60150

ཞང་ཚལ་པ་བརྩོན་འགྲུས་གྲགས་པ་ (1)

Part of speech

མིང་ཚིག

Definition

འགྲོ་བའི་མགོན་པོ་ཞང་གཡུ་བྲག་པ་མཆོག་ནི། ལྷ་ས་སྐྱིད་ཤོད་ཚ་བ་གྲུར། ཡབ་སྔགས་རིགས་རྡོ་རྗེ་སེམས་དཔའ་དང་། ཡུམ་མང་སྐྱིད་ཀྱི་སྲས་སུ་རབ་བྱུང་གཉིས་པའི་ཆུ་ཡོས་ ༡༡༢༣ ལོར་འཁྲུངས། ཆོས་ཀྱི་བག་ཆགས་བཟང་། བྱེའུ་སྟོན་པ་ལ་སྡུད་པ། གཤེན་ལ་མཚན་བརྗོད། རྔོག་མདོ་སྡེ་ལ་དགྱེས་རྡོར། གུར། མཱ་ཡ། གསང་ལྡན། སམྦུ། ལོ་ཙཱ་ལ་མངོན་པ་དང་ཚད་མ་བསླབས། བཅོ་བརྒྱད་ལ་ཕ་ཚན་གྱིས་བརྙས་པ་བྱུང་བས་མཐུས་ཚར་བཅད། ཁམས་སུ་བྱོན། ཉི་ཤུ་རྩ་བཞི་ལ། མནལ་ལམ་གྱི་རྟགས་ལ་བརྟེན་ནས་མཐུ་མཛད་འཕྲོའི་བཅའ་གཞི་བཤིག། ཉེར་དྲུག་ལ་དཀོན་བརྩེགས་གཟིགས་པས་དད་པ་འཁྲུངས། མཁར་སྒོ་བའི་མདུན་ནས་བསྙེན་པར་རྫོགས། མཚན་བརྩོན་འགྲུས་གྲགས་པར་གསོལ། རྒྭ་ལོ་སོག་ཡུལ་ཏུ་ཕེབས་པ་དང་མཇལ་ཏེ་གདམས་ངག་གསན། སོ་གསུམ་ལ་སློབ་དཔོན་སྒོམ་པ་ལྷ་སར་ཞིག་གསོས་མཛད་པའི་ཚེ་མཇལ། ལྷན་ཅིག་སྐྱེས་སྦྱོར་གནང་ནས་བསྒོམས་པས། ཡིད་ཆེས་པས་མོས་གུས་ཀྱང་སྔར་དང་མི་འདྲ་བ་ཞིག་བྱུང་། དེ་ནས་སྔར་རླུང་རྩོལ་བྱེད་པ་དེ་གོམས་པའི་ཤུགས་ཀྱིས་སེམས་མ་བཅོས་པར་འཇོག་པ་འདི་ལ་རླུང་རྩོལ་མ་བྱས་ན་མ་བདེ་བ་བྱུང་ནས་ཞུས་པས། དེ་ལེགས་ཀྱི་གསུངས། རླུང་སྐྱེ་མེད་ཀྱི་གདམས་པ་གནང་། རླུང་དང་ཕྱག་རྒྱ་ཆེན་པོ་གཅིག་ཏུ་འདྲེས། དེ་ནས་ཟླ་བ་ཕྱེད་ལོན་ཙ་ན་རྟོགས་པ་ནི་མ་འགྱུར། སྔར་གྱི་རྟོགས་པ་དང་འདྲ་བའི་ཉམས་མྱོང་རྣམས་མི་འདུག་ནས། ལམ་རྟོགས་པའང་འགྲིབ་པའམ་སྙམ་པ་བྱུང་ནས་ཞུས་པས། རྟོགས་པ་ཤིང་འདྲ། ཉམས་མྱོང་སྤྲེའུ་འདྲ་བ་ཡིན་པས་ཅང་མི་སྟོ་གསུངས། ཐབས་ལམ་མ་བཅུན་པའི་ཕྱག་རྒྱ་ཆེན་པོ་བསྐྱངས་པ་རྟོགས་པ་མཐོ་མཐོ་བྱས་ཀྱང་ཉམས་མྱོང་གི་རྩལ་མེད་པར་ས་གཅིག་པུར་རྡུགས་ནས་སྡོད་པར་འདུག་པས། འབྲོང་བུ་ལྐུགས་པར་གཅིག་པུར་བཞུགས་ཏེ། ཐབས་ལམ་སྐྱེ་མེད་བསྒོམས་ཏེ་ཉམས་མྱོང་འུར་གྱིས་འཕེལ། རྟོགས་པ་དང་ཉམས་མྱོང་འདྲེས། བླ་མ་འོལ་ཁ་བ་དང་མཇལ་ནས་བྱང་ཆུབ་སེམས་ལ་བོགས་ཐོན། རེ་ལྔ་པ་མེ་ལུག་ལོར་ཚལ་གུང་ཐང་གཙུག་ལག་ཁང་དབུ་རྩེ་གློ་འབུར་ཁྱམས་རར་ལྷ་ཆེན་དཔལ་འབར་བཞེངས། གཞན་ཕན་རླབས་ཆེན་གྱི་སྤྱོད་པས་འཁྲུག་པ་མང་པོ་མཛད། གནས་བདུན་དུ་སྐུའི་འགྱུར་བ་བདུན་བསྟན་ནས་མཚན་བདུན་ཐོགས། སྐལ་ལྡན་རྣམས་བྱང་ཆུབ་ཀྱི་མྱུར་ལམ་ལ་བཀོད། ཆོས་སྐྱོང་བྱ་རོག་མས་ཅི་བསྒོ་བ་སྒྲུབ་པ་ཡིན་ཞེས་གྲགས། སྐུ་འབུམ་བཞེངས། དགུང་ལོ་དོན་གཅིག་པ་ཆུ་གླང་ ༡༡༩༣ ལོའི་ཟླ་བ་ལྔ་པའི་ཚེས་བཅུ་ལ་གཤེགས། དེའི་དངོས་ཀྱི་གདན་ས་མཉམ་མེད་ཤཱཀྱ་ཡེ་ཤེས་ཀྱིས་མཛད། སློབ་མའི་གཙོ་བོ་ནམ་མཁའ་འོད། ཉི་མ་འོད། འདུལ་བ་འོད། ཤཱཀྱ་འོད། མར་པ་འོད་ལ་སོགས་པ་བསྟན་པ་ལ་བྱ་བ་བྱེད་པའི་སྐྱེས་བུ་རིམ་པར་བྱོན་པས་ཚལ་པ་བཀའ་རྒྱུད་ཀྱི་ཆོས་དང་སྲིད་ཀྱིི་རིང་ལུགས་བཟང་པོས་བོད་ཡུལ་ལ་ཁྱབ་པ་བྱུང་ངོ་། །

{{#arraymap:ཞང་ཚལ་པ་བརྩོན་འགྲུས་གྲགས་པ་

|; |@@@ | | }}