From Rangjung Yeshe Wiki - Dharma Dictionary
Jump to navigation
Jump to search
| གསུང་དབྱངས་ཡན་ལག་དྲུག་ཅུ
|
| Tibetan Definition
|
མཉེན་པོ། (སེམས་ཅན་གྱི་ཁམས་ལ་དགེ་རྩ་སྟོན་པའི་ཕྱིར་མཉེན་པོ) འཇམ་པ། (ཐོས་པའི་མོད་ལ་ཡིད་བདེ་བར་བྱེད་པས་གསུང་འཇམ་པ) ཡིད་དུ་འོང་བ། (བརྗོད་བྱའི་དོན་བཟང་བས་ཡིད་འོང) ཡིད་དུ་འཐད་པ། (རྗོད་བྱེད་ཀྱི་ཚིག་བཟང་བས་ཡིད་དུ་འཐད་པ) དག་པ། (འཇིག་རྟེན་ལས་འདས་པ་བླ་ན་མེད་པའི་རྗེས་ལ་ཐོབ་པས་དག་པ) དྲི་མ་མེད་པ། (ཉོན་མོངས་བའི་བག་ཆགས་ཐམས་ཅད་དང་བྲལ་བས་དྲི་མ་མེད་པ་ཞེས་བྱ) གསལ་བ། (ཚིག་དང་ཡི་གེ་སོ་སོར་གྲགས་པ་ཉིད་ཀྱི་ཕྱིར་གསལ་བ) སྙན་ཅིང་འཇེབས་པ། (མུ་སྟེགས་ཅན་བློ་གྲོས་ངན་པ་ཐམས་ཅད་ཀྱི་ལྟ་བ་འཇོམས་པའི་སྟོབས་ཀྱི་ཡོན་ཏན་དང་ལྡན་པའི་ཕྱིར་སྙན་ཅིང་འཇེབས་པ) མཉན་པར་འོས་པ། (སྒྲུབ་པས་ངེས་པར་འབྱུང་བའི་ཕྱིར་མཉན་པར་འོས་པ) མི་ཚུགས་པ། (ཕ་རོལ་གྱི་སྨྲ་བ་པོ་ཐམས་ཅད་ཀྱིས་གཅད་པར་བྱ་བ་མ་ཡིན་པའི་ཕྱིར་མི་ཚུགས་པ) སྙན་པ། (ཡིད་དགའ་བར་བྱེད་པའི་ཕྱིར་སྙན་པ) དུལ་བ། (འདོད་ཆགས་ཀྱི་གཉེན་པོ་བྱེད་པའི་ཕྱིར་དུལ་བ) མི་རྩུབ་པ། (བསླབ་པ་བཅའ་བའི་བདེ་བའི་ཐབས་ཉིད་ཀྱི་ཕྱིར་མི་རྩུབ་པ) མི་རླངས་པ། (དེ་ལས་འདས་པ་ན་ཡང་དག་པར་ངེས་པར་འབྱུང་བ་ཉེ་བར་སྟོན་པ་ཉིད་ཀྱི་ཕྱིར་མི་རླངས་པ) རབ་ཏུ་དུལ་བ། (ཐེག་པ་གསུམ་གྱི་འདུལ་བ་ཉེ་བར་སྟོན་པ་ཉིད་ཀྱི་ཕྱིར་རབ་དུ་དུལ་བ) རྣ་བར་སྙན་པ། (རྣམ་པར་གཡེང་བའི་གཉེན་པོ་ཉིད་ཀྱི་ཕྱིར་རྣ་བར་སྙན་པ) ལུས་ཚིམ་པར་བྱེད་པ། (ཏིང་ངེ་འཛིན་སྐྱེད་