From Rangjung Yeshe Wiki - Dharma Dictionary
Jump to navigation
Jump to search
| ༀ
|
| Tibetan Definition
|
(ལེགས་སྦྱར) 1 ལེགས་སྦྱར་གྱི་ༀ་ནི་གུས་འདུད་དང་ཕྱག་འཚལ་བ་མཚོན་བྱེད་ཀྱི་ཡི་གེ་ཞིག་སྟེ། ལེགས་སྦྱར་གྱི་ प्रणमः “པྲ་ཎ་མཿ” ཞེས་པ་རབ་སྔགས་ཏེ་ཕྱག་འཚལ་བ་དང་ༀ་ཡིག་གི་དོན་ཡིན་པར། སཾ་བོད་སྐད་གཉིས་ཤན་སྦྱར་གསེར་གྱི་ཕྲེང་མཛེས་ལས་གསུངས་པ་ལྟར་དང་། བོད་པས་བཀྲ་ཤིས་བདེ་ལེགས་ཟེར་བའི་ཚོད་དུ་རྒྱ་གར་བ་རྣམས་འཚམས་འདྲི་བྱེད་ཚེ་པྲ་ཎམ་ཞེས་བརྗོད་པ་གུས་འདུད་དང་ཕྱག་འཚལ་བ་མཚོན་བྱེད་རེད། ཡང་། སྣར་ཐང་ལོ་ཙཱའི་སྔགས་ཀྱི་བཀླག་ཐབས་སུ། ༀ་ནི་བཀྲ་ཤིས་པ་དང་གཡང་གི་དོན་དུ་བཤད་ཡོད། དཔལ་དུས་ཀྱི་འཁོར་ལོའི་ས་གར་དང་མཆོད་གར་གྱི་སྔགས་དོན་བརྡ་བཀྲོལ་ཁུངས་ལྡན་བདུད་རྩིའི་ཟེགས་མ་ལས་ཀྱང་། ༀ་ནི་སྔགས་ཀྱི་འགོ་འདྲེན་དང་བསྒྱུར་ན་རབ་སྔགས་སམ་སྲུངས་ཤིག་ཅེས་པའི་དོན་ཡིན་པར་བཤད། 2 ཡང་། འདི་ལ་ནོར་བུ་འཛིན་པའི་སྔགས་ཞེས་ཀྱང་ཟེར། ༀ་ལ་ཨ་ཨུ་མ་གསུམ་ (འདི་ཅུང་ཟད་གོ་དཀའ་བའི་རྒྱུ་མཚན་ནི། བོད་ཡིག་ལ་ཨཱ་ལི་སྲོག་ཞུགས་ཀྱི་རྣམ་གཞག་མ་མཛད་པས། དེ་ནི་ལེགས་སྦྱར་གྱི་དབང་དུ་བྱས་པ་སྟེ། སི་ཏུ་འགྲེལ་ཆེན་གྱི་དབུར། ལེགས་སྦྱར་ལྟར་ཨ་ཨི་འདུས་པས་ཨེ་སོགས་སུ་འགྱུར་བར་ཁས་ལེན་དགོས་པའི་སྐྱོན་ཡང་ཡོད་པའི་ཕྱིར་རོ། །ཞེས་གསུངས་པས་ཤེས་པར་འགྱུར་ཏེ། དཔེར་ན་ཨ་དང་ཨུ་འདུས་པ་ལས། ཨོ་ཞེས་གྲུབ། ཨ་དང་ཨི་འདུས་པས། ཨེ་ཞེས་གྲུབ་པ་ལྟ་བུའོ) འདུས་པས། སྐུ་གསུང་ཐུགས་གསུམ་མཚོན། དེ་གསུམ་གཅིག་ཏུ་གྱུར་པའི་ༀ་གྱིས་རྡོ་རྗེ་གསུམ་དབྱེར་མེད་མི་ཕྱེད་པ་མཚོན། སྔགས་དེའི་མཚོན་དོན་དྲན་པའི་སྒོ་ནས་ངག་ཏུ་བརྗོད་ན་བསོད་ནམས་མང་དུ་སྡུད་པས་ནོར་བུ་འཛིན་པའི་སྔགས་ཞེས་བརྗོད་དེ། རྒྱུད་རྡོ་རྗེ་རྩེ་མོ་ལས། ༀ་ནི་ཅི་ཞིག་ཡིན་པར་བརྗོད། །མཆོག་དང་ནོར་དང་དཔལ་དང་གཡང་། །སྐལ་བཟང་རྣམ་པ་དང་ལྡན་ཞིང་། །དམ་བཅའ་བ་དང་བཀྲ་ཤིས་དོན། །ནོར་བུ་འཛིན་པའི་སྔགས་སུ་བརྗོད། །ཅེས་གསུངས་པ་ལྟར་རོ། །ཡི་གེ་གསུམ་པོ་རྡོ་རྗེ་གསུམ་དུ་འཇོག་ཚུལ་སྐལ་ལྡན་གྲགས་པས། ཨ་མི་བསྐྱོད་པ། ཨུ་སྣང་མཐའ། མ་རྣམ་སྣང་དུ་བཞེད། ལོ་ཙཱ་བ་འགའ་ཞིག་གིས། ཨ་དྷེ་ཧ་ཙ་ལུས། ཨ་ཙ་ར་ངག ཨཾ་མན་ཙ་ཡིད་དུ་འདོད་ཅེས་རྗེ་བདག་ཉིད་ཆེན་པོས་གསུངས་སོ། །ཞེས་དཔལ་དུས་ཀྱི་འཁོར་ལོའི་ས་གར་དང་མཆོད་གར་གྱི་སྔགས་དོན་བརྡ་བཀྲོལ་ཁུངས་ལྡན་བདུད་རྩིའི་ཟེགས་མ་ལས་གསུངས་སོ། །3 ཡང་། བཀྲ་ཤིས་པ་དང་གཡང་གི་དོན་ཡིན་པར་སྣང་ཐང་ལོ་ཙཱ་བ་གསུང་། འདི་འདོན་པ་རྣམས་ལ་བཀྲ་ཤིས་པ་སྟེ་བར་ཆད་མི་འབྱུང་ཞིང་། མངོན་པར་འདོད་པའི་དོན་འགྲུབ་པར། མཚོ་ཊཱིཀ་ན་གསལ། ཡི་གེ་འདི་དང་ཨ་ཐ་ཞེས་པ་གཉིས་སྔོན་ལྷ་ཚངས་པའི་ཁུར་ཚོས་བརྡོལ་ཏེ་བྱུང་ཚུལ་ཡང་དེའི་ཐད་དུ་གསལ། ས་བཅུ་པའི་གཟུངས། རྒྱུད་༼ ཙ་པ ༽༥༩བ༦ལས། གསང་སྔགས་ༀ་ཞེས་བྱ་བ་དྲན་ནས་ཚེ་འཕོས་པ་ནི་འཇིག་རྟེན་གྱི་ཁམས་བདེ་བ་ཅན་དུ་འགྲོ་བར་འགྱུར་རོ། །ཞེས་གསུངས་སོ། །
|