File:Welcome3-500.gif

@#/_/chos dbyings rin po che'i mdzod ces bya ba bzhugs so/_/

@##/_/rgya gar skad du/_d+harma d+hA tu rat+na ko Sha nA ma/_
bod skad du/_chos dbyings rin po che'i mdzod ces bya ba/_
dpal kun tu bzang po la phyag 'tshal lo/_

Choying Dzo - Chapter 1

Choying Dzo - Chapter 2

Choying Dzo - Chapter 3

Choying Dzo - Chapter 4

Choying Dzo - Chapter 5

Choying Dzo - Chapter 6

Choying Dzo - Chapter 7

Choying Dzo - Chapter 8

Choying Dzo - Chapter 9

_ch 9_
rang bzhin yangs pa chen po'i klong gcig la/_/mkha' mnyam byang chub sems kyi gnam gzer ni/_/gnad du dril te bcud du phyung ba ni/_/che ba'i che ba kun bzang yangs pa'i thugs/_/rang gi ngo bos spyi rgya rlabs kyis bcad/_/klong chen gcig la rtogs dang ma rtogs dang /_/grol dang ma grol gnyis med mnyam pa che/_/sgo nga'i nang nas 'dab gshog rgyas pa'i bya/_/rgya dang bral bas nam mkha'i klong na gnas/_/klu rnams zil gnon g.yang sa shugs kyis chod/_/theg pa'i yang rtse rdo rje snying po yang /_/ji bzhin rtogs pa'i rnal 'byor skal ba can/_/theg dman zil gnon 'khor ba'i g.yang sa chod/_/kun grol mnyam pa chen por gnas pa de/_/rgyu 'bras rtsol sgrub can la mi rigs kyang /_/theg mchog mi g.yo mnyam pa'i don la 'thad/_/thams cad bde chen mkha' mnyam chos sku'i klong /_/chos sku'i klong du ma grol 'ga' yang med/_/chos nyid rang bzhengs rdo rje snying po'i sku/_/bag chags lus la snying po'i rtsal rdzogs te/_/skye shi bar do srid pa'i las bor nas/_/rig pa gcig pu kun dang dbyer med cing /_/lhun grub sa la rgyal ba'i srid zin nas/_/rgya chad med par sprul pa 'byung ba dang /_/thogs pa med par kun la 'jug pa ni/_/byar med rlung zhon rnal 'byor spyod yul te/_/dman pa'i theg pa kun la mi rigs kyang /_/a tis rigs par ston pa 'bras bu'i gnad/_/skye med skye ba'i cho 'phrul 'byung ba la/_/rgyu 'bras mtshan mar 'dzin pa 'khrul pa'i blo/_/a tis rgyu rkyen med par bstan pa ste/_/'og ma rnams la mi rigs rigs pa'i gnad/_/sangs rgyas sems can dgongs spyod dbyer med la/_/'khor 'das gnyis su 'dzin pa 'khrul pa'i blo/_/a tis gnyis su med par bstan pa de/_/'og ma rnams la mi rigs rigs pa'i gnad/_/rtogs dang ma rtogs med par grol ba la/_/rtogs nas grol bar 'dod pa nyams pa'i dgra/_/a tis mnyam nyid gcig tu bstan pa de/_/'og ma rnams la mi rigs rigs pa'i gnad/_/mtshon byed thabs kyi khyad par ma bsten par/_/brjod med rtogs par mi 'dod blun po'i blo/_/a tis don dam dbyer med bstan pa de/_/'og ma rnams la mi rigs rigs pa'i gnad/_/rdzogs chen ye gdal gting mtha' med pa la/_/thug pa med ces zer ba blun po'i blo/_/a tis mu med chig chod bstan pa de/_/'og ma'i blo yul mi rigs rigs pa'i gnad/_/thig le gcig la rgyu mtshan go bzlog pas/_/'bras bu re dogs chod de mkha' dang mnyam/_/yangs so che'o mkha' mnyam rgyal ba'i thugs/_/spangs thob med de thig le gcig gi klong /_/ye nas grol lo rtogs dang ma rtogs med/_/rnal 'byor mkha' mnyam bya bral lam du bde/_/ye sangs rgyas pa'i rig pa yul med 'di/_/'khor bar mi 'khyam 'khrul gzhi kun las 'das/_/su yang ma 'khrul 'khrul pa'i gnas med de/_/thams cad chos dbyings klong gsal gcig gi ngang /_/snga phyi ris med mkha' mnyam yangs pa nyid/_/ye babs lhun grub 'khor ba gdod nas dag_/grol bar mi 'jug mya ngan 'das mi len/_/mi 'gyur klong chen 'khor 'das yod ma myong /_/'di la spangs thob re dogs mi dmigs shing /_/gdod nas byang chub gzhi klong yangs pa che/_/thams cad ming tsam don la mtshon brjod 'das/_/grol dang 'khrul med 'khor 'das la zlos pas/_/su yang ma rtsol bcos bsgyur ma byed cig_/yangs dog mtho dman med pa'i rig pa la/_/rgya chad phyogs lhung med kyis dmigs gtad shol/_/bya byed 'gro 'ong med pa'i rig pa la/_/dus dang gnyen po med kyis 'dzin rtsol zhog_/ched du dmigs pa yod na 'ching ba'i rgyu/_/gang la'ang gtad 'dzin ma 'cha' phyam la thong /_/chos kun ye nas grol rung ma grol rung /_/gnas lugs rang bzhin dag rung ma dag rung /_/sems nyid spros dang bral rung ma bral rung /_/gnyug ma'i gshis la grub rung ma grub rung /_/'khor 'das rang bzhin gnyis rung ma gnyis rung /_/bsam brjod kun las 'das rung ma 'das rung /_/dgag sgrub 'khrul pa zhig rung ma zhig rung /_/rtogs pa'i lta ba rtogs rung ma rtogs rung /_/chos nyid don la bsgoms rung ma bsgoms rung /_/blang dor med pas spyad rung ma spyad rung /_/gnas lugs 'bras bu grub rung ma grub rung /_/sa dang lam rnams bgrod rung ma bgrod rung /_/sgrib pa kun dang bral rung ma bral rung /_/bskyed rdzogs chos nyid rdzogs rung ma rdzogs rung /_/thar pa'i 'bras bu thob rung ma thob rung /_/'gro drug 'khor bar 'khyams rung ma 'khyams rung /_/rang bzhin lhun gyis grub rung ma grub rung /_/rtag chad gnyis 'dzin bcings rung ma bcings rung /_/chos nyid dgongs par sleb rung ma sleb rung /_/gong ma'i rjes su snyogs rung ma snyogs rung /_/gnam sa 'dre ldog snang ba ci shar yang /_/phyal ba lhug pa gzhi med zang ka ma/_/gtad med zang zing ban bun chal ma chol/_/re dogs gnyis med smyon pa'i ngang tshul can/_/lta sgom ris med ched 'dzin 'dod blo zhig_/zhe 'dod 'khris med 'di zhes rtsol sgrub med/_/gang byung byung la gang snang snang du chug_/gang shar shar la gang yin yin du chug_/gang yang yin la gang yang min du chug_/kun spyod nges med rig pa thod rgal ngang /_/chos dang chos min rtsis gzhi 'ga' med pas/_/gtad med zang ka grub mtha'i gzeb las 'das/_/za 'chag nyal 'dug nyin zhag phyam gdal bas/_/rang bzhin chos nyid mnyam pa'i ngang nyid de/_/mchod pa'i lha med brdung ba'i 'dre yang med/_/sgom pa'i chos med tha mal rang dga'i ngang /_/ma bcos rgyal po snyems med phyam gcig pas/_/phyal pa lhug pa lhun grub gcig pu nyid/_/ma byas ye zin rtsol sgrub bral bas bde/_/lta ba'i gzhi med sgom pa'i ngang med la/_/spyad pa'i chos med bsgrub 'dod 'bras bu med/_/thams cad ris med mnyam par phyam gdal bas/_/bya rtsol ma dgos yangs dog med par bde/_/smon pa med pas sgrub blo'i chos zad de/_/spang bya med pas gnyen po'i 'ching zhen 'das/_/gang yin kun yin yin min 'ga' med pas/_/gang snang gang shar 'dem ka med par grol/_/ma grol ye grol rang grol chos med pas/_/phyam gcig gtad med la bzla'i chos las 'das/_/klong yangs klong yangs klong chen yangs pa'i ngang /_/klong chen rab 'byams klong gsal klong 'byams pas/_/klong gcig gnyis med bde klong 'khyil ba ni/_/sna tshogs rang grol chos nyid zad sar phyin/_/mi 'gyur lhun grub 'dun ma legs pa'i rtse/_/bdag gzhan rjes su 'jug pa'i 'gro rnams kyang /_/'di bzhin ye 'byams klong chen gcig tu dril/_/kun bzang sa la gtan srid zin pa yin/_ /chos dbyings rin po che'i mdzod las/_
chos thams cad byang chub sems kyi klong du la bzla bar bstan pa'i le'u ste dgu pa'o//_//

Choying Dzo - Chapter 10

_ch 10_ rang bzhin gdod nas dag pa'i byang chub sems/_ /btang gzhag 'gro 'ong med pa'i chos nyid la/_ /btsal bas mi 'grub chos nyid nam mkha'i klong /_ /rang bzhin bzhag pas 'od gsal nyi zla 'char/_ /yul kyang mi dgag sems kyang mi gzung bar/_ /rang bzhin lhun grub ngang las mi g.yo na/_ /kun bzang yangs pa chen po'i dgongs par phyin/_ /mi spro mi bsdu rang dvangs sang nge ba/_ /dvangs pa'i rgya mtsho mi g.yo mnyam pa bzhin/_ /chos nyid gting gsal rang byung ye shes ngang /_ /'byung 'jug re dogs bral bar gnas pa yin/_ /tshig gis mi mtshon 'jur bu'i sems med par/_ /rang babs gyin 'da' bcos bslad med pa ni/_ /klong thim chos nyid mtshan ma med pa ste/_/sgom dang bsgom par bya ba'i chos med pas/_/bying rgod rang yan rang byung dgongs par shar/_/spangs pas mi spong kun rtog rig pa'i rtsal/_/chos nyid ngang du dbye bsal ris med pas/_/bsgrubs pas mi 'grub chos nyid dbyings su shar/_/'khor ba ma spangs rang byung ye shes su/_/klong chen rtsal gyi rnal 'byor dag pas mthong /_/ye nas snang sems rang babs chos nyid ngang /_/ting 'dzin mi g.yo chu bo'i rgyun shar bas/_/rdo rje rtse mo kun bzang thugs kyi mchog_/yangs pa'i chos mchog nam mkha'i mtha' dang mnyam/_/dbye bsal med par thams cad sgom pa'i mchog_/ye 'byams rmad byung rgyal por lhun gyis grub/_/ye nas spyi blugs 'od gsal chu bo'i rgyun/_/btang gzhag med pa'i ngang 'dir lhun grub pas/_/'khor 'das rang bzhin chos dbyings dgongs pa'i mchog_/mi g.yo brjod 'das mkha' mnyam klong chen nyid/_/'gro ba kun la ye nas babs kyis grub/_/bdag las gzhan du snang ba 'khrul pa'i sems/_/bsgom dang rtsol bar 'dod pa 'khrul pa'i sems/_/'khrul pa chos nyid ngang bzhag mnyam pa'i zhing /_/mi g.yo gdod nas dag pa'i rang bzhin klong /_/bya dang rtsol med gzhag dang ma bzhag med/_/mi 'gyur lhun gyis grub pa'i chos nyid la/_/dmigs bsam tshol khro bral ba'i rang rig gis/_/yang yang bltas na blta ru med pa mthong /_/bltar med rig pa spyi blugs lta ba yin/_/ma bsgoms rig pa btang gzhag bral ba la/_/yang yang bsgoms na bsgom du med pa mthong /_/sgom med rig pa spyi blugs sgom pa yin/_/gnyis med blang dor bral ba'i gnas lugs la/_/yang yang spyad na spyad du med par mthong /_/spyad med rig pa spyi blugs spyod pa yin/_/ye zin re dogs bral ba'i lhun grub la/_/yang yang bsgrubs na bsgrub tu med pa mthong /_/bsgrub med rig pa spyi blugs 'bras bu yin/_/mnyam nyid ngang las yul du mi rtog cing /_/sems su mi 'dzin re dogs 'byung 'jug gzhi/_/yul sems mnyam pa'i ngang der gnas pa ni/_/chos nyid klong las ngang gis g.yos pa med/_/mtshan ma'i yul la yul med spyi blugs gnas/_ /ye nas gnyis med rig pa sbyi blugs pas/_ /'khor 'das dbyer med rdzogs pa chen po'i ngang /_ /thams cad blang dor med par phyam gdal lo/_ /dngos dang dngos med dbyings su mnyam pa dang /_ /sangs rgyas sems can dbyings su mnyam pa dang /_ /kun rdzob don dam dbyings su mnyam pa dang /_ /skyon dang yon tan dbyings su mnyam pa dang /_ /mtho dman phyogs mtshams dbyings su mnyam pa'i phyir/_ /rang byung ngang las rol pa ci shar yang /_ /shar ba'i dus na mnyam shar bzang ngan med/_ /de la blang dor gnyen pos bcos ci dgos/_/gnas pa'i tshe na mnyam gnas bzang ngan med/_/da lta sems las gang byung rang zhir glod/_/grol ba'i tshe na mnyam grol bzang ngan med/_/dran pa'i rjes la dgag sgrub 'phro ma mthud/_/thams cad gzhi klong byang chub sems nyid las/_/rtsal dang rol pa'i 'char tshul ma nges pas/_/mnyam par shar yang gdod ma'i klong nas shar/_/mi mnyam shar yang mnyam pa'i dbyings nas shar/_/mnyam par gnas kyang rang gzhag chos nyid ngang /_/mi mnyam gnas kyang mnyam pa'i dbyings na gnas/_/mnyam par grol yang rang byung ye shes klong /_/mi mnyam grol yang mnyam pa'i dbyings su grol/_/thams cad ye mnyam rang byung rig pa la/_/shar dang ma shar dbyings la ye nas med/_/gnas dang mi gnas dbyings la ye nas med/_/grol dang ma grol dbyings la ye nas med/_/mi g.yo mnyam pa chen po'i rig pa la/_/shar ba'i dus na rang shar rang sa zin/_/gnas pa'i dus na rang gnas rang sa zin/_/grol ba'i dus na rang grol rang sa zin/_/mi 'gyur spros dang bras ba'i rig pa la/_/shar ba ye shar gnas pa ye gnas la/_/grol bar ye grol nam mkha'i rang bzhin no/_/shar gnas grol gsum shar grol rgyun chad med/_/rgyun chad med pas rgyu 'bras bar ma chod/_/rgya 'bras med pas 'khor ba'i g.yang sa chod/_/g.yang sa med pas gol sa ga la yod/_/ye nas mi 'gyur kun tu bzang po'i klong /_/'pho 'gyur med pa rdo rje sems dpa'i klong /_/gnas lugs rang ngo shes pa tsam nyid la/_/sangs rgyas zhes su ming 'di btags par zad/_/'di nyid rtogs nas blang dor chos med pas/_/thams cad chos nyid gcig tu phyam gdal ba/_/gser gling lta bur dbye bsal med pa yin/_/mtha' yis ma reg gol sgrib gdar sha chod/_ /g.yang sa med pa'i byang chub sems nyid la/_ /'bad rtsol med pa'i sku gsum lhun rdzogs kyang /_ /bsam brjod 'das shes ming tsam brjod par zad/_ /snang ba rgya yan rig par rang byung gsal/_ /ma bsgribs phyi nang med par zang thal bas/_ /ma bcos rnal gzhag chos nyid chen por gsal/_ /blo bde'i mal na lus sems khong glod de/_ /shes pa bag yangs byar med skyes bu bzhin/_ /sgrims glod med par lus sems gang bder gzhag_ /ji ltar 'dug kyang rang gi ngang la 'dug_/ji ltar gnas kyang rang gi ngang la gnas/_/ji ltar 'gro yang rang gi ngang la 'gro/_/byang chub dbyings la 'gro 'ong ngang gis med/_/'gro 'ong med pa rgyal ba rnams kyi sku/_/ji ltar smras kyang rang gi ngang la