད་མཐོང་བས་སོ། ། དེའང་རྩེ་མོ་སོགས་ལ་ལྟོས་ནས་སྟོང་པ་བདག་མེད་ཀྱི་གསལ་བ་ཐ་མར་ཉམས་སུ་མྱོང་བའོ། ། རྩེ་མོ་སྔར་བཞིན་བརྩོན་འགྲུས་རྟག་པར་བརྩམས་པས་གཟུང་བ་རང་བཞིན་མེད་པར་རྟོགས་པའི་སྣང་བ་དེ་ཉིད་སྔ་མ་ལས་གོང་བུ་མཆེད་ཅིང་འཕེལ་ནས་གསལ་སྣང་འབྲིང་དུ་ཐོབ་པའི་ཏིང་ངེ་འཛིན་དང་ཤེས་རབ་མཚུངས་ལྡན་གྱི་གྲོགས་དང་བཅས་པ་སྟེ། བདག་མེད་ཀྱི་རྟོགས་པ་རྨི་ལམ་ནའང་རེས་འགའ་དང་། ཕལ་ཆེར། དེ་ལས་ཀྱང་གྲངས་མང་ཞིང་གསལ་བར་དྲན་པའི་ཆ་ནས་ཆུང་འབྲིང་ཆེ་གསུམ་མོ། ། བཟོད་པ་ནི་སྔར་བཞིན་བསྒོམས་པས་དོན་དུ་སྣང་བ་ཐམས་ཅད་སེམས་ཁོ་ནར་སྣང་བས་གཟུང་བའི་རྣམ་གཡེང་སྤངས་པའི་གསལ་སྣང་ཆེན་པོ་ཐོབ་ཅིང་འཛིན་པའང་རང་བཞིན་མེད་པར་རྟོགས་པ་ལ་གསལ་སྣང་ཆུང་ངུ་ཐོབ་པའི་ཏིང་ངེ་འཛིན་ཤེས་རབ་མཚུངས་ལྡན་དང་བཅས་པ་སྟེ། དེ་ལའང་སྟོང་པ་ཉིད་ཀྱིས་རེས་མི་འཇིགས། ཕལ་ཆེར་མི་འཇིགས། ཐམས་ཅད་དུ་མི་འཇིགས་པ་གསུམ་ལས་ཆུང་འབྲིང་ཆེ་གསུམ་མོ། ། ཆོས་མཆོག་ནི་སྔར་བཞིན་བསྒོམས་པས་དེ་མ་ཐག་པའི་རྗེས་སུ་མཐོང་ལམ་སྐྱེས་ནས་འཛིན་པ་རང་བཞིན་མེད་པར་རྟོགས་པར་འགྱུར་བས་འཇིག་རྟེན་པའི་ལམ་ལ་ལྟོས་ཏེ་འཛིན་པ་རང་བཞིན་མེད་པ་ལ་གསལ་སྣང་ཆེན་པོ་དང་། འདས་ལམ་ལ་ལྟོས་ཏེ་དེ་ཉིད་འབྲིང་དུ་ཐོབ་པའི་ཏིང་ངེ་འཛིན་དང་ཤེས་རབ་མཚུངས་ལྡན་དང་བཅས་པ་སྟེ། འཛིན་པ་རང་བཞིན་མེད་པའི་གསལ་བ་ཐ་འབྲིང་རབ་ཏུ་རྟོགས་པ་ལ་ཆུང་འབྲིང་ཆེ་གསུམ་མོ། ། ངེས་འབྱེད་འདི་དག་མངོན་པ་གོང་འོག་གཉིས་ཀ་མཐུན་པར་བཟོད་པ་མ་གཏོགས་གཞན་རྣམས་ལ་ཆེ་ཆུང་གསུམ་དུ་ཕྱེ་བ་མི་མཛད་དོ། ། དེ་དག་བློའི་རྣམ་པའི་ངོ་བོ་ནི་མཐོང་ལམ་རྣམ་པར་མི་རྟོག་པའི་ཡི་ཤེས་ལ་ལྟོས་ན་རྟོག་བཅས་དང་། སྒྲ་དོན་ངེས་འཛིན་གྱི་རྟོག་པ་ཕལ་པ་ལ་ལྟོས་ན་རྟོག་མེད་མངོན་སུམ་ཡིན་ཏེ། གཟུང་བ་རང་བཞིན་མེད་པ་ལ་གསལ་སྣང་ཐོབ་པར་བཤད་པས་སོ། ། དེ་བཞི་ལ་དབང་པོ་ལྔ་དང་སྟོབས་ལྔ་གཉིས་རེར་བསྒོམ་སྟེ། དྲོད་རྩེ་གཉིས་སུ་དབང་པོ། བཟོད་ཆོས་གཉིས་སུ་སྟོབས་ལྔ་སྒོམ་པར་བྱེད་དོ། ། 4. རང་བཞིན་གཏན་ལ་དབབ་པ་ནི། གང་སྐྱེ་གང་ལ་གང་དམིགས་ཁྱད་པར་ལྡན། ། ལམ་དེའི་རང་བཞིན་གཏན་ལ་དབབ་པ་ལ་གསུམ་སྟེ། རྟེན་གང་ལ་སྐྱེ་བ། ས་གང་ལ་བརྟེན་པ། ཡུལ་གང་ལ་དམིགས་པའོ། ། དང་པོ་ནི། གླིང་གསུམ་གྱི་སྐྱེས་པ་བུད་མེད་དང་། འདོད་ལྷ་རིགས་དྲུག་ལ་སྐྱེ་སྟེ། སྔོན་མིའི་གནས་སུ་ཚོགས་ལམ་རྒྱུད་ལ་བསྐྱེད་ནས་འདོད་ལྷའི་རིས་གང་དུ་སྐྱེས་ཀྱང་སྐྱེའོ། ། ཐེག་ཆེན་ཐུན་མོང་མ་ཡིན་པ་འགའ་ཞིག་ལས་ནི་དུད་འགྲོའི་བྱེ་བྲག་ཀླུ་སོགས་ལ་སྐྱེ་བར་བཤད་པའང་ཡོད་དོ། ། གཉིས་པ་ས་གང་ལ་བརྟེན་པ་ནི། ཉན་ཐོས་ཀྱི་སྦྱོར་ལམ་ནི་བསམ་གཏན་དང་པོའི་ཉེར་བསྡོགས་མི་ལྕོགས་མེད་དང་། དངོས་གཞི་ཙམ་པོ་དང་། དེ་ཁྱད་པར་ཅན་དང་། བསམ་གཏན་ལྷག་མ་གསུམ་གྱི་དངོས་གཞི་སྟེ་བསམ་གཏན་ས་དྲུག་ལ་བརྟེན་ནོ། ། དེ་ལ་སྔར་འདོད་ཆགས་དང་མ་བྲལ་བ་བསམ་གཏན་གྱི་ཉེར་བསྡོགས་དང་། འདོད་པ་ལ་འདོད་ཆགས་དང་བྲལ་ན་དངོས་གཞི་ལ་བརྟེན་ནོ། ། རང་རྒྱལ་ཚོགས་སྤྱོད་ནི་བསམ་གཏན་ས་དྲུག་པོ་གང་རུང་དང་། བསེ་རུ་ལྟ་བུ་ནི་བསམ་གཏན་བཞི་པའི་དངོས་གཞི་ལ་བརྟེན་ནོ། ། བྱང་ཆུབ་སེམས་དཔའ་ནི་བྱེ་སྨྲ་ན་རེ། སྟོན་དང་བསེ་རུ་བྱང་ཆུབ་བར། ། བསམ་གཏན་མཐའ་བརྟེན་གཅིག་ལ་ཀུན། ། ཞེས་ཟེར་བས་བསམ་གཏན་བཞི་པ་ལ་བརྟེན་པར་འདོད་ལ། ཐེག་ཆེན་པ་འགའ་ཞིག་བསམ་གཏན་བཞི་པོ་གང་རུང་གི་དངོས་གཞི་ལ་བརྟེན་པར་འདོད་པའང་ཡོད་དོ། ། གསུམ་པ་ཡུལ་གང་ལ་དམིགས་པ་ནི། མདོ་སྡེ་པ་དག་དྲོད་རྩེ་བཟོད་གསུམ་གཟུང་བ་རང་བཞིན་མེད་པ་དང་། ཆོས་མཆོག་འཛིན་པ་རང་བཞིན་མེད་པ་ལ་དམིགས་ཤིང་། གཟུང་བ་རང་བཞིན་མེད་པར་རྟོག་པ་ལའང་ཆུང་ངུ་སྣང་བ་ཐོབ་པ་དྲོད། འབྲིང་སྣང་བ་མཆེད་པ་རྩེ་མོ། ཆེན་པོ་རྟོགས་པ་བརྟན་པ་བཟོད་པའོ་ཞེས་ཟེར། ཐེག་ཆེན་པ་ཁ་ཅིག་དྲོད་ཀྱིས་གཟུང་བ་རང་བཞིན་མེད་པར་རྟོགས་ཤིང་། བཟོད་མཆོག་གིས་འཛིན་པ་རང་བཞིན་མེད་པར་རྟོགས་ཏེ། དེའང་ཀུན་ནས་ཉོན་མོངས་པའི་ཕྱོགས་ཀྱི་གཟུང་བ་རང་བཞིན་མེད་པར་རྟོག་པ་དྲོད། རྣམ་པར་བྱང་བའི་ཕྱོགས་ཀྱི་གཟུང་བ་དེར་རྟོགས་པ་རྩེ་མོ། འཛིན་པ་རང་བཞིན་མེད་པར་རྟོགས་པ་ལའང་གང་ཟག་རྫས་ཡོད་ཀྱི་རྟེན་ཅན་གྱི་འཛིན་པ་རང་བཞིན་མེད་པར་རྟོགས་པ་བཟོད་པ། སྐྱེས་བུ་བཏགས་ཡོད་ཀྱི་རྟེན་ཅན་གྱི་འཛིན་པ་དེར་རྟོགས་པ་ཆོས་མཆོག་གོ་ཞེས་བཞེད་དེ། མངོན་རྟོགས་རྒྱན་ལས། གཞི་དང་དེ་ཡི་གཉེན་པོ་ཡི། ། གཟུང་བར་རྟོག་པ་རྣམ་པ་གཉིས། རྨོངས་དང་ཕུང་སོགས་བྱེ་བྲག་གིས། ། དེ་ནི་སོ་སོར་རྣམ་པ་དགུ ། རང་དབང་བདག་སོགས་ངོ་བོ་དང་། ། དེ་བཞིན་ཕུང་སོགས་རྟེན་སྒོ་ནས། ། རྫས་དང་བཏགས་པའི་རྟེན་ཅན་གྱི། ། འཛིན་པའང་རྣམ་པ་གཉིས་སུ་འདོད། ། ཞེས་གསུངས་པ་ལྟར་རོ། ། ངེས་འབྱེད་འདི་དག་བློ་གང་དུ་འདུ་ཞེ་ན། ཤེས་རབ་གསུམ་གྱིས་གོམས་པར་བྱས་པའི་རང་རིག་གཙོ་ཆེ་བ་ཉིད་དེ། དཔེར་ན་འདོད་ཆགས་ལ་སོགས་པ་ལ་གོམས་པའི་རང་རིག་བཞིན་ནོ། ། 