པར་བྱེད་པ་ཉིད་ཀྱི་ཕྱིར་ལུས་ཚིམ་བྱེད) སེམས་ཚིམ་པར་བྱེད་པ། (ལྷག་མཐོང་གི་རབ་ཏུ་དགའ་བ་སྐྱེད་པར་བྱེད་པ་ཉིད་ཀྱི་ཕྱིར་སེམས་ཚིམ་བྱེད) སྙིང་དགའ་བར་བྱེད་པ། (ཐེ་ཚོམ་གཅོད་པར་བྱེད་པ་ཉིད་ཀྱི་ཕྱིར་སྙིང་དགའ་བར་བྱེད་པ) དགའ་བདེ་སྐྱེད་པ། (ལོག་པར་ངེས་པ་སེལ་བའི་ཕྱིར་དགའ་བདེ་སྐྱེད་པ) ཡོངས་སུ་གདུང་བ་མེད་པ། (སྒྲུབ་པ་པོ་འགྱོད་པ་མེད་པའི་ཕྱིར་ཡོངས་སུ་གདུང་བ་མེད་པ) ཀུན་ཏུ་ཤེས་པར་བྱ་བ། (ཐོས་པ་ལས་བྱུང་བའི་ཤེས་པ་ཕུན་སུམ་ཚོགས་པའི་རྟེན་ཉིད་ཀྱི་ཕྱིར་ཀུན་ཤེས་བྱ) རྣམ་པར་རིག་པར་བྱ་བ། (བསམས་པ་ལས་བྱུང་བའི་ཤེས་པ་ཕུན་སུམ་ཚོགས་པའི་རྟེན་ཉིད་ཀྱི་ཕྱིར་རྣམ་པར་རིག་བྱ) རྣམ་པར་གསལ་བ། (སློབ་དཔོན་གྱིས་དཔེ་མཁྱུད་མེད་པར་ཆོས་སྟོན་པའི་ཕྱིར་རྣམ་གསལ་བ) དགའ་བར་བྱ་བ། (རང་གི་དོན་རྗེས་སུ་ཐོབ་པ་རྣམས་དགའ་བར་བྱེད་པ་ཉིད་ཀྱི་ཕྱིར་དགའ་བར་བྱ་བ) མངོན་པར་དགའ་བར་འོས་པ། (རང་གི་དོན་རྗེས་སུ་ཐོབ་པ་རྣམས་ཀྱིས་སྤྲོ་བར་བྱ་བ་ཉིད་ཀྱི་ཕྱིར་མངོན་པར་དགའ་བར་འོས་པ) ཀུན་ཏུ་ཤེས་པར་བྱ་བ་གཞུག་ཏུ་འོས་པ། (བསམ་གྱིས་མི་ཁྱབ་པའི་ཆོས་ཡང་དག་པར་སྟོན་པ་ཉིད་ཀྱི་ཕྱིར་ཀུན་ཤེས་པར་བྱ་བ་གཞུག་ཏུ་འོས་པ) རྣམ་པར་རིག་པར་བྱ་བར་གཞུག་ཏུ་འོས་པ། (བསམ་པར་བྱ་བའི་ཆོས་ཡང་དག་པར་སྟོན་པ་ཉིད་ཀྱི་ཕྱིར་རྣམ་པར་རིག་བྱར་གཞུག་ཏུ་འོས་པ) རིགས་པ། (ཚད་མ་དང་མི་འགལ་བའི་ཕྱིར་རིགས་པ) འབྲེལ་བ། (ཇི་ལྟར་འོས་པར་གདུལ་བྱ་ལ་སྟོན་པའི་ཕྱིར་འབྲེལ་བ) ཟློས་པའི་སྐྱོན་མེད་པ། (འབྲས་བུ་མེད་པ་མ་ཡིན་པའི་ཕྱིར་ཟློས་སྐྱོན་མེད་པ སེང་གེའི་སྒྲ་ཡི་ཤུགས་ཅན། མུ་སྟེགས་ཀྱི་ཚོགས་ཐམས་ཅད་སྐྲག་པར་བྱེད་པའི་ཕྱིར་དེ་སྐད་ཅེས་བྱ) གླང་པོ་ཆེའི་སྒྲ་སྐད། (རྒྱ་ཆེ་བ་ཉིད་ཀྱི་ཕྱིར་གླང་པོ་ཆེའི་སྒྲ་སྐད) འབྲུག་གི་སྒྲ་སྐད། (ཟབ་པ་ཉིད་ཀྱི་ཕྱིར་འབྲུག་གི་སྒྲ་སྐད) ཀླུའི་དབང་པོའི་སྒྲ་དབྱངས། (གཟུང་བར་འོས་པ་ཉིད་ཀྱི་ཕྱིར་ཀླུའི་དབང་པོའི་སྒྲ་དབྱངས) དྲི་ཟའི་གླུ་དབྱངས། (སྙན་པ་ཉིད་ཀྱི་ཕྱིར་དྲི་ཟའི་གླུ་དབྱངས) ཀ་ལ་པིངྐའི་སྒྲ་དབྱངས། (རྣོ་བ་དང་འཇེབས་པའི་ཕྱིར་ཀ་ལ་པིངྐའི་སྒྲ་དབྱངས) ཚངས་པའི་སྒྲ་དབྱངས་བསྒྲགས་པ། (ཐག་རིང་པོར་གྲགས་པ་ཉིད་ཀྱི་ཕྱིར་ཚངས་པའི་སྒྲ་དབྱངས་བསྒྲགས་པ) ཤང་ཤང་ཏེའུའི་སྒྲ་དབྱངས་གྲགས་པ། (གྲུབ་པ་ཐམས་ཅད་ལ་བཀྲ་ཤིས་པ་ཉིད་ཀྱིས་སྔོན་དུ་འགྲོ་བ་ཉིད་ཀྱི་ཕྱིར་ཤང་ཤང་ཏེའུའི་སྒྲ་དབྱངས་གྲགས་པ) ལྷ་ཡི་དབང་པོའི་དབྱངས་ལྟར་སྙན་པ། (འདའ་བར་བྱ་བ་མ་ཡིན་པའི་ཕྱིར་ལྷའི་དབང་པོའི་དབྱངས་ལྟར་སྙན་པ) རྔའི་སྒྲ། (རྔའི་སྒྲ་ནི་བདུད་དང་གླགས་འཚོལ་བ་ཐམས་ཅད་ལས་རྒྱལ་བའི་སྔོན་དུ་འགྲཽ་བ་ཉིད་ཀྱི་ཕྱིར་དེ་སྐད་ཅེས་བྱ) མ་ཁེངས་པ། (བསྟོད་པས་ཀུན་ནས་ཉོན་མོངས་པ་མེད་པའི་ཕྱིར་མ་ཁེངས་པ) མི་དམའ་བ། (སྨད་པས་ཀུན་ནས་ཉོན་མོངས་པ་མེད་པའི་ཕྱིར་མི་དམའ་བ) སྒྲ་ཐམས་ཅད་ཀྱི་རྗེས་སུ་ཞུགས་པ། (ལུང་སྟོན་པ་ཐམས་ཅད་ལ་མཚན་ཉིད་རྣམ་པ་ཐམས་ཅད་ལ་རྗེས་སུ་ཞུགས་པ་ཉིད་ཀྱི་ཕྱིར་སྒྲ་ཐམས་ཅད་ཀྱི་རྗེས་སུ་ཞུགས་པ) སྒྲ་ཟུར་མ་ཆག་པ། (དྲན་པ་ཉམས་པས་མི་གསུང་བའི་ཕྱིར་སྒྲ་ཟུར་མ་ཆག་པ) མ་ཚང་བ་མེད་པ། (གདུལ་བྱའི་བྱ་བ་རྣམས་ལ་དུས་ཐམས་ཅད་དུ་ཉེ་བར་གནས་པའི་ཕྱིར་མ་ཚང་བ་