9576

Tibetan	ཡེ་ཤེས་ཕུན་སུམ་ཚོགས་པ་བཅུ།
Tibetan Alternate
Tibetan Definition	དེ་ཡང་། འཕགས་པ་དཀོན་མཆོག་སྤྲིན་ཞེས་བྱ་བའི་མདོ་ལས་བྱུང་བ་བྱང་ཆུབ་སེམས་དཔའ་རྣམས་ཀྱི་ཡེ་ཤེས་ཕུན་སུམ་ཚོགས་པ་བཅུ་སྟེ། 1. བྱང་ཆུབ་སེམས་དཔའ་གང་ཟག་ལ་བདག་མེད་པའི་ཡེ་ཤེས་ཕུན་སུམ་ཚོགས་པ་ནི། འདི་ལ་བྱང་ཆུབ་སེམས་དཔས་ཕུང་པོ་རྣམས་སྐྱེ་བ་ཡང་དག་པར་མཐོང་། འཇིག་པ་དང་། འགོག་པའང་ཡང་དག་པར་མཐོང་ངོ་། ། དེས་ཕུང་པོ་སྐྱེ་བ་རྣམས་སྙིང་པོ་མེད་པ་དང་། བྱེད་པ་མེད་པ་དང་། གསོག་ཏུ་ཡང་དག་པར་མཐོང་། ཕུང་པོ་འགག་པ་རྣམས་འཇིག་པར་ཡང་དག་པར་མཐོང་སྟེ། དེ་འདི་སྙམ་དུ་ཕུང་པོ་འདི་དག་ནི། བདག་མེད་པ། སེམས་ཅན་མེད་པ། སྲོག་མེད་པ། གསོ་བ་མེད་པ། གང་ཟག་མེད་པ་ཡིན་མོད་ཀྱི། འོན་ཀྱང་བྱིས་པ་སོ་སོའི་སྐྱེ་བོ་བདག་ཏུ་འཛིན་པ་ལ་མངོན་པར་ཞེན་པ་འདི་དག་ནི། འདི་ལྟར་བདག་ཅག་གི་ཕུང་པོ་རྣམས་བདག་གོ ། བདག་ཅག་གི་ཕུང་པོ་རྣམས་ལ་བདག་ཡོད་དོ། ། བདག་ཅག་གི་བདག་ལ་ཕུང་པོ་རྣམས་ཡོད་དོ། ། བདག་ཅག་གི་བདག་ནི། ཕུང་པོ་ཅན་ནོ་སྙམ་སྟེ། དེ་དག་བདག་ཏུ་འཛིན་པ་ལ་མངོན་པར་ཞེན་པས་དེ་ཁོ་ན་ཉིད་ཁོང་དུ་མི་ཆུད་དོ། ། དེ་ཁོ་ན་ཉིད་ཁོང་དུ་མི་ཆུད་པས་མགལ་མེའི་འཁོར་ལོ་ལྟར་འཁོར་བར་འཁྱམ་མོ་སྙམ་དུ་སེམས་ཤིང་། དེ་ཐམས་ཅད་ཀྱང་བྱང་ཆུབ་སེམས་དཔས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། དེ་ལྟར་ན། བྱང་ཆུབ་སེམས་དཔའ་གང་ཟག་ལ་བདག་མེད་པའི་ཡེ་ཤེས་ཕུན་སུམ་ཚོགས་པ་ཡིན་ནོ། ། 2. བྱང་ཆུབ་སེམས་དཔའ་ཆོས་ལ་བདག་མེད་པའི་ཡེ་ཤེས་ཕུན་སུམ་ཚོགས་པ་ནི། འདི་ལ་བྱང་ཆུབ་སེམས་དཔས་ཆོས་ལ་སྒྲོ་འདོགས་པ་དང་། ཆོས་ལ་སྐུར་པའང་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། དེ་འདི་སྙམ་དུ་གློ་བུར་དུ་བྱུང་བའི་ཆོས་ལ་ཀུན་བརྟགས་པའི་མིང་གདགས་ཏེ། ཆོས་དེའང་དེའི་ངོ་བོ་ཉིད་མ་ཡིན། ཡི་གེ་དེ་དག་ཀྱང་དེའི་ངོ་བོ་ཉིད་མ་ཡིན་མོད་ཀྱི། འདི་ནི། མིང་ཙམ་དང་། ཐ་སྙད་ཙམ་དུ་བྱའི། འདི་ལ་མངོན་པར་ཞེན་པར་མི་བྱའོ། ། གློ་བུར་དུ་བྱུང་བའི་ཆོས་དེའང་ཐམས་ཅད་དུ་ཐམས་ཅད་མེད་པ་མ་ཡིན་ཏེ། གཞན་གྱི་རྐྱེན་དང་། གཞན་གྱི་རྐྱེན་ལ་སྡོད་པ་དང་། གཞན་གྱི་རྐྱེན་རྣམས་ཀྱིས་འབྱུང་ཞིང་རྐྱེན་དང་བྲལ་ན་འགག་པའི་ཆོས་འདི་ནི། ཡོད་དོ། ། ཞེས་དེ་ཐམས་ཅད་བྱང་ཆུབ་སེམས་དཔས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་ཏེ། བྱང་ཆུབ་སེམས་དཔའ་ཆོས་ལ་བདག་མེད་པའི་ཡེ་ཤེས་ཕུན་སུམ་ཚོགས་པ་ཡིན་ནོ། 3. བྱང་ཆུབ་སེམས་དཔའ་ཉི་ཚེ་བ་མ་ཡིན་པའི་ཡེ་ཤེས་ཕུན་སུམ་ཚོགས་པ་ནི། བྱང་ཆུབ་སེམས་དཔའ་ཉི་ཚེ་བའི་ཡེ་ཤེས་སྐད་ཅིག་གཅིག་ལ་འཇུག་ཅིང་སྐད་ཅིག་གཉིས་པ་ལ་མི་འཇུག་པ་མ་ཡིན་གྱི། བྱང་ཆུབ་སེམས་དཔའི་ཡེ་ཤེས་མཐོང་བ་ནི། སྐད་ཅིག་ཐམས་ཅད་ལ་ཐོགས་པ་མེད་པར་འཇུག་སྟེ། བྱང་ཆུབ་སེམས་དཔའ་ཉི་ཚེ་བ་མ་ཡིན་པའི་ཡེ་ཤེས་ཕུན་སུམ་ཚོགས་པ་ཡིན་ནོ། 4. བྱང་ཆུབ་སེམས་དཔའ་ཏིང་ངེ་འཛིན་གྱི་སྤྱོད་ཡུལ་གྱི་ཡེ་ཤེས་ཕུན་སུམ་ཚོགས་པ་ནི། འདི་ལ་བྱང་ཆུབ་སེམས་དཔས་ཉན་ཐོས་ཀྱི་ཏིང་ངེ་འཛིན་རྣམས་ཀྱང་རབ་ཏུ་ཤེས། རང་སངས་རྒྱས་ཀྱི་ཏིང་ངེ་འཛིན་རྣམས་ཀྱང་རབ་ཏུ་ཤེས། བྱང་ཆུབ་སེམས་དཔའི་ཏིང་ངེ་འཛིན་རྣམས་ཀྱང་རབ་ཏུ་ཤེས། དེ་བཞིན་གཤེགས་པའི་ཏིང་ངེ་འཛིན་རྣམས་ཀྱང་རབ་ཏུ་ཤེས་སོ། ། དེས་ཏིང་ངེ་འཛིན་གང་དང་། ཏིང་ངེ་འཛིན་གྱི་སྤྱོད་ཡུལ་གང་ལ་ཉན་ཐོས་སྤྱོད་པ་དེའང་རབ་ཏུ་ཤེས། ཏིང་ངེ་འཛིན་གང་དང་། ཏིང་ངེ་འཛིན་གྱི་སྤྱོད་ཡུལ་གང་ལ་རང་སངས་རྒྱས་སྤྱོད་པ་དེའང་རབ་ཏུ་ཤེས། ཏིང་ངེ་འཛིན་གང་དང་། ཏིང་ངེ་འཛིན་གྱི་སྤྱོད་ཡུལ་གང་ལ་བྱང་ཆུབ་སེམས་དཔའ་སྤྱོད་པ་དེའང་རབ་ཏུ་ཤེས། དེས་ཏིང་ངེ་འཛིན་གང་དང་། ཏིང་ངེ་འཛིན་གྱི་སྤྱོད་ཡུལ་གང་ལ་དེ་བཞིན་གཤེགས་པས་སྤྱོད་པ་དེའང་རབ་ཏུ་ཤེས་ཏེ། དེ་བཞིན་གཤེགས་པས་སྐབས་ཕྱེ་ན་དེ་བཞིན་གཤེགས་པའི་ཏིང་ངེ་འཛིན་ནི། རབ་ཏུ་ཤེས་ཀྱི། རྣམ་པར་སྨིན་པས་གྲུབ་པའི་རང་གི་ཡེ་ཤེས་ཀྱིས་ནི་མ་ཡིན་ནོ། ། ཏིང་ངེ་འཛིན་གཞན་རྣམས་ནི། རྣམ་པར་སྨིན་པས་གྲུབ་པའི་རང་གི་ཡེ་ཤེས་ཀྱིས་རབ་ཏུ་ཤེས་ཏེ། བྱང་ཆུབ་སེམས་དཔའ་ཏིང་ངེ་འཛིན་གྱི་སྤྱོད་ཡུལ་གྱི་ཡེ་ཤེས་ཕུན་སུམ་ཚོགས་པ་ཡིན་ནོ། ། 5. བྱང་ཆུབ་སེམས་དཔའ་བྱིན་གྱི་རླབས་ཀྱི་ཡེ་ཤེས་ཕུན་སུམ་ཚོགས་པ་ནི། འདི་ལ་བྱང་ཆུབ་སེམས་དཔས་ཉན་ཐོས་ཀྱི་བྱིན་གྱི་རླབས་ཀྱང་ཇི་ལྟ་བ་བཞིན་དུ་རབ་ཏུ་ཤེས། རང་སངས་རྒྱས་ཀྱི་བྱིན་རླབས་ཀྱང་ཇི་ལྟ་བ་བཞིན་དུ་རབ་ཏུ་ཤེས། བྱང་ཆུབ་སེམས་དཔའི་བྱིན་གྱི་རླབས་ཀྱང་ཇི་ལྟ་བ་བཞིན་དུ་རབ་ཏུ་ཤེས་ན། སེམས་ཅན་དེ་མ་ཡིན་པ་གཞན་དག་ལྟ་ཅི་སྨོས་ཏེ། བྱང་ཆུབ་སེམས་དཔའ་བྱིན་གྱི་རླབས་ཀྱི་ཡེ་ཤེས་ཕུན་སུམ་ཚོགས་པ་ཡིན་ནོ། 6. བྱང་ཆུབ་སེམས་དཔའ་མི་འཕྲོག་པའི་ཡེ་ཤེས་ཕུན་སུམ་ཚོགས་པ་ནི། འདི་ལ་བྱང་ཆུབ་སེམས་དཔའི་ཡེ་ཤེས་ནི། མུ་སྟེགས་ཅན་ཐམས་ཅད་དང་། བདུད་ཐམས་ཅད་དང་། ཉན་ཐོས་དང་། རང་སངས་རྒྱས་ཐམས་ཅད་ཀྱིས་མི་འཕྲོག་པ་ཡིན་ཏེ། བྱང་ཆུབ་སེམས་དཔའ་མི་འཕྲོག་པའི་ཡེ་ཤེས་ཕུན་སུམ་ཚོགས་པ་ཡིན་ནོ། 7. བྱང་ཆུབ་སེམས་དཔའ་སེམས་ཅན་ཐམས་ཅད་ཀྱི་སྤྱོད་པ་ལ་རྣམ་པར་ལྟ་བའི་ཡེ་ཤེས་ཕུན་སུམ་ཚོགས་པ་ནི། འདི་ལ་བྱང་ཆུབ་སེམས་དཔའ་ཡེ་ཤེས་ཡོངས་སུ་དག་ཅིང་རྙོག་པ་མེད་པས་སེམས་ཅན་གྱི་ཁམས་ལ་རྣམ་པར་ལྟ་སྟེ། དེས་དེ་ན་སེམས་ཅན་ལ་ལ་བྱང་ཆུབ་ཏུ་སེམས་བསྐྱེད་པ་དག་དང་། ལ་ལ་བྱང་ཆུབ་ཀྱི་སེམས་མ་བསྐྱེད་པ་དག་དང་། ལ་ལ་བྱང་ཆུབ་ཀྱི་སེམས་བསྒྲུབས་པ་དག་དང་། ལ་ལ་བྱང་ཆུབ་ཀྱི་སེམས་མ་བསྒྲུབས་པ་དག་དང་། ལ་ལ་ས་དང་པོ་ལ་གནས་པ་དག་དང་། ལ་ལ་ས་བཅུའི་བར་ལ་གནས་པ་དག་དང་། ལ་ལ་མངོན་པར་རྫོགས་པར་སངས་རྒྱས་པ་དག་དང་། ལ་ལ་མངོན་པར་རྫོགས་པར་སངས་རྒྱས་ཏེ་ཆོས་ཀྱི་འཁོར་ལོ་རབ་ཏུ་བསྐོར་བ་དག་དང་། ལ་ལ་བྱ་བ་ཀུན་བྱས་ཏེ་ཡོངས་སུ་མྱ་ངན་ལས་འདའ་བ་དག་དང་། ལ་ལ་ཉན་ཐོས་ཀྱི་ཐེག་པས་ཡོངས་སུ་མྱ་ངན་ལས་འདའ་བ་དག་དང་། ལ་ལ་རང་སངས་རྒྱས་ཀྱི་ཐེག་པས་ཡོངས་སུ་མྱ་ངན་ལས་འདའ་བ་དག་དང་། ལ་ལ་བདེ་འགྲོར་སྐྱེ་བ་དག་མཐོང་ངོ་། ། སེམས་ཅན་ཐམས་ཅད་ཀྱི་སྤྱོད་པ་ལ་རྣམ་པར་ལྟ་སྟེ། བྱང་ཆུབ་སེམས་དཔའ་སེམས་ཅན་ཐམས་ཅད་ཀྱི་སྤྱོད་པ་ལ་རྣམ་པར་ལྟ་བའི་ཡེ་ཤེས་ཕུན་སུམ་ཚོགས་པ་ཡིན་ནོ། ། 8. བྱང་ཆུབ་སེམས་དཔའ་ལྷུན་གྱིས་གྲུབ་པའི་ཡེ་ཤེས་ཕུན་སུམ་ཚོགས་པ་ནི། འདི་ལ་བྱང་ཆུབ་སེམས་དཔའ་སྤྱོད་པའམ། འགྲེང་བའམ། འདུག་བའམ། འགྲོ་བའམ། འོང་བ་ན་ལྷུན་གྱིས་གྲུབ་ཅིང་ཡེ་ཤེས་འབྱུང་སྟེ། དཔེར་ན། མི་གཉིད་ཀྱིས་ལོག་པའི་དབུགས་འབྱུང་བ་དང་། རྡུབ་པ་དག་ལྷུན་གྱིས་འགྲུབ་ཅིང་འབྱུང་ངོ་། ། བྱང་ཆུབ་སེམས་དཔའི་ཡེ་ཤེས་དེའང་དེ་བཞིན་དུ་བལྟའོ། ། ཡེ་ཤེས་དེའང་ཐམས་ཅད་དུ་མི་ཆགས་པར་འཇུག་སྟེ། བྱང་ཆུབ་སེམས་དཔའ་ལྷུན་གྱིས་གྲུབ་པའི་ཡེ་ཤེས་ཕུན་སུམ་ཚོགས་པ་ཡིན་ནོ། ། 9. བྱང་ཆུབ་སེམས་དཔའ་ཆོས་ཐམས་ཅད་ཀྱི་མཚན་ཉིད་ཀྱི་ཡེ་ཤེས་ཕུན་སུམ་ཚོགས་པ་ནི། འདི་ལ་བྱང་ཆུབ་སེམས་དཔས་ཆོས་ཐམས་ཅད་མཚན་ཉིད་མཚུངས་པར་ཡང་རབ་ཏུ་ཤེས། མཚན་ཉིད་གཅིག་པར་ཡང་རབ་ཏུ་ཤེས། མཚན་ཉིད་དུ་མར་ཡང་རབ་ཏུ་ཤེས། སྒྱུ་མའི་མཚན་ཉིད་དུའང་རབ་ཏུ་ཤེས། ཡང་དག་པ་མ་ཡིན་པར་ཡོངས་སུ་བཏགས་པའི་མཚན་ཉིད་དུའང་རབ་ཏུ་ཤེས་ཏེ། བྱང་ཆུབ་སེམས་དཔའ་ཆོས་ཐམས་ཅད་ཀྱི་མཚན་ཉིད་ཀྱི་ཡེ་ཤེས་ཕུན་སུམ་ཚོགས་པ་ཡིན་ནོ། ། 10 .བྱང་ཆུབ་སེམས་དཔའ་འཇིག་རྟེན་ལས་འདས་པའི་ཡེ་ཤེས་ཕུན་སུམ་ཚོགས་པ་ནི། འདི་ལ་བྱང་ཆུབ་སེམས་དཔའ་ཟག་པ་མེད་པའི་ཡེ་ཤེས་འཇིག་རྟེན་ཐམས་ཅད་ལས་འདས་པ་དང་ལྡན་པ་ཡིན་ཏེ། བྱང་ཆུབ་སེམས་དཔའ་འཇིག་རྟེན་ལས་འདས་པའི་ཡེ་ཤེས་ཕུན་སུམ་ཚོགས་པ་ཡིན་ནོ། ཆོས་བཅུ་པོ་དེ་དག་དང་ལྡན་ན། བྱང་ཆུབ་སེམས་དཔའ་ཡེ་ཤེས་ཕུན་སུམ་ཚོགས་པ་རྣམས་ཡིན་ནོ། །
Tibetan Source	《མདོ་ཚ་པ་》ཤ་55བ་3ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number