5. སྤང་རྟོགས་ཀྱི་ཁྱད་པར་ནི། ཀུན་ཏུ་བརྟགས་པའི་སྒྲིབ་པ་གནོན་པས་སྤོང་། ། བདག་མེད་གཉིས་ཀྱི་ཚུལ་ལ་རྟོགས་པས་ཞུགས། ། ཉོན་མོངས་པ་དང་ཤེས་བྱའི་སྒྲིབ་པ་ཀུན་བརྟགས་པ་རྣམས་རྣམ་པར་གནོན་པའི་ཚུལ་གྱིས་སྤོང་ཞིང་། བདེན་པ་རྣམས་ལ་ཆོས་ཀྱི་བདག་གི་ཕྱེད་གཟུང་བ་རང་བཞིན་མེད་པར་རྟོགས་པའོ། ། ཡང་ཐེག་ཆེན་པ་འགའ་ཞིག་ཐེག་པ་གསུམ་གྱི་སྦྱོར་ལམ་གྱིས་འདི་ལྟར་རྟོགས་པར་འདོད་དེ། ཉན་ཐོས་ཀྱི་དྲོད་ཙེས་གང་ཟག་གི་བདག་གི་གཟུང་བ་དང་། བཟོད་མཆོག་གིས་གང་ཟག་གི་བདག་གི་འཛིན་པ་རང་བཞིན་མེད་པར་རྟོགས། རང་རྒྱལ་གྱི་དྲོད་རྩེས་གང་ཟག་དང་ཆོས་ཀྱི་བདག་གི་ཕྱོགས་རེ་རེའི་གཟུང་བ་དང་། བཟོད་མཆོག་གིས་བདག་དེ་གཉིས་ཀྱི་ཕྱོགས་རེ་རེའི་འཛིན་པ་རང་བཞིན་མེད་པར་རྟོགས། བྱང་སེམས་ཀྱི་དྲོད་རྩེས་གང་ཟག་དང་ཆོས་ཀྱི་བདག་གཉིས་ཀའི་གཟུང་བ་དང་། བཟོད་མཆོག་གིས་བདག་དེ་གཉིས་ཀྱི་འཛིན་པ་རང་བཞིན་མེད་པར་རྟོགས་པར་བཞེད། འཕགས་པ་ཀླུ་སྒྲུབ་ཐེག་པ་གསུམ་གའི་སྦྱོར་ལམ་ལ་ཐབས་ཀྱི་ཁྱད་པར་དང་ངེས་འབྱེད་བཞིའི་རང་རང་གི་དམིགས་པ་གསལ་མི་གསལ་གྱི་ཁྱད་པར་མ་གཏོགས་བདག་མེད་རྟོགས་པ་ལ་ཁྱད་པར་མི་བཞེད་དེ། ཤེར་ཕྱིན་གྱི་མདོ་ལས། ཉན་ཐོས་ཀྱི་ས་ལ་སློབ་པར་འདོད་པས་ཀྱང་ཤེས་རབ་ཀྱི་ཕ་རོལ་དུ་ཕྱིན་པ་འདི་ལ་བསླབ་པར་བྱའོ། ། ཞེས་དང་། སྡུད་པ་ལས། གང་དག་བདེ་གཤེགས་ཉན་ཐོས་འགྱུར་བར་བྱ་སྙམ་དང་། ། རང་སངས་རྒྱས་དང་དེ་བཞིན་ཆོས་རྒྱལ་འགྱུར་འདོད་པ། ། བཟོད་པ་འདི་ལ་མ་བརྟེན་ཐོབ་པར་མི་ནུས་ཏེ། ། ཞེས་སོགས་བཀའ་རྒྱས་འབྲིང་རྣམས་ལས་གསུངས་པའི་དགོངས་པའོ། ། 6. ཡོན་ཏན་བརྗོད་པ་ནི། མི་འཆད་མི་ལྟུང་ལ་སོགས་ཡོན་ཏན་ལྡན། ། དེའང་མདོ་སྡེ་རྒྱན་ལས། རྩེ་མོ་ཐོབ་པས་རྩ་མི་འཆད། ། བཟོད་ཐོབ་ངན་སོང་སོགས་མི་ལྟུང་། ། ཞེས་སོགས་གསུངས་པ་དང་། མདོ་དཀོན་མཆོག་སྤྲིན་ལས། སོ་སོ་སྐྱེ་བོའི་རྒུད་པ་ལས་གྲོལ་ཞིང་ཏིང་ངེ་འཛིན་དང་གཟུངས་དང་རྣམ་པར་ཐར་པ་དང་མངོན་པར་ཤེས་པ་ལ་སོགས་པ་ཡོན་ཏན་དུ་མ་དང་ལྡན་པར་གསུངས་པ་དང་། ཡུམ་དང་རྒྱན་ལས་དབང་པོ་རྣོན་པོས་རྫོགས་པའི་བྱང་ཆུབ་ལས་ཕྱིར་མི་ལྡོག་པའི་རྟགས་ཐོབ་པར་གསུངས་པ་སོགས་སོ། ། 7. བྱེད་ལས་གང་ཡིན་ནི། བདག་ཏུ་འཛིན་སྤོང་དང་པོའི་རྟོགས་པ་སྐྱེད། ། འཇིག་རྟེན་པའི་སྒོམ་བྱུང་གི་ཤེས་རབ་ངེས་པར་འབྱེད་པའི་ཆ་དང་མཐུན་པ་བཞི་པོ་དེས། གང་ཟག་དང་ཆོས་ལ་བདག་ཏུ་འཛིན་པའི་ཕྱིན་ཅི་ལོག་བཞི་སྤོང་ཞིང་། མཐོང་ལམ་ས་དང་པོའི་རྟོགས་པ་སྐྱེད་པའོ། ། 8. ངེས་ཚིག་བསྟན་པ་ནི། ངེས་འབྱེད་ཆ་མཐུན་མོས་སྤྱོད་དོན་དམ་པ། ། མངོན་སུམ་རྟོགས་ལ་སྦྱོར་བ་ངེས་ཚིག་གོ ། མཐོང་ལམ་རྣམ་པར་མི་རྟོག་པའི་ཡེ་ཤེས་མེ་དང་འདྲ་བ་དེས་སོ་སོ་སྐྱེ་བོའི་ཕྱིན་ཅི་ལོག་གི་རྟོག་པ་ཐམས་ཅད་རྩད་ནས་འཇོམས་ཤིང་ངེས་པར་འབྱེད་པས་ན་ངེས་འབྱེད་དངོས་མཐོང་ལམ་ལ་བྱས་ནས་དེ་དང་ཆ་མཐུན་པའི་ཕྱིར་ངེས་འབྱེད་ཆ་མཐུན་དང་། ཆོས་ཉིད་ལ་མོས་པའི་སྟོབས་ཀྱིས་བཟོད་པར་སྤྱོད་པས་ན་མོས་སྤྱོད་ཀྱི་ས། འཇིག་རྟེན་པའི་སྒོམ་བྱུང་གི་ཤེས་རབ་དེས་གཟུང་འཛིན་གྱི་རྟོག་པ་རང་རྒྱུད་པ་དེ་དག་བཅད་ནས། འཇིག་རྟེན་ལས་འདས་པའི་ས་དང་པོ་མཐོང་ལམ་ཆོས་ཀྱི་དབྱིངས་དོན་དམ་པ་མངོན་སུམ་དུ་རྟོགས་པ་ལ་སྦྱོར་བའི་ལམ་ཡིན་པས་སྦྱོར་ལམ་ཞེས་བྱ་སྟེ་ངེས་ཚིག་གོ ། མོས་སྤྱོད་ནི་སྤྱིར་ཚོགས་སྦྱོར་གཉིས་ཀ་ལ་བཤད་དོ། །
Tibetan Source	《ཤེས་བྱ་ཀུན་ཁྱབ་》དེབ་སྨད་ཆ་ཤ་470.13ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number