From Rangjung Yeshe Wiki - Dharma Dictionary
Jump to navigation
Jump to search
| འཐོབ་པར་ཤེས་པ
|
| Tibetan Definition
|
(འདུལ་བ) འཐོབ་པར་ཤེས་པ་ནི་སྡོམ་པ་ལེན་པའི་དུས་ན་བདག་གིས་སྡོམ་པ་འཐོབ་བོ་སྙམ་དུ་བསམ་པ་ལ་ཟེར། འདི་ནི་སོ་ཐར་གྱི་སྡོམ་པའི་རྒྱུའི་ཀུན་སློང་ལ། ལེན་འདོད་ཀྱི་བསམ་པ། འཐོབ་པར་ཤེས་པ། མྱང་འདས་ཀྱི་བསམ་པ་བརྟན་པོ་དང་གསུམ་ཡོད་པའི་ཡ་གྱལ་ལོ། །དེ་ཡན་ལག་ཏུ་དགོས་པར་གང་གིས་ཤེས་ན། ཞུ་བ་ལས། གང་ཟག་གསུམ་ནི་བསྙེན་པར་མ་རྫོགས་པ་ཡིན་ཏེ། བདག་ཉིད་ཀྱི་མིང་མི་བརྗོད་པ་དང། མཁན་པོའི་མིང་མི་བརྗོད་པ་དང། བདག་ཉིད་བསྙེན་པར་རྫོགས་པ་མི་ཤེས་པའོ་ཞེས་བླུན་ཞིང་གཏི་མུག་པས་འཐོབ་ཤེས་མེད་ན་སྡོམ་པ་མི་སྐྱེ་བར་གསུངས་སོ། །དང་པོ་སྡོམ་པ་འཐོབ་ཤེས་ཡོད་ན་དེ་ནས་འཐོབ་ཤེས་མངོན་གྱུར་དུ་མེད་ཀྱང་བདག་ལ་སྡོམ་པ་མི་སྐྱེའོ་སྙམ་པ་མེད་ན། རྒྱུ་རྐྱེན་གཞན་ཚང་ན་སྐྱེ་སྟེ། ཞུ་བ་ལས། གཉིད་ལོག་པ་བསྙེན་པར་རྫོགས་པར་བགྱིས་ན་བསྙེན་པར་རྫོགས་པ་ཞེས་བགྱིའམ། ཨུ་པ་ལི་ལུས་སམ་ཚིག་གིས་དམིགས་ལ། གསོལ་བ་དང་ལས་བྱེད་པའི་ཚེ་གཉིད་ལོག་ཀྱང་བསྙེན་པར་རྫོགས་པ་ཞེས་བྱའོ་ཇི་ལྟར་གཉིད་ལོག་པ་དེ་བཞིན་དུ་ར་རོ་བ་དང་སྙོམས་པར་ཞུགས་པ་རྣམས་ལ་ཡང་བརྗོད་པར་བྱའོ་ཞེས་གསུངས་པས་འགོག་པ་ལ་སྙོམས་པར་ཞུགས་པ་ལ་ཡང་སྡོམ་པ་སྐྱེ་བར་བསྟན་ཏོ། །ཞེས་གསུངས་སོ། །དོགས་གཅོད། ལུང་ཞུ་བའི་ཚིག་སྔ་ཕྱི་གཉིས་ནང་འགལ་ལྟ་བུར་སྣང་ན་དེ་ཇི་ལྟར་འགྲེལ་ཞེ་ན། དེ་ནི་སྐད་ཅིག་དང་པོར་སྡོམ་པ་འཐོབ་ཤེས་ཡོད་ཅིང་། དེ་ནས་གཉིད་ལོག་པ་སོགས་ཀྱི་གློ་བུར་གྱི་རྐྱེན་གཞན་བྱུང་ཡང་སྡོམ་པ་སྐྱེའོ། །ཞེས་པའི་དོན་ཡིན་པར་སེམས་སོ། །ད་དུང་དཔྱད་དོ། །
|