smra/_/ji ltar brjod kyang rang gi ngang la brjod/_/byang chub sems la smra brjod ngang gis med/_/smra brjod med pa dus gsum rgyal ba'i gsung /_/ji ltar bsams kyang rang gi ngang la bsam/_/ji ltar rtog kyang rang gi ngang la rtog_/byang chub sems la bsam rtog ye nas med/_/bsam rtog bral ba dus gsum rgyal ba'i thugs/_/med la cir yang 'byung ba sprul pa'i sku/_/nyid la nyid longs spyod pa longs spyod rdzogs/_/de la dngos gzhi med pas chos sku ste/_/'bras bu sku gsum lhun gyis grub pa'i klong /_/byang chub sems kyi klong chen ngang nyid las/_/dran pa'i rnam par rtog pa mi 'byung ste/_/shes pa'i mtshan ma yid la mi g.yo na/_/de nyid sangs rgyas nyag gcig dgongs pa yin/_/byang chub rang bzhin nam mkha'i dkyil yangs 'dra/_/dran dang rtog pa med pa sgom pa'i mchog_/rang gi rang bzhin ma g.yos bcos pa med/_/mi bsam yid la byed pa rnam bral ba/_/rang babs chos nyid dus gsum 'pho 'gyur med/_/'gyu 'phro'i kun rtog med pa sgom pa'i mchog_/de bzhin nyid der gang gnas dam pa'i sems/_/sangs rgyas nyag gcig mtshon pa kun dang bral/_/mi g.yo chos dbyings 'dzin rtog phyam 'das pa/_/rgyal ba'i dgongs klong rang bzhin yangs pa'i mchog_/lus sems bcos pa'i 'ching ba rnams spangs shing /_/gyin 'dar lhod chags dran bsam ci 'gyus kyang /_/gzhi gzhag chos nyid ngang las mi g.yo na/_thams cad kun bzang dgongs klong yangs pa yin/_/ma bzang ma btang 'jur bu'i sgrims glod med/_/ji ltar rang babs rgya yan ngang gis zin/_/mi g.yo phyam gdal yangs dog med pa'i klong /_/dran bsam thams cad rang byung rang zhi na/_/rdo rje sems dpa' nam mkha'i dgongs pa yin/_/ma bcos klong du ma yengs ngang ldan na/_/dran rtog yul la 'jug pa'ang chos nyid ngang /_/ched du 'jur bus bcos na chos nyid kyang /_/mi rtog mkha' ltar yangs kyang mtshan ma'i gzeb/_/nyin mtshan sgom pas 'da' yang 'ching zhen nyid/_/bsam gtan lha dang mtshungs par rgyal bas gsungs/_/de bas ma yengs 'bad rtsol zhig pa'i sems/_/rang babs 'dzin rtsol 'das pa shin tu gces/_/rang byung ye shes phyogs dang ris med pas/_/'di zhes mi mtshon rang bzhin spros kun zhi/_/de bas yid la byed pa rnams spangs te/_/gzhi bral yangs pa chen po'i don la bslab/_/chos nyid nyag gcig rang byung ye shes te/_/lta ba nyag gcig spros pa'i mtha' dang bral/_/sgom pa nyag gcig btang gzhag 'gro 'ong med/_/spyod pa nyag gcig blang dor byar med cing /_/'bras bu nyag gcig spangs thob gnyis dang bral/_/'di ni rang byung lhun grub dgongs pa yin/_/snang srid snod bcud 'khor dang mya ngan 'das/_/chos so cog kun chos nyid gdod ma'i ngang /_/rang byung ye shes nyid las ma g.yos pas/_/gang yang gzhi gzhag dgongs par shes par bya/_/sna tshogs yul du snang ba'i chos nyid la/_/gang du 'di ltar 'jog ces mi rtog par/_/rang babs spro bsdu bral bar lhun gyis zhog_/chos nyid mnyam pa'i klong du ngang gi gnas/_/dkar dmar yul du snang ba'i rnam pa la/_/dbang po mi bsdu mig kyang mi 'gul bas/_/bdag la mi bsam gzhan la mi rtog par/_/phyam phyal yangs pa chen por ngang gis zhog_/rgya bskyed dpangs bstod spro bsdu bral ba'i sems/_/kun mnyam rang byung ye shes dgongs pa la/_/phyi nang bar med nam mkha' 'dres pa'i nyams/_/bde gsal spros dang bral ba'i ting 'dzin 'char/_/gzhi gzhag mi g.yo mnyam pa'i dgongs pa la/_/phyi dang nang med gzung 'dzin spros dang bral/_/yul zhes gzhan du zhen pa'i sems med pas/_/gzung ba'i chos med snod bcud snang zhen bral/_/'khor bar skye ba'i yul med nam mkha' 'dra/_/rang zhes sems la nang du mi rtog pas/_/'dzin pa'i chos med srid pa'i kun rtog zhi/_/'khor bar skye ba'i mkhan po rtsad nas chod/_/de tshe mkha' 'dra phyi nang 'khrul pa'i chos/_/gang yang mi dmigs chos sku'i dgongs par phyin/_/zad pa'i sar thug 'gro dang 'ong med pas/_/thams cad klong 'byams kun tu bzang po'i zhing /_/chos sku'i pho brang mchog tu phyin pa yin/_/da lta'i rig pa gzhi las ma g.yos na/_/de nyid goms chos phyi ma'i srid pa stongs/_/yang srid len pa'i las dang bag chags bral/_/rgyu 'bras la zlos 'khor 'das mnyam par brjod/_/srid zhir mi gnas byang chub snying por phyin/_/'dir yang zhi gnas rtse gcig phyed pa gces/_/rang bzhin rdzogs pa chen po'i dgongs pa yin/_/ngang las g.yos na yid dpyod 'khor ba nyid/_/de la rgyu 'bras nyid de la ma zlos/_/nor ba'i skye bo 'og nas 'og tu 'gro/_/dos na mchog gsang rdzogs pa chen po ni/_/dbyings las ma g.yos rtsal rnams gzhi la 'khyol/_/dgongs pa mi g.yo mnyam par gnas pa yin/_/'di yi ngang la rgyu 'bras bya rtsol med/_/lta ba bsgom du med pa la sogs te/_/mtha' dbus gnyis med 'gog pa'i tshul brjod kyi/_ /gzhan du ngang las phyir 'khyal rtsal nyid las/_ /rol pa sna tshogs snang srid dgu 'char bas/_ /rgyu 'bras med ces nam yang ma brjod cig_ /rten 'brel rkyen 'byung 'dus byas grangs bsam 'das/_ /'khor ba'i 'khrul snang zhi bde'ang grangs bsam 'das/_ /de kun rgyu rkyen tshogs pa'i rten 'brel nyid/_ /gshis la gzhal na gang yang ma grub ltar/_ /lam du byed pas gshis thog mi g.yo'i dus/_ /gang yang mi dmigs dgongs pa'i dus na rtsi/_ /gshis thog mthar phyin gang yang gos mi 'gyur/_ /nyon mongs las dang bag chags klong chen 'di/_ /rten med sgyu mas sprul pa'i rtsed mo byed/_ /'di las thar dgos rgyu 'bras la zlos 'tshal/_ /de yi thabs ni 'di las mchog gzhan med/_ /de phyir chos dbyings dgongs pa ma g.yos gces/_ /'di nyid kho bo'i snying gtam zab mo'i klong /_ /kun yin kun min yin min 'das pa gces/_ /chos dbyings rin po che'i mdzod las/_ dgongs pa chos nyid las mi g.yo bar bstan pa'i le'u ste bcu pa'o//_//

