8724

Tibetan	དགའ་ལྡན་ན་གནས་པའི་ལས་བཅུ།
Tibetan Alternate
Tibetan Definition	དེ་ཡང་། ཕལ་ཆེན་ལེའུ་ཞེ་གསུམ་པ་དེ་བཞིན་གཤེགས་པ་སྐྱེ་བ་འབྱུང་བ་བསྟན་པ་ལས་བྱུང་བ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་དགའ་ལྡན་ན་གནས་པའི་ལས་བཅུ་སྟེ། 1. འདི་ལྟར་འདོད་པའི་ཁམས་ཀྱི་ལྷའི་བུ་རྣམས་ལ་འདོད་པའི་དབེན་པ་བསྟན་པ་དང་། དབང་ཕྱུག་མི་རྟག་པ་བསྟན་པ་དང་། ཕུན་སུམ་ཚོགས་པ་ཐམས་ཅད་རྒུད་པར་འགྱུར་བ་བསྟན་པ་དང་། དེ་དག་བྱང་ཆུབ་ཀྱི་སེམས་ལ་ཡང་དག་པར་དགོད་པ་འདི་ནི་དགའ་ལྡན་ན་གནས་པའི་ལས་དང་པོའོ། ། 2. གཟུགས་ཀྱི་ཁམས་ཀྱི་ལྷའི་བུ་རྣམས་ལ་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་ལ་སྙོམས་པར་འཇུག་པ་དང་། རྣམ་པར་ལྡང་བ་སྟོན་ཅིང་། བསམ་གཏན་དང་། བསམ་གཏན་གྱི་ཡན་ལག་དེ་དག་ལ་མངོན་པར་ཞེན་པ་དང་། སྲེད་པས་བྱུང་བའི་འཇིག་ཚོགས་སུ་ལྟ་བ་དང་། གཏི་མུག་གི་ཤས་ཆེ་བའི་ཉོན་མོངས་པ་རྣམས་ཡང་དག་པ་ཇི་ལྟ་བ་བཞིན་དུ་བསྟན་པ་དང་། གཟུགས་དང་། གཟུགས་མེད་པའི་ཕྱིན་ཅི་ལོག་ལ་ཞུགས་པ་ཐམས་ཅད་ལ་སྡུག་པར་ཡིད་ལ་བྱེད་པ་ཐམས་ཅད་མི་སྡུག་ཅིང་མི་རྟག་པར་ཡོངས་སུན་བསྟན་ཏེ། བྱང་ཆུབ་ཀྱི་སེམས་ལ་དགོད་པ་འདི་ནི་དགའ་ལྡན་ན་གནས་པའི་ལས་གཉིས་པའོ། ། 3. དགའ་ལྡན་གྱི་གནས་རབ་ན་གནས་པའི་བྱང་ཆུབ་སེམས་དཔའ་རྣམས་ནི་རྒྱན་བཟང་པོའི་ཏིང་ངེ་འཛིན་ལ་གནས་ཏེ། ལུས་ལས་འོད་བཀྱེ་ཞིང་། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སྣང་བ་ཆེན་པོས་རྒྱས་པར་བཀང་ནས། སེམས་ཅན་རྣམས་ལ་དད་པ་ཇི་བཞིན་དུ་ཆོས་སྣ་ཚོགས་ཀྱི་སྒྲ་སྐད་རབ་ཏུ་བརྗོད་དེ། ཆོས་ཀྱི་སྒྲ་སྐད་དེ་དག་ཐོས་ནས། སེམས་དང་བར་གྱུར་ཏེ། དགའ་ལྡན་གྱི་ལྷ་དང་བརྟུལ་ཞུགས་མཐུན་པར་སྐྱེ་བར་འགྱུར་ཞིང་དེ་ལྟར་སྐྱེས་ནས་ཀྱང་། བྱང་ཆུབ་ཀྱི་སེམས་ལ་དགོད་པ་འདི་ནི་དགའ་ལྡན་ན་གནས་པའི་ལས་གསུམ་པའོ། ། 