From Rangjung Yeshe Wiki - Dharma Dictionary
Jump to navigation
Jump to search
| སྨད་འདུལ
|
| Tibetan Definition
|
(འདུལ་བ) མདོ་ཁམས་སྨད་ཀྱི་ཡུལ་ནས་དར་བའི་སྡོམ་རྒྱུན་ནམ་འདུལ་བའི་བསྟན་པ་ལ་ཟེར། དེ་ཡང་གླང་དར་མས་བསྟན་པ་བསྣུབས་པའི་དུས་སུ་དཔལ་ཆེན་ཆུ་བོའི་རིའི་སྒོམ་གྲྭ་ན། གཙང་རབ་གསལ། གཡོ་དགེ་འབྱུང༌། དམར་བན་ཤཱཀྱ་མུ་ནེ་གསུམ་གྱིས་ཀརྨ་ཤ་ཏཾ་ལ་སོགས་པའི་འདུལ་བ་དྲེལ་ཁལ་གཅིག་བཀལ་ཏེ་མདོ་ཁམས་སུ་བྲོས། གཙང་གིས་མཁན་པོ་མཛད། གཡོ་ཡིས་སློབ་དཔོན་མཛད་དེ། མུ་གཟུ་གསལ་འབར་ཐོག་མར་དགེ་ཚུལ་དུ་བསྒྲུབས། དེ་ལ་མཁན་སློབ་ཀྱི་མིང་ཟུར་སྦྱར་ཏེ། དགེ་བ་རབ་གསལ་དུ་བཏགས། (གཡོ་དགེ་འབྱུང་གི་མཚན་ཟུར། དགེ། གཙང་རབ་གསལ་གྱི་མཚན་ཟུར། རབ་ཅེས་པ་གཉིས་བསྡོམས་པའི་དགེ་བ་རབ་གསལ་ཞེས་བཏགས) ཕྱིས་མཁྱེན་རབ་ཆེ་བས་བླ་ཆེན་དགོངས་པ་རབ་གསལ་དུ་བཏགས། ལོ་གཅིག་གི་རྗེས་གཙང་གཡོས་མཁན་སློབ། དམར་བན་ཤཱཀྱ་མུ་ནེས་གསང་སྟོན། རྒྱ་ནག་ཧྭ་ཤང་ཀེ་བང་དང༌། གྱི་བན་བྱ་བ་གཉིས་ཀྱིས་ཁ་སྐོང་བྱས་ཏེ་ལྔའི་ཚོགས་ཀྱིས་བསྙེན་པར་རྫོགས། དབུས་གཙང་མངའ་རིས་བཅས་ནས་ཀླུ་མེས་ཚུལ་ཁྲིམས་ཤེས་རབ་སོགས་མི་བཅུ་འོངས་ནས་བླ་ཆེན་ལས་སྡོམ་པ་བླངས། དེ་རྣམས་དབུས་སུ་བྱོན་ནས་དབུས་གཙང་གི་ཕྱོགས་ཐམས་ཅད་དགེ་འདུན་གྱི་སྡེས་བཀང་སྟེ་བཤད་སྒྲུབ་ཀྱི་བསྟན་པ་དར་ཞིང་རྒྱས་པར་གྱུར་ཏོ། །
|