Choying Dzo - Chapter 11

_ch 11_ thams cad mkha' mnyam byang chub sems gcig la/_ /gnyis su bzung bas rgyu 'bras srid par 'khrul/_ /'khrul snang rten med sgyu ma'i snang ba la/_/thug phrad rjes med rtsis gdab bral bar skyong /_/mi 'dod thog tu bab la dor bya'i sems/_/khro dang mi dga' phrag dog 'khrug dang 'tshig_/skyo bas yid dbyung na tsha sdug bsngal sems/_/'chi dang skye bas 'jigs la sogs pa ste/_/rtsal las rol par shar dus ngos bzung la/_/mi spong mi spyod mi sgyur mi len zhing /_/mi lta mi sgom rang babs phyam gcig tu/_/dmigs bsam spros bsdu bral bar lhun gyis zhog_/rjes med rang yal mkha' klong yangs pa'i sems/_/gsal dvangs ngar dang bcas pa khong nas 'char/_/yin min med pa'i rig pa phyogs yan la/_/'dir gtad med pa'i snang ba thug phrad kyis/_/'dir gzung med pa'i ngang der rang bzhag pas/_/'dir grol med pa'i dgag sgrub rjes med yal/_/'dzin zhen med pa'i nyams myongs khong rdol 'byung /_/'di nyid ji bzhin dgongs klong ye nas yangs/_/de bzhin 'dod cing yid la dga' ba'i sems/_/grub bde gnyen dang gtam snyan longs spyod dang /_/gnas dang phyogs ni yid du 'ong pa der/_/rang bzhin dga' bas brgyan pa'i sems shar ba/_/de nyid ngos gzung rang babs cog gzhag gis/_/gdod ma'i dbyings su ma bcos lhun gyis grub/_/rang bzhin bar ma 'gro 'dug gyin 'dar gnas/_/dga' dang mi dga' gnyis min ci shar yang /_/shar dus ngos gzung spang blang ma byas pas/_/rang babs chos nyid dbye bsal med pa ni/_/gti mug 'od gsal chen por grol zhes bya/_/mtshan mo la sogs gnyid kyis myos pa na'ang /_/rang babs spro bsdu bral ba'i ngang nyal bas/_/rags par snang ba nub pas der 'dzin nub/_/phra ba ches phra 'dzin par bcas nub pas/_/cha mnyam mi rtog ngang du rig pa'i sems/_/'byung 'jug re dogs bral ba rang bzhin gnas/_/kun rtog chos dbyings grol ba'i dus yin pas/_/'khor ba myang 'das grol zhes brjod pa yin/_/gnyid kyang rang byung gdod ma'i klong chen te/_/rtsal rnams ngo bo'i dbyings su gzhir thim pas/_/rol par 'dzin pa'i spros kun ngang gis zhi/_/byar med rang byung ye shes dgongs pa'o/_/de ltar 'dod dang mi 'dod bar ma'i sems/_/dug gsum rtsal las rol par shar to cog_/dbyings las byung zhing dbyings kyi ngang du shar/_/dbyings su ma gtogs g.yos pa 'ga' med pas/_/gzeb dang bcos basgyur gang yang mi byed par/_/dbyings nyid ngos gzung ngang der gzhag ma thag_/rang zhi rang yal rang sar grol ba gnad/_/nyon mongs las dang bag chags thams cad kyang /_/rtsal las rol par shar ba'i cho 'phrul la/_/gnyen po bzang byas thar pa'i lam nyid kyang /_/rtsal las rol pa shar ba'i cho 'phrul te/_/gnyis ka rtsal las rol par ye shar nas/_/ngo shes ngang du ma bcos 'jog pa gnad/_/bang mnyam 'gros mnyam gzhi nas g.yos par mnyam/_/rkyen byung 'dus byas rgyu 'bras ma 'das pas/_/rang gzhag cog gzhag rgyu 'bras zlos pa gces/_/'di ni mchog gsang theg pa'i yang rtse ste/_/blo dman rnams la mi smra shin tu gsang /_/sgro skur dbang gis snying po'i bstan pa 'chal/_/sgro 'debs nyid dang dgongs pa log par zhugs/_/gsang sgo 'chol rnams mtha' med ngan 'gror ltung /_/de bas rab gsang theg pa rgyal po'i gdung /_/skal bzang dam pa rnams la bstan zhing gtad/_/mdor na gang snang yul sems rkyen rnams la/_/gnyen po mi 'jug rtsol bas ma spangs par/_/rang zhag cog gzhag rang babs rig pa'i gnad/_/bde sdug thams cad rig pa'i 'char tshul la/_/blang dor gnyis su bzung bas srid par 'ching /_/gang snang yul mnyam dbang po'i ngor gsal tsam/_/gang shar sems mnyam dran rig rjes med tsam/_/gnyis ka 'phral mnyam dgag sgrub 'ching ba tsam/_/don la phug mnyam gzhi med snang ba tsam/_/yul rnams ris mnyam gzhig na rjes med tsam/_/blo rnams ngor mnyam dpyad na nam mkha' tsam/_/yul sems gnyis med bar snang dag pa tsam/_/de ltar sus shes kun tu bzang po'i gdung /_/rgyal ba'i sras mchog sa rab rig pa 'dzin/_/'di ltar chos rnams yod mnyam med mnyam la/_/snang mnyam stong mnyam bden mnyam rdzun mnyam pas/_/spang gnyen 'bad rtsol 'ching zhen kun thong la/_/yul med mnyam pa chen por phyam gdol cig_/sems med rig pa chen por phyam gdol cig_/skyon med dag mnyam chen por phyam gdol cig_/chos dbyings rin po che'i mdzod las/_ rkyen snang mkha' mnyam dag par bstan pa'i le'u ste bcu gcig pa'o// _//

