From Rangjung Yeshe Wiki - Dharma Dictionary
Jump to navigation
Jump to search
| མཚན་དང་དཔེ་བྱད་ཀྱི་ཁྱད་པར
|
| Tibetan Definition
|
(ཕར་ཕྱིན) མཚན་དང་དཔེ་བྱད་གཉིས་ཀྱི་ཁྱད་པར་ཡོད་དེ། མཚན་བཟང་རྣམས་གཙོ་བོ་དང༌། དཔེ་བྱད་རྣམས་འཁོར་ཡིན་པས་གཙོ་འཁོར་གྱི་ཁྱད་པར་ཡོད་པའི་ཕྱིར། གཙོ་འཁོར་དུ་འགྱུར་ཚུལ་ཡང་ཡོད་དེ། །སེན་མོ་ཟངས་མདོག་ནས་སོར་མོ་བྱིན་གྱིས་ཕྲ་བའི་བར་གྱི་དཔེ་བྱད་དྲུག་ནི། ཕྱག་སོར་རིང་བའི་མཚན་གྱི་འཁོར་དང༌། དབུ་རྒྱས་པ་དང༌། དབུ་སྐྲ་བུང་བ་ལྟར་གནག་ནས་དྲི་ཞིམ་པ་དང་ལྡན་པའི་བར་གྱི་དཔེ་བྱད་དྲུག་དང་བདུན་ནི། གཙུག་ཏོར་དང་སྤུ་གྱེན་དུ་ཕྱོགས་པ་དང༌། སྤུ་གཡས་སུ་འཁྱིལ་པའི་མཚན་གྱི་འཁོར་དང༌། དཔྲལ་བ་འབྱེས་པ་དང་དབྱེས་ཆེ་བ་གཉིས་དང་ཤངས་མཐོ་བ་དང་དག་པ་གཉིས་ཏེ་བརྒྱད་ཀྱི་དཔེ་བྱད་རྣམས་ནི་མཛོད་སྤུའི་མཚན་གྱི་འཁོར་དང༌། སྤྱན་ཡངས་སོགས་སྤྱན་གྱི་དཔེ་བྱད་བཞི། སྨིན་ཚུགས་རིང་བ་སོགས་བཞི་དང་བརྒྱད་ནི་སྤྱན་མཐོན་མཐིང་ལྟ་བུའི་མཚན་གྱི་འཁོར་དང༌། རྫི་མ་སྟུག་པའི་དཔེ་བྱད་ནི་རྫི་མ་བའི་རྫི་མ་ལྟ་བུའི་མཚན་གྱི་འཁོར་དང༌། གཟིགས་པ་སྒྲིབ་མེད་དག་པ་ལ་སྤྱན་མཛེས་པར་འཛུམ་པ་ཞེས་ཟེར་རོ། །སྙན་མཉམ་སོགས་གཉིས་ཀྱི་དཔེ་བྱད་ནི་འགྲམ་པ་སེང་གེའི་འདྲ་བའི་འཁོར་དང༌། ཞལ་ཧ་ཅང་མི་རིང་བ་སོགས་གཉིས་དང༌། ལྗགས་མཉེན་སོགས་གསུམ་སྟེ་ལྔ་ནི་ལྗགས་རིང་བ་དང་རོ་བྲོ་བའི་མཆོག་མཁྱེན་པ་གཉིས་ཀྱི་འཁོར་དང༌། གསུང་འབྲུག་གི་སྒྲ་དང༌། འཇམ་མཉེན་རྣམས་ཚངས་དབྱངས་ཀྱི་འཁོར་དང༌། མཆེ་བ་ཟླུམ་པ་སོགས་མཆེ་བའི་ལྔ་ནི་ཤིན་ཏུ་དཀར་པ་སོགས་ཚེམས་ཀྱི་མཚན་བཞིའི་འཁོར་དང༌། རྩ་མི་མངོན་པ་དང༌། མདུད་པ་མེད་པ། ལོང་བུ་མི་མངོན་པ། སྐུ་གཞོན་ཤ་ཅན། ཕྱག་འཇམ་པ་ཕྱག་རིས་ཀྱི་གསུམ་སྟེ་བརྒྱད་ནི། ཕྱག་ཞབས་འཇམ་ཞིང་གཞོན་ཤ་ཆགས་པ་དང་ཞབས་ལོང་མི་མངོན་པའི་འཁོར་དང༌། ཞབས་མཉམ་པ་ནི་བྱིན་པ་ཨེནྱའི་འདྲ་བ་དང༌། རུས་སྦལ་ཞབས་ཀྱི་འཁོར་དང༌། སེང་གེ་སོགས་གཤེགས་སྟབས་བདུན་དང་གོམ་སྙོམས་དང་བརྒྱད་ནི་སོར་མོ་དྲ་བས་འབྲེལ་བ་དང་རྟིང་པ་ཡངས་པ་གཉིས་ཀྱི་འཁོར་དང༌། སྐུ་འཁྲིལ་བག་ཆགས་པ་ནས། དག་པའི་བར་བདུན་དང༌། མཚན་རྫོགས་པ། ཁོ་ལག་ཡངས་པ། སྐུ་མ་ཞུམ་པ་སོགས་གསུམ་དང༌། ཡན་ལག་རྣམ་འབྱེས་སྐུ་ཟླུམ་པ་ནས། ཕྱལ་ཕྱང་ངེ་བའི་བར་བཞི་དང༌། ཀུན་ནས་ལྟ་ན་སྡུག་པ་ནས། སྨེ་བ་གནག་བག་མེད་པའི་བར་གསུམ་སྟེ་བཅུ་དགུ་ནི། སྐུ་ཆེ་ཞིང་དྲང་བ་བདུན་མཐོ་བ། གསེར་མདོག་འདྲ་བ། ལྤགས་པ་སྲབ་པ། དཔུང་མགོ་ཟླུམ་པ་ཐལ་གོང་རྒྱས་པ། རོ་སྟོད་སེང་གེ་འདྲ་བ་ཆུ་ཞེང་གབ་པ་རྣམས་ཀྱི་འཁོར་དང༌། ལྟེ་བ་ཟབ་པ་དང༌། གཡས་སུ་འཁྱིལ་པ་གཉིས་གསང་གནས་སྤུབས་སུ་ནུབ་པའི་འཁོར་དང༌། ཕྱག་རིང་ཞིང་རྒྱས་པ། ཕྱག་རིང་ཞིང་མཛེས་པའི་འཁོར་དང༌། དཔལ་བེའུ་དང་བཀྲ་ཤིས་ཉ་གཡུང་དྲུང་འཁྱིལ་པ་སོགས་ནི་འཁོར་ལོའི་མཚན་དང་དྲ་བས་འབྲེལ་བའི་འཁོར་ཡིན་པའི་ཕྱིར། ཞེས་སེ་ར་རྗེ་བཙུན་ཆོས་ཀྱི་རྒྱལ་མཚན་གྱི་སྐབས་བརྒྱད་པའི་སྤྱི་དོན་རོལ་མཚོ་ལས་འབྱུང་བ་ལྟར་རོ། །མཚན་དང་དཔེ་བྱད་ཀྱི་གོ་དོན་རང་རང་གི་ཐད་དུ་གཟིགས།
|