From Rangjung Yeshe Wiki - Dharma Dictionary
Jump to navigation
Jump to search
| ཁ་ཆེའི་པཎྜི་ཏ་ཇི་ཙམ་བྱུང་བའི་སྐོར
|
| Tibetan Definition
|
ཁ་ཆེ་སྟེ་ཀསྨིར་ཡུལ་གྱི་ནང་པའི་པཎྜི་ཏ་བོད་ཀྱི་ལོ་རྒྱུས་ཐོག་འཁོད་པ་རྣམས་ཀྱི་མཚན་གཞུང་རགས་རིམ་འགོད་པ་ལ། «ཁ་ཆེའི་པཎྜི་ཏ་ཤཱཀྱ་ཤྲཱི» འདི་ལ་ “ཁ་ཆེའི་པཎྜི་ཏ་ཤཱཀྱ་ཤྲཱི་བྷ་དྲ” དང་། “ཤཱཀྱ་ཤྲཱི་བཟང་པོ” དང་། “ཁ་ཆེའི་པཎ་ཆེན” སོགས་ཟེར། བོད་ཀྱི་ལོ་རྒྱུས་ཐོག་ཁ་ཆེའི་པཎྜི་ཏ་མང་པོ་བྱོན་པ་རྣམས་ཀྱི་ནང་ནས་འདི་ཉིད་སྙན་གྲགས་ཆེ་ཤོས་སུ་སྣང་། བོད་གངས་ཅན་གྱི་ལྗོངས་སུ་དགེ་སློང་གི་སྡོམ་རྒྱུན་གསུམ་བྱུང་བའི་པཎ་ཆེན་སྡོམ་རྒྱུན་ཞེས་ཡོངས་སུ་གྲགས་པ་དེ་ཡང་སློབ་དཔོན་འདི་ཉིད་ལས་བརྒྱུད་པའི་སྡོམ་རྒྱུན་ཡིན་ནོ། ། (འདིའི་ལོ་རྒྱུས་དེབ་སྔོན་སྨད་ཆ་༡༢༣༧ན་གསལ་ལོ) དེ་བཞིན་གཤེགས་པའི་མཚན་བརྗོད་བསྐལ་བཟང་རྒྱན་གྱི་ཕྲེང་བ་ཞེས་བྱ་བ་མཛད་ཅིང་། པཎྜི་ཏ་དེ་ཉིད་དང་། ལོ་ཙཱ་བ་བྱམས་པའི་དཔལ་གཉིས་ཀྱིས་བསྒྱུར། རྡོ་རྗེའི་ཚིག་གི་སྙིང་པོ་བསྡུས་པའི་དཀའ་འགྲེལ་ཞེས་བྱ་བ་ཡང་སློབ་དཔོན་དེ་ཉིད་དང་། བོད་ཀྱི་ལོ་ཙཱ་བ་དཔྱལ་ཆོས་ཀྱི་བཟང་པོ་གཉིས་ཀྱིས་བསྒྱུར། འདིས་མན་ངག་སྙེ་མ་ལའང་ཞུ་བཅོས་མཛད། «ཁ་ཆེའི་པཎྜི་ཏ་བུདྡྷ་ཤྲཱི་ཛྙཱ་ན» ཁ་ཆེའི་པཎྜི་ཏ་ཆེན་པོ་བུདྡྷ་ཤྲཱི་བྷ་དྲ་ཡང་ཟེར། སློབ་དཔོན་འདིས་མངོན་རྟོགས་རྒྱན་གྱི་འགྲེལ་པ་ཤེས་རབ་སྒྲོན་མེའི་ཕྲེང་བ་མཛད་ཅིང་། འདི་དང་གནུབས་ལོ་ཙཱ་བ་དགེ་སློང་བྱམས་པའི་དཔལ་གཉིས་ཀྱིས་བསྒྱུར། (འདི་ཁྲོ་ཕུ་ལོ་ཙཱ་བས་ཐོག་མར་རྒྱ་གར་གྱི་སློབ་དཔོན་རྗེ་མི་ཏྲ་ཛོ་ཀི་བོད་དུ་སྤྱན་དྲངས། དེ་རྗེས་པཎ་ཆེན་བུདྡྷ་ཤྲཱི་སྤྱན་དྲངས། དེ་ཐམས་ཅད་ཀྱི་རྗེས་ལ་ཁ་ཆེ་པཎ་ཆེན་སྤྱན་དྲངས་པ་ཡིན་ཏེ། ཞེས་དེབ་སྔོན་སྨད་ཆ་༡༢༤༡ལས་གསུངས་པས། ཁ་ཆེ་པཎ་ཆེན་ཤཱཀྱ་ཤྲཱི་དང་སྐུ་མཚུངས་པར་བྱོན་པ་ཡིན་ནོ) «ཁ་ཆེ་བྱེ་བྲག་ཏུ་སྨྲ་བའི་སློབ་དཔོན་ཛི་ན་མི་ཏྲ» འདིའི་འགྱུར་ནི་ཤིན་ཏུ་མང་ངོ་། །«ཁ་ཆེའི་པཎྜི་ཏ་སློབ་དཔོན་ཉི་མ་སྦས་པ» ལྷ་མོ་སྒྲོལ་མའི་བསྟོད་པ་ཉི་ཤུ་རྩ་གཅིག་པའི་སྒྲུབ་ཐབས་ཞེས་བྱ་བ་དང། དེའི་སོ་སོའི་སྒྲུབ་ཐབས་ལས་ཚོགས་དང་བཅས་པ་མཛད། «ཁ་ཆེའི་པཎྜི་ཏ་བི་མ་ལ་ཤྲཱི» འདིས་འཕགས་པ་སྤྱན་རས་གཟིགས་རིགས་ཀྱི་འཇིག་རྟེན་མགོན་པོའི་རྗེས་གནང་གི་ཆོ་ག་མཛད་ཅིང་། པཎྜི་ཏ་དེ་ཉིད་དང་། ཤོང་ལོ་ཙཱ་བ་བློ་བརྟན་གྱི་འགྱུར། «ཁ་ཆེའི་པཎྜི་ཏ་དྲི་མེད་དཔལ་བཟང་པོ» ལྔ་བཅུ་པའི་བཤད་པ་མཛད་ཅིང་། པཎྜི་ཏ་ཆེན་པོ་དེ་ཉིད་དང། ལོ་ཙཱ་བ་ཡར་ལུངས་པ་ཤུད་ཀེ་གྲགས་པ་རྒྱལ་མཚན་གྱི་འགྱུར། «ཁ་ཆེའི་མཁན་པོ་ཛྙཱ་ན་ཤྲཱི་བྷ་དྲ» འདི་ལ་ཡེ་ཤེས་དཔལ་བཟང་པོ་ཡང་ཟེར། འདིས་ཚུལ་ཁྲིམས་དང་སྡོམ་པ་དང་དམ་ཚིག་དང་མི་འགལ་བ་ཞེས་བྱ་བ་མཛད་ཅིང་། དེ་ཉིད་དང། ཞུ་ཆེན་གྱི་ལོ་ཙཱ་བ་དགེ་སློང་བློ་གྲོས་སྙིང་པོ་དང། དགེ་སློང་རབ་ཞི་བཤེས་གཉེན་གཉིས་ཀྱི་འགྱུར། «ཁ་ཆེའི་མཁན་པོ་བླ་མ་དྷརྨ་ཤྲཱི» ཡོངས་གྲགས་སུ་ཁ་ཆེ་དྷརྨ་ཤྲཱི་ཟེར། སྡུད་པ་མངོན་རྟོགས་རྒྱན་དང་མཐུན་པར་བཤད་པ་ཤེས་རབ་ཀྱི་ཕ་རོལ་ཏུ་ཕྱིན་པའི་མཛོད་ཀྱི་ལྡེ་མིག་ཅེས་བྱ་བ་མཛད། སྟོང་ཕྲག་བརྒྱ་པའམ་འབུམ་གྱི་རྣམ་པར་བཤད་པ་ཞེས་བྱ་བ་དེ་ཡང་ཁོང་གིས་མཛད་པར་གྲགས་སོ། །«ཁ་ཆེའི་མཁས་པ་ཆེན་པོ་ལ་ཀཥྨཱི» རིམ་པ་ལྔའི་འགྲེལ་པའི་དོན་གསལ་བར་བྱེད་པ་ཞེས་བྱ་བ་མཛད། «ཁ་ཆེའི་པཎྜི་ཏ་ཐིག་ལེ་བུམ་པ» སློབ་དཔོན་འདི་དང་། ལོ་ཙཱ་བ་བློ་ལྡན་ཤེས་རབ་གཉིས་ཀྱིས། སློབ་དཔོན་འཕགས་པ་ཀླུ་སྒྲུབ་ཀྱིས་མཛད་པའི་ཤེས་རབ་ཀྱི་ཕ་རོལ་ཏུ་ཕྱིན་མའི་བསྟོད་པ་བསྒྱུར། «ཁ་ཆེའི་པཎྜི་ཏ་བི་མ་ལ་ཤྲཱི་བྷ་དྲ» སློབ་དཔོན་དེ་ཉིད་དང་། བོད་ཀྱི་ལོ་ཙཱ་བ་དགེ་སློང་ཤོང་བློ་བརྟན་གཉིས་ཀྱིས། རྒྱུད་ཀྱི་རྒྱལ་པོ་དཔལ་ཀྱེའི་རྡོ་རྗེའི་འགྲེལ་བཤད་ཁ་སྦྱོར་ཤིན་ཏུ་དྲི་མ་མེད་པ་ཞེས་བྱ་བ་བསྒྱུར། «ཁ་ཆེའི་པཎྜི་ཏ་དགེ་སློང་སྙན་གྲགས་བཟང་པོ» སློབ་དཔོན་འདིས་རྡོ་རྗེའི་ཚིག་གི་སྙིང་པོ་བསྡུས་པའི་དཀའ་འགྲེལ་ཞེས་བྱ་བ་མཛད། «ཁ་ཆེའི་པཎྜི་ཏ་རིན་ཆེན་རྡོ་རྗེ» གཏོར་མའི་ལས་ཀྱི་རིམ་པ་དང་། དཔལ་དགྱེས་པ་རྡོ་རྗེ་ལ་བསྟོད་པ་གཉིས་མཛད། «ཁ་ཆེའི་པཎྜི་ཏ་སོ་མ་ནཱ་ཐ» སློབ་དཔོན་འདི་དང་། བོད་ཀྱི་ལོ་ཙཱ་བ་ཆེན་པོ་འབྲོ་དགེ་སློང་ཤེས་རབ་གྲགས་གཉིས་ཀྱིས། མཆོག་གི་དང་པོའི་སངས་རྒྱས་ལས་བྱུང་བ་དཔལ་དུས་ཀྱི་འཁོར་ལོའི་བསྡུས་པའི་རྒྱུད་ཀྱི་རྒྱལ་པོ་བསྒྱུར། པདྨ་ཅན་ཞེས་བྱ་བའི་དཀའ་འགྲེལ་དཔལ་དུས་ཞབས་པ་ཆེན་པོས་མཛད་པ་དེ་ཡང་བསྒྱུར། «ཁ་ཆེའི་པཎྜི་ཏ་ཟླ་བ་མགོན་པོ» དཔལ་དོན་དམ་བསྙེན་པ་ཞེས་བྱ་བ་བསྒྱུར་ནས་གཏན་ལ་ཕབ། ཡང་འདིས་དབང་མདོར་བསྟན་པའི་རྒྱ་ཆེར་འགྲེལ་པ་རྣལ་འབྱོར་པ་དུས་ཀྱི་འཁོར་ལོའི་ཞབས་པས་མཛད་པ་ཡང་བསྒྱུར།«ཁ་ཆེའི་པཎྜི་ཏ་དྷརྨ་དྷ་ར» སློབ་དཔོན་དེ་ཉིད་དང་། ལོ་ཙཱ་བ་གྲགས་པ་རྒྱལ་མཚན་གཉིས་ཀྱིས། ན་རོ་པས་མཛད་པའི་དབང་མདོར་བསྟན་པའི་འགྲེལ་བཤད་དོན་དམ་བསྡུས་པ་ཞེས་བྱ་བ་བསྒྱུར། «ཁ་ཆེའི་མཁན་པོ་ལོངས་སྤྱོད་རྡོ་རྗེ» དཔལ་གསང་ཆེན་པདྨ་ཞེས་བྱ་བའི་རྒྱ་ཆེར་འགྲེལ་པ་མཛད་ཅིང་། དེ་ཉིད་ཀྱི་རང་འགྱུར། «ཁ་ཆེའི་པཎྜི་ཏ་ཤྲདྡྷཱ་ཀ་ར་ཝརྨ» སློབ་དཔོན་དེ་ཉིད་དང་། ཞུ་ཆེན་གྱི་ལོ་ཙཱ་བ་དགེ་སློང་རིན་ཆེན་བཟང་པོ་གཉིས་ཀྱིས། ལཱུ་ཡི་པས་མཛད་པའི་དཔལ་བཅོམ་ལྡན་འདས་མངོན་པར་རྟོགས་པ་ཞེས་བྱ་བ་བསྒྱུར། «ཁ་ཆེའི་མཁན་པོ་དྷརྨ་བཛྲ» སློབ་དཔོན་དེ་ཉིད་དང་། བོད་ཀྱི་ལོ་ཙཱ་བ་རྒྱ་བརྩོན་འགྲུས་སེངྒེ་གཉིས་ཀྱིས། དཱ་རི་ཀ་པས་མཛད་པའི་དཔལ་འཁོར་ལོ་སྡོམ་པའི་བསྟོད་པ་དོན་ཐམས་ཅད་གྲུབ་པ་རྣམ་དག་གཙུག་གི་ནོར་བུ་ཞེས་བྱ་བ་བསྒྱུར། «ཁ་ཆེའི་མཁན་པོ་བི་ནཱ་ཡ་ཀ» སློབ་དཔོན་དེ་ཉིད་དང་། བོད་ཀྱི་ལོ་ཙཱ་བ་དགེ་སློང་བློ་ལྡན་ཤེས་རབ་གཉིས་ཀྱིས། དེ་ཁོ་ན་ཉིད་ཀྱི་སྙིང་པོ་ཞེས་བྱ་བའི་སྒྲུབ་པའི་ཐབས་སློབ་དཔོན་དད་བྱེད་གོ་ཆས་མཛད་པ་བསྒྱུར། «ཁ་ཆེའི་མཁས་པ་བྷ་དྲ་བོ་དྷི» སློབ་དཔོན་དེ་ཉིད་དང་། བོད་ཀྱི་ལོ་ཙཱ་བ་མར་པ་ཆོས་ཀྱི་དབང་ཕྱུག་གཉིས་ཀྱིས། དཔལ་འཁོར་ལོ་སྡོམ་པའི་དེ་ཁོ་ན་ཉིད་ཀྱི་མན་ངག་སློབ་དཔོན་ཀུ་ས་ལི་པས་མཛད་པ་བསྒྱུར། «ཁ་ཆེའི་པཎྜི་ཏ་ཆེན་པོ་བྲམ་ཟེ་རིན་ཆེན་རྡོ་རྗེ» འདིས་དཔལ་འཁོར་ལོ་སྡོམ་པ་ལ་བསྟོད་པ་མཛད། «ཁ་ཆེའི་པཎྜི་ཏ་བདེ་བའི་རྒྱལ་པོ» འདིས་དབང་གི་རིམ་པ་ཞེས་བྱ་བ་མཛད། «ཁ་ཆེའི་པཎྜི་ཏ་སངྷ་ཤྲཱི་བྷ་དྲ» དང་། བོད་ཀྱི་ལོ་ཙཱ་བ་འཇམ་དཔལ་སྒེག་པའི་རྡོ་རྗེ་གཉིས་ཀྱིས། ཨུ་རྒྱན་གྱི་སྒྲོལ་མའི་རིམ་པ། དཀྱིལ་འཁོར་དུ་དབང་བསྐུར་བའི་ཆོ་ག་མདོར་བསྡུས་པ་པཎྜི་ཏ་པ་ར་ཧི་ཏས་མཛད་པ་རྣམས་བསྒྱུར། «ཁ་ཆེའི་པཎྜི་ཏ་ཛ་ཡ་ཨཱ་ནནྡ» དང་། བོད་ཀྱི་ལོ་ཙཱ་བ་ཁུ་མདོ་སྡེ་འབར་གཉིས་ཀྱིས། བྱང་ཆུབ་སེམས་ཀྱི་འགྲེལ་པ་ལྷུག་པ་མ་སློབ་དཔོན་ཀླུ་སྒྲུབ་ཀྱིས་མཛད་པ་