Choying Dzo - Chapter 12

_ch 12_ chos kun byang chub sems su ye grol bas/_/ma grol ba yi chos ni yod ma yin/_/'khor ba ye grol gdod nas dag par grol/_/'das pa ye grol lhun gyis rdzogs par grol/_/snang ba ye grol gzhi rtsa med par grol/_/srid pa ye grol byang chub snying por grol/_/spros pa ye grol mu mtha' med par grol/_/spros med ye grol ma skyes dag par grol/_/bde ba ye grol chos nyid phyam du grol/_/sdug bsngal ye grol gzhi mnyam yangs par grol/_/bar ma ye grol mkha' mnyam chos skur grol/_/dag pa ye grol dag gzhis stong par grol/_/ma dag ye grol yongs grol chen por grol/_/sa lam ye grol bskyed rdzogs bral bar grol/_/lta sgom ye grol spang blang med par grol/_/spyod pa ye grol kun tu bzang por grol/_/'bras bu ye grol re dogs med par grol/_/dam tshig ye grol chos nyid chen por grol/_/bzlas brjod ye grol gleng brjod bral bar grol/_/ting 'dzin ye grol bsam yul med par grol/_/yod med ye grol mtha' las 'das par grol/_/rtag chad ye grol gzhi rtsa med par grol/_/yang dag ye grol dmigs bsam 'das par grol/_/yang dag min grol phyogs bsam 'das par grol/_/las rnams ye grol gos pa med par grol/_/nyon mongs ye grol 'ching grol med par grol/_/bag chags ye grol rten gzhi med par grol/_/rnam smin ye grol myong gzhi med gar grol/_/gnyen po ye grol spang bya med par grol/_/spang blang gnyis med mkha' mnyam yangs par grol/_/grol ba ye grol bcings pa med par grol/_/ma grol ye grol bcing grol med par grol/_/glod pa ye grol glod rgyu med par grol/_/cog gzhag ye grol 'jog rgyu med par grol/_/mdor na snang zhing srid pa'i chos rnams dang /_/mi snang mi srid chos las 'das so cog_/thams cad ye nas dbyings su grol zin pas/_/da gzod 'bad pas sus kyang grol mi dgos/_/de la 'bad rtsol byas kyang don med pas/_/ma byed ma byed rtsol zhing sgrub ma byed/_/ma lta ma lta yid kyi chos ma lta/_/ma bsgoms ma bsgoms blo yi chos ma bsgoms/_/ma dpyad ma dpyad yul sems rjes ma dpyad/_/ma bsgrubs ma bsgrubs re dogs 'bras ma bsgrubs/_/ma spangs ma spangs nyon mongs las ma spangs/_/ma len ma len yang dag chos ma len/_/ma 'chings ma 'chings rang gi rgyud ma 'chings/_/thams cad phyam log gang la'ang yul med pas/_/khrigs dang chos med dmigs gtad ngos gzung med/_/gzhi log lam log 'bras bu'i chos log pas/_/legs nyes shor god rdul tsam dmigs su med/_/phyam phyam phyang chad ye chad snang srid chad/_/'khor 'das ru log dbyings kyi so na med/_/gang yin ci yin 'di yin gtad so med/_/khyed cag ci bya nga ni gang na 'dug_/sngar shul da med 'di la sus ci bya/_/ha ha 'di 'dra mtshar che dgod re bro/_/snang srid snod bcud 'khrul pa ru log pas/_/nyin mtshan ye sangs rang sangs nam mkha' sangs/_/zhag dang tshes sangs lo zla bskal pa sangs/_/gcig sangs kun sangs chos dang chos min sangs/_/'khor 'das 'khrul gzhi gdod ma'i dbyings su sangs/_/dbyings zhes tha snyad blo yi chos sangs pas/_/gang sgrub ci 'bad da ni ci zhig gnyer/_/'dod blo'i 'khris zad nam mkha' ya mtshan che/_/chos med sprang po'i rang bzhin de 'drar zad/_/sa gzhi rin chen nam mkha' bar snang rdzong /_/rten med ye grol dgongs par lhun grub pas/_/srid gsum snod bcud yul med chen por grol/_/phyogs med phyogs su 'dzin pas bcings pa rnams/_/rang bzhin ma shes rang gis rang bslad pas/_/rang la rang rmongs 'khrul pa a re 'khrul/_/'khrul pa med la g.yang sar 'dzin pas 'khrul/_/'khrul dang ma 'khrul byang chub sems kyi klong /_/byang chub sems la 'khrul grol ye nas med/_/de las rol par shar la 'dzin pas bcings/_/don la 'ching grol