From Rangjung Yeshe Wiki - Dharma Dictionary
Jump to navigation
Jump to search
| ཤེས་རབ་དང་ཡེ་ཤེས་ཀྱི་ཁྱད་པར
|
| Tibetan Definition
|
ཡེ་ཤེས་ཀྱི་སྐད་དོད་ “ཛྙཱ་ན” ཞེས་པ་དང་། ཤེས་རབ་ཀྱི་སྐད་དོད་ “པྲཛྙཱ” ཞེས་པ་ཡིན་པས། སྤྱིར་དེ་གཉིས་ཤིན་ཏུ་འདྲ་ཡང་། ཁྱད་པར་རགས་པ་ཙམ་ནི། ཡུལ་ལ་ཧ་ཅང་ཞིབ་མོའི་རྣམ་པས་འཇུག་པ་ལ་ཤེས་རབ་དང་། དེ་ལས་ཅུང་ཟད་རགས་པར་འཇུག་པ་ལ་ཡེ་ཤེས་ཟེར་བ་འདྲ། དེ་ནི་སྤྱིར་བཏང་གི་བཤད་པ་ཡིན་གྱི་ཁྱབ་པ་ནི་མེད་དེ། ཡེ་ཤེས་དང་ཤེས་རབ་གཉིས་ལ། ཡེ་ཤེས་ཡིན་ལ་ཤེས་རབ་མིན་པའི་མུ། གཉིས་ཀ་ཡིན་པའི་མུ། གཉིས་ཀ་མིན་པའི་མུ་སྟེ་གསུམ་ཡོད་པའི་ཕྱིར་རོ། །འོན་ཀྱང་མཁས་པ་མང་པོས། ཡེ་ཤེས་དང་མཁྱེན་པ་༼ ས་ལམ་གྱི་མཁྱེན་པ ༽གཉིས་དོན་གཅིག་ལྟ་བུར་བཤད་ཡོད། འོན་ཀྱང་ཤེས་རབ་དང་ཡེ་ཤེས་ཀྱི་ཁྱད་པར་ལ་རྗེ་གུང་ཐང་པས་འདི་ལྟར་གསུངས་ཏེ། ཤེས་རབ་ནི་ཇི་ལྟ་བ་རྟོགས་ཚུལ་དང༌། ཡེ་ཤེས་ནི་ཇི་སྙེད་པ་རྟོགས་ཚུལ་གྱི་སྟེང་ནས་འཇོག་པར། རྗེའི་དགོངས་པ་རབ་གསལ་དང་བྱང་ས་སོགས་ན་གསལ་བར་གསུངས། ཞེས་རྗེ་གུང་ཐང་པའི་གསུང་ཟིན་བྲིས་མདོ་རྒྱན་སྦྱར་བའི་བཤད་པ་ན་གསལ་ཡང་། དེ་ལ་དཔྱད་དགོས་ཏེ། ཡེ་ཤེས་ནི་ཕལ་ཆེར་ཤེས་རབ་འདྲ་བར་གཞུང་མང་པོར་གསུངས་ཏེ། རྣམ་པར་མི་རྟོག་པའི་ཡེ་ཤེས། གཉིས་སུ་མེད་པའི་ཡེ་ཤེས་སོགས་མཐའ་ཡས་ཏེ། རྗེའི་དགོངས་པ་རབ་གསལ་ལས། བྱང་ཆུབ་ཀྱི་སེམས་དང་གཉིས་སུ་མེད་པའི་ཡེ་ཤེས་གཉིས་ཀྱི་རྩ་བ་ཡང་སྙིང་རྗེ་ཡིན་པས་ན། ཞེས་དང་། ཡང་དེ་ཉིད་ལས། རིན་ཆེན་འཕྲེང་བ་ལས། ཐེག་པ་ཆེན་པོ་གང་ཞིག་ལས། །སྙིང་རྗེ་སྔོན་བཏང་སྤྱོད་ཀུན་དང། །ཡེ་ཤེས་དྲི་མ་མེད་བཤད་པ། །སེམས་ཡོད་སུ་ཞིག་དེ་ལ་སྨོད། ཅེས་སྙིང་རྗེ་སྔོན་དུ་བཏང་གིས་དྲངས་པའི་སྤྱོད་པ་སྤྱི་དང། ཁྱད་པར་དུ་མཐའ་གཉིས་ཀྱི་དམིགས་གཏད་ཀྱི་དྲི་མ་མེད་པའི་ཡེ་ཤེས་ཀྱི་སྤྱོད་པ་གསུམ་གྱིས་ཐེག་ཆེན་གྱི་དོན་ཀུན་བསྡུས་པར་གསུངས་སོ། །ཞེས་སོགས་མཐའ་ཡས་སོ། །རྗེ་གུང་ཐང་པས་ཁུངས་སུ་དྲང་རྒྱུའི་རྗེའི་དགོངས་པ་རབ་གསལ་གྱི་ལུང་ནི་འདི་ཡིན་ཏེ། རྗེ་དགོངས་རབ་གསལ་ལས། ཡེ་ཤེས་ཀྱི་ངོས་འཛིན་དང་དེ་དང་ཤེས་རབ་ཀྱི་ཕར་ཕྱིན་གྱི་ཁྱད་པར་ནི། །བྱང་ས་ལས། ཆོས་ཐམས་ཅད་ལ་ཇི་ལྟ་བ་བཞིན་དུ་རྣམ་པར་བཞག་པའི་ཤེས་པ་ནི། ཡེ་ཤེས་ཀྱི་ཕ་རོལ་ཏུ་ཕྱིན་པའོ། །དེ་ལ་དོན་དམ་པ་འཛིན་པ་ལ་ཞུགས་པའི་ཤེས་རབ་ནི། ཤེས་རབ་ཀྱི་ཕ་རོལ་ཏུ་ཕྱིན་པའོ། །ཀུན་རྫོབ་འཛིན་པ་ལ་ཞུགས་པ་ནི་ཡེ་ཤེས་ཀྱི་ཕ་རོལ་ཏུ་ཕྱིན་པ་སྟེ། འདི་གཉིས་ཀྱི་བྱེ་བྲག་ནི་དེ་ཡིན་ནོ། །ཞེས་གསུངས་པ་འདིའོ། །དེས་ན་རྗེའི་དགོངས་པ་རབ་གསལ་དང་བྱང་ས་ལས་གསུངས་པ་ནི། ཕར་ཕྱིན་བཅུའི་ནང་གི་ཤེས་རབ་ཀྱི་ཕར་ཕྱིན་དང་། ཡེ་ཤེས་ཀྱི་ཕར་ཕྱིན་གཉིས་ཀྱི་ཁྱད་པར་ཡིན་གྱི། སྤྱིར་བཏང་གི་ཤེས་རབ་དང་ཡེ་ཤེས་ཀྱི་ཁྱད་པར་ནི་མིན་ནོ། །
|