From Rangjung Yeshe Wiki - Dharma Dictionary
Jump to navigation
Jump to search
| འཆགས་པའི་བསྐལ་པ
|
| Tibetan Definition
|
(མཛོད) འཆགས་པའི་བསྐལ་པ་ནི། མེས་ཞིག་ནས་སྟོངས་པའི་དབང་དུ་བྱས་ན། མེས་སྟོངས་པའི་རྗེས་ལ་བསམ་གཏན་དང་པོའི་འོག་གཞིའི་རླུང་གི་དཀྱིལ་འཁོར་འཆགས་པ་ནས་བརྩམས་ཏེ་དམྱལ་བ་མནར་མེད་པར་སེམས་ཅན་གཅིག་སྲིད་པའི་བར་ཀྱི་དུས་ཡུན་ལ། འཆགས་པའི་བསྐལ་པ་ཟེར། སྣོད་འཆགས་པ་ལ་བར་བསྐལ་གཅིག་དང་། སེམས་ཅན་འཆགས་པ་ལ་བར་བསྐལ་བཅུ་དགུ་སྟེ་བསྡོམས་འཆགས་པའི་བསྐལ་པ་ལ་བར་བསྐལ་ཉི་ཤུ་ཐོགས་སོ། །ཐ་མར་འཇིག་པ་གང་ཡིན་པ་དེ་ནི་དང་པོར་འཆགས་པ་ཡིན། མཛོད་རྩ་བ་ལས། འཆགས་པ་(བསམ་གཏན)དང་པོའི་རླུང་ནས་ནི། །དམྱལ་བའི་སྲིད་པའི་བར་དུའོ། །མཛོད་རང་འགྲེལ་ལས། འཆགས་པ་དང་པོའི་རླུང་ནི་དམྱལ་བ་སྲིད་པའི་བར་དུའོ། །དང་པོའི་རླུང་ནས་བཟུང་སྟེ་དམྱལ་བ་དག་ནས་སེམས་ཅན་སྲིད་པའི་བར་ཏེ། དེ་ལྟར་འཇིག་རྟེན་ཞིག་པ་ནི་ནམ་མཁའ་ཙམ་ལུས་པར་ཡུན་རིང་དུ་གནས་སོ། །ཡང་རིམ་གྱིས་སེམས་ཅན་རྣམས་ཀྱི་ལས་ཀྱི་དབང་གིས་ནམ་མཁའ་ལ་སྣོད་རྣམས་ཀྱི་སྔ་ལྟས་སུ་གྱུར་པ་རླུང་འཇམ་པོ་འཇམ་པོ་དག་ལྡང་སྟེ། དེའི་ཚེ་འཇིག་རྟེན་འདི་ཞིག་ནས་བར་གྱི་བསྐལ་པ་ཉི་ཤུར་འདུག་པ་གང་ཡིན་པ་དེ་ལས་ནི་ངེས་པར་འབྱུང་བ་ཞེས་བརྗོད་པར་བྱ་ལ། བར་གྱི་བསྐལ་པ་ཉི་ཤུར་འཆགས་པར་འགྱུར་བ་གང་ཡིན་པ་དེ་ནི་ཉེ་བར་འོངས་པར་བརྗོད་པར་བྱའོ། །དེ་ནས་རླུང་དེ་དག་སྐྱེ་བ་ན་ཇི་སྐད་བཤད་པའི་རླུང་གི་དཀྱིལ་འཁོར་དུ་འགྱུར་རོ། །དེའི་འོག་ཏུ་རིམ་གྱིས་ཆུའི་དཀྱིལ་འཁོར་དང༌། གསེར་གྱི་རང་བཞིན་གྱི་ས་གཞི་ཆེན་པོ་དང༌། གླིང་རྣམས་དང༌། རི་རབ་ལ་སོགས་པ་ཇི་སྐད་བཤད་པའི་རིམ་པ་དང་ཚུལ་དུ་ཐམས་ཅད་འབྱུང་ངོ་། །དང་པོར་ནི་ཚངས་པའི་གཞལ་མེད་ཁང་འབྱུང་ངོ་། །དེའི་འོག་ཏུ་ནི་འཐབ་བྲལ་བའི་བར་དུ་འབྱུང་ངོ་། །དེའི་འོག་ཏུ་ནི་རླུང་གི་དཀྱིལ་འཁོར་ལ་སོགས་པ་སྟེ། དེ་ཙམ་གྱིས་ན་འདི་ལྟ་སྟེ་སྣོད་ཆགས་པས་འཇིག་རྟེན་འདི་ཆགས་པ་ཡིན་ནོ། །དེ་ནས་སེམས་ཅན་གང་ཡང་རུང་བ་ཞིག་འོད་གསལ་དག་ནས་ཤི་འཕོས་ནས་ཚངས་པའི་གཞལ་མེད་ཁང་སྟོང་པར་སྐྱེ་བར་འགྱུར་ལ། སེམས་ཅན་གཞན་དག་ཀྱང་དེ་ནས་ཤི་འཕོས་ནས་ཚངས་པའི་མདུན་ན་འདོན་དག་ཏུ་སྐྱེ་བར་འགྱུར་རོ། །དེའི་འོག་ཏུ་ཚངས་རིས་དག་དང༌། གཞན་འཕྲུལ་དབང་བྱེད་དག་དང༌། འཕྲུལ་དགའ་དག་ནས་རིམ་གྱིས་བྱང་གི་སྒྲ་མི་སྙན་པ་དང༌། བ་ལང་སྤྱོད་དང༌། ཤར་གྱི་ལུས་འཕགས་པོ་དང༌། འཛམ་བུའི་གླིང་དང༌། ཡི་དགས་རྣམས་དང༌། དུད་འགྲོ་རྣམས་དང༌། དམྱལ་བ་དག་གི་ནང་དུ་སྐྱེ་བར་འགྱུར་ཏེ། གང་མཇུག་ཏུ་འཇིག་པ་དེ་དང་པོར་འཆགས་པ་འདི་ནི་ཆོས་ཉིད་ཡིན་ནོ། །གང་གི་ཚེ་དམྱལ་བ་དག་ན་སེམས་ཅན་འགའ་ཞིག་སྐྱེས་པར་གྱུར་པ་དེའི་ཚེ་འཇིག་རྟེན་འདི་བར་གྱི་བསྐལ་པ་ཉི་ཤུར་འཆགས་པ་གང་ཡིན་པ་དེ་ལས་ནི་ངེས་པར་འབྱུང་བ་ཡིན་ལ། ཆགས་ནས་བར་གྱི་བསྐལ་པ་ཉི་ཤུར་འདུག་པར་འགྱུར་བ་གང་ཡིན་པ་དེ་ནི་ཉེ་བར་འོངས་པ་ཡིན་ནོ། །ཞེས་གསུངས་སོ། ། བོད་རྒྱ་ཚིག་མཛོད་ཆེན་མོར། ཆགས་པའི་བསྐལ་པ་ཞེས་བྲིས་ཀྱང་། འཆགས་པ་བསྐལ་པ་ཞེས་བྲིས་ན་ཡི་གེ་དག་པར་སེམས་ཏེ། མཛོད་རྩ་འགྲེལ་དང་མཆིམས་མཛོད་སོགས་གཞུང་ཁུངས་མ་ཕལ་མོ་ཆེར། འཆགས་པའི་བསྐལ་པ་ཞེས་འས་འཕུལ་སྣང་བའི་ཕྱིར་རོ། །
|