gnyis med yul sems med/_/med la yod par 'dzin pas ma bslu zhig_/ye sangs rgyas pas grol ba'i rig pa de/_/gtad 'dzin chos kyi gzeb tu ma 'chings shig_/ye nas yul med rnam kun dag pa'i klong /_/mkha' mnyam bde chen gzhi rtsa byang chub klong /_/de la 'khor ba mi srid gdod ma'i babs/_/thig le nyag gcig grva zur med pa la/_/gcig dang tha dad 'dzin pa 'khrul pa'i sems/_/rang byung ye shes rgyu rkyen med pa la/_/'khor ba'i lam du 'dzin pa byang chub gegs/_/lhun grub phyogs med mtha' dang bral ba la/_/phyogs lta'i mtha' la zhen pa snyem byed bdud/_/dngos mtshan med pa'i stong pa 'gag med la/_/yod med snang stong 'dogs pa log pa'i blo/_/des na gang 'dod phyogs ris gzeb bor la/_/lhun grub phyogs med nam mkha' ltar shes byos/_/snang grags mthong thos tshogs drug ci shar yang /_/thams cad rang gsal dbye bsal med pa'i klong /_/ye grol mnyam pa'i klong du la zlos shing /_/mnyam nyid gcig la cir snang 'byung bas dbyings/_/yon tan thams cad skyed par byed pas gzhi/_/thams cad bya byed med par grol bas klong /_/kun 'byung snying po shar bas byang chub sems/_/mkha' 'dra gdod nas dag par shes par bya/_/rang byung ye shes gzhi klong yangs pa la/_/ye nas dri med 'khor bas ma gos kyang /_/yon tan lhun grub rgyu 'bras 'das par chub/_/rang rig snying po 'od gsal dag pas sems/_/byang chub sems su kun 'dus rnam par dag_/rtsal las rol par shar ba'i rang ngo la/_/rtogs pas glo bur yang sangs rgyas pa dang /_/ma rtogs ma rig 'khrul pa'i tshogs shar bas/_/kun gzhi las mched tshogs brgyad yul dang bcas/_/snang srid snod gcud rol par ci shar yang /_/byang chub sems kyi klong las g.yos pa med/_/sems klong ma g.yos mnyam pa'i ngang gnas na/_/'khor 'das 'ub chub dgongs klong yangs par grol/_/gshis la 'khor 'das mi srid rang bzhin babs/_/bzang ngan blang dor mi srid rang bzhin babs/_/spangs thob gzung 'dzin mi srid rang bzhin babs/_/dug lnga'i nyon mongs mi srid rang bzhin babs/_/rgya chad phyogs lhung mi srid rang bzhin babs/_/rtsal dang 'char ba mi srid rang bzhin babs/_/phyogs tsam btags pa mi 'gog rang bzhin babs/_/rang byung ye shes chos zad ming med pa/_/rtsal dang rol pa ci shar gzhi med nyid/_/'ching grol med pa gnas lugs rang bzhin babs/_/grol zhes brdar btags rang yal rjes med tsam/_/kun yin kun min btags par mi 'gal bas/_/ye nas grol zhes tshig tu brjod pa yin/_/dbye bsal med do lhun grub klong du grol/_/'du 'bral med do thig le'i klong du grol/_/cir yang 'char ro nges med klong du grol/_/gzugs su snang ngo snang ba rang sar grol/_/sgra ru grags so grags par rang sar grol/_/dri ru tshor ba tshor ba'i dbyings su grol/_/ro myong reg pa rang sa'i ngang der grol/_/dran rig byung tshor gzhi rtsa rten med grol/_/gcig tu grol lo chos nyid klong du grol/_/gnyis su med do yul sems mnyam par grol/_/rang byung grol lo ye shes klong du grol/_/lhun grub grol lo gzhi dbyings dag par grol/_/sna tshogs grol lo nyag gcig klong du grol/_/phyogs med grol lo lhun grub klong du grol/_/thams cad grol lo snying po'i klong du grol/_/'od gsal grol lo nyi zla'i klong du grol/_/chos nyid grol lo nam mkha'i klong du grol/_/chos can grol lo rgya mtsho'i klong du grol/_/mi 'gyur grol lo ri rgyal klong du grol/_/gdod nas grol lo skye med klong du grol/_/phyam gcig grol lo ye sangs klong du grol/_/yongs grol grol lo ye rgyas klong du grol/_ /chos dbyings rin po che'i mdzod las/_ chos thams cad byang chub sems su ye nas grol ba'i rang bzhin bstan pa'i le'u ste bcu gnyis pa'o//_ _//

