9133

Tibetan	རྣམ་བཅུ་དབང་ལྡན་རྒྱུ་རྒྱུད་ཀྱི་གཤིས་ལ་ཡེ་ཤེས་ཀྱི་ཚུལ་དུ་ཇི་ལྟར་ལྡན་ཚུལ།
Tibetan Alternate
Tibetan Definition	1.རྣམ་བཅུ་དབང་ལྡན་དེ་ཉིད་རྒྱུ་རྒྱུད་ཀྱི་གཤིས་ལ་ཡེ་ཤེས་ཀྱི་ཚུལ་དུ་ཇི་ལྟར་ལྡན་ཚུལ་ནི། རྒྱུའི་རྒྱུད་སེམས་རང་བཞིན་གྱིས་འོད་གསལ་བ་དེ་ཉིད་ལ་རྫས་རིས་ཐ་དད་པའི་དབྱེ་བ་མེད་ཀྱང་ལྡོག་པའི་ངོས་ནས་ཕྱེ་ན་འོད་གསལ་དེ་ཉིད་ཀྱི་སྒྲིབ་པ་མེད་པའི་ཆ་རྣམ་པའམ་རྟགས་སམ་སྣང་བ་བཅུའི་ངོ་བོར་གནས་པ། མ་དག་པའི་སྣོད་བཅུད་རྣམ་བཅུ་དབང་ལྡན་གྱི་སྣང་བ་མཐའ་དག་འཆར་བའི་གཞིར་གྲུབ་པ་དག་གོ ། 2. དེའི་རྣམ་འགྱུར་རྣམ་ཤེས་ལས་འཁོར་བའི་སྣོད་བཅུད་ཀྱི་རྣམ་བཅུ་དབང་ལྡན་ཇི་ལྟར་འཆར་བའི་ཚུལ་ལ་གཉིས་ཏེ། (1)ཁྱབ་བྱེད་ནི། སྐུ་ཟླ་བ་གཞན། ཡེ་ཤེས་ཉི་མ་གཞན། ཁམས་ལྔ། དེ་རྣམས་ཚོགས་པའི་བརྟན་གཡོ་ཕྲ་བའི་ས་བོན་གསུམ་སྟེ་བཅུའོ། ། (2)ཁྱབ་བྱ་ལ་གསུམ་སྟེ། [1]གཞིའི་དབང་དུ་བྱས་པ་ལ་གཉིས་ཏེ། < 1 > ཕྱི་ལ་སྦྱར་ན། སྲོག་གི་ཨས་ཕྱི་རོལ་གྱི་ནམ་མཁའ། ཡ་ར་ཝ་ལ་བཞིས་རླུང་མེ་ཆུ་སའི་དཀྱིལ་འཁོར། མ་ཡིས་ཁམས་ལྔའི་བདག་ཉིད་ཀྱི་ལྷུན་པོ། ཀྴས་འདོད་པ་དང་གཟུགས་ཀྱིས་བསྡུས་པའི་གཡོ་བའི་ཚོགས། ཧས་གཟུགས་མེད་བཞི། ཟླ་ཚེས་ཐིག་ལེ་ནཱ་ད་གསུམ་གྱིས་འཇིག་རྟེན་གྱི་ཁམས་བརྒྱན་པར་བྱེད་པའི་ཟླ་ཉི་སྒྲ་གཅན་གསུམ་རྣམས་མཚོན་པས་ཕྱི་འཇིག་རྟེན་ཁམས་ཀྱི་རྣམ་བཅུ་དབང་ལྡན་གྱི་ཚུལ་དུ་གྲུབ་བོ། ། <2> ནང་ལ་སྦྱོར་ན། སྐྱེས་བུའི་ལུས་ཀྱི་རྐང་མཐིལ། རྗེ་ངར། པུས་མོ། དཔྱི་མཚམས་རྣམས་ཡ་ར་ཝ་ལ་སྟེ་རླུང་མེ་ཆུ་ས་བཞི། རྒལ་ཚིགས་མ་སྟེ་ལྷུན་པོ། མགྲིན་པ་ནས་དཔྲལ་བའི་འཁོར་ལོའི་བར་ཀྵ་སྟེ་འདོད་གཟུགས་གཉིས། གཙུག་ཏོར་ཧ་སྟེ་གཟུགས་མེད། ནང་གི་རོ་རྐྱང་དབུ་མ་གསུམ་ཟླ་ཚེས་ཐིག་ལེ་ནཱ་ད་སྟེ་ཟླ་ཉི་སྒྲ་གཅན་གསུམ་མོ། ། དེ་ལྟར་ན་རྡོ་རྗེའི་ལུས་ཀྱི་རྣམ་བཅུ་དབང་ལྡན་གྱི་ངོ་བོར་གྲུབ་བོ། ། [ 2 ] ལམ་གྱི་དབང་དུ་བྱས་པ་ལ་ཡང་བསྐྱེད་རྫོགས་གཉིས་ཏེ། <1>བསྐྱེད་རིམ་གྱི་དབང་དུ་བྱས་པ་ནི། རྟེན་གཞལ་ཡས་ཁང་གི་འོག་གཞི་རླུང་མེ་ཆུ་སའི་དཀྱིལ་འཁོར་བཞི་ཡ་ར་ཝ་ལ། རི་རབ་གཞལ་ཡས་ཁང་དང་བཅས་པ་མ། བརྟེན་པ་སྐུ་གསུང་ཐུགས་ཀྱི་ལྷ་རྣམས་ཀྴ། ཐུགས་དཀྱིལ་གྱི་ལྷ་རྣམས་ཧ། བདེ་ཆེན་འཁོར་ལོའི་སྐུ་གསུང་ཐུགས་ཟླ་ཚེས་ཐིག་ལེ་ནཱ་ད་སྟེ་རྟེན་བརྟེན་པའི་ལྷ་བསྐྱེད་པའི་རིམ་པ་ཡང་རྣམ་བཅུ་དབང་ལྡན་གྱི་རང་བཞིན་ཡིན་ནོ། ། <2> རྫོགས་རིམ་ལ་སྦྱར་ན། རྣལ་འབྱོར་ཡན་ལག་དྲུག་གི་སོར་བསམ་དུ་སོགས་ཀྱི་རྟགས་རྣམ་བཅུ་དབང་ལྡན་ཡིན་ཞིང་། དེ་བཞིན་དུ་སྲོག་འཛིན་དུ་གཡས་གཡོན་གྱི་དཀྱིལ་འཁོར་བཅུ་འགོག་པ་དང་། རྗེས་དྲན་དུ་འདོད་པའི་གནས་སྐབས་བཅུ་ལམ་དུ་བྱེད་པ་དང་། ཏིང་ངེ་འཛིན་དུ་ཕུང་ལྔ་དང་ཁམས་ལྔ་སྟེ་བཅུ་སྒྲིབ་བྲལ་དུ་བྱེད་པ་རྣམས་རྣམ་བཅུ་དབང་ལྡན་ཡིན་པས་མཚོན་ནོ། ། [3]འབྲས་བུའི་དབང་དུ་བྱས་པ་ནི། གཞི་ལ་གནས་པ་དེ་ཉིད། སྒྱུ་འཕྲུལ་དྲ་བ་ལས། རྣམ་བཅུ་དབང་ལྡན་ཆེ་བ་པོ། ། ཐོག་མ་མེད་པ་སྤྲོས་མེད་བདག ། ཅེས་སོགས་ཀྱི་མཚན་ཉིད་ཅན་དུ་གྱུར་པ་ལ་བྱའོ། ། རྒྱུའི་རྒྱུད་དེ་ཉིད་ཕྱི་ནང་གཞན་གསུམ་གྱི་དུས་ཀྱི་འཁོར་ལོར་འཆར་བའི་ཚུལ་མདོར་བསྡུས་ན། ཀུན་གཞི་རྒྱུའི་རྒྱུད་ལུས་ཡོངས་སུ་རྫོགས་པ་ཨེ་ཝྃ་ཟུང་དུ་འཇུག་པ་དེ་ཉིད་ལ་དཔལ་དུས་ཀྱི་འཁོར་ལོ་ཞེས་བརྗོད་ཅིང་། དེའི་དུས་ནི་མི་འགྱུར་བའི་བདེ་བ་དང་། འཁོར་ལོ་ནི་རྣམ་ཀུན་མཆོག་ལྡན་གྱི་སྟོང་ཉིད་ཡིན་ལ། བདེ་སྟོང་གཉིས་སུ་མེད་པའི་དོན་གྱིས་ན་དཔལ་ཞེས་བྱ་བ་སྟེ། དེ་ལྟ་བུའི་དུས་ཀྱི་འཁོར་ལོ་དེ་ཉིད་ཕྱི་འཇིག་རྟེན་གྱི་ཁམས། ནང་རྡོ་རྗེའི་ལུས། གཞན་དཀྱིལ་འཁོར་གྱི་འཁོར་ལོའི་ཆོས་སུ་འཆར་བ་ཡིན་ནོ། །
Tibetan Source	《ཤེས་བྱ་ཀུན་ཁྱབ་དེབ་བར་ཆ》ཤ་653.10ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number