9611

Tibetan	རིག་པ་བཅུ།
Tibetan Alternate
Tibetan Definition	དེ་ཡང་། ཕལ་ཆེན་ལེའུ་ཞེ་གསུམ་པ་དེ་བཞིན་གཤེགས་པ་སྐྱེ་བ་འབྱུང་བ་བསྟན་པ་ལས་བྱུང་བ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་རིག་པ་བཅུ་སྟེ། 1. འདི་ལྟར་སེམས་ཅན་ཐམས་ཅད་ཀྱི་ལས་དང་། རྣམ་པར་སྨིན་པ་མངོན་པར་གྲུབ་པ་ལ་མཁས་ཤིང་ཤེས་པའི་རིག་པ། 2. འགྲོ་བ་ཐམས་ཅད་དམིགས་པས་དབེན་ཞིང་བྱེད་པ་མེད་པ་ལ་སྤྲོས་པ་མེད་པའི་སེམས་རབ་ཏུ་ཞི་བ་མངོན་པར་གྲུབ་པ་ལ་མཁས་ཤིང་ཤེས་པའི་རིག་པ། 3. དམིགས་པ་ཐམས་ཅད་ལ་ཞུགས་པས་སེམས་གཅིག་ལ་ཡང་ཐ་དད་དུ་དམིགས་ཤིང་། ཆོས་ཐམས་ཅད་རབ་ཏུ་རྟོགས་པས་རྡོ་རྗེ་ལྟ་བུའི་ཡེ་ཤེས་ཀྱི་རིག་པ། 4. དབྱངས་བསམ་གྱིས་མི་ཁྱབ་པ་བྱིན་གྱིས་བརླབས་པས། འཇིག་རྟེན་གྱི་ཁམས་མུ་མེད་པར་གོ་བར་བྱ་བར་མངོན་པར་གྲུབ་པ་ལ་མཁས་ཤིང་ཤེས་པའི་རིག་པ། 5. གནས་ཐམས་ཅད་ཡང་དག་པར་གཞོམ་པ་མངོན་པར་བསྒྲུབས་པ་ལ་མཁས་ཤིང་ཤེས་པའི་རིག་པ། 6. སྐྱེ་བ་ལ་མཁས་པ། མི་སྐྱེ་བ་ལ་མཁས་པ་མངོན་པར་གྲུབ་པ་ལ་མཁས་ཤིང་ཤེས་པའི་རིག་པ། 7. འདུ་ཤེས་དང་། ཚོར་བའི་ཡུལ་ཐམས་ཅད་རྣམ་པར་བཟློག་པ་མངོན་པར་བསྒྲུབ་པ་ལ་མཁས་ཤིང་ཤེས་པའི་རིག་པ། 8. གཞན་ཡང་བྱང་ཆུབ་སེམས་དཔའ་ཆོས་ཐམས་ཅད་མཚན་ཉིད་མེད་པ་དང་། མཚན་ཉིད་དང་བྲལ་བ་མེད་ཅིང་རྣམ་པར་དགོད་པ་གཅིག་ཏུ་གྱུར་པ་དང་། རྣམ་པར་དགོད་པ་མེད་པའི་ཚུལ་གྱིས་རེག་པར་བྱ་བ་སྣ་ཚོགས། ཐ་དད་པ་རབ་ཏུ་ཤེས་ཏེ། ཚད་མེད་པའི་བསྐལ་པར་ཆོས་སྟོན་ཅིང་། ཆོས་ཀྱི་དབྱིངས་སུ་གནས་པའི་ཚུལ་གྱིས་བླ་ན་ མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་འབྱུང་བ་འདི་ནི་ཡེ་ཤེས་ཀྱི་རིག་པ། 