མེད་པ) མ་ཞུམ་པ། (རྙེད་པ་དང་བཀུར་སྟི་ལ་མི་བརྟེན་པའི་ཕྱིར་མ་ཞུམ་པ) མི་ཞན་པ། (འཇིགས་པ་བྲལ་བའི་ཕྱིར་མི་ཞན་པ) རབ་ཏུ་དགའ་བ། (མི་སྐྱོ་བའི་ཕྱིར་རབ་ཏུ་དགའ་བ) ཁྱབ་པ། (རིག་པའི་གནས་ཐམས་ཅད་ལ་མཁས་པ་དང་ལྡན་པའི་ཕྱིར་ཁྱབ་པ ཆུབ་པ། སེམས་ཅན་རྣམས་ཀྱི་དོན་ཐམས་ཅད་ཕུན་ཚོགས་པར་བྱེད་པའི་ཕྱིར་ཆུབ་པ) རྒྱུན་ཆགས་པ། (རྒྱུན་མི་འཆད་པ་ཉིད་ཀྱི་ཕྱིར་རྒྱུན་ཆགས) འབྲེལ་བ། (རྣམ་པ་སྣ་ཚོགས་སུ་ཉེ་བར་གནས་པ་ཉིད་ཀྱི་ཕྱིར་འབྲེལ་བ) སྒྲ་ཐམས་ཅད་རྫོགས་པར་བྱེད་པ། (སྒྲ་གཅིག་ལས་སྒྲའི་རྣམ་པར་རིག་པ་དུ་མ་ཉེ་བར་གནས་པའི་ཕྱིར་སྒྲ་ཐམས་ཅད་རྫོགས་པར་བྱེད་པ) དབང་པོ་ཐམས་ཅད་ཚིམ་པར་བྱེད་པ། (གཅིག་ལས་དོན་དུ་མའི་རྣམ་པར་རིག་པ་ཉེ་བར་གནས་པའི་ཕྱིར་དབང་པོ་ཐམས་ཅད་ཚིམ་པར་བྱེད་པ) མ་སྨད་པ། (དམ་བཅའ་བ་ཇི་ལྟ་བ་བཞིན་གནས་པའི་ཕྱིར་མ་སྨད་པ) མི་འགྱུར་བ། (དུས་ལ་བབས་པར་རབ་ཏུ་སྦྱོར་བའི་ཕྱིར་མི་འགྱུར་བ) མ་བརྟབས་པ། (རྟབ་རྟབ་པོ་སྟེ་བྲེལ་ཟིང་ཚབ་ཚུབ་ཏུ་མི་གསུང་བའི་ཕྱིར་མ་བརྟབས་པ) ཁོར་ཡུག་ཀུན་ཏུ་གྲགས་པ། (རིང་བ་དང་ཉེ་འཁོར་དུ་མཚུངས་པར་ཐོས་པ་ཉིད་ཀྱི་ཕྱིར་འཁོར་ཀུན་ཏུ་གྲགས་པ) རྣམ་པ་ཐམས་ཅད་ཀྱི་མཆོག་དང་ལྡན་པ། (འཇིག་རྟེན་པའི་དོན་ཐམས་ཅད་མཆོག་དང་ལྡན་པ) ཐུབ་པ་དགོངས་རྒྱན་ལ་འཕྲི་སྣོན་ཅུང་ཟད་བགྱིས་ཏེ་བཀོད། རྒྱ་གར་གྱི་སློབ་དཔོན་ལེགས་ལྡན་འབྱེད་ཀྱི་རྟོག་གེ་འབར་བར་ཡང་ཚིག་ཟུར་རེ་གཉིས་མ་གཏོགས་དེ་དང་འདྲ་བར་གསུངས་སོ། །བུ་ཆོས་འབྱུང་དང༌། ཀོང་སྤྲུལ་ཡོན་ཏན་རྒྱ་མཚོའི་ཤེས་བྱ་མཛོད་འགྲེལ་དུའང་དེ་ལྟར་གསལ་ལོ། །
|