9712

Tibetan	སངས་རྒྱས་ཀྱི་སྐུ་བལྟར་ཡོད་པ་ཁོང་དུ་ཆུད་པར་བྱ་བ་བཅུ།
Tibetan Alternate
Tibetan Definition	དེ་ཡང་། ཕལ་ཆེན་ལེའུ་ཞེ་གཉིས་ལས་བྱུང་བ་བྱུང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པའི་སྐུ་ཐམས་ཅད་ལ་ཁྱབ་པའི་དཔེ་སངས་རྒྱས་ཀྱི་སྐུ་བལྟར་ཡོད་པ་ཁོང་དུ་ཆུད་པར་བྱ་བ་བཅུ་སྟེ། 1. བྱུང་ཆུབ་སེམས་དཔའ་སེམས་དཔའ་ཆེན་པོས་ཁོང་དུ་ཆུད་པར་བྱ་བའི་སྒོ་དང་པོ་འདིས། དེ་བཞིན་གཤེགས་པའི་སྐུ་བལྟར་ཡོད་པ་ཤེས་པར་བྱའོ། ། གཞན་ཡང་འདི་ལྟ་སྟེ། ནམ་མཁའ་གཟུགས་མེད་དེ། ། སེམས་ཅན་ཐམས་ཅད་ཀྱི་བྱ་བ་སྣང་ཞིང་ཡོད་པར་གྱུར་ཏེ། ནམ་མཁའ་ལ་རྟོག་པ་མེད་་དོ། ། སྤྲོས་པ་མེད་དོ། ། དེ་བཞིན་དུ་དེ་བཞིན་གཤེགས་པའི་སྐུ་ཡེ་ཤེས་ཀྱི་འོད་སྣང་བ་ལ་བརྟེན་ཅིང་། སེམས་ཅན་ཐམས་ཅད་ཀྱི་དགེ་བའི་རྩ་བའི་ལས་འཇིག་རྟེན་པ་དང་། འཇིག་རྟེན་ལས་འདས་པ་རྣམས་ཡོད་ཅིང་སྣང་བར་གྱུར་ཀྱང་། དེ་བཞིན་གཤེགས་པའི་སྐུ་ལ་རྣམ་པར་རྟོག་པ་མི་མངའ་སྟེ། སྤྲོས་པ་མི་མངའོ། ། དེ་ཅིའི་ཕྱིར་ཞེ་ན། དེ་བཞིན་གཤེགས་པའི་སྐུ་ནི་ཐོག་མ་ནས་སྤྲོས་པ་ཐམས་ཅད་ཡང་དག་པར་ཆད་པའི་ཕྱིར་རོ། ། 2. བྱང་ཆུབ་སེམས་དཔའ་སེམས་དཔའ་ཆེན་པོས་ཁོང་དུ་ཆུད་པར་བྱ་བའི་སྒོ་གཉིས་པོ་འདིས་ཀྱང་། དེ་བཞིན་གཤེགས་པའི་སྐུ་བལྟར་ཡོད་པ་ཤེས་པར་བྱའོ། ། གཞན་ཡང་འདི་ལྟ་སྟེ། འཛམ་བུའི་གླིང་དུ་ཉི་མ་ཤར་བ་ནི་འོད་ཀྱིས་ཚད་མེད་པར་ཁྱབ་པས། སེམས་ཅན་རྣམས་ཚད་མེད་པའི་རྣམ་པས་ཉེ་བར་འཚོ་སྟེ། འདི་ལྟར་རི་ལ་བབ་ཅིང་རྩྭ་དང་ནགས་ཚལ་སྐྱེ་བར་བྱེད་པས་ཀྱང་ཉེ་བར་འཚོ་བ་ཡིན། མུན་པའི་མུན་ནག་ཡོངས་སུ་སེལ་ཞིང་སྣང་བར་བྱེད་པས་ཀྱང་ཉེ་བར་འཚོ་བ་ཡིན། ས་ལ་བབ་ཅིང་འདམ་རྫབ་ཡོངས་སུ་སྐེམ་པས་ཀྱང་ཉེ་བར་འཚོ་བ་ཡིན། ལོ་ཏོག་ལ་བབ་ཅིང་ཡོངས་སུ་སྨིན་པར་བྱེད་པས་ཀྱང་ཉེ་བར་འཚོལ་བ་ཡིན། ནགས་ཚལ་དང་། གེལ་པ་དང་། སྨན་ལ་བབ་ཅིང་སྐྱེ་བ་དང་རྣམ་པར་འཕེལ་བར་བྱེད་པས་ཀྱང་ཉེ་བར་འཚོ་བ་ཡིན། ནམ་མཁའ་ལ་བབ་ཀྱང་བར་སྣང་ལ་སྤྱོད་པའི་སེམས་ཅན་རྣམས་ཉེ་བར་འཚོ་བ་ཡིན། པདྨོའི་ནགས་ཚལ་ལ་བབ་ཀྱང་ཁ་འབྱེ་ཞིང་རྒྱས་པར་བྱེད་པས་ཉེ་བར་འཚོ་བ་ཡིན། གྲོང་དང་། གྲོང་ཁྱེར་དང་། ལྗོངས་དང་། ཕོ་བྲང་འཁོར་དང་། རྒྱལ་པོའི་གནས་ལ་བབ་ཀྱང་གཟུགས་སྣ་ཚོགས་གསལ་བར་སྟོན་པས་ཉེ་བར་འཚོ་བ་ཡིན། ཆུ་ལ་བབ་ཀྱང་ཆུ་ལ་གནས་པའི་སེམས་ཅན་ཡོངས་སུ་ལོངས་སྤྱོད་པས་ཉེ་བར་འཚོ་བ་ཡིན། ལས་ཀྱི་རྣམ་པ་སྣ་ཚོགས་ལ་བབ་ཀྱང་དགོས་པ་བརྩམས་པ་ཡོངས་སུ་གྲུབ་པར་བྱེད་པས་ཉེ་བར་འཚོ་བ་ཡིན། དེ་ཅིའི་ཕྱིར་ཞེ་ན། དེ་ནི་ཉི་མའི་དཀྱིལ་འཁོར་གྱི་འོད་ཟེར་ཚད་མེད་པ་བཀྱེ་བའི་ཕྱིར་རོ། ། དེ་བཞིན་དུ་དེ་བཞིན་གཤེགས་པའི་སྐུ་བལྟར་ཡོད་པའི་ཉི་མ་ཡང་། རྣམ་པ་ཚད་མེད་པས་སེམས་ཅན་ཐམས་ཅད་ཉེ་བར་འཚོ་བ་ཡིན་ཏེ། འདི་ལྟར་དགེ་བའི་ལས་ཡོངས་སུ་སྐྱེད་ཅིང་སྡིག་པའི་ལས་རྣམ་པར་ཟློག་པས་ཀྱང་ཉེ་བར་འཚོ་བ་ཡིན། ཤེས་རབ་ཀྱི་འོད་སྣང་བ་མཛད་ཅིང་གཏི་མུག་གི་མུན་པ་རྣམ་པར་སེལ་བས་ཀྱང་ཉེ་བར་འཚོ་བ་ཡིན། འགྲོ་བ་ཐམས་ཅད་ཡོངས་སུ་སྐྱོབ་ཅིང་། བྱམས་པ་ཆེན་པོ་དང་ལྡན་པས་ཀྱང་ཉེ་བར་འཚོ་བ་ཡིན། འགྲོ་བ་ཐམས་ཅད་ཡོངས་སུ་འགྲེལ་ཅིང་། ཐུགས་རྗེ་ཆེན་པོ་དང་ལྡན་པས་ཀྱང་ཉེ་བར་འཚོ་བ་ཡིན། དབང་པོ་དང་སྟོབས་དང་། བྱང་ཆུབ་ཀྱི་ཡན་ལག་འཕེལ་བར་མཛད་ཅིང་། ཆོས་ཀྱི་ལོ་ཏོག་ལ་བབ་པས་ཀྱང་ཉེ་བར་འཚོ་བ་ཡིན། སེམས་ཅན་གྱི་རྙོག་པ་ཡོངས་སུ་སེལ་བས་དད་པ་བསྐྱེད་པས་ཀྱང་ཉེ་བར་འཚོ་བ་ཡིན། རྒྱུ་དང་འབྲས་བུ་རྣམ་པར་ཆུད་མི་ཟ་བས་མཐོང་བ་དོན་ཡོད་པས་ཀྱང་ཉེ་བར་འཚོ་བ་ཡིན། སྐྱེ་བ་དང་། འཕོ་བ་ཡང་དག་པར་སྟོན་ཅིང་། གཟུགས་སྣང་བར་མཛད་པས་ཀྱང་ཉེ་བར་འཚོ་བ་ཡིན། དགེ་བའི་རྩ་བ་རྣམ་པར་ཆུད་མི་གཟོན་ཅིང་ཁོང་ཁྲོ་བ་མི་མངའ་བས་ཀྱང་ཉེ་བར་འཚོ་བ་ཡིན། སློབ་མའི་ཡོན་ཏན་པདྨོ་ཁ་ཕྱེ་ཞིང་རྒྱས་པར་མཛད་དེ། སེམས་ཅན་རྣམས་ལ་ཡེ་ཤེས་ཀྱི་འོད་ཟེར་ཚད་མེད་པ་རབ་ཏུ་གཏོང་བས་ཀྱང་ཉེ་བར་འཚོ་བ་ཡིན། སྤྱད་པ་བརྩོམས་པ་ཡོངས་སུ་གྲུབ་པ་མཛད་ཅིང་། བྱང་ཆུབ་སེམས་དཔའི་སྤྲོ་བ་བསྐྱེད་པས་ཀྱང་ཉེ་བར་འཚོ་བ་ཡིན། དེ་ཅིའི་ཕྱིར་ཞེ་ན། དེ་བཞིན་གཤེགས་པའི་སྐུའི་ཉི་མ་ནི། ཡེ་ཤེས་ཀྱི་འོད་ཟེར་གྱི་དཀྱིལ་འཁོར་ཚད་མེད་པ་དང་ལྡན་པའི་ཕྱིར་རོ། ། 3. གཞན་ཡང་འདི་ལྟ་སྟེ། དཔེར་ན། ཉི་མའི་དཀྱིལ་འཁོར་ཉིད་འཛམ་བུའི་གླིང་དུ་འཆར་བའི་ཚེ། ། ཐོག་མ་ཉིད་དུ་རིའི་རྒྱལ་པོ་ཆེན་པོ་འདི་ལྟ་སྟེ། རི་རབ་རིའི་རྒྱལ་པོ་ལ་སྣང་བ་འགྱུར་རོ། ། དེའི་འོག་ཏུ་དེ་མ་ཡིན་པའི་རི་ཆེན་པོ་གཞན་ལ་སྣང་བར་འགྱུར་རོ། ། དེའི་འོག་ཏུ་རི་ནག་པོ་དག་ལའང་སྣང་བར་འགྱུར་རོ། ། དེའི་འོག་ཏུ་ས་ཕྱོགས་མཐོན་པོ་རྣམས་སུ་སྣང་བར་འགྱུར་རོ། དེའི་འོག་ཏུ་འཛམ་བུའི་གླིང་འདིའི་ས་ཕྱོགས་དམའ་བ་དག་ཀྱང་སྣང་བར་བྱེད་དེ། འོན་ཀྱང་ཉི་མའི་དཀྱིལ་འཁོར་ལ། འདིར་ནི་ཐོག་མ་ཉིད་དུ་འོད་ཟེར་དགྱེའོ་ཞེའམ། འདིར་ནི་ཐོག་མར་སྣང་བར་བྱའོ་ཞེས་བྱ་བའི་རྣམ་པར་རྟོག་པ་མེད་དེ།། སྤྲོས་པ་མེད་ཀྱང་ཉི་མའི་དཀྱིལ་འཁོར་འོད་མཉམ་དུ་གཏོང་ཞིང་འཆར་བ་ནི་མེད་པ་མ་ཡིན་ཏེ། ས་མཐོན་དམན་གྱི་ཁྱད་པར་གྱིས་མཐོ་མཐོ་ལ་སྔར་འཆར་རོ། ། དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཡེ་ཤེས་ཀྱི་སྐུ་ཉི་མའི་དཀྱིལ་འཁོར་ཡང་། ཆོས་ཀྱི་དབྱིངས་མཐའ་དང་དབུས་མེད་པའི་རིས་སུ་འཆར་བར་འགྱུར་བའི་ཚེ། རྟག་ཏུ་རྒྱུན་མི་འཆད་པར་ཐོགས་པ་མེད་པའི་ཡེ་ཤེས་ཀྱི་འོད་ཟེར་སྣང་བ་འགྱེད་དེ། དེ་ཡོངས་སུ་བཀྱེ་བའི་ཚེ་ཡང་ཐོག་མ་ཉིད་དུ་ལྷག་པའི་བསམ་པ། རིའི་རྒྱལ་པོ་ཆེན་པོ་ལྟ་བུ་དང་ལྡན་པའི་སྐྱེས་བུ་དམ་པ་རྣམས་ལ། ཆོས་ཀྱི་སྣང་བ་ཆེན་པོ་ཡང་དག་པར་སྟོན་པའི་ཚུལ་དུ་འཆར་བར་འགྱུར་རོ། ། དེའི་འོག་ཏུ་ཉན་ཐོས་དང་རང་སངས་རྒྱས་ཀྱི་ཐེག་པར་ཞུགས་པ་རྣམས་ལ་འཆར་བར་འགྱུར་རོ། ། དེའི་འོག་ཏུ་དགེ་བའི་རྩ་བ་ངེས་པ་དང་ལྡན་པའི་སེམས་ཅན་རྣམས་ལ་བསམ་པའི་སྣོད་ཇི་ལྟ་བ་བཞིན་དུ་ཡེ་ཤེས་ཀྱི་སྣང་བ་ཆེན་པོ་ཡང་དག་པར་བསྟན་པའི་ཚུལ་གྱིས་འཆར་བར་འགྱུར་རོ། ། དེའི་འོག་ཏུ་ཆུང་དུ་ན་ལོག་པར་ངེས་པའི་སེམས་ཅན་ཡན་ཆད་སེམས་ཅན་ཐམས་ཅད་ལའང་དེ་བཞིན་གཤེགས་པའི་ཡེ་ཤེས་ཀྱི་འོད་ཟེར་ཆེན་པོ་འཆར་བར་འགྱུར་རོ། ། དེ་ལྟར་ཤར་ནས་ཀྱང་སེམས་ཅན་རྣམས་ལ་ཤིན་ཏུ་ཕན་པར་འགྱུར་ཏེ། མ་འོངས་པའི་རྒྱུའང་ཡོངས་སུ་སྨིན་པར་མཛད་ཅིང་། དགེ་བའི་ཆོས་ཀྱིས་རྣམ་པར་འཕེལ་བར་མཛད་ཀྱང་། དེ་བཞིན་གཤེགས་པའི་ཡེ་ཤེས་ཀྱི་སྐུ་ཉི་མའི་འོད་ཟེར་དེ་དག་ནི། སེམས་ཅན་འདི་རྣམས་ལ་བདག་ཅག་གིས་ཐོག་མ་ཉིད་དུ་ཐེག་པ་ཆེན་པོས་སྣང་བར་བྱས་ཏེ། དེའི་འོག་ཏུ་བསམ་པ་འབྲིང་དང་ལྡན་པ་རྣམས་ལ། ཉན་ཐོས་དང་། རང་སངས་རྒྱས་ཀྱི་ཐེག་བ་ཡོངས་སུ་པས་རྣམ་པར་དག་པར་བྱ་བའི་ཕྱིར་སྣང་བར་བྱའོ། ། དེའི་འོག་ཏུ་སེམས་ཅན་དགེ་བའི་བསམ་པ་ཅན་མོས་པའི་ཐེག་པ་དང་ལྡན་པ་རྣམས་ལ་བསམ་པ་ཇི་ལྟ་བ་བཞིན་དུ་ཡོངས་སུ་སྨིན་པར་བྱ་བའི་ཚུལ་གྱིས་སྣང་བར་བྱའོ། ། དེའི་འོག་ཏུ་ཆུང་དུ་ན་སེམས་ཅན་ལོག་པར་ངེས་པ་ཡན་ཆད་སེམས་ཅན་ཐམས་ཅད་ཀྱི་བསམ་པ་ཡོངས་སུ་སྦྱང་བར་བྱའོ། ། བལྟ་བ་བསྲང་བར་བྱའོ་ཞེས་རྣམ་པར་རྟོག་པ་མི་མངའ། སྤྲོས་པ་མི་མངའ་སྟེ། འོན་ཀྱང་འོད་ཟེར་མཉམ་པར་འགྱེད་པས། འོད་ཟེར་གྱི་མཉམ་པ་ཉིད་དུ་ཀུན་ཏུ་བསྒྲིབས་པ་མེད་པར་སེམས་ཅན་ཐམས་ཅད་ལ་རབ་ཏུ་སྣང་བར་འགྱུར་ཏེ། དེ་ནི་དེ་བཞིན་གཤེགས་པའི་ཡེ་ཤེས་ཀྱི་སྐུ་ཉི་མའི་དཀྱིལ་འཁོར་ལ་རྣམ་པར་རྟོག་པ་མི་མངའ་བའི་ཕྱིར་རོ། ། དེ་ཡང་འདི་ལྟ་སྟེ། ཉི་མའི་དཀྱིལ་འཁོར་རྣམ་པོར་རྟོག་པ་མེད་ཅིང་། འོད་ཟེར་མཉམ་པ་ཉིད་དུ་འཆར་ཡང་རི་ཆེན་པོ་རྣམས་ལ་རྣམ་པ་ཐ་དད་དུ་སྣང་བར་འགྱུར་རོ། ། དེ་བཞིན་དུ་དེ་བཞིན་གཤེགས་པའི་ཡེ་ཤེས་ཀྱི་སྐུ་ཉི་མའི་དཀྱིལ་འཁོར་རྣམ་པར་རྟོག་པ་མི་མངའ་ཞིང་། འོད་ཟེར་མཉམ་པ་ཉིད་དུ་འཆར་ཡང་། སེམས་ཅན་རྣམས་ཀྱི་དགེ་བའི་རྩ་བ་རྣམ་པ་ཐ་དད་པ་དང་། བསམ་པའི་རྣམ་པ་ཐ་དད་པས། དེ་བཞིན་གཤེགས་པའི་འོད་ཟེར་རྣམ་པ་ཐ་དད་པ་ཡང་སྣང་ཞིང་ཡོད་དོ། ། 4. བྱང་ཆུབ་སེམས་དཔའ་སེམས་དཔའ་ཆེན་པོས་ཁོང་དུ་ཆུད་པར་བྱ་བའི་སྒོ་བཞི་པ་འདིས་ཀྱང་། དེ་བཞིན་གཤེགས་པའི་སྐུ་བལྟར་ཡོད་པ་ཤེས་པར་བྱའོ། ། གཞན་ཡང་འདི་ལྟ་སྟེ། དཔེར་ན། ཉི་མའི་དཀྱིལ་འཁོར་དེ་ཉིད་ཤར་ཀྱང་སེམས་ཅན་དམུས་ལོང་རྣམས་ཀྱི་མིག་ལམ་དུ་སྣང་བར་མི་འགྱུར་ཏེ། དེ་ནི་མིག་དང་མི་ལྡན་པའི་ཕྱིར་རོ། ། དེ་ལྟར་ཉི་མའི་དཀྱིལ་འཁོར་དེ་སེམས་ཅན་དམུས་ལོང་རྣམས་མིག་དང་མི་ལྡན་པའི་ཕྱིར་མིག་ལམ་དུ་མི་སྣང་དུ་ཟིན་གྱིས་ཀྱང་། སེམས་ཅན་དམུས་ལོང་རྣམས་ལའང་ཉི་མར་གདགས་པ་དང་། ཁ་ཟས་འཇུ་བ་དང་། བདེ་བར་སྤྱོད་པ་དང་། ལུས་ཀྱི་གྲང་བ་བསལ་བ་དང་། ལུས་ཡང་བ་དང་། མིག་ནད་དང་། ལུས་ལ་གནས་པའི་ནད་རླུང་ངམ་མཁྲིས་པའམ། བད་ཀན་ལས་བྱུང་བ་དེ་དག་ཐམས་ཅད་སེལ་བར་བྱེད་པའི་སྒོར་མི་ཕན་པ་མ་ཡིན་ཏེ། ཕན་འདོགས་སོ། ། དེ་བཞིན་དུ་དེ་བཞིན་གཤེགས་པའི་ཡེ་ཤེས་ཀྱི་སྐུ་ཉི་མའི་དཀྱིལ་འཁོར་ཡང་། སེམས་ཅན་ལྷག་པའི་བསམ་པའི་མིག་ལྡོངས་པར་གྱུར་པ། མོས་པ་ལོག་པ། ལྟ་བ་ལོག་པ། སྦྱོར་བ་ལོག་པ། འཚོ་བ་ལོག་པ། དམུས་ལོང་ལྟ་བུར་གྱུར་པའི་མིག་ལམ་དུ་སྣང་བར་མི་འགྱུར་ཏེ། དེ་ནི་དད་པའི་མིག་དང་མི་ལྡན་པའི་ཕྱིར་རོ། ། དེ་ལྟར་དེ་བཞིན་གཤེགས་པའི་ཡེ་ཤེས་ཀྱི་སྐུ་ཉི་མའི་དཀྱིལ་འཁོར་སེམས་ཅན་དམུས་ལོང་ལྟ་བུར་གྱུར་པའི་དད་པའི་མིག་དང་མི་ལྡན་པ་དེ་དག་གི་མིག་ལམ་དུ་སྣང་བར་མ་གྱུར་དུ་ཟིན་ཀྱང་། སེམས་ཅན་རྣམ་པ་དེ་ལྟ་བུ་དག་ལ་དེ་བཞིན་གཤེགས་པའི་མཐུས། སེམས་ཅན་དེ་དག་གི་ལུས་ལ་མི་བདེ་བ། རྩེ་ཞིལ་བར་འགྱུར་བ་དང་། མ་འོངས་པའི་ཉོན་ངས་པའི་རྒྱུའི་ལྷགས་པ་སེལ་བའི་སྒོར་དེ་བཞིན་གཤེགས་པའི་ཡེ་ཤེས་ཀྱི་སྐུ་ཉི་མའི་དཀྱིལ་འཁོར་ཕན་པར་མི་འགྱུར་བ་མ་ཡིན་ཏེ། ཕན་འདོགས་སོ། ། དེ་བཞིན་གཤེགས་པ་ལ་ཡོན་ཏན་རིན་པོ་ཆེ་ཐམས་ཅད་ཡང་དག་པར་བསགས་པ་ཞེས་བྱ་བའི་འོད་ཟེར་དང་། ཐམས་ཅད་མཁྱེན་པའི་ཡེ་ཤེས་ཀྱི་ང་བ་དང་ལྡན་པ་ཞེས་བྱ་བའི་འོད་ཟེར་དང་། རྣམ་པར་དག་པས་རྣམ་པར་རོལ་པའི་ཡེ་ཤེས་ཀྱི་སྣང་བ་དང་ལྡན་པ་ཞེས་བྱ་བའི་འོད་ཟེར་དང་། དབྱངས་ཆེན་པོས་ཡེ་ཤེས་རྣམ་པར་དགོད་པའི་དོན་སྣང་བ་དང་ལྡན་པ་ཞེས་བྱ་བའི་འོད་ཟེར་དང་། སྤྱོད་པ་ཐམས་ཅད་ཀྱིས་ཤིན་ཏུ་ཚིམ་པར་བྱེད་པའི་ཡེ་ཤེས་སྣང་བ་དང་ལྡན་པ་ཞེས་བྱ་བའི་འོད་ཟེར་དང་། སེམས་ཅན་ཐམས་ཅད་ཀྱི་ཐེ་ཚོམ་ཐམས་ཅད་ཡོངས་སུ་བཅད་པའི་ཡུལ་ལ་རྣམ་པར་རོལ་པ་ཞེས་བྱ་བའི་འོད་ཟེར་དང་། མི་གནས་པའི་ཡེ་ཤེས་རྣམ་པར་འཕྲུལ་བའི་སྣང་བ་དང་ལྡན་པ་ཞེས་བྱ་བའི་འོད་ཟེར་དང་། ། སྤྲོས་པ་ཐམས་ཅད་ཡང་དག་པར་གཅད་པའི་ཡུལ་ལ་ཡེ་ཤེས་ཀྱིས་རྣམ་པར་རོལ་པ་ཞེས་བྱ་བའི་འོད་ཟེར་དང་། ཐེག་པ་ཐ་དད་་པའི་སྣོད་ལ་དབྱངས་རབ་ཏུ་བསྒྲགས་པ་ཞེས་བྱ་བའི་འོད་ཟེར་དང་། ཞིང་གི་རྒྱུན་དུ་སེམས་ཅན་ཡོངས་སུ་སྨིན་པར་མཛད་ཅིང་། སྐྱེ་བ་རྣམ་པར་སྦྱོང་བས་རྣམ་པར་རོལ་པའི་དཀྱིལ་འཁོར་གྱི་དབྱངས་ཞེས་བྱ་བའི་འོད་ཟེར་མངའ་སྟེ། འོད་ཟེར་དེ་དག་ལ་སོགས་པ་དེ་བཞིན་གཤེགས་པའི་མཛོད་སྤུའི་གསེབ་ཀྱི་སྒོ་གཅིག་ནས་ཀྱང་འོད་ཟེར་སྟོང་ཚང་བར་འབྱུང་སྟེ། ལྔ་བརྒྱ་ནི་འོག་གི་ཕྱོགས་སུ་གཏོགས་སོ། ། ལྔ་བརྒྱ་ནི་སྟེང་གི་ཕྱོགས་སུ་གཏོགས་སོ། །འོད་ཟེར་དེ་དག་མཐོང་བར་གྱུར་ན་བྱང་ཆུབ་སེམས་དཔའ་སངས་རྒྱས་ཀྱི་ཞིང་གཞན་དང་གཞན་ན་འཁོད་པ་རྣམས་ཀྱིས། དེ་བཞིན་གཤེགས་པ་མཚན་ཐ་དད་པ་རྣམས་རབ་ཏུ་ཤེས་པར་འགྱུར་ཏེ། བྱང་ཆུབ་སེམས་དཔའ་དེ་དག་ཐམས་ཅད་ཀྱང་། དེ་བཞིན་གཤེགས་པའི་ཡུལ་ལ་མགོ་ཡོངས་སུ་དག་པ་བཅུ་རབ་ཏུ་འཐོབ་པར་འགྱུར་རོ། ། དེ་བཞིན་གཤེགས་པའི་ཡུལ་ལ་མིག་ཡོངས་སུ་དག་པ་བཅུ་དང་། རྣ་བ་ཡོངས་སུ་དག་པ་བཅུ་དང་། སྣ་ཡོངས་སུ་དག་པ་བཅུ་དང་། ལྕེ་ཡོངས་སུ་དག་པ་བཅུ་དང་། ལུས་ཡོངས་སུ་དག་པ་བཅུ་དང་། ལག་པ་ཡོངས་སུ་དག་པ་བཅུ་དང་། ། རྐང་པ་ཡོངས་སུ་དག་པ་བཅུ་དང་། ས་ཡོངས་སུ་དག་པ་བཅུ་དང་། ཡེ་ཤེས་འབྱམས་ཀླས་པ་ཡོངས་སུ་དག་པ་བཅུ་རབ་ཏུ་འཐོབ་པར་འགྱུར་ཏེ། དེ་དག་གི་སྐྱེ་མཆེད་བྱང་ཆུབ་སེམས་དཔའི་སར་གྲུབ་པ་དེ་དག་གིས་འོད་ཟེར་དེ་དག་མཐོང་ཞིང་ཤེས་པར་གྱུར་ནས་ཀྱང་། དེ་དག་གི་སྐྱེ་མཆེད་དེ་དག་དེ་བས་ཀྱང་རྣམ་པར་དག་པར་གྱུར་ཏེ། དེ་དག་གི་དགེ་བའི་རྩ་བ་ཐམས་ཅད་ཀྱང་ཐམས་ཅད་མཁྱེན་པ་ཉིད་དུ་ཡོངས་སུ་སྨིན་པར་འགྱུར་རོ། ། ཉན་ཐོས་ཀྱི་ཐེག་པ་པ་དང་། རང་སངས་རྒྱས་ཀྱི་ཐེག་པ་པ་རྣམས་ལ་ཡང་། ཕྱོགས་གཅིག་གི་སར་དྲི་མ་ཐམས་ཅད་ཡོངས་སུ་བྱང་བའི་རྒྱུར་འགྱུར་རོ། ། སེམས་ཅན་དམུས་ལོང་ལྟ་བུ་རྣམས་ཀྱིས་ཀྱང་། ལུས་ཀྱི་བདེ་བ་རབ་ཏུ་འཐོབ་ཅིང་ཡོངས་སུ་རྫོགས་པ་དང་། སྐྱོན་མེད་པ་དང་རྣམ་པར་དག་པ་དང་། ཤིན་ཏུ་དུལ་བ་རབ་ཏུ་འགྲུབ་པར་འགྱུར་ཏེ། དེ་ནི་གོང་དུ་ཡང་རྣམ་པར་བསྒོམ་པའི་ཡེ་ཤེས་རབ་ཏུ་འགྲུབ་པའི་རྒྱུར་འགྱུར་རོ། ། སེམས་ཅན་དམྱལ་བ་པ་དང་། བྱོལ་སོང་གི་སྐྱེ་གནས་པ་དང་། གཤིན་རྗེའི་འཇིག་རྟེན་པའི་སེམས་ཅན་རྣམས་དང་། ལོག་པར་ལྟུང་བའི་སེམས་ཅན་རྣམས་ལ་ཡང་། ལུས་ཀྱི་བདེ་བ་ཉེ་བར་འགྲུབ་པའི་རྒྱུར་འགྱུར་ཏེ། ལུས་ཀྱི་བདེ་བ་དེ་དང་ལྡན་པར་གྱུར་ནས་ཀྱང་། ལོག་པར་ལྟུང་བ་དེ་དག་ནས་ཤི་འཕོས་ཤིང་འགྲོལ་བར་འགྱུར་རོ། ། ལོག་པར་ལྟུང་བའི་ངན་སོང་དེ་དག་ནས་ཤི་འཕོས་ནས་ཀྱང་ལྷ་དང་མིར་སྐྱེ་སྟེ། སེམས་ཅན་དེ་དག་གིས་ནི། ཁོང་དུ་བདག་ཅག་རྒྱུ་གང་དང་། རྐྱེན་གང་དང་། སུའི་མཐུས་དེར་སྐྱེས་པར་གྱུར་པའང་མི་ཤེས། ཁོང་དུ་མི་ཆུད་དོ། ། སེམས་ཅན་དམུས་ལོང་དུ་གྱུར་པ་དེ་དག་འདི་སྙམ་སེམས་ཏེ། བདག་ཅིག་ནི་ཚངས་པས་བྱས་པ་སྟེ། ཚངས་པས་སྤྲུལ་པའོ་ཞེས་བྱ་བའི་ལྟ་བའི་རྣམ་པ་དང་ལྡན་ཡང་། དེ་བཞིན་གཤེགས་པའི་ཏིང་ངེ་འཛིན་གྱི་དཀྱིལ་འཁོར་ཀུན་ཏུ་རྣམ་པར་འཕྲུལ་པ་ལ་བཞུགས་ཤིང་། སངས་རྒྱས་ཀྱི་གསུང་སྟོང་ཕྲག་དྲུག་ཅུ་དང་ལྡན་པས། སེམས་ཅན་དེ་དག་ལ་བཀའ་སྩལ། ལོང་དུ་གྱུར་པ་རྣམས་ལ་ཡང་དགེ་བའི་རྩ་བ་ཡོངས་སུ་སྨིན་པར་མཛད་པས་ཕན་འདོགས་པ་ཡིན་ནོ། ། 5. བྱང་ཆུབ་སེམས་དཔའ་སེམས་དཔའ་ཆེན་པོས་ཁོང་དུ་ཆུད་པར་བྱ་བའི་སྒོ་ལྔ་པ་འདིས་ཀྱང་། དེ་བཞིན་གཤེགས་པའི་སྐུ་བལྟར་ཡོད་པ་ཤེས་པར་བྱའོ། ། གཞན་ཡང་འདི་ལྟ་སྟེ། ཟླ་བའི་དཀྱིལ་འཁོར་འཆར་བར་འགྱུར་བའི་ཚེ་རྨད་དུ་བྱུང་བའི་ཆོས་བཞི་སྔ་ཕྱི་མེད་པར་བྱེད་དེ། བཞི་གང་ཞེ་ན། (1)སྐར་མ་ཐམས་ཅད་ཟིལ་གྱིས་གནོན་ཏོ། ། (2)འཕེལ་བ་དང་། འགྲིབ་པ་ཡང་ཡོངས་སུ་སྟོན་ཏོ། ། (3)འཛམ་བུའི་གླིང་ཐམས་ཅད་ཀྱི་ཆུ་དང་བའི་སྣོད་ཀུན་ཏུའང་གཟུགས་བརྙན་རབ་ཏུ་སྣང་ངོ་། (4)སེམས་ཅན་ཀུན་གྱིས་བལྟས་ནའང་མངོན་སུམ་དུ་གནས་པར་སྣང་སྟེ། དེ་ལ་རྣམ་པར་རྟོག་པ་མེད་དོ། ། སྤྲུལ་པ་མེད་དོ། ། དེ་བཞིན་དུ་དེ་བཞིན་གཤེགས་པའི་སྐུ་ཟླ་བའི་དཀྱིལ་འཁོར་ཡང་། རྨད་དུ་བྱུང་བའི་ཆོས་བཞི་སྔ་ཕྱི་མེད་པར་སྟོན་ཏོ། ། བཞི་གང་ཞེ་ན། [1]སློབ་པ་དང་མི་སློབ་པ་ཐམས་ཅད། [2]རང་སངས་རྒྱས་ཐམས་ཅད་ཀྱི་ཡོན་ཏན་རྣམ་པ་ཐམས་ཅད་དུ་ཟིལ་གྱིས་གནོན་ཏོ། ། [3]ཇི་ལྟ་བུར་མོས་པའི་སེམས་ཅན་རྣམས་ཀྱི་ལྟ་བ་རྣམ་པ་ཐ་དད་པའི་ཚུལ། [4] སྐུ་ཚེའི་ཚད་རྣམ་པ་ཐ་དད་པ་ཡང་ཡང་དག་པར་སྟོན་ཏེ། དེ་བཞིན་གཤེགས་པའི་སྐུ་ཟླ་བའི་དཀྱིལ་འཁོར་ལ་འཕེལ་བ་དང་། འགྲིབ་པ་མི་མངའོ། ། འཇིག་རྟེན་གྱི་ཁམས་ཐམས་ཅད་དུ་ལྷག་པའི་བསམ་པ་དང་། ་སེམས་ཡོངས་སུ་དག་ཅིང་། མོས་པ་ཡོངས་སུ་བསྒོམས་པའི་སྟོབས་དང་། ཤུགས་སུ་ལྡན་པའི་སེམས་ཅན་བྱང་ཆུབ་ཀྱི་སྣོད་རྣམས་ལའང་གཟུགས་བརྙན་རིབ་ཏུ་འབྱུང་ངོ་། ། སེམས་ཅན་ཀུན་གྱིས་བལྟས་ཀྱང་། བདག་བདག་ལ་མངོན་དུ་གཟིགས་པར་འཛིན་ཏེ། བསམ་པ་ཇི་ལྟ་བ་བཞིན་དུ་ཆོས་ཉན། ཐེག་པ་གང་གིས་འདུལ་བའི་ས་ཅི་བཞིན་དུ་རྣམ་པོར་གྲོལ་བར་འགྱུར་ཏེ། སེམས་ཅན་ཇི་ལྟ་བུར་འདུལ་བ་བཞིན་དུ་སྣང་བའི་ཚུལ་གྱིས་དེ་བཞིན་གཤེགས་པའི་སྐུའང་རབ་ཏུ་སྟོན་ཏེ། དེ་བཞིན་གཤེགས་པའི་སྐུ་ཟླ་བའི་དཀྱིལ་འཁོར་དེ་ལ་རྣམ་པར་རྟོག་པ་མི་མངའ། སྤྲོས་པ་མི་མང་འོ། ། རྣམ་པར་རྟོག་པ་མི་མངའ་ཞིང་སྤྲོས་པ་མི་མངའ་བས་ཀྱང་འཕྲིན་ལས་དེ་དག་ལ་རབ་ཏུ་སྤྱོད་དོ། ། 