From Rangjung Yeshe Wiki - Dharma Dictionary
Jump to navigation
Jump to search
| མིང་རིགས
|
| Tibetan Definition
|
(འདུལ་བ) མདོ་རྩ་བ་ལས། མིང་དང་རིགས་དང་ལྡན་པར་བརྗོད་ན་ལྟུང་བ་ལས་སོ། །ཞེས་དང་། གཞན་ཡང་དགེ་འདུན་ལྷག་མ་དང་། ལྟུང་བྱེད། སོར་བཤགས་བཅས་ཀྱི་མཚན་ཉིད་ཀྱི་ཟུར་དུ། མིང་རིགས་བརྗོད་པས་ཚུལ་བཞིན་དུ་ཕྱིར་བཅོས་ན་འདག་ཏུ་རུང་བ་ཞེས་འབྱུང་བའི་མིང་རིགས་ཀྱི་གོ་དོན་གང་ཡིན་ནམ་ཞེ་ན། མིང་ནི་སྡེ་ཚན་གྱི་དོན་ཡིན་ལ། རིགས་ནི་སྡེ་ཚན་དེའི་བྱེ་བྲག་ལ་ཟེར་རོ། །དཔེར་ན་ཁུ་བ་འབྱིན་པའི་ལྷག་མ་ལྟ་བུ་ཞིག་ཕྱིར་བཅོས་བྱེད་ཚེ། མིང་ནི་ལྷག་མའི་སྡེ་ཚན་ལས་ཞེས་པ་དེ་ཡིན་ལ། རིགས་ནི་དེའི་ནང་ཚན་ཁུ་བ་འབྱིན་པའི་ལྷག་མ་ཞེས་པ་དེ་ཡིན་ནོ། །ཕལ་སྐད་དུ་གོ་བདེ་བར་བཤད་ན། ང་ལ་ལྷག་མ་བྱུང་སོང་ཞེས་པ་ལྟ་བུ་ལྟུང་བ་སྡེ་ལྔའི་ནང་ནས་ལྷག་མའི་སྡེ་ཚན་གྱི་མིང་བརྗོད་པ་ཡིན། ལྷག་མའི་སྡེ་ཚན་གྱི་ནང་ནས་ཁུ་བ་འབྱིན་པའི་ལྷག་མ་བྱུང་སོང་ཞེས་བརྗོད་ཚེ། སྡེ་ཚན་དེའི་རིགས་སམ་བྱེ་བྲག་ཁུ་བ་འབྱིན་པའི་ལྷག་མ་དམིགས་སུ་བཀར་ནས་བརྗོད་པ་ལྟ་བུའི་དོན་ནོ། །དེ་ཡང་སློབ་དཔོན་ཡོན་ཏན་གྱི་འོད་ཀྱི་མདོ་རྩའི་རང་འགྲེལ་རང་གི་རྣམ་བཤད་ལས། འདིར་མིང་ནི་ལྟུང་བྱེད་ཀྱི་སྡེ་ཚན་ལས་མིང་ངོ། །བྱུང་བ་ནི་རིགས་སོ་ཞེས་བྱ་བ་སྨོས་ཏེ། འདིར་ལྟུང་བ་ལས་ལྡང་བ་ལ་སྡེ་ཚན་ལ་བརྟེན་ནས་མིང་དུ་གྲགས་པ་གང་ཡིན་པ་དེ་ནི་མིང་དུ་ཤེས་པར་བྱའོ། །དེ་བས་ན་ཕམ་པར་འགྱུར་བ་དང་དགེ་སློང་ལྷག་མར་ཞེས་བྱ་བ་ལ་སོགས་པས་སོ། །བསམས་བཞིན་དུ་ཁུ་བ་འབྱིན་པ་ལ་སོགས་པ་བྱུང་བ་གང་ཡིན་པ་དེ་ནི་རིགས་ཡིན་པར་ཤེས་པར་བྱའོ། །དགེ་ལུགས་པའི་བླ་མ་རྣམས་ཀྱི་འདུལ་འགྲེལ་དང་། ཀརྨ་པ་མི་བསྐྱོད་རྡོ་རྗེའི་འདུལ་ཊཱིཀ་རྣམས་སུའང་དེ་བཞིན་དུ་གསལ་ལོ། །
|