From Rangjung Yeshe Wiki - Dharma Dictionary
Jump to navigation
Jump to search
| ཞི་ལྷག་གཉིས་ཀ་དགོས་པའི་རྒྱུ་མཚན
|
| Tibetan Definition
|
དེའི་རྒྱུ་མཚན་ནི། དཔེར་ན་མཚན་མོ་ལོགས་རིས་བལྟ་བའི་དོན་དུ་མར་མེ་སྦར་བ་ན་མར་མེ་ཤིན་ཏུ་གསལ་བ་དང༌། རླུང་གིས་མི་གཡོ་བ་གཉིས་དང་ལྡན་ན་བྲིས་སྐུ་རྣམས་ཤིན་ཏུ་གསལ་བར་མཐོང་ལ། མར་མེ་མི་གསལ་བའམ། གསལ་ཡང་རླུང་གིས་བསྐྱོད་ན་གཟུགས་རྣམས་གསལ་བར་མི་མཐོང་བ་བཞིན་དུ། ཟབ་མོའི་དོན་ལྟ་བ་ལ་ཡང་དེ་ཁོ་ན་ཉིད་ཀྱི་དོན་ཕྱིན་ཅི་མ་ལོག་པར་ངེས་པའི་ཤེས་རབ་དང༌། སེམས་དམིགས་པ་ལ་ཇི་ལྟར་འདོད་པ་བཞིན་དུ་གནས་པའི་མི་གཡོ་བ་གཉིས་དང་ལྡན་ན་དེ་ཁོ་ན་ཉིད་གསལ་བར་མཐོང་གི་སེམས་གཞན་དུ་མི་འཕྲོ་བར་གནས་པའི་མི་རྟོག་པའི་ཏིང་ངེ་འཛིན་ཡོད་ཀྱང་ཡིན་ལུགས་རྟོགས་པའི་ཤེས་རབ་མེད་ན་ཏིང་ངེ་འཛིན་ལ་ཇི་ཙམ་གོམས་ཀྱང༌། ཡིན་ལུགས་རྟོགས་པ་མི་སྲིད་ལ། བདག་མེད་ཁོང་དུ་ཆུད་པའི་ལྟ་བ་ཡོད་ཀྱང་སེམས་རྩེ་གཅིག་པའི་གནས་པ་བརྟན་པའི་ཏིང་ངེ་འཛིན་མེད་ན། ཡིན་ལུགས་ཀྱི་དོན་གསལ་བར་མཐོང་བ་མི་སྲིད་པའི་ཕྱིར། ཞེས་རྗེའི་ལམ་རིམ་ཆེ་ཆུང་དུ་གསལ་བ་ལྟར་རོ། །དེ་ཡང་དོན་བསྡུ་ན། ལོགས་རིས་ནི་སྟོང་པ་ཉིད། མར་མེའི་གསལ་ཆ་ནི་ལྷག་མཐོང༌། རླུང་གིས་མི་གཡོ་བ་ནི་ཞི་གནས་ཏེ། ལོགས་རིས་ཀྱི་སྟོང་ཉིད་གསལ་བར་རྟོགས་པ་ལ། ལྷག་མཐོང་གི་མར་མེའི་གསལ་ཆ་དང༌། ཞི་གནས་ཀྱི་མི་གཡོ་བ་གཉིས་ཀ་དང་ལྡན་པ་དགོས་སོ། །ཞེས་བྱ་བའི་དོན་ནོ། །འདི་ཡང་ལམ་རིམ་དུ་ཡུལ་སྟོང་ཉིད་ལ་སྦྱར་ནས་གསུངས་པ་གཞན་ལའང་སྦྱོར་ཚུལ་ཤེས་པར་བྱའོ། །
|