8788

Tibetan	ང་རྒྱལ་གྱི་ལས་བཅུ།
Tibetan Alternate
Tibetan Definition	དེ་ཡང་། ཕལ་ཆེན་ལེའུ་ཞེ་གསུམ་པ་དེ་བཞིན་གཤེགས་པ་སྐྱེ་བ་འབྱུང་བ་བསྟན་པ་ལས་བྱུང་བ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ང་རྒྱལ་གྱི་ལས་བཅུ་སྟེ། 1. འདི་ལྟར་བླ་མ་དང་། སྦྱིན་པའི་གནས་དང་། ཕ་དང་། མ་དང་། དགེ་སྦྱོང་དང་། བྲམ་ཟེ་དང་། ཡང་དག་པར་སོང་བ་དང་། ཡང་དག་པར་ཞུགས་པ་ལ་རིམ་གྲོ་མེད་པ་ནི་ང་རྒྱལ་གྱི་ལས་སོ། ། 2. ཆོས་སྨྲ་བ་དང་། ཁྱད་པར་གྱི་ཆོས་ཁོང་དུ་ཆུད་པ་དང་། ཆོས་རྒྱ་ཆེན་པོ་སྟོན་པ་དང་། ཐེག་པ་ཆེན་པོ་ལ་ཡང་དག་པར་གནས་པ་དང་། འབྱུང་བའི་ལམ་གྱི་ཚུལ་ཤེས་པ་དང་། གཟུངས་དང་། མདོ་སྡེ་ལ་ཤིན་ཏུ་བྱང་བ་རྣམས་ལ་མི་འདུད་དེ་ཁེངས་ཤིང་འགྱིང་ལ། ཆོས་དང་ཆོས་སྨྲ་བ་ལ་གུས་པ་མི་སྐྱེད་པ་དང་། གུས་པར་མི་ཉན་པ་དང་། ཞེ་ས་མི་བྱེད་པ་ནི་ང་རྒྱལ་གྱི་ལས་སོ། ། 3. ཆོས་མཉན་པ་དང་། ཡང་དག་པའི་གཏམ་བྱ་བར་འཇུག་པ་ལས་ཆོས་ཀྱི་ཤུགས་ཆེན་པོ་སྐྱེས་ཀྱང་ཆོས་སྨྲ་བ་ལ་ལེགས་སོ་ཞེས་བྱ་བ་མི་སྟེར་ཞིང། ལ་ལ་ཞིག་འདི་ལ་དད་པར་འགྱུར་དུ་འོང་ངོ་སྙམ་པ་ནི་ང་རྒྱལ་གྱི་ལས་སོ། ། 4. ལྷག་པའི་ང་རྒྱལ་བསྐྱེད་དེ། བདག་གི་གཟེངས་བསྟོད་ཅིང་གཞན་གྱི་ཉམས་སྨོད་པ་དང་། རང་གི་དྲོད་མི་འཛིན་ཅིང་སེམས་ངེས་པར་རྟོགས་པ་མི་སྐྱེད་པ་ནི་ང་རྒྱལ་གྱི་ལས་སོ། ། 5. མཐོ་བའི་ང་རྒྱལ་བསྐྱེད་དེ། ཤེས་བཞིན་ཁོང་དུ་ཆུད་བཞིན་དུ་བསྔགས་པར་འོས་པའི་གང་ཟག་རྣམས་ཀྱི་ལེགས་པ་འཆབ་པ་དང་། མི་སྙན་པར་བརྗོད་ཅིང་གཞན་གྱི་ཡོན་ཏན་བསྔགས་པས་དགའ་བར་མི་འགྱུར་བ་འདི་ནི་ང་རྒྱལ་གྱི་ལས་སོ། ། 6. འདི་ནི་ཆོས་སོ། ། འདི་ནི་འདུལ་བའོ། ། འདི་ནི་ཡང་དག་པར་སངས་རྒྱས་ཀྱི་བཀའ་ཡིན་ནོ་ཞེས་བྱ་བར་ཡང་ཤེས་ལ། གང་ཟག་ལ་ཞེ་སྡང་ཞིང་ཆོས་ལ་ཞེ་སྡང་བ་དང་། ཆོས་སྤོང་བ་དང་གཞན་ཡང་དཔའ་བས་ལྡོག་པར་བྱེད་པ་ནི་ང་རྒྱལ་གྱི་ལས་སོ། ། 