9. གཞན་ཡང་བྱང་ཆུབ་སེམས་དཔའ་འགྲོ་བ་ཐམས་ཅད་མངོན་པར་འགྲུབ་པ་འགྱུར་བ་མེད་པའི་ཚུལ་དང་། སྐྱེ་བ་མི་དམིགས་པའི་ཚུལ་གྱིས་རབ་ཏུ་ཤེས། རྒྱུ་རབ་ཏུ་ཤེས། རྐྱེན་རབ་ཏུ་ཤེས། དངོས་པོ་རབ་ཏུ་ཤེས། དམིགས་པ་རབ་ཏུ་ཤེས། འདུ་བྱེད་རབ་ཏུ་ཤེས། སྐྱེ་བ་རབ་ཏུ་ཤེས། འགོག་པ་རབ་ཏུ་ཤེས། དེ་ཁོ་ན་བསྟན་པ་རབ་ཏུ་ཤེས། གཏི་མུག་དང་ལྡན་པར་གྱུར་པ་རབ་ཏུ་ཤེས། གཏི་མུག་དང་བྲལ་བ་རབ་ཏུ་ཤེས། ཕྱིན་ཅི་ལོག་རབ་ཏུ་ཤེས། ཕྱིན་ཅི་ལོག་མེད་པ་རབ་ཏུ་ཤེས། ཀུན་ནས་ཉོན་མོངས་པ་རབ་ཏུ་ཤེས། རྣམ་པར་བྱང་བ་རབ་ཏུ་ཤེས། འཁོར་བ་རབ་ཏུ་ཤེས། མྱ་ངན་ལས་འདས་པ་རབ་ཏུ་ཤེས། དམིགས་པ་རབ་ཏུ་ཤེས། དམིགས་པ་མེད་པ་རབ་ཏུ་ཤེས། མངོན་པར་ཆགས་པ་རབ་ཏུ་ཤེས། མངོན་པར་ཆགས་པ་མེད་པ་རབ་ཏུ་ཤེས། གནས་རབ་ཏུ་ཤེས། གྱེན་དུ་བསྐྱོད་པ་རབ་ཏུ་ཤེས། ཞུགས་པ་རབ་ཏུ་ཤེས། ལོག་པ་རབ་ཏུ་ཤེས། འཇུག་པ་རབ་ཏུ་ཤེས། ལྡོག་པ་རབ་ཏུ་ཤེས། འཇིག་པ་རབ་ཏུ་ཤེས། འབྱུང་བ་རབ་ཏུ་ཤེས། ཡོངས་སུ་སྨིན་པ་རབ་ཏུ་ཤེས། དབང་པོ་རབ་ཏུ་ཤེས། སྣོད་ཐ་དད་པའི་ཚུལ་གྱིས་སེམས་ཅན་དེ་དག་གི་འདུལ་བའང་རབ་ཏུ་ཤེས། སེམས་ཅན་འདུལ་ཞིང་། བྱང་ཆུབ་སེམས་དཔའི་སྤྱོད་པ་ལ་མགོ་རྨོངས་པ་ཡང་མེད་དེ། དེ་ཅིའི་ཕྱིར་ཞེ་ན། བྱང་ཆུབ་སེམས་དཔས་ནི། སེམས་ཅན་ཡོངས་སུ་སྨིན་པར་བྱ་བའི་དོན་དུ་མ་གཏོགས་པར། བླ་ན་མེད་པ་ཡང་དག་པར་རྫོགས་པའི་བྱང་ཆུབ་སེམས་མ་བསྐྱེད་དེ། དེ་དག་གང་གི་ཕྱིར་སེམས་བསྐྱེད་པའི་སེམས་ཅན་དེ་དག་ཡོངས་སུ་སྨིན་པར་བྱེད་ཅིང་། རྣམ་པར་འདུལ་བའི་ལུས་ལ་ཉོན་མོངས་པར་མི་རྩིའོ། ། འདི་ནི་བྱང་ཆུབ་སེམས་དཔའ་རྣམས་ཀྱི་འགྲོ་བ་ཐམས་ཅད་ཀྱི་བྱ་བ་དང་མི་འགལ་བ་ཞེས་བྱ་བ་རྟེན་ཅིང་འབྲེལ་བར་འབྱུང་བ་རིག་པ་སྟེ་དགུ་པའོ། ། 10 .གཞན་ཡང་བྱང་ཆུབ་སེམས་དཔའ་སངས་རྒྱས་གང་ལ་ཡང་མངོན་པར་ཆགས་པ་མེད་དེ། སངས་རྒྱས་ལ་མངོན་པར་ཆགས་པ་མི་སྐྱེད། ཆོས་གང་ལ་ཡང་མངོན་པར་ཆགས་པ་མེད་དེ། ཆོས་ལ་མངོན་པར་ཆགས་པ་མི་སྐྱེད། ཞིང་གང་ལ་ཡང་མངོན་པར་ཆགས་པ་མེད་དེ། ཞིང་ལ་མངོན་པར་ཆགས་པ་མི་སྐྱེད། སེམས་ཅན་གང་ལ་ཡང་མངོན་པར་ཆགས་པ་མེད་དེ། སེམས་ཅན་ལ་མངོན་པར་ཆགས་པ་མི་སྐྱེད། སེམས་ཅན་གང་ཡང་མཐོང་བ་མེད་དེ། སེམས་ཅན་ཡང་ཡོངས་སུ་སྨིན་པར་བྱེད་ཅིང་སེམས་ཅན་ཡང་ཡོངས་སུ་འདུལ་བར་བྱེད། ཆོས་གང་ཡང་སྟོན་པ་མེད་དེ། སྤྱོད་པ་ཡང་ཡོངས་སུ་སྦྱོང་ཞིང་སྨོན་ལམ་ཡང་ཡོངས་སུ་རྫོགས་པར་བྱེད། སྙིང་རྗེ་ཆེན་པོ་ཡང་རྣམ་པར་འཕེལ་བར་བྱེད། སངས་རྒྱས་ཀྱང་མཐོང་བར་བྱེད། དེ་བཞིན་གཤེགས་པས་ཆོས་བསྟན་པ་ལ་ཡང་རྗེས་སུ་འབྲང་བར་བྱེད། དེ་བཞིན་གཤེགས་པ་དང་རྒྱུ་མཐུན་པ་ཡང་འཐོབ་པར་བྱེད། དགེ་བའི་རྩ་བ་སྐྱེད་པར་བྱེད། དེ་བཞིན་གཤེགས་པའི་སྤྱོད་ཡུལ་ཡང་རྒྱུན་མི་འཆད་པར་བྱེད། དེ་བཞིན་གཤེགས་པ་མཆོད་པ་ཡང་རྣམ་པར་འཕེལ་བར་བྱེད། འཇིག་རྟེན་གྱི་ཁམས་བསམ་གྱིས་མི་ཁྱབ་པ་ཡང་ཆོས་ཀྱི་དབྱངས་ཀྱིས་ཀླས་པའི་སེམས་ཀྱིས་ཡོངས་སུ་སྐྱོད་པར་བྱེད། ཆོས་བསྟན་པ་རྣམ་པ་སྣ་ཚོགས་ཀྱང་རབ་ཏུ་ཤེས་པར་བྱེད། སེམས་ཅན་གྱི་གྲངས་ཀྱང་རབ་ཏུ་ཤེས་པར་བྱེད། སེམས་ཅན་རྣམ་པ་ཐ་དད་པ་ཡང་རབ་ཏུ་ཤེས་པར་བྱེད། སྡུག་བསྔལ་སྐྱེ་བ་ཡོང་རབ་ཏུ་ཤེས་པར་བྱེད། སྡུག་བསྔལ་འགོག་པ་ཡང་རབ་ཏུ་ཤེས་པར་བྱེད་དེ། འདུ་བྱེད་ཀྱི་རྣམ་པ་ཐམས་ཅད་སྡུག་བསྔལ་བར་ཤེས་ནས། མིག་ཡོར་ལྟ་བུའི་ཚུལ་གྱིས་བྱང་ཆུབ་སེམས་དཔའི་སྤྱད་པ་སྤྱོད་ཅིང་། སྐྱེ་བའི་སྐྱེ་མཆེད་ཐམས་ཅད་རྩ་བ་ནས་རྒྱུན་མི་གཅོད་པའི་སེམས་བསྐྱེད་པས་འགྲོ་བ་ཐམས་ཅད་ཡོངས་སུ་བསྐྱབ་པའི་ཕྱིར་མི་སྤྱོད་པའི་ཚུལ་གྱིས་བྱང་ཆུབ་སེམས་དཔའི་སྤྱད་པ་ལ་སྤྱོད་ཅིང་། སངས་རྒྱས་ཐམས་ཅད་ཀྱི་རིགས་ཀྱི་རྗེས་སུ་བསླབ་པ་དང་། རྟོག་པའི་ཕྱིན་ཅི་ལོག་ཐམས་ཅད་ཁོང་དུ་ཆུད་པ། རི་བོའི་རྒྱལ་པོ་ཆེན་པོ་དམ་པ་ལྟ་བུ་ཐམས་ཅད་མཁྱེན་པ་ཉིད་ཀྱི་སྒོ་ལ་གཞོལ་བས། སེམས་ཅན་ཐམས་ཅད་སྲིད་པའི་གངས་ཆེན་མཚོ་ལས་ཕྱིར་བཟློག་པའི་ཕྱིར་ཡེ་ཤེས་འབྱམས་ཀླས་པ། ཆེ་ཞིང་མི་གཡོ་བའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བར་བྱའོ། ། ཞེས་བྱ་བ་འདི་ནི་ཤེས་པའི་རིག་པ་བཅུ་པའོ། །
Tibetan Source	《ཕལ་ཆེན་ང་པ་》ཤ་237ན་4ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number