From Rangjung Yeshe Wiki - Dharma Dictionary
Jump to navigation
Jump to search
| ས་སྐྱ་པཎྜི་ཏ
|
| Tibetan Definition
|
ས་སྐྱ་པཎྜི་ཏ་ཀུན་དགའ་རྒྱལ་མཚན་ནི། ཕྱི་ལོ་༡༡༨༢ལོར་གཙང་དུ་སྐུ་འཁྲུངས། སྐུ་བལྟམས་མ་ཐག་ཏུ་སཾ་སྐྲྀ་ཏའི་སྐད་གསུངས། རྗེ་བཙུན་གྲགས་པ་རྒྱལ་མཚན་ལས་ས་སྐྱ་གོང་མའི་གསུང་བཅུད་མདོ་སྔགས་ཀྱི་ཟབ་གནད་མ་ལུས་པ་གསན། མནལ་ལམ་དུ་མཁས་མཆོག་དབྱིག་གཉེན་ལས་ཆོས་མངོན་པ་མཛོད་དང༌། ཁ་ཆེ་པཎ་ཆེན་ལས་རྡོ་རྗེ་གླུ་སོགས་གསན། ཞུ་སྟོན་རྡོ་རྗེ་སྐྱབས་ལས་བྱམས་ཆོས་སོགས་ལུང་གི་སྐོར། རྨ་བྱ་བྱང་བརྩོན་དང༌། ཚུར་སྟོན་གཞོན་སེང་ལས་ཚད་མ། རྩེགས་པ་དབང་ཕྱུག་སེང་གེ་ལས་གྲུབ་མཐའ། སྤྱོ་བོ་ལྷས་པ་བྱང་ཆུབ་འོད་ལས་གདམས་པ་སྣ་ཚོགས་གསན། དགུང་ལོ་ཉེར་གསུམ་དུས་ཁ་ཆེ་པཎ་ཆེན་དང་མཇལ། ཁ་ཆེ་པཎ་ཆེན་དང་དེའི་སློབ་མ་སངྒྷ་ཤྲཱི། སུ་ག་ཏ་ཤྲཱི། དཱ་ན་ཤཱི་ལ་རྣམས་ལས་སྒྲ་ཚད་སོགས་རིག་གནས་ཆེ་བ་ལྔ། སྙན་ངག་མངོན་བརྗོད་སོགས་རིག་གནས་ཆུང་བ་ལྔ་སྟེ། རིག་པའི་གནས་བཅུ་ལ་སྦྱངས་པ་མཐར་ཕྱིན་པར་མཛད་པས། བོད་ཀྱི་ལྗོངས་སུ་པཎྜི་ཏའི་མཚན་སྙན་ཐོབ་པའི་ཐོག་མ་ཡིན་པར་གསུངས། དགུང་ལོ་ཉེར་བདུན་པ་ལ་ཁ་ཆེ་པཎ་ཆེན་ལས་བསྙེན་པར་རྫོགས། རིག་གཏེར་དང༌། སྡོམ་གསུམ་རབ་དབྱེ་སོགས་བརྩམས་ནས་སྨྲ་བ་ངན་པ་དང༌། ལྟ་བ་ངན་པ་མཐའ་དག་སུན་ཕྱུང༌། སྐྱིད་གྲོང་དུ་རྒྱ་གར་ལྷོ་ཕྱོགས་ཀྱི་མུ་སྟེགས་འཕྲོག་བྱེད་གཙོས་པའི་རྒོལ་ངན་དྲུག་རིགས་པས་ཚར་བཅད་ནས། བསྟན་པ་ལ་བཅུག་པས་སྙན་པའི་གྲགས་པས་ས་སྟེང་ཁྱབ། སོག་ཡུལ་གྱི་རྒྱལ་པོ་གོ་དན་གྱིས་གདན་དྲངས་ནས་ཡུལ་དེར་བཤད་སྒྲུབ་ཀྱི་བསྟན་པ་སྤེལ། དགུང་གྲངས་བདུན་བཅུའི་སྟེང་གཟུགས་སྐུའི་བཀོད་པ་བསྡུས། འཁྲུངས་འདས་ལོ་ཚིགས་1182-1251
|