From Rangjung Yeshe Wiki - Dharma Dictionary
Jump to navigation
Jump to search
| མུ་སྟེགས་པ
|
| Tibetan Definition
|
ཕྱི་རོལ་པ། གཞན་སྡེ། མུ་སྟེགས་པ། མུ་སྟེགས་བྱེད། ཆོས་འདི་པ་མ་ཡིན་པ་རྣམས་དོན་གཅིག སློབ་དཔོན་ཡོན་ཏན་འོད་ཀྱིས་མཛད་པའི་གྲགས་པའི་འགྲེལ་ཆུང་ལས་ནི་མུ་སྟེགས་པ་ལ། མུར་འདུག་པ་ཞེས་ཐ་སྙད་གསུངས་ཡོད། སྒྲ་བཤད་ནི། མུ་ནི་མཐའི་དོན་ཡིན་པས། དབང་ཕྱུག་དང་ཁྱབ་འཇུག་སོགས་ཀྱི་གྲུབ་པའི་མཐའ་ནི་མུ་ཡིན་ལ། དེ་ལ་བརྟེན་པའམ་སྟེགས་འཆའ་བས་ན་སྟེགས་ཞེས་བྱའོ། །རིན་ཆེན་ཕྲེང་བའི་རྒྱ་ཆེར་བཤད་པ་༡༥༧ན༤ལས། ལྷ་ཁྱབ་འཇུག་དང་ལྷ་ཆེན་པོ་ལ་སོགས་པས་བཤད་པའི་གྲུབ་པའི་མཐའ་ནི་མུའོ། །དེ་ལ་བརྟེན་པས་ན་མུ་སྟེགས་སོ། །ཞེས་གསུངས་པ་ལྟར་རོ། །ཁྱད་པར་འཕགས་བསྟོད་ཀྱི་འགྲེལ་པ་ལས། མུ་སྟེགས་ནི་ཐར་པ་དང༌། མཐོ་རིས་ཀྱི་ལམ་སྟེ། དེ་སྟོན་པར་བྱེད་པའི་བསྟན་བཅོས་ལ་མུ་སྟེགས་ཞེས་བྱ་ལ། དེ་བྱེད་པས་ན་མུ་སྟེགས་བྱེད་དོ། །ཞེས་རང་རང་གི་ཐར་པ་དང་མཐོ་རིས་ཀྱི་ལམ་མམ་འཇུག་ངོགས་སམ་ཐབས་སུ་འདུ་ཤེས་པའི་ཚུལ་དེ་སྟོན་པའི་བསྟན་བཅོས་འཛིན་པ་དང་སྤེལ་བ་ལ་མུ་སྟེགས་བྱེད་དུ་སྒྲ་བཤད་པ་ཡིན་གྱི་ཁྱབ་པ་ནི་མ་ཡིན་ནོ། །ཞེས་ལྕང་སྐྱ་རིན་པོ་ཆེའི་གྲུབ་མཐར་གསལ། དབྱངས་ཅན་དགའ་བློའི་ལམ་རིམ་བརྡ་བཀྲོལ་ལས། མུ་ནི་མཐའ་ལ་འཇུག་པས་འཁོར་བའི་མཐའ་ཐར་པ་དང་། སྟེགས་ནི་ཐར་པ་དེར་འཛེག་པའི་རྐང་སྟེགས་ལྟ་བུ་ཐབས་སམ་ལམ་སྟེ། རང་ངོར་ཐར་པ་དང་མཐོ་རིས་འཐོབ་པའི་ཐབས་སུ་འདུ་ཤེས་པའི་ལམ་ལ་མུ་སྟེགས་ཞེས་བྱ་ལ། དེ་སྟོན་པའི་བསྟན་བཅོས་འཛིན་ཅིང་སྤེལ་བར་བྱེད་པས་ན་མུ་སྟེགས་བྱེད་དམ་མུ་སྟེགས་ཅན་ཟེར། ཞེས་གསུངས་སོ། །ས་སྐྱ་པའི་མཁས་པ་ཀློ་བོ་མཁན་ཆེན་བསོད་ནམས་ལྷུན་གྲུབ་ཀྱི་རིགས་གཏེར་གྱི་ཕྱོགས་སྔ་རྣམ་པར་བཤད་པ་ཞེས་བྱ་བ་ལས་ཀྱང་དེ་དང་འདྲ་བར་གསུངས། བཟང་སྤྱོད་འགྲེལ་པ་ལོ་ཆེན་ཡེ་ཤེས་སྡེས་མཛད་པ་ལས། མུ་སྟེགས་ནི། དཔེར་ན་ཆུའི་རྫིང་བུའམ་མཚེའུར་འཇུག་པའི་མུར་ཐེམ་པ་བྱས་པ་ལྟ་བུའམ་རབ་བརྒལ་བའི་རབ་ཁ་བདེ་བ་ལ་མུ་སྟེགས་ཞེས་བྱའོ། །དེ་བཞིན་མྱ་ངན་ལས་འདས་པའི་མཚོར་འཇུག་པའི་མུ་སྟེགས་དང༌། འཁོར་བའི་ཆུ་བོ་ལས་བརྒལ་བའི་ཐབས་ལམ་གྱི་རབ་ཁ་ལ་མུ་སྟེགས་ཞེས་བྱ་སྟེ། གང་སུ་དག་ལ་ལམ་དེ་ཡོད་ཅིང་དེ་སྤྱོད་ན་དེ་དག་ནི་མུ་སྟེགས་ཅན་ནོ། །ཞེས་གསུངས། ཡང་ན་ལྟ་བ་ངན་པའི་མུར་སྟེགས་འཆའ་བས་ན་མུ་སྟེགས་ཞེས་ཀུན་མཁྱེན་འཇིགས་མེད་དབང་པོ་དང༌། ཐུའུ་བཀྭན་བློ་བཟང་ཆོས་ཀྱི་ཉི་མ་གསུང༌། འདི་སྐོར་རྒྱས་པ་རྗེ་གུང་ཐང་པའི་བསྟན་འབར་མའི་རྣམ་བཤད་དུ་བལྟ་བར་བྱའོ། །མུ་སྟེགས་པའི་མཚན་ཉིད་དང་སྒྲ་བཤད་སོགས་གོང་དང་འདྲ་བར་ཀོང་སྤྲུལ་ཡོན་ཏན་རྒྱ་མཚོའི་ཤེས་བྱ་མཛོད་འགྲེལ་གླེགས་བམ་བར་ཆ་༣༣༣ནའང་གསལ།
|