rje btsun sgam po pa’i phyag rgya chen po lam gcig chod

From the zab lam phyag rgya chen po dang nA ro chos drug gzhung gces pa rab tus pa nges don rin po che’i mdzod, gdams ngag mdzod, vol. JA (7), pp. 1-121:

[34a/5] rje btsun sgam po pa’i phyag rgya chen po lam gcig chod bzhugs so//

/rje btsun sgam po pa’i phyag rgya chen po lam gcig chod ’di la gsum ste/ gnas lugs kyi kho thag bcad pa/ yin lugs kyi ngo sprad pa dang/ de kho na nyid lam sbyangs pa’o/

dang po la lnga ste/

phyag rgya chen po la rgyu med/ phyag rgya chen po la rkyen med/ phyag rgya chen po la thabs med/ phyag rgya chen po la lam med/ phyag rgya chen po la ’bras bu med do/

gnyis pa yin lugs ngo sprad pa la lnga ste/

phyag rgya chen po la rgyu med de/ dad pa dang mos gus phyag rgya chen po’i rgyu yin/ phyag rgya chen po la rkyen med de/ bla ma dam pa phyag rgya chen po’i rkyen yin/ phyag rgya chen po la thabs med de/ bla ma bcos pa ‘di phyag rgya chen po’i thabs yin/ / phyag rgya chen po lam med de/ yid ma yengs pa ‘di phyag rgya chen po lam yin/ phyag rgya chen po la ’bras bu med de/ blo chos nyid du grol ba ‘di phyag rgya chen po’i ’bras bu yin no/

gsum pa de kho na nyid la lam sbyang pa la bzhi ste/

1. sngon ‘gro dad pa dang/ mos pa/ gus pa gsum gyis nyin lan gsum mtshan lan gsum du bla ma’i rnal ‘byor bsgom/
   
2. dngos gzhi sems ma bcos pa’i ngang la ma yengs pa’i rtsis bzung ba bzhag
   
3. rjes cir snang thams cad rang gi sems su shes par byas la rig pa rtsal sbyangs/ nyams myong gi ‘char lugs la brten nas blo ma zad bar du bsgom bsgrub la nan tan bya’o/ de la nyams myong gi ‘char lugs la gnyis te/ mi mthun pa’i nyams dang/ mthun pa’i nyams so/ dang po ni/ bying rgod dang/ na tsha dang/ ‘jigs brid dang/ the tshom la sogs pa mi mthun pa’i nyams ci byung yang/ de thams cad bsgom pa las byung ba yin pas de thams cad nyams so shes par byas la/ mi spang bar de kho na nyid la lta bsgom gyi bab byas nas bsgom pas/ mthun pa’i nyams shug la ‘char ro/ mthun pa’i nyams ni/ dang po sems gnas pa’i nyams ‘char ba de la brten nas ngo bo stong pa’i nyams ‘char/ de la brten nas rtogs pa thob pa’i nyams ‘char/ de la brten nas zhen pa log pa’i nyams ‘char ro/
   
4. de ltar nyams myong gi ‘char lugs la brten nas/ sgrub pa chog shes med par nan tan bya ba ni/ dang po sems gnas pa tsam gyis mi chog /ngo bo mthong mthong du bsgom dgos/ ngo bo mthong ba tsam gyi mi chog /rtogs pa thob thob du bsgom dgos/ rtogs pa thob tsam gyis mi chog /zhen pa log log tu bsgom dgos/ zhen pa log pa tsam gyis mi chog /rang blo chos nyid du grol nas blo zad chos zad du sangs rgyas su bsgom dgos/

phyag rgya chen po lam gcig chod thugs kyi nying khu zhes bya ba rdzogs so// /ithi/ //