From Rangjung Yeshe Wiki - Dharma Dictionary
Jump to navigation
Jump to search
| བརྫུན་སྨྲ་བ
|
| Tibetan Definition
|
(ཕར་ཕྱིན) སླུ་འབྲིད་ཀྱི་བསམ་པས་ཕ་རོལ་པོ་ལ་མི་བདེན་པའི་གཏམ་སྨྲས་པ། བརྫུན་སྨྲ་བའི་ཉེས་དམིགས་ནི། མདོ་སྡེ་དྲན་པ་ཉེར་གཞག་༼ཡ་པ༽ ༡༨༨ན༡ ལས། འདི་ལྟ་སྟེ། ལྕེ་པད་མའི་འདབ་མ་ལྟར་ཤིན་ཏུ་འཇམ་པ་དེ་ཁ་ནས་དྲངས་ཏེ་རྒྱང་གྲགས་གསུམ་དུ་བརྒྱངས་པ་གཤིན་རྗེའི་མི་འཇིགས་འཇིགས་ལྟར་འདུག་པས་དེ་བཟུང་ནས་གཤིན་རྗེའི་མི་རྣམས་ཀྱིས་ལྕགས་ཀྱི་ཐོང་གཤོལ་རབ་ཏུ་འབར་བ་དག་གིས་འབུགས་ཤིང་རྨེད་ལ་ཡོངས་སུ་འདྲལ་ལོ། །ཟངས་དམར་པོ་རབ་ཏུ་འབར་བས་ཆག་ཆག་འདེབས་ཤིང་ལྕེ་ལས་བྱུང་བའི་སྲིན་བུ་ཁ་རབ་ཏུ་འབར་བ་དག་སྐྱེ་སྟེ། གང་ལྕེ་དག་ལ་ཟ་ཡང་བརྫུན་དུ་སྨྲ་བ་དེས་ལྕེ་དེ་དག་ཕྱིར་ཁའི་ནང་དུ་གཞུག་པར་མི་ནུས་སོ། །དེའི་ཁའི་ནང་གི་སོ་གང་ཡིན་པ་དེ་དག་ལ་སོ་སྲིན་ཨུ་ལུ་ཀ་ལ་ཞེས་བྱ་བ་བྱུང་སྟེ། དེ་དག་གིས་འབྱིན་པར་བྱེད་ཅིང་དེའི་རྐན་ཡང་ལས་ཀྱིས་བྱས་པའི་རླུང་གིས་བྱེ་མའི་ཕྱེ་མ་ལྟར་ཕྱེ་མར་རློག་གོ། དེའི་མིད་པ་ཡང་སྤུ་གྲི་ལྟ་བུའི་རླུང་གིས་འཇོག་པར་བྱེད་ལ། དེའི་སྙིང་ཡང་སྲིན་བུའི་མཆུ་རབ་ཏུ་འབར་བ་དག་གིས་ཟ་བར་བྱེད་དོ། །བརྫུན་སྨྲ་བའི་ལུས་ཅན་ནི་སེམས་ཅན་དམྱལ་བ་ངུ་འབོད་ཆེན་པོའི་གཞིར་སྐྱེས་ནས་སྲེག་སྟེ། ལས་བྱས་པས་ཀུན་ནས་བསླང་བའི་ལུས་ལས་བྱུང་བའི་སྲིན་བུ་རྣམས་ཀྱིས་ལུས་རབ་ཏུ་འབར་བའི་རྒྱུ་མ་དག་ལ་ཟའོ། །དེའི་ནང་ན་འདུག་པའི་སྲིན་བུ་རྣམས་དང་། ནད་རྣམས་ཀྱིས་ཚོར་བ་མི་བཟད་ཅིང་ཚ་ལ་དྲག་པ་རྣམས་མྱོང་ངོ་། །ཕྱི་རོལ་དུ་ཡང་སྡུག་བསྔལ་རྣམ་པ་གཉིས་ཀྱིས་གནོད་དེ། འདི་ལྟ་སྟེ། མེ་ལས་བྱུང་བའི་སེམས་ཅན་དམྱལ་བ་པ་དག་ལ་གཤིན་རྗེའི་མི་རྣམས་ཀྱིས་ཚོར་བའི་རྒྱུ་རྣམ་པ་སྣ་ཚོགས་དག་གིས་འཇིགས་པ་བསྐྱེད་དོ། །ཕུར་བུ་དག་གིས་ཀྱང་ཡན་ལག་དང་ཉིང་ལག་ཐམས་ཅད་དང་། ལུས་ཀྱི་རྩ་དང་། རྒྱུས་པ་དང་། རུས་པའི་གསེབ་ཐམས་ཅད་འབུགས་པར་བྱེད་དོ། །གཞན་ཡང་ཚོར་བ་རྣམས་ཀྱིས་མངོན་པར་གཙེས་པར་འགྱུར་ཏེ། འདི་ལྟ་སྟེ། སྟེའུ་ཡིས་ཡན་ལག་ནས་རུས་པ་ལ་སོགས་པའི་བར་ཐམས་ཅད་འཇོག་གོ། བརྫུན་སྨྲ་བ་སྨྲས་པ་དེ་ནི་མཆོག་ཏུ་དོན་མ་ཡིན་པ་བྱེད་ཅིང་ཆོས་ཀྱི་སྟེགས་ཀུན་ལས་རྒལ་བ་ཡིན་ཏེ། བརྫུན་སྨྲ་བ་ནི་དོན་མེད་པ་ཐམས་ཅད་ཀྱི་སྒོར་གྱུར་པ། དགེ་བའི་ལོ་ཏོག་ཐམས་ཅད་སེར་བ་ལྟ་བུར་གྱུར་པ། ངན་འགྲོ་ཐམས་ཅད་ཀྱི་སྒོར་གྱུར་པ། བྱ་བ་མ་ཡིན་པ་ཐམས་ཅད་ཀྱི་གཞིར་གྱུར་པ། སེམས་ཅན་ཐམས་ཅད་ཀྱིས་ཡིད་ཆེས་པར་འགྱུར་བ་མ་ཡིན་པ།འཕགས་པའི་སྐྱེ་བོ་ཀུན་གྱིས་མི་གཙང་བ་དང་འདྲ་བར་སྨད་པར་གྱུར་པ། རྫོགས་པའི་སངས་རྒྱས་དང་ཉན་ཐོས་དང་རང་སངས་རྒྱས་དང་དགྲ་བཅོམ་པ་དག་གིས་དུག་བཞིན་དུ་རྣམ་པར་སྤངས་པ། འཇིག་རྟེན་པ་དང་འཇིག་རྟེན་ལས་འདས་པའི་ལམ་གྱི་མུན་པར་གྱུར་ཅིང་སུ་ཡང་འདོད་པ་མེད་པ། གཅིག་ཏུ་སེམས་ཅན་དམྱལ་བ་མངོན་དུ་གྱུར་ཅིང་གཞན་དང་མཚུངས་པ་མེད་པ། རྣམ་པ་དེ་དག་ཏུ་གྱུར་པ་དོན་མེད་པ་འབྱུང་བ་ཡིན་ནོ། །ཞེས་སོགས་གསུངས་སོ། །
|