7. སྟན་མཐོན་པོ་འདོད་ཅིང་གཅེས་པར་བྱ་བའི་ཆོས་ཚོལ་བ་དང། གཞན་གྱིས་རིམ་གྲོ་བྱ་བར་སྡོད་ཅིང་མངོན་པར་དགའ་བ་དང་། གནས་བརྟན་རྒན་པ་ཚངས་པའི་སྤྱོད་པ་ཡུན་རིང་དུ་སྤྱོད་པ་རྣམས་ལ་མི་ལྡང་ཞིང་མི་བསུ་བ་དང་། བསྙེན་བཀུར་མི་བྱེད་པ་ནི་ང་རྒྱལ་གྱི་ལས་སོ། ། 8. བཞིན་ཁྲོ་གཉེར་ཅན་དུ་བྱས་ཤིང་མི་འཛུམ་པ་དང་། ཚིག་འཇམ་ཞིང་མཉེན་པ་མེད་ལ་རྟག་ཏུ་ཁེངས་པའི་སེམས་ཀྱིས་ཀླན་ཀ་ཚོལ་ཞིང་གླགས་ལྟ་བ་ནི་ང་རྒྱལ་གྱི་ལས་སོ། ། 9. ལྷག་པའི་ང་རྒྱལ་དུ་ལྷུང་ཞིང་མཁས་པའི་དྲུང་དུ་མི་འགྲོ། མི་སྟེན། མི་བསྙེན། རིམ་གྲོ་མི་བྱེད་ཅིང་། དགེ་བ་ནི་གང་། མི་དགེ་བ་ནི་གང་། བྱ་བ་ནི་ཅི། མི་བྱ་བ་ནི་ཅི། ཅི་ཞིག་བྱས་ན་ཡུན་རིང་པོར་དོན་དང་། བདེ་བ་དང་། ཕན་པར་འགྱུར་ཞེས་མི་འདྲི། མི་དཔྱོད་དེ། དེ་རྨོངས་པ་ལས་ཀྱང་ཆེས་རྨོངས་པར་གྱུར་ནས། གཏི་མུག་གིས་སློང་ཞིང་ང་རྒྱལ་གྱིས་བརྒྱལ་ཏེ། འབྱུང་བ་མི་མཐོང་བ་ནི་ང་རྒྱལ་གྱི་ལས་སོ། ། 10 .དེ་མངོན་པའི་ང་རྒྱལ་གྱིས་ཟིལ་གྱིས་ནོན་པས་སངས་རྒྱས་སྐྱེ་བ་མཉེས་པར་མི་བྱེད་པ་དང་། སྔོན་གྱི་དགེ་བའི་རྩ་བ་ཟད་པར་བྱེད་ཅིང་། གསར་དུ་མི་སྒྲུབ་ལ། མི་བཤད་པ་འཆད་པ་དང་། འཐབ་མོ་བྱེད་ཅིང་རྩོད་པ་མང་བར་གྱུར་ཏེ། དེ་དེ་ལྟ་བུའི་ཆོས་ལ་མང་དུ་སྤྱོད་པས་འདོད་ང་རྒྱལ་ཆེན་པོར་ལྷུང་བའི་གནས་སུ་གྱུར་ཀྱང་། བྱང་ཆུབ་སེམས་དཔའི་སྟོབས་དང་ཤུགས་ཀྱིས་དེ་ད་དུང་དབང་ཕྱུག་ཐོབ་པར་འགྱུར་ཡང་། བསྐལ་པ་བརྒྱ་སྟོང་དུ་མར་སངས་རྒྱས་སྐྱེ་བ་མཐོང་བར་ཡང་མི་འགྱུར་ན། ཆོས་ཉན་པ་ལྟ་སྨོས་ཀྱང་ཅི་དགོས་ཏེ། འདི་ནི་ང་རྒྱལ་གྱི་ལས་སོ། །
Tibetan Source	《ཕལ་ཆེན་ང་པ་》ཤ་351བ་2ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number