From Rangjung Yeshe Wiki - Dharma Dictionary
Jump to navigation
Jump to search
| ཚོགས་ཞིང༌
|
| Tibetan Definition
|
སྐྱབས་ཡུལ། སྐྱབས་ཡུལ་གྱི་འདུས་ཚོགས། སྒྲ་བཤད་ནི། ཚོགས་གསོག་པའི་ཞིང་སྟེ་ཡུལ་ཡིན་པས་ན་ཚོགས་ཞིང་ཟེར་ཏེ། རྗེའི་ལམ་རིམ་ཆེན་མོ་ལས། མདུན་གྱི་ནམ་མཁའ་ལ་རྒྱ་ཆེན་སྤྱོད་པ་དང་ཟབ་མོ་ལྟ་བའི་བརྒྱུད་པའི་བླ་མ་རྣམས་དང་གཞན་ཡང་སངས་རྒྱས་དང་བྱང་ཆུབ་སེམས་དཔའ་འཕགས་པ་ཉན་ཐོས་དང་རང་སངས་རྒྱས་བཀའ་སྡོད་དང་བཅས་པ་དཔག་ཏུ་མེད་པ་བཞུགས་པར་བསམས་ཏེ་ཚོགས་གསོག་པའི་ཞིང་གསལ་གདབ། ཅེས་གསུངས་སོ། །དེ་ཡང་འཇིག་རྟེན་ན་ཞིང་ས་ལ་བརྟེན་ནས་ལོ་ཏོག་ཕུན་སུམ་ཚོགས་པ་འབྱུང་བའི་དཔེ་ལྟར། འདིར་ཡང་ཚོགས་ཞིང་གི་སྐྱབས་ཡུལ་དེ་དག་ལས་བདེ་ལེགས་ཀྱི་ལོ་ཏོག་ཕུན་སུམ་ཚོགས་པ་འབྱུང་བའི་རྒྱུ་མཚན་གྱིས་དེ་ལ་ཞིང་གི་ཐ་སྙད་བྱེད་པ་ཡིན། ཡང་ན་སྐྱབས་ཡུལ་མང་པོ་འདུས་པས་ན་ཚོགས་དང་། ཕྱག་མཆོད་དང་བསོད་ནམས་གསོག་པའི་ཡུལ་ཡིན་པས་ཞིང་ཞེས་བརྗོད་དོ། །པཎ་ཆེ་དཔལ་ལྡན་ཡེ་ཤེས་ཀྱི་ལམ་རིམ་ཟིན་བྲིས་༣བ༦ལས། སྤྱིར་ཚོགས་ཞིང་གི་དོན། ཚོགས་ཡང་ཡིན། ཞིང་ཡང་ཡིན་པ་ལ་ཚོགས་ཞིང་གི་དོན་བྱེད་པ་ཅིག་དང་། བསོད་ནམས་དང་ཡེ་ཤེས་ཀྱི་ཚོགས་གཉིས་འབྱུང་བའི་ཞིང་ས་ལྟ་བུ་ཡིན་པས་ན་ཚོགས་ཞིང་ཞེས་བརྗོད་པའི་ལུགས་གཉིས་གསུངས། ཞེས་འབྱུང་བ་ལྟར་རོ། །
|