9194

Tibetan	ཕྱག་རྒྱ་བཅུ།
Tibetan Alternate
Tibetan Definition	དེ་ཡང་། ཕལ་ཆེན་ལེའུ་ཞེ་གསུམ་པ་དེ་བཞིན་གཤེགས་པ་སྐྱེ་བ་འབྱུང་བ་བསྟན་པ་ལས་བྱུང་བ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཕྱག་རྒྱ་བཅུ་སྟེ། 1. འདི་ལ་བྱང་ཆུབ་སེམས་དཔའ་འདུ་བྱེད་ཀྱི་སྡུག་བསྔལ་དང་། འགྱུར་བའི་སྡུག་བསྔལ་ཤེས་ཀྱང་། སངས་རྒྱས་ཀྱི་ཆོས་ཡོངས་སུ་བཙལ་བས་སྒྱིད་ལུག་པར་བྱེད་པར་འགྱུར་བ་མེད་ཅིང་། བྱང་ཆུབ་སེམས་དཔའི་སྤྱོད་པ་ལ་ཞུམ་པར་འགྱུར་བ་མེད་ལ། མི་འཇིགས། མི་སྐྲག ། སྐྲག་པར་མི་བྱེད་དེ། སྨོན་ལམ་ལས་ཕྱིར་མི་ལྡོག་ཅིང་། ཐམས་ཅད་མཁྱེན་པ་ཉིད་དུ་སེམས་བསྐྱེད་པ་རྒྱུན་མི་གཅོད་ཅིང་། སངས་རྒྱས་ཀྱི་ཆོས་ཡོངས་སུ་བཙལ་བ་ལ་མཐར་ཐུག་པ་མེད་པ་འདི་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འགྱུར་བའི་ཕྱག་རྒྱ་དང་པོའོ། ། 2. གཞན་ཡང་བྱིས་པ་སོ་སོའི་སྐྱེ་བོ་རང་གི་ཀུན་ནས་ཉོན་མོངས་པས་ཤིན་ཏུ་འཁྲུགས་པར་གྱུར་པ་དེ་དག་བྱང་ཆུབ་སེམས་དཔའ་ལ་མི་སྙན་པར་བརྗོད་ཅིང་། ངན་དུ་ཟེར་ལ། མི་ཚུལ་བ་དང་། རྩུབ་པའི་ངག་འབྱིན་ཅིང་། སྡིགས་ར་བྱེད་པ་དང་། རྡོ་དང་། དབྱིག་པ་དང་། མཚོན་ཆས་བརྡེག་ཅིང་འདེབས་ཀྱང་། དེའི་རྒྱུས་བྱང་ཆུབ་སེམས་དཔའ་སྤྱོད་པ་དང་། སངས་རྒྱས་ཀྱི་ཆོས་ཡོངས་སུ་བཙལ་བ་ལས་སྐྱོ་བར་མི་འགྱུར་ལ། བཟོད་པ་དང་། མོས་པ་མང་བར་སྤྱོད་ཅིང་། ཆོས་སྐྱོན་མེད་པ་ཡང་དག་པར་ཇི་ལྟ་བ་བཞིན་དུ་རྟོགས་པའི་བཟོད་པ་དང་ལྡན་པ་འདི་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འགྱུར་བའི་ཕྱག་རྒྱ་གཉིས་པའོ། ། 3. གཞན་ཡང་བྱང་ཆུབ་སེམས་དཔའ་སངས་རྒྱས་ཀྱི་ཆོས་ཟབ་མོ་ཐམས་ཅད་མཁྱེན་པ་ཉིད་དང་ལྡན་པ་བསྟན་པའི་ཚེ། ཁོང་ནས་ཤེས་པས་འཇུག་ཅིང་མོས་པ་དང་། ཡིད་ཆེས་པ་དང་། དགའ་བ་དང་། མངོན་པར་དད་པར་འགྱུར་བ་འདི་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འགྱུར་པའི་ཕྱག་རྒྱ་གསུམ་པའོ། ། 4. གཞན་ཡང་བྱང་ཆུབ་སེམས་དཔའ་རང་གི་ཤེས་པས་བདག་ཤེས་པར་བྱེད་ཅིང་། ཐམས་ཅད་མཁྱེན་པ་ཉིད་དུ་སེམས་བསྐྱེད་པ། ལྷག་པའི་བསམ་པས་འབྱུང་བས་སངས་རྒྱས་སུ་འགྱུར་བར་བྱའོ། ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བར་བྱའོ། ། དགའ་བ་དང་། མོས་པ་དང་། སྤྲོ་བ་ཆེན་པོས་བྱུང་བའི་སེམས་བསྐྱེད་པ་དང་། མོས་པ་ཆེན་པོའི་རྒྱུས་རྣམ་པར་འཕེལ་བའི་བརྩོན་འགྲུས་ཆེན་པོས་འགྲོ་བ་ལྔའི་རྒྱུད་དུ་འཁོར་ཞིང་ཉོན་མོངས་པའི་སེམས་ཅན་རྣམས་རབ་ཏུ་དགྲོལ་བར་བྱའོ་སྙམ་པ་འདི་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འགྱུར་བའི་ཕྱག་རྒྱ་བཞི་པའོ། ། 5. གཞན་ཡང་བྱང་ཆུབ་སེམས་དཔའ་དེ་བཞིན་གཤེགས་པའི་ཡེ་ཤེས་མུ་མེད་པ་ལ་འཇུག་ཀྱང་དེ་བཞིན་གཤེགས་པའི་ཡེ་ཤེས་ལས་མཚམས་ཀྱིས་དཔོག་པ་མི་བྱེད་ཅིང་། སངས་རྒྱས་བཅོམ་ལྡན་འདས་ཚད་མེད་པ་རྣམས་ལས་དེ་བཞིན་གཤེགས་པའི་ཡེ་ཤེས་ཀུན་ཏུ་མཐའ་ཡས་པ་ཐོས་ཤིང་། ཚད་འཛིན་པར་མི་བྱེད་ཅིང་། ཡི་གེ་རྣམ་པར་དགོད་པ་ཐམས་ཅད་ཀྱིས་དེ་བཞིན་གཤེགས་པའི་ཡེ་ཤེས་ལས་མཚམས་སུ་དཔོག་པར་མི་བྱེད་པ་འདི་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འགྱུར་བའི་ཕྱག་རྒྱ་ལྔ་པའོ། ། 6. གཞན་ཡང་བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཤིན་ཏུ་མོས་པ་ཡིན་ཏེ། མོས་པ་གཞན་གྱིས་མི་ཐུབ་པ་དང་། མོས་པ་ཟབ་པ་དང་། མོས་པ་ཡངས་པ་དང་། མོས་པ་ཆེ་བ་དང་། མོས་པ་སྣ་ཚོགས། མོས་པ་ཟིལ་གྱིས་མི་ནོན་པ་དང་། མོས་པ་བླ་ན་མེད་པ་དང་། མོས་པ་བརྟེན་པ་དང་། མོས་པ་ལས་མི་མཚུངས་པའི་མོས་པ་དང་ལྡན་ཞིང་། དེ་ལ་བདུད་ཐམས་ཅད་དང་། བདུད་ཀྱི་རིས་ཀྱི་ལྷ་ཐམས་ཅད་དང་། མུ་སྟེགས་ཅན་གཞན་དང་། ཕས་ཀྱི་རྒོལ་བ་ཐམས་ཅད་ཀྱི་མོས་་པ་དེ་ལས་བཟློག་པར་མི་ནུས་ཤིང་། ཐམས་ཅད་མཁྱེན་པ་ཉིད་དུ་སེམས་བསྐྱེད་པ་ལས་ཕྱིར་བཟློག་པར་མི་ནུས་ཏེ། དེ་ལྟ་བུའི་མོས་པ་ཆེན་པོ་ལ་གནས་པའི་བྱང་ཆུབ་སེམས་དཔའ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པའི་མོས་པ་དང་ལྡན་པ་ཡིན་ཏེ། འདི་ནི་ཕྱག་རྒྱ་དྲུག་པའོ། ། 