Choying Dzo - Chapter 13

_ch 13_ chos rnams lhun grub byang chub snying po la/_
/'bad rtsol med pa'i gnad kyi goms byas na/_
/ye sangs rgyas la yang sangs rgyas 'byung ste/_
/'di ni bla med rdo rje snying po'i don/_
/rim dgu'i snying po byang chub klong chen yin/_
/mkha' dkyil nyi zla'i dkyil 'khor 'od gsal yang /_
/ma rtogs sprin chen snying pos yongs bsgribs pas/_
/mi snang byang chub rang la yod pa'i tshul/_/sprin chen dbyings su bzhag pas rang dengs ltar/_/'bad rtsol med pas rgyu 'bras sprin bral nas/_/mkha' dkyil byang chub snying po rang la 'char/_/dbang po'i rim pas theg pa tha dad la/_/ngo bo nyi bzhin chos dbyings klong na gsal/_/rtsal las zer bzhin kun shar ris med pas/_/sa dang chu mtshor drod kyis khyab pa na/_/rlangs las sprin gyi rol par shar ba yis/_/ngo bo nyid dang rtsal yang bsgribs pa bzhin/_/ngo bo nyid las rang rtsal ma dag pa'i/_/rol pas snying po'i de nyid rang ngor sgrib/_ /snang srid snod bcud 'khrul snang bsam mi khyab/_/nyi zer rtsal las rlung bskyod sprin dengs ltar/_/rang ngo rtogs las rol pa rgyan du shar/_/'khrul pa ye grol rang sar rang grol bas/_/'khrul snang 'khrul 'dzin ma spangs dbyings su zhi/_/gar song cha med dvangs pa'i nam mkha' la/_/sku dang ye shes lhun grub nyi ma shar/_/gzhan nas ma 'ongs rang snang dag pa tsam/_/gnyis skyes sgo nga'i nang nas 'dab rgyas pa/_/sgong rgyas 'thums ltar da ltar mi snang yang /_/sgong rgya ral bas mkha' dkyil lding ba ltar/_/gzung 'dzin 'khrul rtog zag pa sngar zad kyang /_/zag 'bras lhag bcas sgong rgya ral ma thag_/lhun grub rig pa rang gsal rang la 'char/_/sku dang ye shes snang bas mkha' dbyings khyab/_/rang ngo shes pas kun bzang klong du grol/_/phyogs bcur thugs rje'i rol pa tshad med las/_/sprul pa 'phro bas 'gro ba'i don kun byed/_/'khor ba ji srid mdzad pa nye bar ston/_/'di ni rang bzhin babs kyi ngo bo las/_/rtsal gyi thugs rje phyogs med shar ba ste/_/rol pas gzhan don phun sum tshogs pa yin/_/ma dag cha bcas rol pa nyer zhi yang /_/ma dag 'gro la sprul pa snang ba ni/_/ston pa'i ji bzhin shugs kyi thugs rje dang /_/'gro sems gtsang ma'i las smon dag pas 'char/_/de tshe zhing kun sprul pa tshad med cing /_/mtha' yas 'gro ba byang chub 'dren mdzad kyang /_/ston pa'i chos sku dbyings las mi g.yo ste/_/rang byung ye shes rtag chad phyogs lhung med/_/dbyings las rang shar stug po bkod par ni/_/rig 'dzin mkha' 'gro sa bcu'i sems dpa' la/_/longs spyod rdzogs pa'i bkod pa bsam yas snang /_/de yang dbyings las ston pa'i thugs rje dang /_/gdul bya'i mos dges lhun grub rang ngor snang /_/chos sku'i ngo bo rang byung ye shes te/_/rol par thams cad mkhyen pa'i ye shes mtsho/_/gdod ma'i dbyings na thig le gcig tu bzhugs/_/longs sku'i ngo bo rang bzhin lhun grub ste/_/rol par rigs lnga ye shes rnam pa lnga/_/nam mkha'i dbyings kun gang bar snang ba yin/_/sprul sku'i ngo bo thugs rje'i 'char gzhi ste/_/rol par gang la gang 'dul der snang zhing /_/phrin las chen pos mnga' dbang 'byor pa yin/_/'di dag rgyu 'bras rtsol bas ma bsgrubs te/_/ye nas lhun grub cog gzhag ngang la snang /_/mchog gsang rab la tshe 'dir snang ba ste/_/de las gzhan du bar dor mi bslu bas/_/rdo rje snying po rtse mo'i theg pa ni/_/rgyu 'bras theg pa kun las khyad par 'phags/_/chos dbyings rin po che'i mdzod las/_ chos thams cad byang chub kyi sems su ye sangs rgyas pa la rtsol ba dang sgrub pa med par yang sangs rgyas par bstan pa'i le'u ste bcu gsum pa'o//____ _//