6. བྱང་ཆུབ་སེམས་དཔའ་སེམས་དཔའ་ཆེན་པོས་ཁོང་དུ་ཆུད་པར་བྱ་བའི་སྒོ་དྲུག་པ་འདིས་ཀྱང་། དེ་བཞིན་གཤེགས་པའི་སྐུ་བལྟར་ཡོད་པ་ཤེས་པར་བྱའོ། ། གཞན་ཡང་འདི་ལྟ་སྟེ། དཔེར་ན། སྟོང་གསུམ་གྱི་སྟོང་ཆེན་པོའི་བདག་པོ་ཚངས་པ་ཆེན་པོ་ནི། ལས་གྲོན་ཆུང་དུས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་དུ་ལུས་ཡོངས་སུ་སྟོན་ཏེ། འོན་ཀྱང་ལུས་ཡོངས་སུ་འབྱེད་པ་མེད་དོ། ། ལུས་ཐ་དད་པར་བྱེད་པ་མེད་དོ། ། སྟོང་གསུམ་གྱི་སྟོང་ཆེན་པོར་གཏོགས་པའི་སེམས་ཅན་རྣམས་ཀྱིས་ཀྱང་། བསམ་པ་མཉམ་པ་ཉིད་ཇི་ལྟ་བུ་དང་ལྡན་པའི་ཚུལ་བཞིན་དུ་ལུས་མཉམ་པ་ཉིད་དུ་མཐོང་ངོ་། ། དེ་བཞིན་དུ་དེ་བཞིན་གཤེགས་པ་ཡང་། སྐུ་ཡོངས་སུ་འབྱེད་པ་མི་མཛད། སྐུ་ཐ་དད་པར་མཛད་པ་ཡང་མི་མངའ་བར་འཇིག་རྟེན་གྱི་ཁམས་ཐམས་ཅད་དུ་གཏོགས་པའི་སེམས་ཅན་རྣམས་ལ་ཡང་བསམ་པ་དང་། མོས་པ་ཇི་ལྟ་བ་བཞིན་དུ་སྐུ་ཡོངས་སུ་སྟོན་ཏེ། དེ་བཞིན་གཤེགས་པའི་སྐུ་ལ་རྣམ་པར་རྟོག་པ་མི་མངའ། སྤྲོས་པ་མི་མངའོ། ། 7. བྱང་ཆུབ་སེམས་དཔའ་སེམས་དཔའ་ཆེན་པོས་ཁོང་དུ་ཆུད་པར་བྱ་བའི་སྒོ་བདུན་པ་འདིས་ཀྱང་། དེ་བཞིན་གཤེགས་པའི་སྐུ་བལྟར་ཡོད་པ་ཤེས་པར་བྱའོ། གཞན་ཡང་འདི་ལྟ་སྟེ། སྨན་པའི་རྒྱལ་པོ་ཆེན་པོ་སྨན་གྱི་ཡོ་བྱད་དང་། ཆོ་ག་ལ་ཤིན་ཏུ་མཁས་པ་གཙུག་ལག་དང་སྔགས་ཐམས་ཅད་ཀྱི་ཚུལ་ཤེས་པ་ཞིག་ཡོད་ལ། འཛམ་བུའི་གླིང་གི་སྨན་ཐམས་ཅད་དེའི་དབང་དུ་གྱུར་ཏེ། སྨན་པའི་རྒྱལ་པོ་ཆེན་པོ་དེའི་སྔོན་གྱི་དགེ་པའི་རྩ་བའི་སྟོབས་ཀྱི་ཤུགས་དང་། སྔགས་དང་། རིགས་སྔགས་ཀྱི་མཐུ་དང་། ཐབས་ཀྱིས་མཐོང་མ་ཐག་ཏུ་སེམས་ཅན་རྣམས་ཀྱི་ནད་ཡོངས་སུ་འཚོ་བར་འགྱུར་ཞིང་། ནད་མེད་པར་འགྱུར་བ་ཞིག་ཡོད་དེ།དེ་ནས་སྨན་པའི་རྒྱལ་པོ་དེ་འཆི་བའི་དུས་ལ་བབ་པར་གྱུར་ན། དེ་འདི་སྙམ་དུ་སེམས་པར་གྱུར་ཏེ།། ཀྱི་ཧུད་སེམས་ཅན་འདི་དག་བདག་ཤི་བ་དང་མགོན་མེད་པར་འགྱུར་གྱི། བདག་གི་ཐབས་མཁས་པའི་སྟོབས་ཀྱིས་སྨན་ཐམས་ཅད་ཡོངས་སུ་བསྡུས་ཏེ། བདག་གི་ལུས་ལ་བསྐུའོ། ། སྔགས་དང་རིག་སྔགས་ཀྱི་སྟོབས་དང་། བྱིན་གྱི་རླབས་ཀྱིས་ཀྱང་བདག་གི་ལུས་བྱིན་གྱིས་བརླབས་ཏེ། ཅི་ནས་ཀྱང་བདག་ཤི་ནས་ལུས་མི་འཇིག་པ་དང་། མི་སྐམ་པ་དང་། མི་ཉམས་ཤིང་འགྲོ་བ་དང་། འོང་བ་དང་། འདུག་པས་ཀྱང་སྤྱོད་པ་དང་། ནད་ཐམས་ཅད་སོས་པར་བྱ་བའི་ཕྱིར། སྨན་པའི་ལས་སུ་བྱ་བ་ཐམས་ཅད་ཀྱང་ སྤྱོད་ཅིང་བལྟ་བ་དང་། མཉན་པའི་དོན་སྤྱོད་པས་ཀྱང་སྔོན་ཇི་ལྟ་བ་བཞིན་དུ་ཕྱིན་ཆད་ཀྱང་གནས་པར་བྱའོ་སྙམ་དུ་སེམས་པ་ཞིག་ཡོད་ན། དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྨན་པའི་རྒྱལ་པོ་ཆེན་པོ་བླ་ན་མེད་པ་ཉོན་མོངས་པའི་ནད་ཐམས་ཅད་རབ་ཏུ་ཞི་བར་མཛད་པ་ལ་མཁས་པ། བསྐལ་པ་བྱེ་བ་ཁྲག་ཁྲིག་བརྒྱ་སྟོང་མང་པོས་ཀུན་མཁྱེན་པའི་རྩི་ལ། བརྩོན་འགྲུས་ཤིན་ཏུ་མཛད་པ། ཤེས་རབ་ཀྱི་ཕ་རོལ་ཏུ་ཕྱིན་པའི་ཐབས་མཁས་པ་དང་། སྔགས་དང་། རིག་སྔགས་ལ་ཤིན་ཏུ་བསླབས་པ། སྟོབས་དང་མི་བསྙེངས་པ་དང་སངས་རྒྱས་ཀྱི་ཆོས་མ་འདྲེས་པ་ལ་རབ་ཏུ་མཁས་པ་སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། གདུལ་བའི་ཚུལ་མཁྱེན་པ། དེ་བཞིན་གཤེགས་པ་ཐམས་ཅད་ཀྱི་མངའ་ཆེན་པོ་བརྙེས་པ་དེས་ཀྱང་། སྔོན་བྱང་ཆུབ་སེམས་དཔའི་སྤྱོད་པ་ལ་བཞུགས་ཤིང་། བསོད་ནམས་དང་། ཡེ་ཤེས་ཀྱི་ཚོགས་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་ཐབས་མཁས་པའི་སྔགས་དང་། རིག་སྔགས་དང་། སྨན་གྱི་མཐུས་ཕྱི་མའི་མཐའི་མུར་ཐུག་པའི་བསྐལ་པར་འགྲོ་བ་ཐམས་ཅད་ཀྱི་ཉོན་མོངས་པའི་ནད་གསོ་བའི་ཕྱིར། སྐུ་ཚེའི་ཚད་བྱིན་གྱིས་བརླབས་པས། དེའི་སྐུ་ཡོངས་སུ་དག་པའི་ཕྱིར། མཐོང་མ་ཐག་ཏུ་ཆེད་དུ་མི་མཛད་ཅིང་ལྷུན་གྱིས་གྲུབ་པར་སེམས་ཅན་རྣམས་ཀྱི་ཉོན་མོངས་པའི་ནད་ཐམས་ཅད་རབ་ཏུ་ཞི་བར་འགྱུར་ཏེ། སངས་རྒྱས་ཀྱི་འཕྲིན་ལས་ཐམས་ཅད་ཀྱང་རྒྱུན་མི་འཆད་པར་འབྱུང་ངོ་། ། 8. བྱང་ཆུབ་སེམས་དཔའ་སེམས་དཔའ་ཆེན་པོས་ཁོང་དུ་ཆུད་པར་བྱ་བའི་སྒོ་བརྒྱད་པ་འདིས་ཀྱང་། དེ་བཞིན་གཤེགས་པའི་སྐུ་བལྟར་ཡོད་པ་ཤེས་པར་བྱའོ། །རྒྱ་མཚོ་ཆེན་པོའི་ནང་ན་ནོར་བུ་རིན་པོ་ཆེ་ཆེན་པོ་འོད་ཐམས་ཅད་འདུས་པས་རྣམ་པར་སྣང་བའི་སྙིང་པོ་ཞེས་བྱ་བ་ཡོད་དེ། ནོར་བུ་རིན་པོ་ཆེ་ཆེན་པོ་དེའི་འོད་ཀྱིས་སེམས་ཅན་གང་ལ་བབ་པ་དེ་དག་ཐམས་ཅད་ཀྱང་འདི་ལྟ་སྟེ། ནོར་བུ་རིན་པོ་ཆེ་འོད་ཐམས་ཅད་འདུས་པས། རྣམ་པར་སྣང་བའི་སྙིང་པོའི་ཁ་དོག་ཏུ་ཁ་དོག་གཅིག་པར་འགྱུར་རོ། ། གང་གིས་ནོར་བུ་རིན་པོ་ཆེ་དེ་མཐོང་བར་གྱུར་པ་དེ་དག་གི་མིག་ཀྱང་ཡོངས་སུ་དག་པར་འགྱུར་རོ། ། ནོར་བུ་རིན་པོ་ཆེ་དེའི་འོད་ཀྱི་དཀྱིལ་འཁོར་གྱིས་ཇི་ཙམ་དུ་ཁྱབ་པར་གྱུར་པ་དེ་ཙམ་དུ་འོད་ཀྱི་དཀྱིལ་འཁོར་དེ་ལས། སེམས་ཅན་བདེ་བར་བྱེད་པ་ཞེས་བྱ་བའི་ནོར་བུ་རིན་པོ་ཆེའི་ཆར་འབབ་པར་འགྱུར་ཏེ། དེས་སེམས་ཅན་དེ་དག་ཀྱང་རབ་ཏུ་བདེ་བར་འགྱུར་ལ། སྡུག་བསྔལ་ཡང་རྒྱུན་འཆད་པར་འགྱུར་རོ། ། ནོར་བུ་རིན་པོ་ཆེ་དེ་ཆོས་ཅི་ལ་ཡང་མི་རྟོག་ན། འོན་ཀྱང་དོན་ཆེན་པོ་རབ་ཏུ་སྒྲུབ་བོ། ། དེ་བཞིན་དུ་དེ་བཞིན་གཤེགས་པ་ལ་ཡང་སྐུ་རིན་པོ་ཆེ་ཆེན་པོ་བསོད་ནམས་ཐམས་ཅད་ཡོངས་སུ་བསྡུས་པས། ཡེ་ཤེས་ཆེན་པོའི་སྙིང་པོ་དང་ལྡན་པ་མངའ་སྟེ། དེ་བཞིན་གཤེགས་པའི་སྐུ་རིན་པོ་ཆེའི་ཡེ་ཤེས་ཀྱི་འོད་ཟེར་དེ་དག་གིས། སེམས་ཅན་ཇི་སྙེད་ལ་རེག་པར་གྱུར་པ་དེ་དག་ཐམས་ཅད་ཀྱང་། དེ་བཞིན་གཤེགས་པའི་སྐུའི་ཁ་དོག་ཏུ་ཁ་དོག་གཅིག་པར་འགྱུར་རོ། ། སེམས་ཅན་གང་གིས་དེ་བཞིན་གཤེགས་པའི་སྐུ་མཐོང་བར་གྱུར་པ་དེ་དག་གི་ཆོས་ཀྱི་མིག་ཀྱང་རྣམ་པར་དག་པར་འགྱུར་རོ། །དེ་བཞིན་གཤེགས་པའི་སྐུ་རིན་པོ་ཆེའི་འོད་ཟེར་གྱི་དྲ་བའི་དཀྱིལ་འཁོར་གྱིས་སེམས་ཅན་ཇི་སྙེད་ལ་རེག་པ་དེ་དག་ཐམས་ཅད་ཀྱང་། དབུལ་བ་དང་ཡོངས་སུ་བྲལ་བར་འགྱུར་ཏེ། བྱང་ཆུབ་ཀྱི་སྒོའི་བར་གྱི་དེ་བཞིན་གཤེགས་པའི་བདེ་བ་ཡང་རབ་ཏུ་འཐོབ་པར་འགྱུར་རོ། ། དེ་བཞིན་གཤེགས་པའི་སྐུ་ཆོས་གང་ལ་ཡང་རྟོག་པ་མི་མངའ་སྟེ། སྤྲོས་པ་མི་མངའ་ཡང་འགྲོ་བ་ཐམས་ཅད་ཀྱི་དོན་ཡོངས་སུ་ཐོབ་པར་མཛད་དོ། ། 9. བྱང་ཆུབ་སེམས་དཔའ་སེམས་དཔའ་ཆེན་པོས་ཁོང་དུ་ཆུད་པར་བྱ་བའི་སྒོ་དགུ་པ་འདིས་ཀྱང་། དེ་བཞིན་གཤེགས་པའི་སྐུ་བལྟར་ཡོད་པ་ཤེས་པར་བྱའོ། །རྒྱ་མཚོ་ཆེན་པོའི་ནང་ན། རིན་པོ་ཆེའི་རྒྱལ་པོ་ཆེན་པོ་ཡིད་བཞིན་གྱི་ནོར་བུ་འགྲོ་བ་ཐམས་ཅད་ཀྱི་རྒྱན་གྱི་སྙིང་པོ་ཞེས་བྱ་བ་ཡོད་དེ། རིན་པོ་ཆེའི་རྒྱལ་པོ་དེ་ནི་ཡོན་ཏན་བརྒྱ་སྟོང་ཕྲག་བཅུ་དང་ལྡན་པ་སྟེ། ནོར་བུ་རིན་པོ་ཆེའི་རྒྱལ་པོ་དེ་གང་ན་འདུག་པ་དེ་འཁོར་གྱི་སེམས་ཅན་ཀུན་གྱི་ནང་དང་། སྡུག་བསྔལ་གྱི་གཙེ་བ་ཐམས་ཅད་མེད་པར་འགྱུར་རོ། ། སེམས་ཅན་ཇི་སྙེད་ཅིག་ནོར་བུ་རིན་པོ་ཆེའི་རྒྱལ་པོ་དེ་ལ། འདོད་པས་སིམས་པ་དེ་དག་ཐམས་ཅད་ཀྱི་བསམ་པ་ཡོངས་སུ་རྫོགས་པར་བྱེད་དེ། རིན་པོ་ཆེའི་རྒྱལ་པོ་ཆེན་པོ་དེ་ནི་བསོད་ནམས་མ་བྱས་པའི་སེམས་ཅན་རྣམས་ཀྱི་མིག་ལམ་དུ་སྣང་བར་འགྱུར་བ་མ་ཡིན་ནོ། ། དེ་ལ་ནོར་བུ་རི་པོ་ཆེའི་རྒྱལ་པོ་ཆེན་པོ་ཞེས་བྱ་བ་དེ་ནི། དེ་བཞིན་གཤེགས་པའི་སྐུ་སེམས་ཅན་ཐམས་ཅད་ཤིན་ཏུ་ཚིམ་པར་མཛད་པའི་ཚིག་བླ་དྭགས་ཏེ། གང་ན་དེ་བཞིན་གཤེགས་པའི་སྐུ་བལྟར་ཡོད་ཅིང་མཚན་མཉན་དུ་ཡོད་ལ། ཡོན་ཏན་དང་། ལེགས་པ་ཡོངས་སུ་བརྗོད་དུ་ཡོད་པ་དེ་ཕྱོགས་ཀྱི་སེམས་ཅན་ཀུན་གྱི་འཁོར་བ་ལ་གནས་པའི་སྡུག་བསྔལ་དང་། མི་བདེ་བ་ཐམས་ཅད་མེད་པར་འགྱུར་རོ། ། དེ་བཞིན་གཤེགས་པའི་སྐུ་རིན་པོ་ཆེ་དེ་ནི། ཅི་སྟེ་སེམས་ཅན་འཇིག་རྟེན་གྱི་ཁམས་ཐམས་ཅད་དུ་གཏོགས་པ་ཀུན་གྱིས་སྔ་ཕྱི་མེད་པར་སེམས་རྩེ་གཅིག་ཏུ་ཡིད་ལ་བྱ་བ་མ་འཁྲུགས་པས། དེ་བཞིན་གཤེགས་པའི་སྐུ་བལྟ་བའི་ཕྱིར་དམིགས་པ་བྱས་ན་དེ་དག་ཐམས་ཅད་ཀྱིས་སོ་སོ་ནས་དེ་བཞིན་གཤེགས་པའི་སྐུའང་མཐོང་བར་འགྱུར་ལ། ཐམས་ཅད་ཀྱི་ཆོས་ཀྱི་བསམ་པ་ཡང་ཡོངས་སུ་རྫོགས་པར་འགྱུར་རོ། དེ་བཞིན་གཤེགས་པའི་སྐུ་དེ་ཡང་སེམས་ཅན་འདུལ་བའི་དབང་དུ་དེ་བཞིན་གཤེགས་པའི་བྱིན་གྱི་རླབས་ཀྱིས་བསྟན་པ་མ་གཏོགས་པར་སེམས་ཅན་བསོད་ནམས་མ་བྱས་པ་རྣམས་ཀྱི་མིག་ལམ་དུ་སྣང་བར་མི་འགྱུར་ཏེ། སེམས་ཅན་སུ་ལའང་རུང་སྟེ། དགེ་བའི་རྩ་བ་དེ་བཞིན་གཤེགས་པའི་སྐུ་བསྟན་པས་ཡོངས་སུ་སྨིན་པར་བྱ་བ་ཞིག་ཡོད་ན། དེ་དག་ཡོངས་སུ་སྨིན་པར་བྱ་བའི་དོན་དུ་དེ་བཞིན་གཤེགས་པ་སྐུ་རིན་པོ་ཆེ་སྟོན་ཏོ། ། 10 . བྱང་ཆུབ་སེམས་དཔའ་སེམས་དཔའ་ཆེན་པོས་སེམས་ཚད་མེད་པའི་རྗེས་སུ་སོང་ཞིང་། ཕྱོགས་ཀྱི་དྲ་བ་ཐམས་ཅད་རྒྱས་པར་འགེངས་པ། ནམ་མཁའ་ལྟ་བུར་ཆགས་པ་མེད་པའི་སྤྱོད་ཡུལ་དང་ལྡན་པ། ཆོས་ཀྱི་དབྱིངས་མཉམ་པ་ཉིད་ཁོང་དུ་ཆུད་པ་ཡང་དག་པའི་མཐའ་མཉམ་པ་ཉིད་ལ་གནས་པ། དེ་བཞིན་ཉིད་ལ་གནས་པ། དེ་བཞིན་ཉིད་མ་སྐྱེས་མ་འགགས་པ་དང་། དུས་གསུམ་མཉམ་པ་ཉིད་ཀྱི་རྗེས་སུ་སོང་བ་རྟོག་པ་དང་། རྣམ་པར་རྟོག་པ་དང་།ཡོངས་སུ་རྟོག་པ་ཐམས་ཅད་དང་བྲལ་བ་ཕྱི་མའི་མཐའི་མུར་ཐུག་པའི་ལྷག་པའི་བསམ་པ་ལ་ཞུགས་པ། འཇིག་རྟེན་གྱི་ཁམས་དང་། ཆོས་ཀྱི་དབྱིངས་མ་ལུས་པ་ཐམས་ཅད་དུ་ཁྱབ་པ། དེ་བཞིན་གཤེགས་པ་ཐམས་ཅད་དང་། སྐུའི་རྒྱུན་གཅིག་ཏུ་གྱུར་པས་ཁོང་དུ་ཆུད་པར་བྱ་བའི་སྒོ་འདིས་ཀྱང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་སྐུ་བལྟར་ཡོད་པ་ཤེས་པ་བྱའོ། །
Tibetan Source	《ཕལ་ཆེན་ང་པ་》ཤ་124བ་5ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number