7. གཞན་ཡང་བྱང་ཆུབ་སེམས་དཔའ་མི་ཟློག་ཅིང་། ལུས་དང་སྲོག་ལ་མི་ལྟ་བར་ཐམས་ཅད་མཁྱེན་པ་ཉིད་ལ་མངོན་པར་ཕྱོགས་ཤིང་། ཐམས་ཅད་མཁྱེན་པ་ཉིད་དུ་སེམས་བསྐྱེད་པ་སངས་རྒྱས་ཐམས་ཅད་ཀྱི་བྱང་ཆུབ་སྣང་བས་བྱང་ཆུབ་སེམས་དཔའི་སྤྱད་པ་ལ་སྤྱོད་ཅིང་། སངས་རྒྱས་ཀྱི་བྱང་ཆུབ་ཡོངས་སུ་མི་གཏོང་ལ། དགེ་བའི་བཤེས་གཉེན་བསྙེན་པ་ལས་ཕྱིར་མི་ལྡོག་པ་འདི་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འགྱུར་བའི་ཕྱག་རྒྱ་བདུན་པའོ། ། 8. གཞན་ཡང་བྱང་ཆུབ་སེམས་དཔའ་ཐེག་པ་ཆེན་པོ་ལ་གནས་པའི་རིགས་ཀྱི་བུའམ། རིགས་ཀྱི་བུ་མོ་རྣམས་ལ་སངས་རྒྱས་ཀྱི་ཆོས་ཡོངས་སུ་བཙལ་བས་ཉེ་བར་སྟོན་པར་བྱེད་དེ། དགེ་བའི་རྩ་བ་ལ་ཡང་རབ་ཏུ་བག་ཞིག་གོ ། ཇི་ལྟར་ན་བྱང་ཆུབ་ལས་ཕྱིར་མི་ལྡོག་པར་འགྱུར་ཞེས་ཏེ། ཐམས་ཅད་མཁྱེན་པ་ཉིད་ཀྱི་སེམས་ཀྱིས་ཀྱང་རབ་ཏུ་འཛིན་ཏོ། ། འདི་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འགྱུར་བའི་ཕྱག་རྒྱ་བརྒྱད་པའོ། ། 9. གཞན་ཡང་བྱང་ཆུབ་སེམས་དཔའ་སེམས་ཅན་ཐམས་ཅད་ལ་སྙོམས་པའི་སེམས་ལ་གནས་ཤིང་། ཐམས་ཅད་མཁྱེན་པའི་ཡེ་ཤེས་ཡང་དག་པར་བསྒྲུབ་པ་ལ་བརྩོན་པ་ཡིན་ཏེ། སེམས་ཅན་ཐམས་ཅད་ལ་ཡང་སྙིང་རྗེ་ཆེན་པོ་བསྐྱེད་ཅིང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་ཆོས་སྟོན་ཏེ། འདི་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འགྱུར་བའི་ཕྱག་རྒྱ་དགུ་པའོ། ། 10 .གཞན་ཡང་བྱང་ཆུབ་སེམས་དཔའ་འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་དང་། དགེ་བའི་རྩ་བ་ཐམས་ཅད་ཀྱི་རྒྱུད་ཀྱི་ཚུལ་གཅིག་ཏུ་གྱུར་ཅིང་། སངས་རྒྱས་ཐམས་ཅད་ཀྱི་རིགས་རྒྱུན་མི་གཅོད་པ་ལ་ཤིན་ཏུ་བརྩོན་པ་དང་། ཐམས་ཅད་མཁྱེན་པའི་ཡེ་ཤེས་ཀྱི་ལམ་གྱིས་འབྱུང་བ་ལ་གནས་པ་ཡིན་ཏེ། འདི་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འགྱུར་བའི་ཕྱག་རྒྱ་བཅུ་པའོ། །
Tibetan Source	《ཕལ་ཆེན་ང་པ་》ཤ་245ན་3ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number