4. དགའ་ལྡན་གྱི་གནས་རབ་ན་གནས་པའི་བྱང་ཆུབ་སེམས་དཔའ་ནི་བྱང་ཆུབ་སེམས་དཔའི་མིག་བསྒྲིབས་པ་མེད་པས་ཕྱོགས་བཅུའི་དགའ་ལྡན་གྱི་གནས་རབ་ན་གནས་པའི་བྱང་ཆུབ་སེམས་དཔའ་རྣམས་ལ་ལྟ་སྟེ། བྱང་ཆུབ་སེམས་དཔའ་དེ་དག་གིས་ཀྱང་བྱང་ཆུབ་སེམས་དཔའ་དེ་མཐོང་ངོ་། ། མཐོང་ནས་ཀྱང་ཆོས་ཡང་དག་པར་བགྲོ་བ་ཆེན་པོ་དང་། ཡང་དག་པའི་ཆོས་ཀྱི་གཏམ་ཆེན་པོ་བྱེད་དོ། ། ཡུམ་གྱི་སྐུར་གཤེགས་པ་དང་། སྐྱེ་བ་དང་། འབྱུང་བ་དང་། སྙིང་པོ་བྱང་ཆུབ་ཀྱི་རྒྱུན་རྣམ་པར་དགོད་པ་ཡང་ཡང་དག་པར་བགྲོའོ། ། སྔོན་གྱི་སྤྱོད་པ་གང་གིས་ཡེ་ཤེས་ཀྱི་ཆེ་བ་ཉིད་དེ་ཐོབ་པར་གྱུར་པའི་སྔོན་གྱི་སྤྱོད་པ་དེ་དག་ཀྱང་རབ་ཏུ་བརྗོད་དེ། གནས་ནས་མི་གཡོ་ཡང་བྱ་བ་འདི་ལྟ་བུ་དག་སྟོན་པ་འདི་ནི་དགའ་ལྡན་ན་གནས་པའི་ལས་བཞི་པའོ། ། 5. དགའ་ལྡན་གྱི་གནས་རབ་ན་གནས་པའི་བྱང་ཆུབ་སེམས་དཔའི་དྲུང་དུ་བྱང་ཆུབ་སེམས་དཔའ་དེ་ལ་བལྟ་བ་དང་། ཕྱག་བྱ་བ་དང་། བསྙེན་བཀུར་བའི་ཕྱིར་ཕྱོགས་བཅུ་ནས་དགའ་ལྡན་གྱི་གནས་རབ་ན་འཁོད་པའི་བྱང་ཆུབ་སེམས་དཔའ་རྣམས་འོངས་སྟེ། བྱང་ཆུབ་སེམས་དཔའ་དེ་དག་གི་སེམས་དང་། བསམ་པ་ཡོངས་སུ་ཚིམ་པར་བྱ་བ་དང་། སྨོན་པ་ཡོངས་སུ་རྫོགས་པར་བྱ་བའི་ཕྱིར་ཆོས་ཡང་དག་པར་བགྲོ་བའི་སྒོ་ཆེན་པོ་ཡང་དག་པར་སྟོན་ཏེ། སོ་སོའི་ས་ལ་གནས་པའི་བྱང་ཆུབ་སེམས་དཔའ་རྣམས་ཀྱིས་གང་བྱ་བ་དང་། གང་སྤང་བ་དང་། གང་བསྒོམ་པ་དང་། གང་མངོན་དུ་བྱ་བ་དེ་དག་ཀྱང་ཡང་དག་པར་སྟོན་ཏོ། ། ཡང་དག་པར་བགྲོ་བའི་ཆོས་དེ་དག་ཐོས་ནས་བྱང་རབ་ཏུ་དགའ་ཞིང་མགུ་བ་དང་། རངས་པས་ལེགས་པར་བརྗོད་ཅིང་། རང་རང་གི་ཞིང་དང་། རང་རང་གི་གནས་སུ་འདོང་བར་འགྱུར་བ་འདི་ནི་དགའ་ལྡན་ན་གནས་པའི་ལས་ལྔ་པའོ། ། 6. དགའ་ལྡན་གྱི་གནས་རབ་ན་གནས་པའི་གན་དུ་ནམ་བདུད་སྡིག་ཅན་འདོད་པའི་ཁམས་ཀྱི་དབང་པོ་འཁོར་མང་པོས་ཡོངས་སུ་བསྐོར་ཞིང་གླགས་བཙལ་བའི་ཕྱིར་འོངས་པར་གྱུར་ན་ཡང་དེའི་ཚེ། བྱང་ཆུབ་སེམས་དཔའ་བདུད་ཐམས་ཅད་ཚར་གཅོད་པ་ཞེས་བྱ་བའི་རྡོ་རྗེའི་ཚིག་ལ་གནས་ཤིང་། ཤེས་རབ་ཀྱི་ཕ་རོལ་ཏུ་ཕྱིན་པ་དང་། ཐབས་མཁས་པས་ཡང་དག་པར་བཟུང་བའི་ཡེ་ཤེས་ཀྱི་སྒོས་མཉམ་ཞིང་མཉེན་པའི་མཐའ་གཉིས་བཟུང་ནས། ཅི་ནས་ཀྱང་བདུད་སྡིག་ཅན་གྱིས་གླགས་རྙེད་པར་མི་འགྱུར་བ་དེ་ལྟ་དེ་ལྟར་བྱིན་གྱིས་རློབ་བོ། ། དེ་ལྟ་དེ་ལྟར་ཆོས་ཀྱང་སྟོན་ཏེ། བདུད་ཀྱི་འཁོར་ཆེན་པོ་དེས་བྱང་ཆུབ་སེམས་དཔའི་རྣམ་པར་འཕྲུལ་བ་དེ་ལྟ་བུ་མཐོང་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་འགྱུར་བ་འདི་ནི་དགའ་ལྡན་ན་གནས་པའི་ལས་དྲུག་པའོ། ། 7. བྱང་ཆུབ་སེམས་དཔའ་དགའ་ལྡན་གྱི་གནས་རབ་ན་གནས་པ་ནི་གང་གི་ཚེ། འདི་ལྟར་འདོད་པའི་ཁམས་ཀྱི་ལྷའི་བུ་འདི་རྣམས་ཆོས་མཉན་པ་དང་། ཡང་དག་པར་བགྲོ་བས་སྐྱོ་བར་གྱུར་ཏོ། ། ཞེས་བྱ་བར་ཤེས་པར་གྱུར་པ་དེའི་ཚེ། འདོད་པའི་ཁམས་ཀྱི་གནས་ཐམས་ཅད་དུ་སྒྲ་སྒྲོག་ཅིང་དབྱངས་འབྱིན་ཏེ། གྲོགས་པོ་དག དེ་རིང་བྱང་ཆུབ་སེམས་དཔའ་བཙུན་མོའི་འཁོར་ཆེན་པོ་སྟོན་པ་མཛད་ཀྱི། བལྟ་བར་སུ་འདོད་པ་དེ་དག་མྱུར་དུ་ཤེག་ཅིག་ཅེས་ནས། དེར་ལྷའི་བུ་བྱེ་བ་ཁྲག་ཁྲིག་བརྒྱ་སྟོང་ཀུན་ནས་འདུ་བར་འགྱུར་ཏེ། དེ་དག་དང་བྱང་ཆུབ་སེམས་དཔའ་རྣམས་ཀུན་ནས་འདུས་པར་གྱུར་ནས་ཀྱང་། ལྷའི་བུ་དེ་དག་གིས་སྔོན་ཆད་མ་མཐོང་། མ་ཐོས་པའི་བཙུན་མོའི་འཁོར་དེ་ལྟ་བུ་བསྟན་ནས། དེ་དག་ནམ་དགའ་བས་མོས་པར་གྱུར་པ་དེའི་ཚེ། དེ་དག་གིས་རོལ་མོ་བརྡུང་བ་དང་། དཀྲོལ་བ་དེ་དག་ལས། ཀྱེ་གྲོགས་པོ་རྣམས། འདུ་བྱེད་ཐམས་ཅད་ནི་མི་རྟག་གོ། འདུ་བྱེད་ཐམས་ཅད་ནི་སྡུག་བསྔལ་བའོ། ། ཆོས་ཐམས་ཅད་ནི་བདག་མེད་པའོ། ། མྱ་ངན་ལས་འདས་པ་ནི་ཞི་བའོ་ཞེས་སྒྲ་འབྱུང་བ་དང་། བྱང་ཆུབ་སེམས་དཔའ་སྤྱོད་པས་ནི་ཐམས་ཅད་མཁྱེན་པའི་ཡེ་ཤེས་ཡོངས་སུ་རྫོགས་པར་འགྱུར་རོ་ཞེས་བྱ་བའི་སྒྲ་འབྱུང་བ་ཐོས་པར་འགྱུར་ཏེ། དེ་དག་གིས་ཆོས་ཀྱི་སྒྲ་དེ་ཐོས་པ་དང་སྐྱོ་བ་སྐྱེ་བར་གྱུར་ཏེ། བྱང་ཆུབ་ཀྱི་སེམས་ལ་ཡང་དག་པར་གཞོལ་བར་འགྱུར་བ་འདི་ནི་དགའ་ལྡན་ན་གནས་པའི་ལས་བདུན་པའོ། ། 