From Rangjung Yeshe Wiki - Dharma Dictionary
Jump to navigation
Jump to search
| འཆི་བ་ཆོས་སྐུའི་ལམ་འཁྱེར
|
| Tibetan Definition
|
རང་དང་དཀྱིལ་འཁོར་གྱི་ལྷ་རྣམས་སྟོང་པར་སྦྱངས་ནས་དེ་ལ་རྩེ་གཅིག་ཏུ་མཉམ་པར་བཞག་པ་ལ་ཟེར། རྗེའི་གསང་འདུས་བསྐྱེད་རིམ་བློ་གསལ་བུང་བའི་རེ་སྐོང་གནད་དོན་གསལ་བ་ལས། སྤྱི་བོ་ལ་སོགས་པའི་གནས་སུ་གཟུགས་ཕུང་ལ་སོགས་པའི་ལུས་ཀྱི་ཆ་ཤས་རྣམས་དང༌། རྣམ་སྣང་ལ་སོགས་པའི་ལྷའི་འཁོར་ལོའི་ངོ་བོ་དབྱེར་མེད་དུ་བྱས་ན། གནས་དེ་དང་དེར་བདེ་སྟོང་དབྱེར་མེད་ཀྱི་འོད་གསལ་ཐིམ་པར་བསྒོམ། དེ་ནས་གཙོ་བོ་ཡང་འོད་གསལ་དུ་ཐིམ་པ་ལས་བྱུང་བའི་བདེ་སྟོང་སྦྱར་ནས་བསྒོམས་ཏེ། ཤཱུནྱ་ཏཱའི་སྔགས་བརྗོད་ནས། ཡུལ་སྟོང་པ་ཉིད་དང༌། ཡུལ་ཅན་ཡེ་ཤེས་དབྱེར་མེད་པའི་ཡེ་ཤེས་ཀྱི་བདག་ཉིད་དེ་ངའོ་སྙམ་པའི་ང་རྒྱལ་ལ་སློབ་པར་བྱེད་པ་ནི། བསྐྱེད་རིམ་པའི་འཆི་བ་ཆོས་སྐུར་འཁྱེར་བའི་ལམ་འཁྱེར་ཡིན་ལ། དེ་ལ་ནི་འཆི་བ་ཆོས་སྐུར་འཁྱེར་བའི་ལམ་འཁྱེར་དང༌། དེ་བཞིན་ཉིད་ལས་བྱང་ཆུབ་པ་དང༌། ལྷག་མོས་འོད་གསལ་དུ་སྡུད་པའི་དེ་ཉིད་དང༌། དོན་དམ་པའི་དཀྱིལ་འཁོར་ཅེས་བྱའོ། །འོ་ན་བསྐྱེད་རིམ་པའི་ཆོས་སྐུས་འཆི་བ་སྦྱོང་བའི་ཚུལ་ཇི་ལྟར་ཡིན་སྙམ་ན། ཐ་མལ་པའི་འཆི་བ་རང་དགའ་བ་འབྱུང་བའི་དོད་ལ། རྣལ་འབྱོར་པ་ལ་ལྷག་མོས་འོད་གསལ་དུ་བསྡུས་པའི་ཆོས་སྐུ་འབྱུང་བ་སྟེ། བསྐྱེད་རིམ་པའི་ཆོས་སྐུས་འཆི་བ་སྦྱོང་བའི་ཚུལ་ཡིན་ནོ། །འོ་ན་དེས་རྫོགས་རིམ་པའི་རྒྱུད་གང་སྨིན་པར་བྱེད་སྙམ་ན། ལུས་དབེན་དང་ངག་དབེན་གྱི་སྐབས་ཀྱི་དཔེའི་འོད་གསལ་དང༌། འཆི་བ་དངོས་གནས་པ་སྦྱོང་བར་བྱེད་པའི་སེམས་དབེན་དང༌། སྒྱུ་ལུས་ཀྱི་སྐབས་ཀྱི་དཔེའི་འོད་གསལ་དང༌། རིམ་པ་བཞི་པ་དང༌། ལྔ་པའི་སྐབས་ཀྱི་དོན་གྱི་འོད་གསལ་རྣམས་ཀྱིས་རྒྱུད་སྨིན་པར་བྱེད་ཅིང༌། སྦྱངས་པའི་འབྲས་བུ་སངས་རྒྱས་ཀྱི་ཆོས་སྐུ་འགྲུབ་པར་བྱེད་དོ། །ཞེས་གསུངས།
|