From Rangjung Yeshe Wiki - Dharma Dictionary
Jump to navigation
Jump to search
| བེ་ཏ
|
| Tibetan Definition
|
(ལེགས་སྦྱར) 1 ནང་དུ་ཆུ་མངར་ལ་བསིལ་བ་འཐུང་རྒྱུ་ཡོད་པའི་ “ཀོ་ཀོ་ན་ཊི” coconut ཞེས་པའི་ཤིང་འབྲས་དེའི་མིང་། ཕྱི་རྒྱལ་གྱི་སྐད་དུ་ “ཀོ་ཀོ་ན་ཊི” coconut དང་རྒྱ་གར་ཡུལ་སྐད་དུ་ “ནཱ་རི་ཡལ” नारियल ཟེར། ནཱ་རི་ཡལ་ཞེས་པ་ལེགས་སྦྱར་གྱི་ “ནཱ་རི་ཀེ་ལཱ” ཟུར་ཆག་པ་འདྲ། ནཱ་རི་ཀེ་ལཱ་ཞེས་པ་ནི་བུད་མེད་རྩེན་ཞེས་པའི་དོན་ཡིན། རྒྱ་གར་ལྷོ་ཕྱོགས་ཀར་ཎ་ཊ་ཀའི་ཡུལ་སྐད་ལ་ཤ་ལ་ “མཱཾ་ས” ཟེར་བ་དང་། མཚན་མོ་ལ་ “རཱཏྲི” ཟེར་བ་སོགས་ལེགས་སྦྱར་ཆེས་མང་བས། དེང་སང་ཡང་ཡུལ་མི་འགས་ཀོ་ཀོ་ན་ཊི་ལ། བེ་ཏ་ཞེས་འབོད་པ་རང་གིས་དངོས་སུ་ཐོས་སོ། །ཤིང་འབྲས་དེ་ནི་མ་སྨིན་པའི་དུས་སུ་ནང་དུ་ཆུ་མངར་བསིལ་འཐུང་རྒྱུ་ཡོད་ལ། འདི་ཆེ་ཆུང་མིའི་མགོ་ལས་ཅུང་ཟད་ཆུང་ཙམ་པ་ཞིག་ལ་ཧ་ཅང་ལྕི་བ་ཤིང་སྡོང་ནས་ལྷུངས་ཏེ་མགོ་ཐོག་ཏུ་ཕོག་ན་རྐྱེན་ལམ་དུ་གཏོང་རྒྱུ་ཉེན་ཁ་ཡོད། དེའི་ནང་འབྲས་དེ་སྨིན་པ་ན་ཞག་ཚི་ཤིན་ཏུ་ཆེ་ལ་ཆེ་ཆུང་རྫོག་མགོའི་ཚད་ཙམ་པ་ཞིག་ལ་མདོག་ནག་པོའམ་རྒྱ་སྨུག་ལྟ་བུ་ཞིག་ཏུ་འགྱུར། བེ་ཏའི་འབྲས་བུ་ནི་ཀོ་ཀོ་ན་ཊི་རང་ལ་ཟེར་བ་ཁུ་ནུ་བླ་མའི་ངག་སྒྲོན་འགྲེལ་པར་ཡང་ཟུར་ཙམ་གསལ་ཏེ། ནཱ་རི་ཀེ་ལཱའི་འགྲེལ་བཤད་ལ་བེ་ཏའི་འབྲས་བུ་ཞེས་གསུངས་པས་ཀྱང་ཤེས་ནུས་སོ། །མཁས་དབང་དགེ་འདུན་ཆོས་འཕེལ་གྱི་རྒྱལ་ཁམས་རིག་པས་བསྐོར་བའི་གཏམ་རྒྱུད་གསེར་གྱི་ཐང་མ་ལས་ཀྱང་ཏ་ལ་དང་བེ་ཏ་ཞེས་པ་ཀོ་ཀོ་ན་ཊིའི་འབྲས་བུ་རང་ལ་ངོས་འཛིན་མཛད་འདུག 2 ཀོ་ཀོ་ན་ཊིའི་ཤིང་སྡོང་། 3 ཤིང་ཏ་ལ་སྟེ་ཆུ་མངར་འཐོན་རྒྱུ་ཡོད་པའི་ཤིང་སྡོང་རིང་པོ་དབྱིབས་ཀོ་ཀོ་ན་ཊིའི་སྡོང་པོ་དང་ཕལ་ཆེར་འདྲ་བ་ཞིག ཆུ་མངར་དེ་ཤིང་ཆང་བཟོ་བྱེད་དུ་བེད་སྤྱོད་བྱེད། ཤིང་སྡོང་ལ་གྲིས་ཉག་ཀ་བཏོད་ནས་ཤིང་ཆུ་འདོན་ཞིང་། དེ་ཤིང་ཆང་བཟོ་བྱེད་ཡིན། རྒྱ་གར་ལྷོ་ཕྱོགས་སོགས་སུ་སྡོང་པོ་ལ་རྫ་ཁོག་མང་པོ་བཏགས་པ་མཐོང་རྒྱུ་ཡོད་པ་དེ་རྒྱུ་མཚན་དེ་ཡིན། རྒྱ་གར་ལྷོ་ཕྱོགས་ལ་ཆེར་མང་། ཁོང་ཚོའི་ཡུལ་སྐད་ལ་ཤིང་འདིའི་མིང་ལ་ “ཏལ” ཟེར། 4 བེ་ཏ་ནི་རྩྭ་འཇག་མའི་མིང་དུ། རྗེའི་འགྲེལ་པ་བཞི་སྦྲགས་ན་གསལ། བྷཻ་ཏ་ཞེས་བྲིས་པའང་སྣང་།
|