8. བྱང་ཆུབ་སེམས་དཔའ་དགའ་ལྡན་གྱི་གནས་རབ་ན་འདུག་པ་ནི། དགའ་ལྡན་གྱི་གནས་ནས་ཀྱང་ལུས་མི་སྣང་བར་མ་གྱུར་ལ། ཕྱོགས་བཅུར་ཡང་དེ་བཞིན་གཤེགས་པ་རྣམས་ལ་བལྟ་བ་དང་། ཕྱག་བྱ་བ་དང་། བསྙེན་བཀུར་བ་དང་། ཆོས་མཉན་པའི་ཕྱིར་འགྲོ་སྟེ། དེ་ལ་སངས་རྒྱས་བཅོམ་ལྡན་འདས་དེ་དག་གིས་བྱང་ཆུབ་སེམས་དཔའི་ས་མངོན་པར་དབང་བསྐུར་བ་ཐོབ་པའི་མཆོག་ཏུ་ཕྱིན་པས། ཐམས་ཅད་མངོན་པར་ཤེས་པ་ཞེས་བྱ་བ་ཡང་དག་པར་བསྟན་པར་འགྱུར་བ་དང་། ཐམས་ཅད་མཁྱེན་པའི་ཡེ་ཤེས་ཡན་ལག་དང། ཉེ་བའི་ཡན་ལག་ཐམས་ཅད་དང་ལྡན་ཞིང་། རྣམ་པའི་མཆོག་ཐམས་ཅད་དང་ལྡན་པ་ལ་འཇུག་པ་སེམས་ཀྱི་སྐད་ཅིག་གིས་སྦྱོར་བ་ཡང་དག་པར་བསྟན་པར་འགྱུར་བ་འདི་ནི་དགའ་ལྡན་ན་གནས་པའི་ལས་བརྒྱད་པའོ། ། 9. བྱང་ཆུབ་སེམས་དཔའ་དགའ་ལྡན་གྱི་གནས་རབ་ན་གནས་པའི་མཐུས། ཁྱད་པར་འདོད་པ་ཞེས་བྱ་བའི་དེ་བཞིན་གཤེགས་པའི་མཆོད་པ་དང་། རིམ་གྲོ་རྣམ་པ་ཚད་མེད་པས་རྣམ་པར་དག་པ་མཐའ་ཡས་པའི་རྣམ་པ་ཡོངས་སུ་སྟོན་པ། ཆོས་ཀྱི་དབྱིངས་ཀྱིས་ཀླས་པ། ནམ་མཁའི་མཐས་གཏུགས་པ། འཇིག་རྟེན་གྱི་ཁམས་འབྱམས་ཀླས་པའི་དེ་བཞིན་གཤེགས་པའི་མཆོད་པའི་ལས་ཀྱི་དོན་དུ་འབྱུང་སྟེ། འཁོད་པ་དེ་མཐོང་ནས་སེམས་ཅན་གྲངས་མེད་ཚད་མེད་པ་རྣམས་བླ་ན་མེད་པ་ཡང་དག་པ་རྫོགས་པའི་བྱང་ཆུབ་ཏུ་སེམས་བསྐྱེད་དེ། འདི་ནི་དགའ་ལྡན་ན་གནས་པའི་ལས་དགུ་པའོ། ། 10 .བྱང་ཆུབ་སེམས་དཔའ་དགའ་ལྡན་གྱི་གནས་རབ་ན་གནས་པ་མཐའ་དང་དབུས་མེད་པའི་ཆོས་སྒྱུ་མ་ལ་ཞུགས་པ་ནི། མིག་ཡོར་ལྟ་བུས་ཤིན་ཏུ་བསྒྲུབས་པའི་ཡེ་ཤེས་ཀྱི་འཇིག་རྟེན་གྱི་ཁམས་འབྱམས་ཀླས་པ་ཐམས་ཅད་དུ་གཟུགས་སྣ་ཚོགས་དང་། ཁ་དོག་སྣ་ཚོགས་དང་། དབྱིབས་སྣ་ཚོགས་དང་། སྤྱོད་ལམ་སྣ་ཚོགས་དང་། བྱ་བ་སྣ་ཚོགས་དང་། སྦྱོར་བ་སྣ་ཚོགས་དང་། བསྟན་པ་མངོན་པར་བསྒྲུབ་པ་སྣ་ཚོགས་དང་། དགོད་པ་རྣམ་པ་སྣ་ཚོགས་ཀྱིས། སེམས་ཅན་རྣམས་མོས་པ་ཇི་ལྟ་བ་བཞིན་དུ་སེམས་དང་། བསམ་པ་མགུ་བར་བྱ་བའི་ཕྱིར། ཆོས་སྟོན་ཅིང་གཟུགས་ཡོངས་སུ་སྟོན་ཏེ། འདི་ནི་དགའ་ལྡན་ན་གནས་པའི་ལས་བཅུ་པའོ། །
Tibetan Source	《ཕལ་ཆེན་ང་པ་》ཤ་355བ་4ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number