From Rangjung Yeshe Wiki - Dharma Dictionary
Jump to navigation
Jump to search
| ཁ་བཏགས
|
| Tibetan Definition
|
1 ཁ་བཏགས་ནི་ལྷ་གོས་སམ། ལྷ་རྫས་ཞེས་རྟེན་འབྲེལ་གྱི་རྫས་ཤིག་ཏུ་ངོས་འཛིན་གྱིས་གཙུག་ལག་ཁང་ལ་སོགས་པར་རྟེན་མཇལ་བར་འགྲོ་བ་དང་། བླ་མ་དང་། དཔོན་པོ་མཇལ་བ། བྱ་དགའ་དཔའ་རྟགས་སྤྲོད་པ། ཆང་ས་སོགས་ཀྱི་རྟེན་འབྲེལ་དང་། འགྲུལ་པ་ཐོན་པ། གཤིན་པོའི་ཕུང་པོ་ཕྱིར་ཐོན་ཡན་བྱ་བ་ལེགས་ཉེས་བཟང་ངན་ཚང་མར་མེད་ཐབས་མེད་པ་ཞིག་ཡིན། སྔར་རྒྱ་གར་བས་རྟེན་མཇལ་སྐབས་དང་། བླ་མ་དང་། དགེ་འདུན་ལ་བསྙེན་བཀུར་རམ་ཡོན་འབུལ་སྐབས་ན་བཟའ་རེ་འབུལ་སྲོལ་ཡོད་པ་ལྟར། རྗེས་སུ་བོད་ལ་རིམ་པས་ན་བཟའི་དོད་ལ་ཁ་བཏགས་འབུལ་བའི་སྲོལ་དར་བ་མིན་ནམ་སྙམ། ཁ་བཏགས་སྤུས་ལེགས་ཞན་གྱི་རྣམ་གྲངས་ཤིན་ཏུ་མང་། སྔ་མོའི་ནང་མཛོད་མ་རིག་གཉིད་སངས་མ། དཀོན་མཆོག་རིན་ཆེན་མ། བར་ཐོན་ཉིན་བདེ་མ། འདོམ་འཁོར་མ། ཕྱིས་ཐོན་འཕྲིན་ལས་དར་རྒྱས་མ་སོགས་དང་། དེ་བཞིན་ཨ་ཤེ། བར་མཛོད། ཟུབ་ཕྱི། ཕྱི་མཛོད། བསོད་ནམས་ཁ་བཏགས་སོགས་ཕྱི་མ་ཕྱི་མ་སྤུས་ཞན་པ་ཡོད་ཅེས་ཞྭ་སྒབ་པའི་རྒྱལ་རབས་ན་གསལ་བ་ལྟར་རོ། །ཁ་བཏགས་ཁ་དོག་དཀར་པོ་ཡིན་པ་ནི། བསམ་པ་དཀར་བའམ་ལྷག་བསམ་རྣམ་དག་གི་མཚོན་དོན་ཡིན་ཏེ། མཁས་གྲུབ་ཆོས་རྗེའི་གསུང་ཐོར་བུ་༥༩ན༣ལས། ཅེས་པའི་ཞུ་ཡིག་གཟིགས་པའི་རྟེན་མཚོན་པར། ལྷག་བསམ་དྲི་མ་མེད་པ་ལྟར་རབ་ཏུ་དཀར་བའི་ཁ་བཏགས་གཅིག་མཆིས། ཞེས་གསུངས་པ་ལྟར་རོ། །ཡང་དུང་དཀར་བློ་བཟང་འཕྲིན་ལས་རིན་པོ་ཆེའི་ཚིག་མཛོད་ཆེན་མོར། འདི་ཡི་སྐོར་བོད་ཡིག་གི་ལོ་རྒྱུས་ཡིག་ཆ་ཁག་ཏུ་མི་གསལ་ཡང་རྒན་རབས་མི་ཉུང་བ་ཞིག་གི་ངག་རྒྱུན་དུ་གནའ་རབས་བོད་དུ་སྐུ་མགྲོན་ཁྱིམ་དུ་ཕེབས་པ་དང་ཁྱིམ་ནས་ནང་མི་ཡུལ་གཞན་དུ་ཐོན་པ་སོགས་ཀྱི་སྐབས་བཀྲ་ཤིས་པའི་རྟེན་འབྲེལ་བཟང་པོ་མཚོན་བྱེད་དུ་རྩམ་པས་གོས་ཀྱི་གོང་བའི་སྟེང་དུ་དཀར་ཐིག་རྒྱབ་པ་དེར་ཁ་བཏགས་ཟེར་ཞིང་། རྗེས་སུ་སོག་པོས་བོད་ས་གནས་སུ་དབང་སྒྱུར་བྱས་སྐབས་དེའི་ཚབ་ཏུ་དར་སྔོན་པོ་དང་སེར་པོ་སོགས་མགུལ་དུ་གཡོགས་པ་དང་ཕྱག་ཏུ་འབུལ་བ་སོགས་ཀྱི་སྲོལ་དར་ནས་དེའི་མིང་ལ་ཁ་བཏགས་ཞེས་འབོད་སྲོལ་བྱུང་བ་ཡིན་ཞེས་གསུང་མཁན་འདུག་པ་དེའི་དཔྱད་གཞིར་བཀོད་ཅེས་གསལ་ལོ། །
|