From Rangjung Yeshe Wiki - Dharma Dictionary
Jump to navigation
Jump to search
| མ་ནིང་གི་གོ་འཕང༌
|
| Tibetan Definition
|
(སྔགས) ཟུང་འཇུག་གི་གོ་འཕང༌། མི་གནས་པའི་མྱང་འདས། སྒྲ་བཤད་ནི། ཉན་རང་གི་མྱང་འདས་ལྟ་བུ་ཤེས་རབ་དང་ལྡན་ཡང་ཐབས་སྙིང་རྗེ་ཆེན་པོ་དང་བྲལ་བ་ལྟ་བུ་མ་ཡིན་པར། ཐབས་ཤེས་གཉིས་ཀ་ཚོགས་པས་མ་ནིང་གི་གོ་འཕང་ཞེས་བྱ་སྟེ། དཔེར་ན་འཇིག་རྟེན་ན་མཚན་གཉིས་ཀ་རྟེན་གཅིག་ལ་མཉམ་དུ་ཚོགས་པ་ལ་མ་ནིང་ཞེས་བརྗོད་པ་བཞིན་ནོ། །མཁས་གྲུབ་རྗེའི་གསུང་ལ་གཞི་བྱས། གཞན་ཡང༌། གྲུབ་ཆེན་དྲིལ་བུའི་ཞབས་ཀྱི་གསུང་གུང་ཐང་རིན་པོ་ཆེའི་བསྟོད་པ་དོན་ལྡན་མའི་འགྲེལ་པར༡༩༢དྲངས་པ་ལས། འདི་ནི་ངོ་བོ་ཉིད་ཀྱི་སྐུ། །མ་ནིང་ཞེས་བྱར་བརྗོད་པ་སྟེ། །འགའ་ཞིག་ཏུ་ནི་ཟུང་འཇུག་ཅེས། །ཞེས་འདུས་པ་སོགས་སུ་ཟུང་འཇུག་གི་མིང་གིས་བཏགས་ལ། འདིར་མ་ནིང་གི་གོ་འཕང་ཞེས་བཏགས་པ་སྟེ། དེའང་ཕ་མའི་རྒྱུད་དུ་འབྱེད་ཚུལ་བཞིན། ཕར་འཇོག་བྱེད་སྒྱུ་མའི་སྐུ་དང༌། མར་འཇོག་བྱེད་བདེ་སྟོང་གི་ཡེ་ཤེས་རེ་རེ་བ་ཙམ་མ་ཡིན་པར་གཉིས་ཀའི་དོན་ཚང་བ་ལ་མ་ནིང་དུ་བཤད་པའི་ཕྱིར། ཞེས་གསུངས་པ་ལྟར་རོ། །
|