བསྒྱུར། «ཁ་ཆེའི་སློབ་དཔོན་ཆེན་པོ་དཔལ་རིན་ཆེན་རྡོ་རྗེ» བཞི་པའི་རྣམ་པར་ངེས་པའི་མན་ངག་ཅེས་བྱ་བ་མཛད། «ཁ་ཆེའི་མཁན་པོ་པཎྜི་ཏ་མ་ཧཱ་ཛ་ན» དང་། བོད་ཀྱི་ལོ་ཙཱ་བ་དགེ་སློང་ཚུལ་ཁྲིམས་གཞོན་ནུ་གཉིས་ཀྱིས། འཕགས་པ་འཇམ་དཔལ་གྱི་དཀྱིལ་འཁོར་གྱི་ཆོ་ག་ཡིད་བཞིན་ནོར་བུ་ཞེས་བྱ་བ་སློབ་དཔོན་ཟླ་བཟངས་གྲགས་པས་མཛད་པ། «ཁ་ཆེའི་པཎྜི་ཏ་ཏ་ཐཱ་ག་ཏ་བྷ་དྲ» དང་། དགེ་སློང་འཕགས་པས། འཇིགས་པ་བརྒྱད་ལས་སྐྱོབ་པའི་སྒྲོལ་མའི་སྒྲུབ་ཐབས་སློབ་དཔོན་ཐམས་ཅད་མཁྱེན་པའི་བཤེས་གཉེན་གྱིས་མཛད་པ། རྒྱའི་ཡུལ་ཅོང་ཏོའི་མཁར་དུ་བསྒྱུར། «ཁ་ཆེའི་མཁན་པོ་ཧ་སུ་མ་ཏི» སློབ་དཔོན་འདི་དང་། བོད་ཀྱི་སྒྲ་སྒྱུར་གྱི་ལོ་ཙཱ་བ་པ་ཚབ་ཉི་མ་གྲགས་གཉིས་ཀྱིས། ཅོག་རོ་ཀླུ་ཡི་རྒྱལ་མཚན་གྱིས་རྩ་བ་ཤེས་རབ་བསྒྱུར་བ་ལ་འགྲེལ་པ་ཚིག་གསལ་དང་བསྟུན་ནས་ཞུ་བཅོས་མཛད་དོ། །«ཁ་ཆེའི་མཁན་པོ་ཀ་ན་ཀ་ཝརྨ» དང་། བོད་ཀྱི་ལོ་ཙཱ་བ་པ་ཚབ་ཉི་མ་གྲགས་གཉིས་ཀྱིས། དཔལ་ལྡན་ཟླ་བས་མཛད་པའི་རྩ་ཤེའི་འགྲེལ་པ་ཚིག་གསལ་ལ་ཉི་འོག་ཤར་ཕྱོགས་ཀྱི་དཔེ་དང་གཏུགས་ཤིང་ལེགས་པར་ཞུ་བཅོས་མཛད། «ཁ་ཆེའི་མཁན་པོ་པ་ར་ཧི་ཏ» ལོ་ཙཱ་བ་དགེ་སློང་གཞོན་ནུ་མཆོག་གཉིས་ཀྱིས། སྟོང་ཉིད་བདུན་ཅུ་པའི་རྣམ་པར་བཤད་པ་བསྒྱུར། «ཁ་ཆེའི་ཡུལ་གྱི་མཁས་པ་ཆེན་པོ་སོ་མ་ཤྲཱི» འདི་གོང་དུ་བཤད་པའི་སྟོང་ཉིད་བདུན་ཅུ་པའི་རྣམ་བཤད་མཛད་མཁན་སློབ་དཔོན་ཆེན་པོ་དཔལ་གཞན་ལ་ཕན་པ་ཞེས་བྱ་དེའི་བླ་མ་ཡིན། «ཁ་ཆེའི་པཎྜི་ཏ་ཏི་ལ་ཀ་ཀ་ལ་ཤ» དང་། བོད་ཀྱི་ལོ་ཙཱ་བ་དགེ་སློང་བློ་ལྡན་ཤེས་རབ་གཉིས་ཀྱིས། བསླབ་པ་ཀུན་ལས་བཏུས་པའི་ཚིག་ལེའུར་བྱས་པ་དང། བསླབ་པ་ཀུན་ལས་བཏུས་པ་སློབ་དཔོན་ཞི་བའི་ལྷས་མཛད་པ་ལ་ཞུ་བཅོས་ལེགས་པར་མཛད། «ཁ་ཆེ་ཨ་མོ་གྷ»དང་། བོད་ཀྱི་འོ་རུ་ལོ་ཙཱ་གཉིས་ཀྱིས། དབུ་མ་རྒྱན་གྱི་མན་ངག་ཅེས་བྱ་བ་སློབ་དཔོན་རིན་ཆེན་འབྱུང་གནས་ཞི་བས་མཛད་པ་བསྒྱུར། འདི་ལ་སྔ་འགྱུར་ཞིག་ཀྱང་ཡོད་པར་སྣང་། «ཁ་ཆེའི་པཎྜི་ཏ་བ་ལ་ཤྲཱི་བྷ་དྲ» འདིས་གླེང་གཞི་དང་གང་ཟག་བསྡུས་པའི་ཚིག་ལེའུར་བྱས་པ་མཛད། «ཁ་ཆེའི་མཁན་པོ་ན་ར་ས་དེ་ཝ་»དང་། བོད་ཀྱི་ལོ་ཙཱ་བ་དགེ་སློང་རྒྱལ་བའི་ཤེས་རབ་གཉིས་ཀྱིས། དགེ་ཚུལ་གྱི་དང་པོའི་ལོ་དྲི་བ་བསྒྱུར། «ཁ་ཆེའི་པཎྜི་ཏ་ཤྲཱི་ཐ»དང་། བོད་ཀྱི་ལོ་ཙཱ་བ་དགེ་སློང་གྲགས་འབྱོར་ཤེས་རབ་གཉིས་ཀྱིས། རྨི་ལམ་ཡིད་བཞིན་ནོར་བུའི་གཏམ། སྦྱིན་པའི་གཏམ། སྲིད་པ་ལས་འདས་པའི་གཏམ་རྣམས་སློབ་དཔོན་འཕགས་པ་ཀླུ་སྒྲུབ་ཀྱིས་མཛད་པ་བསྒྱུར། «ཁ་ཆེའི་པཎྜི་ཏ་བི་ནཱ་ཡ»དང་། བོད་ཀྱི་ལོ་ཙཱ་བ་གྲགས་འབྱོར་ཤེས་རབ་གཉིས་ཀྱིས། མི་རྟག་པའི་དོན་གྱི་གཏམ་སྙན་དངགས་མཁན་ཆེན་པོ་དགའ་བའི་དབང་པོས་མཛད་པ་བསྒྱུར། «ཁ་ཆེའི་པཎྜི་ཏ་ཆེན་པོ་སྐལ་ལྡན་རྒྱལ་པོ»དང་། བོད་ཀྱི་ལོ་ཙཱ་བ་ཆེན་པོ་དགེ་སློང་རྔོག་བློ་ལྡན་ཤེས་རབ་གཉིས་ཀྱིས། ཚད་མ་རྣམ་འགྲེལ་གྱི་ཚིག་ལེའུར་བྱས་པ་ལ་ཞུ་བཅོས་ལེགས་པར་མཛད། «ཁ་ཆེའི་མཁན་པོ་པཎྜི་ཏ་ཀུ་མཱར་ཤྲཱི»དང་། ཞུ་ཆེན་གྱི་ལོ་ཙཱ་བ་དགེ་སློང་འཕགས་པ་ཤེས་རབ་གཉིས་ཀྱིས། ཚད་མ་རྣམ་འགྲེལ་ལེའུ་གཉིས་པ་མན་ཆད་ཀྱི་འགྲེལ་པ་རྣམ་འགྲེལ་གྱི་རྒྱན་ཞེས་བྱ་བ་ཞུ་བཅོས་ལེགས་པར་མཛད། «ཁ་ཆེའི་པཎྜི་ཏ་མ་ནོ་རཱ་ཐ»དང་། བོད་ཀྱི་ལོ་ཙཱ་བ་བློ་ལྡན་ཤེས་རབ་གཉིས་ཀྱིས། སེལ་བ་གྲུབ་པ་ཞེས་བྱ་བ་དགེ་བསྙེན་དམ་པ་མཁས་པ་ཆེན་པོ་བྲམ་ཟེ་ཤངྐ་རཱ་ནནྡས་མཛད་པ་བསྒྱུར། «ཁ་ཆེའི་པཎྜི་ཏ་སྙན་དངགས་མཁན་ཆེན་པོ་སུ་མ་ན་ཤྲཱི»དང་། བོད་ཀྱི་ཞུ་ཆེན་གྱི་ལོ་ཙཱ་བ་མང་དུ་ཐོས་པའི་དགེ་སློང་བྱང་ཆུབ་རྩེ་མོ་དང་། ལོ་ཙཱ་བ་ལུང་རིགས་སྨྲ་བ་ནམ་མཁའ་བཟང་པོ་རྣམས་ཀྱིས། སྙན་དངགས་སྤྲིན་གྱི་ཕོ་ཉ་ཞེས་བྱ་བ་སྙན་དངགས་མཁན་ཆེན་པོ་ནག་མོ་ཁོལ་གྱིས་མཛད་པ། དཔལ་ས་སྐྱའི་གཙུག་ལག་ཁང་ཆེན་པོར་བསྒྱུར་ཏོ། །འདི་ཡན་ནི་བསྟན་འགྱུར་མཛད་པ་པོ་དང་སྒྱུར་བ་པོའི་ཁ་ཆེའི་མཁས་པ་རྣམས་ཀྱི་མཚན་གཞུང་ཡིན་ལ། ༼ བཀའ་འགྱུར་སྒྱུར་བྱེད་ནི ༽ «ཁ་ཆེའི་མཁན་པོ་ཛྙཱ་ན་བཛྲ» འདིས་དཔལ་བདེ་མཆོག་ནམ་མཁའ་དང་མཉམ་པའི་རྒྱུད་ཀྱི་རྒྱལ་པོ་ལེའུ་གསུམ་པ་རང་འགྱུར་དུ་མཛད། «ཁ་ཆེའི་པཎྜི་ཏ་ཨཱ་ཀ་ར་སིདྡྷི»དང་། བོད་ཀྱི་ལོ་ཙཱ་བ་ནག་ཚོ་ཚུལ་ཁྲིམས་རྒྱལ་བ་གཉིས་ཀྱིས། དཔལ་ཡེ་ཤེས་རྡོ་རྗེ་ཀུན་ལས་བཏུས་པ་རབ་བྱེད་བཞི་བཅུ་རྩ་གཅིག་པ་བསྒྱུར། «ཁ་ཆེའི་པཎྜི་ཏ་ཛྙཱ་ན་བཛྲ»དང་། བོད་ཀྱི་ལོ་ཙཱ་བ་འབྲོ་ཤེས་རབ་གྲགས་གཉིས་ཀྱིས། རབ་ཏུ་གནས་པ་མདོར་བསྡུས་པའི་རྒྱུད་བསྒྱུར། «ཁ་ཆེའི་པཎྜི་ཏ་ཙེ་ལུ»དང་། བོད་ཀྱི་ ལོ་ཙཱ་བ་འཕགས་པ་ཤེས་རབ་གཉིས་ཀྱིས། བཅོམ་ལྡན་འདས་ཕྱག་ན་རྡོ་རྗེ་གོས་སྔོན་པོ་ཅན་རྡོ་རྗེ་ས་འོག་གི་རྒྱུད་ཅེས་བྱ་བ་ལ་ལེའུ་བཅུ་གསུམ་བསྒྱུར། «ཁ་ཆེའི་པཎྜི་ཏ་མ་ཧཱ་ཛྙཱ་ན» འཕགས་པ་དེ་བཞིན་གཤེགས་པའི་གཙུག་ཏོར་ནས་བྱུང་བའི་གདུགས་དཀར་པོ་ཅན་གཞན་གྱིས་མི་ཐུབ་པ་ལྷ་ཡུལ་མ་ཆུང་བར་གྲགས་པ་རང་འགྱུར་མཛད། «ཁ་ཆེའི་མཁན་པོ་དྷརྨཱ་ཀ་ར»དང་། བོད་ཀྱི་ལོ་ཙཱ་བ་བེནྡེ་དཔལ་འབྱོར་གཉིས་ཀྱིས། ནོར་བུ་ཆེན་པོ་རིན་པོ་ཆེ་ལ་མཁས་པ་བསྟན་པ་ཡོངས་སུ་བསྔོ་བ་ཆེན་པོའི་རྒྱལ་པོ་ཞེས་བྱ་བ་བསྒྱུར་ཏོ། །
|