From Rangjung Yeshe Wiki - Dharma Dictionary
Jump to navigation
Jump to search
| ཞི་བྱེད
|
| Tibetan Definition
|
སྤྱི་ལོའི་དུས་རབས་བཅུ་གཉིས་པའི་འགོར་ཕ་དམ་པ་སངས་རྒྱས་ཀྱིས་སྲོད་བཏོད་པའི་ཤེར་ཕྱིན་ཉམས་ལེན་གྱིས་སྲིད་ཞིའི་སྡུག་བསྔལ་ལམ་སྐྱོན་ཐམས་ཅད་ཞི་བར་བྱེད་པའི་བོད་ཀྱི་ཆོས་ལུགས་གྲུབ་མཐའ་ཞིག སྒྲ་བཤད་ནི། ཆོས་འདིས་ཚེ་རབས་སྔ་མའི་ལས་དབང་གིས་ཚེ་འདིར་ལུས་དམན་པར་གྱུར་པ་དང༌། ནད་བུ་ཅན་དང༌། དབུལ་ཕོངས་དང༌། མི་མ་ཡིན་པས་གཙེས་པ་དག་གི་སྡུག་བསྔལ་རྣམས་འཕྲལ་དུ་ཞི་བར་བྱེད་ནས་རྣལ་འབྱོར་ལ་སྦྱོར་བར་བྱེད་པས་དམ་ཆོས་སྡུག་བསྔལ་ཞི་བྱེད་ཅེས་མིང་དུ་ཐོགས་སོ། །ཞི་བྱེད་ཀྱི་སྙིང་པོར་གྱུར་པ་ནི། ཤེས་རབ་ཀྱི་ཕ་རོལ་ཏུ་ཕྱིན་པ་ཡུམ་རྒྱས་འབྲིང་བསྡུས་གསུམ་གྱི་དོན་མ་ལུས་པ་ཉམས་སུ་ལེན་པའི་མན་ངག་ཀུན་ལ་མ་གྲགས་པའི་ཁྱད་ཆོས་ཤེས་རབ་ཀྱི་ཕ་རོལ་ཏུ་ཕྱིན་པའི་ལམ་གྱི་རིམ་པ་ཞེས་བྱ་བ་འདི་ཉིད་ཡིན་ནོ། །གཅོད་ཀྱི་གདམས་པའང་ཞི་བྱེད་པའི་ཆོས་ཚན་ཞིག་ཡིན་པར་བཤད་དོ། །
|