From Rangjung Yeshe Wiki - Dharma Dictionary
Jump to navigation
Jump to search
| དག་མིང་ཐོབ་པ
|
| Tibetan Definition
|
(འདུལ་བ) ཕམ་པ་འཆབ་མེད་ཀྱིས་གོས་པའི་གང་ཟག་ཅིག་གིས་དགྲ་བཅོམ་པའི་གོ་འཕང་ཐོབ་པ་ན་ཕམ་པའི་ལྟུང་བ་དག་པ་མ་ཟད་དག་མིང་ཐོབ་པ་ཅེས་ཀྱང་བྱའོ། །མཚོ་ཊཱིཀ་སྟོད་ཆ་ལས། དགེ་འདུན་ལྷག་མ་གང་ལ་མཚོན་ཡང་རུང་སྟེ་འཁྲིག་ཚིག་སྨྲ་བའི་ལྷག་མ་ལ་མཚོན་ན། འཁྲིག་ཚིག་སྨྲ་བའི་ལྷག་མ་བྱུང་ནས་སྤོ་མགུ་དབྱུང་བར་མི་བྱེད་པར། འཁྲིག་ཚིག་ངག་ཀྱལ་གྱི་སྡིག་པ་སྟོབས་བཞིས་དག་པར་བྱས་པ་ཆོས་ཅན། སྡིག་པ་དེ་དང་ངོ་བོ་གཅིག་པའི་ལྷག་མའི་ལྟུང་བ་དག་པར་ཐལ། སྡིག་པ་དེ་དག་པའི་ཕྱིར་རོ། །ཁྱབ་པ་མེད་ན་སྡིག་ལྟུང་དེ་གཉིས་ངོ་བོ་གཅིག་ཡིན་པ་ཉམས་སོ། །འདོད་ན་མིང་དང་རིགས་དང་ལྡན་པར་བརྗོད་ན་ལྟུང་བ་ལས་སོ། །ཞེས་ཆོ་ག་ལ་བརྟེན་ནས་ལྟུང་བ་དག་པ་དེ་ནི་མིང་རིགས་བརྗོད་པའི་ཕྱིར་བཅོས་ལ་ལྟོས་པར་བཤད་པ་དང་འགལ་ལོ་ཞེ་ན། དོན་ལ་དག་པར་ཐལ་ཟེར་རམ། དག་པའི་ཐ་སྙད་ཀྱང་འཐོབ་པར་ཐལ་ཟེར། དང་པོ་ལྟར་ན་འདོད་པ་ཡིན་ཏེ། སྡིག་པ་དག་པའི་རྟགས་ཐོན་གྱི་བར་དུ་སྡིག་སྦྱངས་བྱས་ནའོ། །གཉིས་པ་ལྟར་ན་ཁྱབ་པ་མ་གྲུབ་སྟེ། དོན་ལ་དག་ཀྱང་དག་པའི་ཐ་སྙད་མི་ཐོབ་པ་ཡོད་དེ། དཔེར་ན་ཕམ་པ་འཆབ་མེད་བྱུང་བ་བསླབ་པ་སྤྱོད་པས་མཐོང་ལམ་ཐོབ་པའམ་ཕྱིར་མི་འོང་ཐོབ་པ་ན་ཕམ་པ་དོན་ལ་དག་ཀྱང་དག་པའི་ཐ་སྙད་མི་འཐོབ་ཅིང། དག་པའི་ཐ་སྙད་ཐོབ་པ་དེ་དགྲ་བཅོམ་ཐོབ་པ་ལ་ལྟོས་པ་བཞིན་ནོ། །འོ་ན་ལྟུང་བ་དང་ངོ་བོ་གཅིག་པའི་སྡིག་པ་སྦྱངས་ཀྱང་ལྟུང་བ་དག་པའི་ཐ་སྙད་མི་ཐོབ་པ་རྒྱུ་མཚན་ཅིའི་ཕྱིར་སྙམ་ན་བཅས་པའི་དབང་གིས་ཏེ། དེ་ལྟར་མ་ཡིན་ན་ལྷག་མ་ལ་སོགས་པའི་ལྟུང་བ་བྱུང་ཡང། སྐུ་གསུང་ཐུགས་ཀྱི་རྟེན་གྱི་མདུན་དུ་སྟོབས་བཞིའི་བཤགས་པ་ལ་འཇུག་ཅིང། གང་ཟག་གི་མདུན་དུ་ལྟུང་བ་ཕྱིར་འཆོས་པ་རྒྱུན་བཅད་པར་འགྱུར་བའི་ཕྱིར་ན་ལྟུང་བ་ལ་འཛེམ་པ་མེད་པར་འགྱུར་བས། སངས་རྒྱས་ཀྱི་བསྟན་པ་ལ་མེ་བཏང་སྟེ་སྡིག་སྒྲིབ་སྦྱངས་པས་དེའི་ལྟུང་བ་དག་ཅིང་དག་པའི་ཐ་སྙད་ཀྱང་འཐོབ་ན། བའི་སྐྱོན་དུ་འགྱུར་རོ་ཞེས་གསུངས་ངོ། །ཞེས་གསུངས།
|