From Rangjung Yeshe Wiki - Dharma Dictionary
Jump to navigation
Jump to search
| འཇིགས་པ་བརྒྱད
|
| Tibetan Definition
|
༡ ང་རྒྱལ་གྱི་འཇིགས་པ། ༢ གཏི་མུག་གི་འཇིགས་པ། ༣ ཞེ་སྡང་གི་འཇིགས་པ། ༤ ཕྲག་དོག་གི་འཇིགས་པ། ༥ ལྟ་ངན་གྱི་འཇིགས་པ། ༦ སེར་སྣའི་འཇིགས་པ། ༧ འདོད་ཆགས་ཀྱི་འཇིགས་པ། ༨ ཐེ་ཚོམ་གྱི་འཇིགས་པ་དང་བརྒྱད་དོ། །དེ་བརྒྱད་ལ། ༡ ང་རྒྱལ་སེངྒེའི་འཇིགས་པ། ༢ གཏི་མུག་གླང་པོའི་འཇིགས་པ། ༣ ཞེ་སྡང་མེ་ཡི་འཇིགས་པ། ༤ ཕྲག་དོག་སྦྲུལ་གྱི་འཇིགས་པ། ༥ ལྟ་ངན་རྐུན་པོའི་འཇིགས་པ། ༦ སེར་སྣ་ལྕགས་སྒྲོག་གི་འཇིགས་པ། ༧ འདོད་ཆགས་ཆུ་བོའི་འཇིགས་པ། ༨ ཐེ་ཚོམ་ཤ་ཟའི་འཇིགས་པ་ཞེས་ཀྱང་བྱའོ། །ལེགས་བྲིས་མ་ལས། འཇིག་ཚོགས་ལྟ་བའི་རི་སུལ་གནས་བཅས་ཏེ། །གཞན་ལས་མཆོག་ཏུ་འཛིན་པས་སེམས་ཁེངས་ཤིང༌། །ཕ་རོལ་ཁྱད་དུ་གསོད་པའི་སྦར་ཁྱིམ་ཅན། །ང་རྒྱལ་སེང་གེའི་འཇིགས་པ་བསྐྱབ་ཏུ་གསོལ། །དྲན་ཤེས་ལྕགས་ཀྱུ་རྣོན་པོས་མ་བརྟུལ་ཞིང༌། །འདོད་ཡོན་མྱོས་ཆུ་འཐུངས་པས་འཐོམས་པའི་མཐུས། །ལོག་པའི་ལམ་ཞུགས་གནོད་འཚེའི་མཆེ་བ་གཙིགས། །གཏི་མུག་གླང་པོའི་འཇིགས་པ་བསྐྱབ་ཏུ་གསོལ། །ཚུལ་མིན་ཡིད་བྱེད་རླུང་གིས་བསྐུལ་བ་ལས། །ཉེས་སྤྱོད་དུད་སྤྲིན་འཁྲུག་པའི་ཀློང་དཀྱིལ་ན། །དགེ་བའི་ནགས་ཚལ་སྲེག་པའི་ནུས་པ་ཅན། །ཞེ་སྡང་མེ་ཡི་འཇིགས་པ་བསྐྱབ་ཏུ་གསོལ། །མ་རིག་འཐིབས་པོའི་ཁུང་དུ་མངོན་ཞིན་ཅིང༌། །གཞན་འབྱོར་ཕུན་ཚོགས་མཐོང་ཚེ་མི་བཟོད་པར། །གདུག་པའི་དུག་གིས་མྱུར་དུ་ཁྱབ་བྱེད་པའི། །ཕྲག་དོག་སྤྲུལ་གྱི་འཇིགས་པ་བསྐྱབ་ཏུ་གསོལ། །བརྟུལ་ཞུགས་དམན་པའི་འབྲོག་དགོན་འཇིགས་རུང་དང༌། །རྟག་ཆད་མྱ་ངན་ཐང་ལ་རབ་རྒྱུ་ཞིང༌། །ཕན་བདེའི་གྲོང་དང་དགོན་པ་ཀུན་འཇོམས་པའི། །ལྟ་ངན་རྐུན་པོའི་འཇིགས་པ་བསྐྱབ་ཏུ་གསོལ། །མི་བཟད་སྲིད་པའི་བརྩོན་ཁང་ར་བ་རུ། །ལུས་ཅན་རང་དབང་མེད་པར་འཆིང་བྱེད་ཅིང༌། །སྲེད་པའི་སྒོ་ལྕགས་དབྱེ་དཀས་འཁྱུད་པ་ཡི། །སེར་སྣའི་ལྕགས་སྒྲོག་འཇིགས་པ་བསྐྱབ་ཏུ་གསོལ། །ཤིན་ཏུ་བརྒལ་དཀའ་སྲིད་པའི་རྒྱུན་ཕྱོགས་ཁྱེར། །ལས་རླུང་དྲག་པོའི་རྐྱེན་དང་ཉེ་བ་ལས། །སྐྱེ་རྒ་ན་འཆིའི་རྦ་ཀློང་རབ་འཁྲུག་པའི། །འདོད་ཆགས་ཆུ་བོའི་འཇིགས་པ་བསྐྱབ་ཏུ་གསོལ། །ཀུན་ཏུ་རྨོངས་པའི་མཁའ་ལ་རབ་རྒྱུ་ཞིང༌། །ངེས་པ་དོན་དུ་གཉེར་ལ་ལྷག་པར་འཚེ། །ཐར་བའི་སྲོག་ལ་རྒོལ་བའི་གདུག་པ་ཅན། །ཐེ་ཚོམ་ཤ་ཟའི་འཇིགས་པ་བསྐྱབ་ཏུ་གསོལ། །ཞེས་གསུངས་སོ། །
|