10505

ལ་སྒྲ

Tibetan Definition

ལ་དོན། 1 ལ་སྒྲ་རྣམ་དབྱེ་གཉིས་པ་ལ་འཇུག་པ་ནི། ཆོས་ར་ལ་འགྲོ་ལྟ་བུ། 2 ལ་སྒྲ་རྣམ་དབྱེ་བཞི་པ་ལ་འཇུག་པ། དཔེ་ཁྲིད་ལ་ཕྱིན་ལྟ་བུ། 3 ལ་སྒྲ་གནས་གཞི་ལ་འཇུག་པ། མགོ་ལ་སྐྲ་དཀར་འདུག་ལྟ་བུ། 4 ལ་སྒྲ་ཚེ་སྐབས་ལ་འཇུག་པ། ཞོགས་པ་ཆུ་ཚོད་དྲུག་པ་ལ་ཡར་ལངས་ལྟ་བུ། 5 ལ་སྒྲ་དེ་ཉིད་འཇུག་པ། ལེགས་སྦྱར་ནས་བོད་ཡིག་ལ་བསྒྱུར། ཞོ་ད་ར་ལ་གྱུར། ད་ར་ཕྱུར་ཁུ་ལ་གྱུར། མི་ངན་བཟང་པོར་གྱུར། ལྟ་བུ། 6 ལ་སྒྲ་མཐུན་པའི་ཚིག་རྒྱན་ལ་འཇུག་པ། སྣང་ལ་རང་བཞིན་མེད་པ་ལྟ་བུ། གསལ་ལ་དྭངས་པ། མཐོ་ལ་བརླིང་པ་ལྟ་བུའོ། །7 ལ་སྒྲ་ཚིག་སྔ་ཕྱི་མཚམས་སྦྱོར་བ་ཙམ་ལ་འཇུག་པ་ནི། བདེ་བ་དང་ལྡན་ལ་གནོད་པ་མི་མངའ་བ། གསལ་ཞིང་དྭངས་ལ་དྲི་མ་མེད་པ། ཞེས་སོགས་དང༌། གཞན་ཡང་ “ཞིང་སྒྲའི” འཇུག་པ་དང་མཚུངས་པར་འཇུག་པ་འདི་ལྟར། ས་སྐྱ་ལེགས་བཤད་ལས། བསྟོད་པས་དགའ་བར་མི་འགྱུར་ལ། །སྨད་པས་མི་དགའ་མི་འགྱུར་ཞིང༌། །རང་གི་ཡོན་ཏན་ལེགས་གནས་པ། །སྐྱེས་བུ་དམ་པའི་མཚན་ཉིད་ཡིན། །ལྟ་བུ། དེ་ནི་ཚིག་སྔ་ཕྱི་མཚམས་སྦྱར་ནས་འབྲེལ་ཆགས་པ་ཙམ་ལས་དོན་གཞན་གང་ཡང་མི་སྟོན། 8 ལ་སྒྲ་ལྷག་བཅས་ཀྱི་དོན་ལ་འཇུག་པ་ནི། “སྟེ་ཏེ་དེ” “ནས” བཅས་དང་འཇུག་པ་མཐུན་ཏེ། མཉམ་པར་བཞག་ལ་དེ་ཁོ་ན་ཉིད་སེམས། ལག་པ་བསྙལ་ལ་ཟས་ཟ་ལྟ་བུ། ས་སྐྱ་ལེགས་བཤད་ལས། གནོད་པར་བྱེད་པ་ཆུང་ངུ་ཡང༌། །མྱུར་དུ་བསལ་ “ལ” འདུམ་པར་བྱ། །ཡུར་བ་ཆུང་ངུའི་རྗེས་ཞུགས་ནས། །འོད་པ་ཆེན་པོ་མ་མཐོང་ངམ། །ལྟ་བུ། 9 ལ་སྒྲ་རྒྱུ་མཚན་ནམ། ཕལ་སྐད་དུ་ཡིན་གཙང་ཞེས་པའི་དོན་ལ་འཇུག་པ་ནི། ས་སྐྱ་ལེགས་བཤད་ལས། ལེགས་པར་བརྟགས་ནས་བྱས་པ་ “ལ” ། །བྱ་བ་ཉམས་པ་ག་ལ་སྲིད། །མིག་ལྡན་བརྟགས་ནས་འགྲོ་བ་ན། །གཡང་སར་གོམ་པ་འདོར་རམ་ཅི། །ལྟ་བུ། གཞོན་ནུ་ཟླ་མེད་ལས། བདག་ནི་ཞི་བར་གནས་པ་ “ལ” །༌།ཁྲོ་བའི་གོ་སྐབས་མ་མཆིས་ཀྱང༌། །རྒོལ་བ་ལ་ནི་སྙིང་རྗེ་ཡིས། །སྐྱོང་བའི་བརྟུལ་ཞུགས་གྲུབ་པ་མེད། །ལྟ་བུ། q ལ་སྒྲ་ཡིད་སྨོན་ལ་འཇུག་པ་ནི། དགའ་བ་ལ། སྐྱིད་པ་ལ། ཕངས་པ་ལ། སྙིང་རྗེ་བ་ལ་ལྟ་བུའོ། །ལྟ་བུ། (11) ལ་སྒྲ་ངེས་བཟུང་གི་སྒྲའམ་ཁོ་ནའི་དོན་ལ་འཇུག་པ་ནི། ལམ་སྒྲོན་ལས། དམིགས་པ་གང་རུང་གཅིག་དག་ལ། །ཡིད་ནི་དགེ་ལ་གཞག་པར་བྱ། །ཞེས་གཅིག་དག་ལ་ཞེས་པ་ངེས་བཟུང་གི་ཚིག་ཏུ་ལམ་རིམ་འབྲིང་པོར་གསུངས་སོ། །