de ltar chos nyid rdo rje snying po'i glu/_ /mkha' mnyam gdod nas dag pa'i rang bzhin 'di/_ /mi 'gyur gzhi rtsa bral ba'i gnas nyid du/_ /rang shar 'pho 'gyur med pa'i rol par shar/_ /ye mnyam phyam gdal klong chen yangs pa'i don/_ /gang yang ma phyin gdod ma'i rang bzhin ngang /_ /mi g.yo lhun gyis grub pa'i chos nyid la/_ /rgya chad med cing phyogs lhung bral bar gyur/_ /don rnams ji bzhin mkha' mnyam yangs pa'i dkyil/_ /gang du rang byung klong chen rgyal po ni/_ /rtag tu mi g.yo sna tshogs rang sar grol/_ /'di zhes mi mtshon dbyings rum yangs par phyin/_ /rtogs pa'i dus des mkha' 'dra'i rnal 'byor pas/_ /rang nyams phyogs gcig lung don mthun pa ni/_ /rtsa ba'i sems lung nyi shu rtsa gcig dang /_ /klong gsum man ngag sde bzhi mthun par bkod/_ /dge ba 'di yis ma lus 'gro ba kun/_ /ma 'bad bzhin du gdod ma'i sar phyin nas/_ /kun bzang sa la 'pho 'gyur med pa yi/_ /don gnyis lhun grub chos kyi rgyal por shog_ /phyogs rnams kun tu bde dpal 'byor pa ni/_ /dag pa'i zhing bzhin 'dod dgu lhun grub cing /_ /chos rnga sgrogs pas thar pa'i rgyal mtshan 'dzugs/_ /dam chos mi nub bstan pa rgyas par shog_ /chos dbyings rin po che'i mdzod cesabya ba/_ theg pa mchog gi rnal 'byor pa klong chen rab 'byams kyis gangs ri thod dkar gyi mgul du legs par bkod pa rdzogs so//____//

_!_na maHsarba dz+nyag+g+hA na gu ru we/_kun bzang dgongs klo~Mng dri~M me~Md mkha' dbyings las/_ /rdzogs che~Mn ka lhun dgongs gsang ra~Mb 'abyama~Msa gnad/_/cig char 'gyed 'khas 'o~Md ze~Mr bsa~Mm ya~Ms pa~M/_ /rdo~M rje~M gzi~M brji~Md zhing kun nyin mor byed/_ /sku gsum dgongs par rang grol klong rdol gter/_ /gsang chen nA da'i sgra dbyangs mi zad rgyan/_ /sku dang ye shes rang byung rig pa'i rgyud/_ /rdo rje 'chang gi bka' dang mi gnyis pa/_ /zab las ches zab cho~Ms dabyinga~Msa rtogs pa'i mdzod/_ /dus gsum rgyal dgongs chos sku'i ring bsrel mchog_ /kun mkhyen chos rje'i rtogs pa'i 'dra zhal dngos/_ /mngon sum mjal du yod 'di skal pa bzang /_ /rgyal bstan yongs rdzogs dgongs don gcig bsdus pa/_ /gzhung bzang 'di 'dra srid pa gsum na med/_ /dus gsum 'byon dka' zab gsang nor bu'i tog_ /mthong thos dran grol srid zhi'i rgyan gcig pu/_ /rnam dag par du bskrun pa'i dmigs med dges/_ /snying po'i bstan dar de 'dzin bshad sgrub rgyas/_ /'gro kun theg rtse'i myur lam gdod ma'i gzhir/_ /mngon par byang chub don gnyis lhun grub shog_ /ces pa'ang chos sbyin gsar bskrun dang smon tshig chab gcig kun mkhyen yab sras kyi bka' 'bangs su smon pa grub rigs gdung grol can tshe dbang rig 'dzin dpal gyis lha ldan gtsug lag khang gi nye 'dabs chu srin shar du rab byung bcu drug pa chu bya sa gas nya ba'i dus tshes dge bar bris pa'i dge bas kun tu bzang po ru gyur cig gu/_ /dge'o/_ /dge'o/_ /dge'o//____//_!_mkhan slob chos gsum ring lugs che/_ /'dzam gling sa gsum khyab par 'phel/_ /'gro rgyud mchog gsum snang ba dang /_ /mi 'bral dus gsum dge legs shog/__/ /ces pa'ang dz+nyag+g+hA nas so/_ /sarba mang+galaM//___//